2 Pablo tiꞌ cꞌajtibeyob: ¿Tsaꞌix ba ochi ti laꞌ pusicꞌal Chꞌujul bʌ i Chꞌujlel Dios cheꞌ ñac ti laꞌ chꞌujbi Jesús? Cheꞌ tiꞌ cꞌajtibeyob Pablo. Jiñob tiꞌ jacꞌʌyob: Mi tsaꞌic lojon cubi mi an Chꞌujul bʌ i Chꞌujlel Dios. Cheꞌ tiꞌ jacꞌʌyob.

3 Cheꞌ jini Pablo tiꞌ cꞌajtibeyob: ¿Chuqui ti chꞌʌm jaꞌ ti laꞌ chꞌʌmʌ? cheꞌen. Jiñob tiꞌ jacꞌʌyob: Jini chꞌʌm jaꞌ tsaꞌ bʌ i yʌcꞌʌ Juan, cheꞌob.

4 Pablo tiꞌ subeyob: Juan ti yʌcꞌʌ ti chꞌʌm jaꞌ quixtyañujob chaꞌan i señʌjlel tsaꞌix i cʌyʌyob i mul. Pero Juan tiꞌ subeyob jeꞌel yom i chꞌujbiñob jini tyal tyo bʌ ti i pat. Jiñʌch jini Cristo tsaꞌ bʌ i yajcʌ Dios. Jiñʌch jini Jesús. Cheꞌ ti yʌlʌ Juan, cheꞌ Pablo.

5 Cheꞌ ñac ti yubiyob i tꞌan Pablo, tiꞌ chꞌʌmʌyob jaꞌ chaꞌan tsiquil tiꞌ chꞌujbiyob lac Yum Jesús.

6 Cheꞌ ñac ti yʌcꞌʌ i cꞌʌb Pablo tiꞌ pam i jol, jini Chꞌujul bʌ i Chꞌujlel Dios ti ochi tiꞌ pusicꞌalob. Ti quejiyob ti tꞌan ti yan tyac bʌ tꞌan. Tiꞌ subuyob tꞌan cheꞌ bajcheꞌ ti yʌqꞌueyob i subeꞌ Dios.

7 Cheꞌ bajcheꞌ doce winicob ti pejtyelelob.

8 Cꞌʌlʌl uxpꞌej uw ti beleꞌ ochi Pablo ti i templo israelob baꞌ utsꞌat tiꞌ chaꞌle subtꞌan. Tiꞌ wen sube quixtyañujob chaꞌan i yumintyel Dios.

9 Pero juntiquil chaꞌtiquil ti michꞌʌ chaꞌan mach yom i chꞌujbiñob. Tsucul tꞌan ti i subeyob i tꞌan Dios tiꞌ tyojlel quixtyañujob. Cheꞌ jini Pablo ti loqꞌui majlel yaꞌ baꞌañob. Tiꞌ pʌyʌyob majlel ochemoꞌ bʌ tiꞌ tꞌan Dios yaꞌ ti jumpꞌej escuela i chaꞌan bʌ Tiranno bʌ i cꞌabaꞌ bʌ winic. Yaꞌ tiꞌ subeyob i tꞌan Dios ti jujumpꞌej qꞌuin.

10 Chʌꞌʌch tiꞌ bej chaꞌle cꞌʌlʌl chaꞌpꞌej jab chaꞌan pejtyelelob yaꞌ bʌ chumulob ti pañimil Asia bʌ i cꞌabaꞌ ti yubiyob i tꞌan lac Yum Jesús. Chʌꞌʌch israelob jeꞌel yicꞌot mach bʌ israelob ti yubiyob.

11 Dios ti yʌqꞌue i pʌseꞌ ñuc tyac bʌ i pꞌʌtyʌlel Pablo.

12 Jinic tyo an i pꞌʌtyʌlel jini cajchilʌl yicꞌot i pislel tsaꞌ bʌ i tyʌlʌ Pablo. Cheꞌ ñac tiꞌ chꞌʌmʌyob majlel yaꞌ baꞌan xcꞌamꞌañob tiꞌ cꞌʌñʌyob ti lajmel. Jeꞌel ti locꞌsʌbentiyob xiba tiꞌ pusicꞌal quixtyañujob.

13 Pero yaꞌan chaꞌtiquil uxtiquil israelob muꞌ bʌ i luꞌ ñumel majlel ti lum tyac. Jiñob miꞌ locꞌsan xiba ti i pusicꞌal quixtyañujob. Yom i cꞌʌñob i cꞌabaꞌ lac Yum Jesús. Jin chaꞌan tiꞌ subeyob jini xibajob: Mic xiqꞌueꞌ loqꞌuel ti i pꞌʌtyʌlel Jesús jiñʌch jini muꞌ bʌ i subeꞌ Pablo. Cheꞌ ti yʌlʌyob.

14 Chʌꞌʌch tiꞌ chaꞌleyob jini siete yalobilob juntiquil israel bʌ winic Esceva bʌ i cꞌabaꞌ. Ñuc bʌ cura jini Esceva.

15 Pero cheꞌ ñac cheꞌ tiꞌ chaꞌle jini sietejob, jini xiba ti yʌlʌ: Ubibil c chaꞌan i cꞌabaꞌ Jesús. Cʌñʌ c chaꞌan majchqui jini Pablo pero jatyetla, ¿majchetquila? Cheꞌ ti yʌlʌ jini xiba.

16 Jini winic am bʌ xiba yicꞌot ti tijpꞌi i chuc jini sietejob. Ti ganarintiyob. Cheꞌ jini, chacalob lojweñob ti putsꞌiyob jini sietejob.

17 Pejtyelelob yaꞌ bʌ chumulob ti Efeso, israelob yicꞌot mach bʌ israelob, ti yubiyob bajcheꞌ ti ujti. Tiꞌ wen bʌcꞌñʌyob. Ti subeyob i ñuclel lac Yum Jesús.

18 Cabʌlob jeꞌel tsaꞌ bʌ i chꞌujbiyob Jesús ti tyʌliyob i subob jini mach bʌ wen tiꞌ chaꞌleyob ti yambʌ ora.

19 Cabʌl jini tsaꞌ bʌ i chaꞌleyob wujt tiꞌ chꞌʌmʌyob tyʌlel i jun tyac. Yaꞌ tiꞌ puluyob tiꞌ cantyʌlelob i wut ti pejtyelelob. Cheꞌ ñac tiꞌ ñaꞌtyʌyob bajcheꞌ i tyojol pejtyel jun tyac, ti loqꞌui i tyojol cheꞌ bajcheꞌ cincuenta mil pesos.

20 Chʌꞌʌch tiꞌ bej pucu majlel i tꞌan lac Yum. Ti wen tsictiyi añʌch i pꞌʌtyʌlel.

21 Cheꞌ ñac ti ujti jini, Pablo ti chʌc alʌ tiꞌ pusicꞌal chaꞌan yom majlel ti julaꞌ ti Macedonia yicꞌot ti Acaya. Yom cꞌʌlʌl majlel ti Jerusalén. Ti yʌlʌ jeꞌel yaꞌ bʌ mi quejel i loqꞌuel majlel ti Jerusalén wersa yom majlic cꞌʌlʌl ti lum Roma bʌ i cꞌabaꞌ.

22 Yaꞌ tyo ti poj cʌyle ti Asia jini Pablo pero tiꞌ xiqꞌuiyob majlel ti Macedonia chaꞌtiquil muꞌ bʌ i cotyan ti toñel, Timoteo yicꞌot Erasto bʌ i cꞌabaꞌ.

23 Ti jim bʌ ora ti quejiyob ti juꞌlʌpojlʌmiyel ti caj i tꞌan Dios.

24 Juntiquil Demetrio bʌ i cꞌabaꞌ ti tyeche jini juꞌlapojla bʌ tꞌan. Jini yujil bʌ niqꞌui melol ti plata. Miꞌ mel i saj locꞌom i templo jini melel bʌ i dios Diana bʌ i cꞌabaꞌ. Cabʌl tiꞌ chaꞌleyob ganar jini tsaꞌ bʌ i chaꞌle lajal bʌ toñel yicꞌot.

25 Jini Demetrio tiꞌ muchꞌquiyob pejtyelel jini lajaloꞌ bʌ i toñel yicꞌot jiñob tsꞌityaꞌ lajaloꞌ bʌ i toñel. Tiꞌ subeyob: Piꞌʌlob, laꞌ wujil isujm chaꞌan iliyi lac toñel muꞌ bʌ lac niqꞌui mel maꞌan chʌ bʌ tyo más yom lac chaꞌan.

26 Pero cheꞌ bajcheꞌ chʌncol laꞌ wilan, chʌncol laꞌ wubin, jini Pablo bej chʌncol yʌleꞌ mach Diosic jini melel bʌ dios tyac muꞌ bʌ i mel quixtyañujob. Cabʌlix quixtyañujob tiꞌ chꞌujbibeyob i tꞌan. Mach wʌꞌic jach wʌꞌ ti Efeso pero lʌcꞌʌl yomox i tyaj ti pettyelel Asia tiꞌ chꞌujbiyob.

27 Tiꞌ bej chaꞌle tꞌan jini Demetrio. Ti yʌlʌ: Bʌbʌqꞌuen cheꞌ jini, ame yʌqꞌueñonla lac sʌt lac choñoñel. Cꞌoꞌojlʌch jeꞌel maꞌix mi quej i chʌc qꞌuelob ti ñuc quixtyañujob jini i templo Diana. Chʌꞌʌch cheꞌ jini mucꞌ jachix i wajleñob i ñuclel jini melel bʌ dios muꞌ bʌ i chꞌujbin pejtyelelob wʌꞌ ti Asia yicꞌot ti pejtyel mulawil. Cheꞌ ti yʌlʌ Demetrio.

28 Cheꞌ ñac jini muchꞌquibiloꞌ bʌ ti yubiyob ili tꞌan ti quejiyob i wen michꞌan. Cꞌam tiꞌ chaꞌleyob tꞌan. Ti yʌlʌyob: Ñoj ñuc Diana i dios efesojob. Cheꞌ ti yʌlʌyob ti cꞌam bʌ tꞌan.

29 Cabʌl bajcheꞌ ti ujti tꞌan ti pejtyel ili lum. Tiꞌ chucuyob chaꞌtiquil chꞌoyoloꞌ bʌ ti Macedonia muꞌ bʌ i piꞌlen ti xʌmbal Pablo, Gayo yicꞌot Aristarco bʌ i cꞌabaꞌob. Tiꞌ tyujcꞌʌyob majlel cꞌʌlʌl ti jumpꞌej colem otyot baꞌ miꞌ muchꞌquiñob i bʌ quixtyañujob.

30 Pablo yom ochel i pejcan quixtyañujob yaꞌi. Pero jini ochemoꞌ bʌ tiꞌ tꞌan Dios maꞌ ti yʌcꞌʌyob majlel.

31 Yicꞌot chaꞌtiquil uxtiquil añoꞌ bʌ yeꞌtyel uts bʌ yicꞌot Pablo tiꞌ xiqꞌui ti wersa subentyel chaꞌan mach ochic yaꞌi.

32 Yoque juꞌupojolobjax yaꞌ baꞌ muchꞌquibilob quixtyañujob. Ojlilob chʌncox i yʌleꞌ junchajp bʌ i sujmlel, ojlil yambʌ i sujmlel. Lʌcꞌʌl yom i taj ti pejtyelelob maꞌ tiꞌ saj ñaꞌtyʌ chʌ bʌ och muchꞌquibilob yaꞌi.

33 Jini israelob tiꞌ chucuyob juntiquil Alejandro bʌ i cꞌabaꞌ. Tiꞌ waꞌchocoyob tiꞌ tyojel quixtyañujob. Cheꞌ jini chaꞌtiquil uxtiquil yaꞌ bʌ baꞌañob tiꞌ wen subeyob Alejandro i sujmlel chucoch juꞌlapojlawob. Cheꞌ jini Alejandro tiꞌ pʌsꞌeyob i cꞌʌb chaꞌan i señʌjlel mi cʌyob i tꞌan. Yom i cotyan tiꞌ tꞌan jini chʌncol bʌ i tsꞌaꞌqꞌuejlel.

34 Pero cheꞌ ñac tiꞌ ñaꞌtyʌ pejtyel quixtyañujob cheꞌ israel bʌ winic jini Alejandro, cꞌʌlʌl chaꞌpꞌej ora ti cꞌam bʌ tꞌan junlajal ti yʌlʌyob: Ñoj ñuc Diana i dios efesojob, cheꞌob.

35 Jini secretario tiꞌ tiqꞌui quixtyañujob chaꞌan lajmic ti tꞌan. Cheꞌ ñʌchꞌʌlix quixtyañujob jini secretario ti yʌlʌ: Piꞌʌlob wʌꞌ ti Efeso, pejtyel mulawil yujil isujm an ti lac wenta wʌꞌ ti ili lum chaꞌan mi lac cʌñʌtyan i templo jini ñuc bʌ dios Diana yicꞌot i locꞌom tsaꞌ bʌ yajli jubel ti panchan.

36 Maꞌan majch chꞌujbi yʌleꞌ mi lot jach. Ñʌchꞌiꞌla. Mach laꞌ niqꞌui mel jini max tyo bʌ laꞌ wen pensali.

37 Como jini winicob tsaꞌ bʌ laꞌ pʌyʌyob tyʌlel wʌꞌi machꞌan chʌ bʌ tiꞌ tyumbe templo. Maꞌan ti wajleyob jini melel bʌ laꞌ dios.

38 Mi an chʌ bʌ tiꞌ tyumbetla Demetrio yicꞌot jini muꞌ bʌ ti troñel yicꞌot, an laꞌ jueces. An i qꞌuinilel mi yʌcꞌ melojel. Chꞌujbi majliquetla laꞌ mel laꞌ bʌ yaꞌ baꞌan am bʌ yeꞌtyel.

39 Pero mi añob yambʌ i mul mi laꞌ wʌleꞌ, yom mi laꞌ meleꞌ tiꞌ tyojlel pejtyel quixtyañujob bajcheꞌ miꞌ xicꞌonla am bʌ yeꞌtyel.

40 Bʌbʌqꞌuen ame majchic i subonla ti ñuc bʌ yeꞌtyel jini tsaꞌ bʌ ujti sajmʌl ame mi lolon ubin chʌncol lac tsꞌaꞌqꞌuel. Machꞌan bajcheꞌ chꞌujbi lac jacꞌ mi ti cꞌajtibentiyonla chʌ bʌ och juꞌupojolonla. Chʌꞌʌch ti yʌlʌ jini secretario.

41 Cheꞌ ñac ti ujti yʌleꞌ cheꞌ bajcheꞌ jini tiꞌ xiqꞌuiyob sujtyel.