2 Yaꞌ tiꞌ tyaja juntiquil israel bʌ winic chꞌoyol bʌ ti pañimil Ponto bʌ i cꞌabaꞌ. Aquila bʌ i cꞌabaꞌ bʌ winic. Maꞌan jal ti loqꞌuiyob majlel ti pañimil Italia bʌ i cꞌabaꞌ jini Aquila yicꞌot yijñam Priscila bʌ i cꞌabaꞌ. Wersa ti loqꞌuiyob como jini ñoj ñuc bʌ yumʌl Claudio bʌ i cꞌabaꞌ tiꞌ xiqꞌui loqꞌuel ti Roma pejtyel israelob. Jini Roma jiñʌch baꞌan jini ñuc bʌ yumʌl yaꞌ ti Italia. Yaꞌ ti cꞌotiyob ti Corinto Aquila yicꞌot Priscila. Yaꞌ ti majli Pablo i julaꞌañob.

3 Chaꞌan lajal an i toñel Pablo cheꞌ bajcheꞌ jini chaꞌtiquil, yaꞌ ti ochi yicꞌotyob. Junlajal mucꞌob ti troñel ti tsꞌis carpa bʌ otyot.

4 Ti jujumpꞌej i qꞌuinilel cꞌaj oj Pablo ti ochi yaꞌ ti i templo israelob. Tiꞌ subeyob i tꞌan Dios yicꞌot tiꞌ wen tsictisʌbeyob i sujmlel jini israelob yicꞌot mach bʌ israelob.

5 Silas yicꞌot Timoteo ti loqꞌui majlel yaꞌ ti Macedonia. Cheꞌ ñac ti cꞌotiyob yaꞌ baꞌan Pablo tiꞌ cʌyʌ i toñel ti tsꞌis carpa bʌ otyot chaꞌan miꞌ chaꞌlen subtꞌan cꞌʌlʌl mi ñumel qꞌuin yicꞌot chaꞌan miꞌ subeñob israelob ti ñoj tsiquil bʌ tꞌan chaꞌan Jesús jiñʌch Cristo jini yajcʌbil bʌ i chaꞌan Dios chʌncol bʌ i pijtyañob.

6 Pero jini israelob ti queji i tsꞌaꞌqꞌuelob Pablo. Leco tiꞌ subeyob. Cheꞌ jini Pablo tiꞌ lijcʌ i pislel chaꞌan i señʌjlel chaꞌan mach wen bajcheꞌ chʌncol i chaꞌleñob. Ti yʌlʌ: Laꞌ mulʌch mi quej laꞌ sajtyel como maꞌan chʌncol laꞌ chꞌujbin Jesús. Mach c mulic. Como joñon tic subetla i tꞌan Dios. Wale mi quej c majlel ti sub tꞌan baꞌan mach bʌ israelob. Cheꞌ ti yʌlʌ Pablo.

7 Ti loqꞌui majlel ti i templo israelob. Ti majli ti yotyot juntiquil winic muꞌ bʌ i chꞌujutisan Dios Justo bʌ i cꞌabaꞌ. Yaꞌan yotyot tiꞌ tꞌejl i templo israelob.

8 Juntiquil winic Crispo bʌ i cꞌabaꞌ yicꞌot pejtyel añoꞌ bʌ ti yotyot ti ochiyob tiꞌ tꞌan Dios. An ñuc bʌ yeꞌtyel ti i templo israelob jini Crispo. Cheꞌ ñac ti yubiyob i tꞌan Dios cabʌl yañoꞌ bʌ yaꞌ ti Corinto ti ochiyob tiꞌ tꞌan Dios jeꞌel. Tiꞌ chꞌʌmʌyob jaꞌ.

9 Cheꞌ jini, jumpꞌej acꞌbʌlel Jesús tiꞌ pejcʌ Pablo cheꞌ bajcheꞌ ti ñajal. Ti yʌlʌ: Mach a chaꞌlen bʌqꞌuen. Maꞌ bej chaꞌlen subtꞌan. Mach a wʌctyan a subeꞌ.

10 Como wʌꞌañon quicꞌotyet. Maꞌan majch chꞌujbi i tyʌcꞌlañet. Como cabʌlob wʌꞌ ti ili lum mi quej i jacꞌbeñoñob c tꞌan. Cheꞌ ti subenti Pablo ti Jesús.

11 Chʌꞌʌch cheꞌ jini, yaꞌ ti cʌyle Pablo yaꞌ ti Corinto cꞌʌlʌl jumpꞌej jab ti tyʌli xiñil jabil. Tiꞌ bej cʌntisʌyob i tꞌan Dios.

12 Cheꞌ ñac juntiquil winic Galión bʌ i cꞌabaꞌ ti ochi ti ñuc bʌ yeꞌtyel yaꞌ ti pañimil Acaya bʌ i cꞌabaꞌ jini israelob tiꞌ muchꞌquiyob i bʌ tiꞌ contra Pablo. Tiꞌ pʌyʌyob majlel yaꞌ baꞌ miꞌ melob i bʌ quixtyañujob.

13 Tiꞌ subeyob jini ñuc bʌ yeꞌtyel: Jini winic chʌncol i xicꞌob quixtyañuyob chaꞌan miꞌ chꞌujutisañob Dios cheꞌ bajcheꞌ ticꞌbil tiꞌ tꞌan am bʌ yeꞌtyel, cheꞌob.

14 Quejelix muꞌ ti tꞌan Pablo cheꞌ ñac jini Galión tiꞌ sube israelob: Ubinla. Anqui ñuc bʌ i mul ili winic, cheꞌ jini melelʌch yom mic ñʌchꞌtyʌbeñetla laꞌ tꞌan jatyetla israelet bʌ la.

15 Pero mach cheꞌic bajcheꞌ mi laꞌ wʌleꞌ. Mucꞌ jach laꞌ michꞌqꞌuel laꞌ bʌ chaꞌan ti caj mach junlajal mi laꞌ pensalin tꞌan tyac yicꞌot cꞌabaꞌ tyac. Yicꞌot mach junlajal chʌncol laꞌ ñaꞌtyan i sujmlel laꞌ mandar tyac. Bajñel melela. Mach com cotsan c bʌ chaꞌan ti caj jini. Cheꞌ ti yʌlʌ jini ñuc bʌ yumʌl.

16 Cheꞌ jini tiꞌ chocoyob loqꞌuel yaꞌ baꞌ miꞌ chaꞌleñob melojel.

17 Jini mach bʌ israelob tiꞌ chucuyob jini más ñuc bʌ yeꞌtyel ti i templo israelob Sóstenes bʌ cꞌabaꞌ. Ti yʌcꞌbeyob yaꞌ tiꞌ cantyʌlel i wut ñuc bʌ yumʌl. Pero maꞌan chʌ bʌ ti yʌlʌ jini yumʌl Galión bʌ i cꞌabaꞌ.

18 Cabʌl qꞌuin ti cʌyle yaꞌ ti Corinto Pablo. Cheꞌ jini, tiꞌ subeyob adios pejtyel ochemoꞌ bʌ tiꞌ tꞌan Dios. Ti majli ti jumpꞌej lum yaꞌ ti tiꞌ jaꞌ Cencrea, bʌ i cꞌabaꞌ. Priscila yicꞌot Aquila ti motin majli yicꞌot. Cheꞌ jini yaꞌ ti Cencrea, Pablo ti yʌcꞌʌ ti pitis tsetꞌol i jol chaꞌan i señʌjlel ti tsꞌʌctiyi i tꞌan bajcheꞌ tiꞌ wʌ sube Dios. Cheꞌ jini ti motin ochiyob ti barco yicꞌot Priscila yicꞌot Aquila chaꞌan mi majlelob ti pañimil Siria bʌ i cꞌabaꞌ.

19 Cheꞌ ñac ti cꞌotiyob ti mali lum Efeso bʌ i cꞌabaꞌ yaꞌ tiꞌ cʌyʌyob Priscila yicꞌot Aquila. Cheꞌ jini Pablo ti majli yaꞌ ti i templo israelob. Yaꞌ tiꞌ pejcʌ israelob tsaꞌ bʌ i muchꞌquiyob i bʌ.

20 Tiꞌ wersa subeyob chaꞌan mi bej cʌytyʌl pero Pablo mach yomox cʌytyʌl.

21 Cheꞌ jini tiꞌ subeyob mux i majlel. Ti yʌlʌ: Wersa mic majlel ti Jerusalén chaꞌan mic ñusan jini tyal bʌ qꞌuin. Pero muꞌ tyo c chaꞌ tyʌlel j qꞌueletla mi cheꞌ yom Dios. Cheꞌ ti yʌlʌ Pablo. Cheꞌ jini ti ochi ti barco. Ti loqꞌui majlel ti Efeso.

22 Cheꞌ ñac ti cꞌoti Pablo yaꞌ ti Cesarea ti loqꞌui ti barco. Ti majli ti Jerusalén i yʌqꞌueñob saludos ochemoꞌ bʌ tiꞌ tꞌan Dios. Cheꞌ jini ti cꞌʌlʌ jubi majlel ti Antioquía.

23 Yaꞌ ti poj jale. Cheꞌ jini ti chaꞌ loqꞌui majlel chaꞌan mi chaꞌ ñumel ti jujumpꞌej lum tyac baꞌ ti ñumi ti yambʌ ora yaꞌ ti jini pañimil tyac Galacia yicꞌot Frigia bʌ i cꞌabaꞌ. Yaꞌ tiꞌ xucꞌchocobeyob i pusicꞌal ochemoꞌ bʌ tiꞌ tꞌan Dios.

24 Ti jim bʌ ora ti cꞌoti ti Efeso juntiquil israel bʌ winic Apolos bʌ i cꞌabaꞌ. Chꞌoyol ti lum Alejandría bʌ i cꞌabaꞌ. Wen yujil bajcheꞌ tsꞌijbubil tiꞌ tꞌan Dios. Wen yujil subtꞌan jeꞌel.

25 Ti wen cʌntisʌnti tiꞌ tꞌan Jesús. Cꞌotyajax tiꞌ chaꞌle tꞌan. Tsiquil i sujmlel tiꞌ subeyob chaꞌan Jesús. Pero cheꞌ jach tiꞌ cʌñʌ bajcheꞌ ti yʌcꞌʌ chꞌʌm jaꞌ Juan.

26 Apolos utsꞌat ti queji ti tꞌan yaꞌ ti i templo israelob. Pero cheꞌ ñac ti queji yubiñob i tꞌan jini Priscila yicꞌot Aquila tiꞌ poj pʌyʌ majlel chaꞌan miꞌ pejcan. Tiꞌ wen tsictisʌbeyob i sujmlel i tꞌan Dios jini max tyo bʌ ti yubi ti yambʌ ora.

27 Cheꞌ ñac yom majlel Apolos yaꞌ ti pañimil Acaya bʌ i cꞌabaꞌ jini ochemoꞌ bʌ tiꞌ tꞌan Dios tiꞌ cotyʌyob. Tiꞌ chocoyob majlel carta chaꞌan wen pꞌuntyʌntic ti jini ochemoꞌ bʌ tiꞌ tꞌan Dios yaꞌi. Cheꞌ ñac ti cꞌoti yaꞌ ti Acaya tiꞌ wen cotyʌyob jini tsaꞌ bʌ chꞌujbiyob Dios chaꞌan ti caj i yutslel i pusicꞌal Dios.

28 Tiꞌ tyojlelob pejtyel quixtyañujob tiꞌ wen pejcʌ jini israelob. Tiꞌ wen pʌsꞌeyob chaꞌan maꞌan tyoj jini chʌncol bʌ i pensaliñob. Maꞌ tiꞌ ñaꞌtyʌ bajcheꞌ miꞌ jacꞌob. Ti Tsꞌijbubil bʌ i Tꞌan Dios tiꞌ tsictisʌbeyob chaꞌan Jesús jiñʌch Cristo chʌncol bʌ i pijtyañob.