2 Tiꞌ julaꞌayob pejtyel ochemoꞌ bʌ tiꞌ tꞌan Dios yaꞌ baꞌ ti ñumi. Tiꞌ wen xucꞌchocobeyob i pusicꞌal tiꞌ tꞌan Dios. Ti wiꞌil ti cꞌoti yaꞌ ti Grecia.

3 Yaꞌ ti cʌyle uxpꞌej uw Pablo. Cheꞌ i tꞌʌñʌlelix mi yochel ti barco chaꞌan majlic ti Siria ti yubi chaꞌan tiꞌ tyem lajayob i tꞌan israelob ti i contra. Jin chaꞌan tiꞌ chaꞌ qꞌuexe i pensal chaꞌan ti yoc mi majlel chaꞌan ñumic majlel ti Macedonia.

4 Ti piꞌle ti xʌmbal jini Sópater chꞌoyol bʌ ti Berea yicꞌot Aristarco yicꞌot Segundo chꞌoyoloꞌ bʌ ti Tesalónica yicꞌot Gayo chꞌoyol bʌ ti Derbe yicꞌot Timoteo yicꞌot jeꞌel Tíquico yicꞌot Trófimo chꞌoyol bʌ ti pañimil Asia bʌ i cꞌabaꞌ.

5 Ti ñaxan majliyob ti Troas baꞌ mi quej i pijtyañon lojon quicꞌot Pablo. Joñon chʌncol bʌ c tsꞌijbun ili jun.

6 Cheꞌ tsaꞌix ñumi jini qꞌuin cheꞌ mi laj cꞌuxeꞌ caxlan waj machꞌʌ baꞌan yicꞌot levadura muꞌ bʌ yʌqꞌuen i wos i bʌ, ti ochiyon lojon ti barco. Ti loqꞌuiyon lojon majlel ti Filipos. Tiꞌ jopꞌejlel qꞌuin ti cꞌotiyon lojon ti Troas yaꞌ baꞌ ti cʌyleyon lojon siete qꞌuin.

7 Ti jini ñaxan bʌ qꞌuin ti semana pejtyel ochemoꞌ bʌ tiꞌ tꞌan Dios tiꞌ muchꞌquiyob i bʌ chaꞌan mi motin uchꞌejelob cheꞌ bajcheꞌ tiꞌ xiqꞌui i melob Jesús cheꞌ ñac cojachix bʌ tiꞌ chaꞌle weꞌel Jesús. Pablo tiꞌ subuyob i tꞌan Dios. Chaꞌan mi quej i loqꞌuel majlel ti sʌcꞌan baꞌañob, cꞌʌlʌl xin acʌbʌlel tiꞌ chaꞌle tꞌan Pablo.

8 Muchꞌquibilob yaꞌ ti uxlajm bʌ otyot baꞌ tsꞌʌbʌl tyac lámpara.

9 Yaꞌ buchul ti ventana juntiquil alob Eutico bʌ i cꞌabaꞌ. Chaꞌan jal tiꞌ chaꞌle subtꞌan Pablo, ti ochi i wʌyel jini alob. Cheꞌ wen wʌyʌlix ti yajli jubel cꞌʌlʌl uxlajm. Sajtyemix tiꞌ lotyoyob.

10 Cheꞌ jini Pablo ti jubi yaꞌ baꞌañob. Tiꞌ choco i bʌ tiꞌ pam alob. Tiꞌ meqꞌue. Tiꞌ sube jini ochemoꞌ bʌ tiꞌ tꞌan Dios: Mach a bʌcꞌñan. Cuxulʌch, cheꞌ Pablo.

11 Pablo ti chaꞌ letsi majlel yaꞌ ti mali otyot. Tiꞌ xetꞌe waj. Tiꞌ cꞌuxuyob. Cheꞌ jini Pablo tiꞌ bej chaꞌle tꞌan cꞌʌlʌl ti sʌcꞌʌ. Cheꞌ jini ti loqꞌui majlel.

12 Cuxulʌch tiꞌ pʌyʌ majlel ti yotyot i tyat i ñaꞌ jini alob. Cꞌajacñayob i yoj.

13 Pablo ti loqꞌui majlel ti yoc chaꞌan cꞌotic ti lum Asón bʌ i cꞌabaꞌ. Joñon lojon ti ochiyon lojon ti barco chaꞌan yaꞌ mi quej c tyaj lojon c bʌ.

14 Cheꞌ ñac tic tyaja lojon c bʌ yaꞌ ti Asón, Pablo ti ochi ti barco lojon quicꞌot. Ti loqꞌuiyon lojon majlel ti lum Mitilene bʌ i cꞌabaꞌ.

15 Ti loqꞌuiyon lojon majlel ti barco yaꞌi. Ti yijcꞌʌlel ti ñumiyon lojon tiꞌ tꞌejl lum Quío bʌ i cꞌabaꞌ. Tiꞌ chaꞌpꞌejlel qꞌuin ti cꞌotiyon lojon ti lum yaꞌ ti lʌcꞌʌl tiꞌ jaꞌ Samos bʌ i cꞌabaꞌ. Ti poj j cꞌaja lojon coj ti lum Trogilio bʌ i cꞌabaꞌ. Ti yijcꞌʌlel ti cꞌotiyon lojon cꞌʌlʌl ti Mileto.

16 Chʌꞌʌch tiꞌ meleyob como Pablo mach yom putyun jalejel yaꞌ ti Asia. Jin chaꞌan mach yom majlel yaꞌ ti Efeso. Yom i seb cꞌotyel yaꞌ ti Jerusalén chaꞌan yaꞌ chꞌujbi i ñusan qꞌuin Pentecostés bʌ i cꞌabaꞌ.

17 Yaꞌ tyo an Pablo ti Mileto. Tiꞌ choco majlel tꞌan baꞌan añoꞌ bʌ yeꞌtyel ti templo yaꞌ ti Efeso chaꞌan mi tyʌlel yaꞌ baꞌan Pablo.

18 Cheꞌ ñac ti cꞌotiyob tiꞌ subeyob: Laꞌ wujil isujm pejtyel bajcheꞌ tic chaꞌle cꞌʌlʌl ti cojax tyo bʌ qꞌuin cheꞌ ñac ti tyʌliyon ti Asia.

19 Ti beleꞌ ora tic wen chaꞌlibe i toñel lac Yum ti pejtyel c pusicꞌal. Machꞌan tic letsʌ c bʌ ti laꞌ tyojlel. An tic chaꞌle uqꞌuel cheꞌ ñac ti quilʌ bajcheꞌ yilal tiꞌ chaꞌle quixtyañujob. Laꞌ wujil isujm jeꞌel bajcheꞌ tic ñusʌ wocol chaꞌan bajcheꞌ tiꞌ jopꞌo i wen tyʌcꞌlañoñob jini israelob.

20 Machꞌan ti cʌctyʌ c subeñetla i tꞌan Dios chaꞌan c bʌqꞌuen pejtyel chʌ bʌ yom chaꞌan laꞌ wenlel. Tij cʌntisʌyetla tiꞌ tꞌan Dios cheꞌ muchꞌquibiletla ti laꞌ pejtyelel. Tij cʌntisʌyetla jeꞌel ti laꞌ bajñel laꞌ wotyot tyac.

21 Tic wen sube jini israelob yicꞌot jeꞌel jini mach bʌ israelob chaꞌan yom miꞌ qꞌuexob i pensal i cʌyob i mul. Yom ti pejtyelel i pusicꞌal miꞌ chꞌujbiñob lac Yum Jesucristo. Cheꞌ tic subeyob, cheꞌ Pablo.

22 Wale mi quej c majlel ti Jerusalén como wersa mi xicꞌon c majlel Chꞌujul bʌ i Chꞌujlel Dios. Pero maꞌan mic ñaꞌtyan chʌ bʌ yes mi quej i yujtyel yaꞌi.

23 Jin jach cujil isujm chaꞌan ti jujumpꞌej lum baꞌ mi quej c ñumel jini Chꞌujul bʌ i Chꞌujlel Dios miꞌ subeñon an yom bʌ i tyʌcꞌlañon yicꞌot yom i yotsañon ti cʌchol.

24 Pero machꞌan mic bʌcꞌñan pejtyel jini. Machꞌan chʌ bʌ miꞌ chaꞌlen mi ti tsʌnsʌntiyon mi cubin. Jin jach com cujtisan c toñel tsaꞌ bʌ i yʌcꞌon c meleꞌ c Yum Jesús tiꞌ tijicñʌyel c pusicꞌal cꞌʌlʌl jintyo mic sajtyel. Jin jach com c subeñob pejtyel quixtyañujob i tꞌan Dios bajcheꞌ an i pꞌuntyʌntyel ti Dios.

25 Tsaꞌix wen ñumiyon baꞌ añetla chaꞌan c subetla chaꞌan i yumintyel Dios. Pero wale cujil isujm maꞌix mi quej laꞌ chaꞌ qꞌuel c wut wʌꞌ ti mulawil. Cheꞌ ti yʌlʌ Pablo.

26 Wale mic subeñetla ti tyoj bʌ tꞌan chaꞌan mach c wentajic mi maꞌan ti laꞌ tyaja laꞌ cuxtyʌlel machꞌʌ yujil jilel.

27 Maꞌan ti cʌctyʌ c subeñetla pejtyel chʌ bʌ yom Dios chaꞌan ti caj c bʌqꞌuen. Maꞌan chʌ bʌ yes machꞌʌ baꞌan tic subetla.

28 Yom laꞌ wen cʌñʌtyan laꞌ bʌ. Maꞌ subeñob i cʌñʌtyañob i bʌ jeꞌel pejtyelel ochemoꞌ bʌ tiꞌ tꞌan Dios añoꞌ bʌ ti laꞌ wenta. Como jini Chꞌujul bʌ i Chꞌujlel Dios ti yʌqꞌuetla ti laꞌ wenta chaꞌan laꞌ cʌñʌtyañob. Como lac Yum Jesucristo tiꞌ mʌñʌyob tiꞌ chꞌichꞌel.

29 Cujil isujm cheꞌ majlemon mux yochel wʌꞌ baꞌ añetla quixtyañujob i jopꞌ i chꞌicbeñetla tꞌan chaꞌan laꞌ cʌy tsaꞌ bʌ laꞌ chꞌujbi. Cheꞌ bajcheꞌ mi yochel maꞌtyeꞌlel tsꞌiꞌ i jisan tiñʌmeꞌ, chʌꞌʌch mi quej i jopꞌ yochel i chꞌicbeñetla tꞌan.

30 An jeꞌel ochem bʌ la wicꞌot muꞌ bʌ i chaꞌlen lot bʌ cʌntisa chaꞌan miꞌ jopꞌ i lotiñob jeꞌel jini ochemoꞌ bʌ tiꞌ tꞌan Dios chaꞌan miꞌ tsʌcleñob majlel.

31 Cʌñʌtyan laꞌ bʌ chaꞌan mach laꞌ chꞌujbin lot. Cꞌajal laꞌ chaꞌan ti qꞌuin ti acꞌbʌlel tij cʌntisʌyetla tiꞌ tꞌan Dios cꞌʌlʌl uxpꞌej jab. Tic wen pꞌuntyʌyetla jujuntiquiletla.

32 Wale mi quej j cʌyetla ti i cꞌʌb Dios. I tꞌan Dios miꞌ cʌñʌtyʌbeñetla laꞌ pusicꞌal como mi la cubin tiꞌ tꞌan Dios bajcheꞌ miꞌ pꞌuntyañonla Dios. Pꞌʌtyʌl i tꞌan Dios. Jini miꞌ pꞌʌtyʌlisan lac pusicꞌal. Mux i yʌqꞌueñetla laꞌ wajñib ti panchan jujuntiquiletla tsaꞌ bʌ laꞌ chꞌujbi Jesús. Mi quej laꞌ motin ajñel yicꞌot pejtyel yañoꞌ bʌ i chaꞌan bʌ Dios.

33 Maꞌan chʌ bʌ tic mulʌbetla chaꞌan bajñel com, mi laꞌ pislelic mi laꞌ tyaqꞌuinic.

34 Pero laꞌ wujil isujm tic chaꞌle toñel tij cꞌʌb chaꞌan tic tyaja i cꞌʌjnibal bʌ c chaꞌan yicꞌot i chaꞌan jini tsaꞌ bʌ i tsʌcleyon majlel ti xʌmbal.

35 Chʌꞌʌch tic beleꞌ pʌsbetla chaꞌan chʌꞌʌch yom laꞌ chaꞌlen troñel chaꞌan mi laj cotyan machꞌʌ baꞌan i chaꞌan. Cꞌajal laꞌ chaꞌan i tꞌan lac Yum Jesús baꞌ ti yʌlʌ: Más cꞌajacña la coj mi laj cubin cheꞌ mi la cʌqꞌuen i majtyan lac piꞌʌl cheꞌ bajcheꞌ mi lac tyaj lac chaꞌan. Cheꞌ ti yʌlʌ Jesús, cheꞌ Pablo.

36 Cheꞌ ñac ti ujti i yʌleꞌ Pablo ti ñocle ti oración yicꞌotyob.

37 Cheꞌ jini ti luꞌ uqꞌuiyob. Tiꞌ lajlaj jatsꞌbeyob i pat. Tiꞌ ñupuyob.

38 Ñoj chꞌʌjyem ti yubiyob como tiꞌ subeyob maꞌix mi quej i chaꞌ ilañob. Cheꞌ jini tiꞌ piꞌleyob majlel cꞌʌlʌl yaꞌ baꞌ ti ochi ti barco.