2 Pablo, cheꞌ bajcheꞌ miꞌ beleꞌ chaꞌlen, ti ochi ti i templo israelob. Tiꞌ wen pejcʌyob. Tiꞌ subeyob i tꞌan Dios. Chʌꞌʌch tiꞌ chaꞌle ti jujumpꞌej i qꞌuinilel cꞌaj oj cꞌʌlʌl uxpꞌej semana.

3 Ti jini tsꞌijbubil bʌ i tꞌan Dios tsaꞌ bʌ tsꞌijbunti cheꞌ ñac max tyo ajn ti mulawil Jesús, Pablo tiꞌ wen tsictisʌbeyob bajcheꞌ tiꞌ wersa ñusʌ wocol Cristo. Tiꞌ subeyob chaꞌan tiꞌ wersa sajti Cristo pero ti wiꞌil ti tyejchi loqꞌuel baꞌan sajtyemoꞌ bʌ. Cheꞌ jini, ti yʌlʌ: Jini Jesús cheꞌ bajcheꞌ tic subetla, jiñʌch jini Cristo, jiñʌch jini yajcʌbil bʌ i chaꞌan Dios. Cheꞌ ti yʌlʌ Pablo.

4 Cheꞌ jini lamital tsaꞌ bʌ i ñʌchꞌtyʌbeyob i tꞌan tiꞌ chꞌujbiyob Jesús. Ti yotsʌyob i bʌ yicꞌot Pablo yicꞌot Silas. Chʌꞌʌch jeꞌel cabʌl mach bʌ israelob chʌc cꞌajalob i chaꞌan Dios tiꞌ chꞌujbiyob Jesús. Chʌꞌʌch jeꞌel cabʌl xꞌixicob añoꞌ bʌ i ñuclel.

5 Jini israelob machꞌʌ baꞌan tiꞌ chꞌujbiyob Jesús ti queji i tsꞌaꞌqꞌuelob Pablo yicꞌot Silas como lamital i piꞌʌlob chʌncol i yochelob tiꞌ tꞌan Dios. Cheꞌ jini, tiꞌ muchꞌquibeyob chaꞌtiquil uxtiquil simaroñoꞌ bʌ, tsꞌuboꞌ bʌ winicob tsaꞌ bʌ quejiyob ti cꞌam bʌ tꞌan tiꞌ contra Pablo yicꞌot Silas. Chʌꞌʌch tiꞌ xiqꞌuiyob pejtyel añoꞌ bʌ ti lum tiꞌ contrajob. Cheꞌ jini ti wersa ochiyob ti yotyot juntiquil Jasón bʌ i cꞌabaꞌ chaꞌan i sʌclan Pablo yicꞌot Silas. Yomob i chucob majlel yaꞌ tiꞌ tyojlel quixtyañujob.

6 Pero machꞌan tiꞌ tyajayob. Cheꞌ jini tiꞌ tyujcꞌʌyob majlel Jasón yicꞌot yañoꞌ bʌ ochemoꞌ bʌ tiꞌ tꞌan Dios yaꞌ baꞌan añoꞌ bʌ yeꞌtyel. Ti cꞌam bʌ tꞌan ti yʌlʌyob: Jini winicob tsaꞌ bʌ yʌqꞌueyob i sutquin i pensal quixtyañujob ti pejtyel pañimil, wale wʌꞌ ti tyʌliyob jeꞌel wʌꞌwʌꞌi.

7 Jini Jasón tiꞌ pʌyʌyob ochel ti yotyot. Chʌncox i luꞌ tsꞌaꞌleñob i tꞌan jini ñoj ñuc bʌ yeꞌtyel como mi yʌlob an yambʌ rey. Jiñʌch jini Jesús mi yʌlob. Chʌꞌʌch ti yʌlʌyob jini simaroñoꞌ bʌ.

8 Cheꞌ ñac ti yubiyob jini tꞌan pejtyelel quixtyañujob yicꞌot añoꞌ bʌ yeꞌtyel ti queji i michꞌan. Ti quejiyob ti juꞌlʌpojlʌmiyel.

9 Pero jini Jasón yicꞌot yañoꞌ bʌ yi ti lolon aqꞌuentiyob i tyojob i mul. Tiꞌ coloyob.

10 Cheꞌ acꞌbʌlelix jini ochemoꞌ bʌ tiꞌ tꞌan Dios tiꞌ waꞌ xiqꞌuiyob majlel Pablo yicꞌot Silas chaꞌan majlicob ti yambʌ lum Berea bʌ i cꞌabaꞌ. Cheꞌ ñac ti cꞌotiyob yaꞌi ti ochiyob ti i templo israelob.

11 Más utsob jini israelob cheꞌ bajcheꞌ yaꞌ ti Tesalónica. Ñoj yom i yubiñob i tꞌan Dios. Ti jujumpꞌej qꞌuin tiꞌ wen sʌclʌyob bajcheꞌ tsꞌijbubil tiꞌ tꞌan Dios chaꞌan miꞌ ñaꞌtyan mi melelʌch cheꞌ bajcheꞌ ti subentiyob.

12 Cheꞌ jini cabʌlob ti ochiyob tiꞌ tꞌan Dios. Cabʌl ti ochiyob jeꞌel jini mach bʌ israelob winicob xꞌixicob muꞌ bʌ qꞌuejlelob ti ñuc.

13 Cheꞌ ñac ti yubiyob jini israelob yaꞌ ti Tesalónica cheꞌ chʌncol i sub i tꞌan Dios Pablo yaꞌ ti Berea, ti majliyob chaꞌan i xicꞌ quixtyañujob chaꞌan miꞌ tsꞌaꞌqꞌuelob Pablo.

14 Jini ochemoꞌ bʌ tiꞌ tꞌan Dios tiꞌ xiqꞌuiyob Pablo chaꞌan i majlel ti ora jach yaꞌ ti lʌcꞌʌl i tiꞌ jaꞌ. Pero Silas yicꞌot Timoteo ti cʌyleyob yaꞌ ti Berea.

15 Jini tsaꞌ bʌ majli i yʌcꞌob Pablo tiꞌ piꞌleyob majlel ti xʌmbal cꞌʌlʌl yaꞌ ti lum Atenas bʌ i cꞌabaꞌ. Cheꞌ jini, Pablo tiꞌ xiqꞌuiyob i subeñob Silas yicꞌot Timoteo chaꞌan mi tyʌlel jeꞌel mi chꞌujbiyʌch i tyʌlel chaꞌan yaꞌ mi cꞌotyel i tyajob i bʌ. Cheꞌ jini ti sujtiyob majlel ti Berea jini winicob.

16 Cheꞌ ñac Pablo chʌncol tyo i pijtyan Silas yicꞌot Timoteo yaꞌ ti Atenas chꞌʌjyem ti queji yubin tiꞌ pusicꞌal como ti yilʌ an cabʌl melel bʌ i diosob tiꞌ lum.

17 Jin chaꞌan yaꞌ ti i templo israelob tiꞌ pejcʌyob i bʌ Pablo yicꞌot israelob yicꞌot yañoꞌ bʌ muꞌ bʌ i chꞌujutisañob Dios jeꞌel. Ti jujumpꞌej qꞌuin tiꞌ pejcʌyob majchical jach tiꞌ tyaja yaꞌ baꞌ miꞌ muchꞌquiñob i bʌ ti tꞌan quixtyañujob.

18 Lamital jini winicob chʌncol bʌ i cʌmben i cʌntisa epicúrejob bʌ i cꞌabaꞌ yicꞌot yañoꞌ bʌ chʌncol bʌ i cʌmben i cʌntisa estoicojob bʌ i cꞌabaꞌ ti queji i pejcañob Pablo. ¿Chuqui yom i subeñonla jini winic muꞌ bʌ ti chʌc tꞌan? cheꞌob. Yañoꞌ bʌ ti yʌlʌyob: Cꞌoꞌojlʌch jiñʌch juntiquil muꞌ bʌ i subeꞌ tsijiꞌ bʌ tꞌan chaꞌan yambʌ dios tyac, cheꞌob. Cheꞌ ti yʌlʌyob como Pablo chʌncol i subeñob tꞌan chaꞌan Jesús yicꞌot chʌncol i subeñob chaꞌan Jesús ti tyejchi loqꞌuel baꞌan sajtyemoꞌ bʌ. Chʌꞌʌch mi quej i tyejchelob yañoꞌ bʌ jeꞌel. Cheꞌ ti yʌlʌ Pablo.

19 Cheꞌ jini tiꞌ pʌyʌyob majlel yaꞌ ti jumpꞌej saj wits Areópago bʌ i cꞌabaꞌ baꞌ i tyʌlel miꞌ muchꞌquiñob i bʌ junmujchꞌ winicob añoꞌ bʌ yeꞌtyel. Jiñob ti yʌlʌyob: Com lojon cubin i sujmlel jini tsijiꞌ bʌ tꞌan chʌncol bʌ a chꞌʌm tyʌlel.

20 Maꞌan baꞌ bʌ ora ti lojon cubi bajcheꞌ chʌncol a wʌleꞌ. Com lojon cubin pejtyel i sujmlel. Cheꞌ ti yʌlʌyob jini muchꞌquibiloꞌ bʌ quixtyañujob añoꞌ bʌ yeꞌtyel.

21 Como pejtyel yaꞌ bʌ chumulob yaꞌi yicꞌot chꞌoyoloꞌ bʌ ti yambʌ lum muꞌ bʌ i chumtyʌl yaꞌi, jin jach miꞌ ñʌchꞌtyañob o mi yʌlob tsijib tyac bʌ cꞌʌlʌl mi ñumel qꞌuin.

22 Cheꞌ jini Pablo ti waꞌle yaꞌ tiꞌ tyojelob jini yaꞌ baꞌañob ti Areópago. Ti yʌlʌ: Piꞌʌlob wʌꞌ ti Atenas. Mij qꞌuel chaꞌan chʌc cꞌajal laꞌ chaꞌan pejtyel laꞌ dios tyac.

23 Cheꞌ ñac ti ñumiyon wʌꞌ baꞌ añetla ti quilʌ baꞌ mi laꞌ chꞌujbin laꞌ dios tyac. Tic tyaja jumpꞌej i pantyeꞌlel laꞌ dios tyac baꞌ mi yʌl: I chaꞌan bʌ jini dios machꞌʌ baꞌan miꞌ cʌñob quixtyañujob, cheꞌ mi yʌl. Jini Dios chʌncol bʌ laꞌ chꞌujbin aunque machꞌʌ baꞌan ti laꞌ cʌñʌ, jiñʌch jini Dios chʌncol bʌ c subeñetla.

24 Jini Dios tsaꞌ bʌ i mele mulawil yicꞌot pejtyel i bʌl jiñʌch i yum pejtyel chan yicꞌot pejtyel mulawil. Maꞌan mi chumtyʌl ti templo tyac muꞌ bʌ i meleꞌ quixtyañujob.

25 Machꞌan mi cotyʌntyel Dios ti jini muꞌ bʌ i chaꞌlen quixtyañujob. Como Dios i bajñel mi yʌqꞌueñonla laj cuxtyʌlel ti lac pejtyelel yicꞌot pejtyelel chʌ bʌ tyac i cꞌʌjñibal lac chaꞌan.

26 Dios tiꞌ mele jini ñaxan bʌ quixtyañujob. Cheꞌ jini loqꞌuemoꞌ bʌ ti jini ñaxan bʌ tiꞌ mele pejtyelel quixtyañujob muꞌ bʌ i chumtyʌl ti pejtyel mulawil. Jini miꞌ yʌl chʌ bʌ ti qꞌuin miꞌ chꞌoc añob yicꞌot baqui bʌ pañimil mi chumtyʌlob.

27 Chʌꞌʌch tiꞌ luꞌ meleyob chaꞌan miꞌ sʌclañob Dios chaꞌan miꞌ tyajob mi chꞌujbiyʌch i tyajob. Pero melelʌch machꞌan ñajt an baꞌañonla Dios ti jujuntiquilonla.

28 Como cuxulonla ti Dios. Jini mi yʌqꞌueñonla lac nijcan lac bʌ. Mi yʌqꞌueñonla lac mel pejtyelel chʌ bʌ tyac mi lac mel. Cheꞌ bajcheꞌ ti yʌlʌ chaꞌtiquil uxtiquil ajtsꞌijbob wʌꞌ ti laꞌ lumal. Ti yʌlʌyob: I yalobilonla Dios, cheꞌob.

29 Cheꞌ yalobilonla Dios, cheꞌ jini mach yom lac lolon ñaꞌtyan chaꞌan cheꞌ bajcheꞌ diosʌch chʌ bʌ tyac muꞌ bʌ i mel quixtyañujob cheꞌ bajcheꞌ miꞌ bajñel ñaꞌtyan i meleꞌ mi ti oro mi ti plata mi ti tyunic.

30 Dios tiꞌ cuchbeyob mach bʌ wen bʌ i melbal winicob ti ñoj oniyix cheꞌ ñac max tyo i cʌñʌyob Dios. Pero wale miꞌ xicꞌob pejtyelelob am bʌ ti mulawil chaꞌan miꞌ qꞌuexob i pensal chaꞌan i cʌyob i mul.

31 Como tsaꞌix yajcʌ jumpꞌej qꞌuin cheꞌ mi quej i luꞌ melob i bʌ ti pejtyelelob tiꞌ tyojlel Dios. Tsaꞌix yajcʌ winic muꞌ bʌ yʌcꞌ tyoj bʌ melojel. Tsaꞌix i tsictisʌ majchqui jini cheꞌ ñac ti tyejche loqꞌuel baꞌan sajtyemoꞌ bʌ. Cheꞌ ti yʌlʌ Pablo.

32 Lamital cheꞌ ñac ti yubiyob ili tꞌan chaꞌan mi quej i tyejchelob loqꞌuel baꞌan sajtyemoꞌ bʌ tiꞌ wajleyob. Lamitalob ti yʌlʌyob: Com lojon c más ubin i sujmlel jini chʌncol bʌ a sub. Cheꞌ ti yʌlʌyob.

33 Cheꞌ jini Pablo ti loqꞌui majlel baꞌañob.

34 Lamital tsaꞌ bʌ yubiyob i tꞌan Pablo tiꞌ chꞌujbiyob. Ti yotsʌyob i bʌ yicꞌot Pablo. Chʌꞌʌch tiꞌ chꞌujbi juntiquil winic am bʌ yeꞌtyel yaꞌ ti Areópago. Dionisio i cꞌabaꞌ jini winic. Chʌꞌʌch jeꞌel juntiquil xꞌixic Dámaris bʌ i cꞌabaꞌ. Yicꞌot yañoꞌ bʌ quixtyañujob tiꞌ chꞌujbiyob jeꞌel.