2 Yaꞌ motin añob Simón Pedro yicꞌot Tomás muꞌ bʌ i pejcʌntyel ti Lut yicꞌot Natanael chꞌoyol bʌ ti Caná yaꞌ ti Galilea yicꞌot i yalobilob Zebedeo yicꞌot yambʌ chaꞌtiquil ajcʌntꞌañob i chaꞌan Jesús.

3 Simón Pedro tiꞌ subeyob: Mi quejel c majlel ti chuc chʌy, cheꞌen. I piꞌʌlob tiꞌ jacꞌʌyob: Much lojon c majlel jeꞌel, cheꞌob. Ti majliyob. Ti ochiyob ti jumpꞌej jucub. Yaꞌ tiꞌ ñusʌyob jumpꞌej acꞌbʌlel ti jucub. Pero machꞌan tiꞌ saj chucuyob chʌy.

4 Cheꞌ ñac yomox sʌcꞌan ti yilʌyob yaꞌ waꞌal Jesús yaꞌ tiꞌ tiꞌ colem joyol bʌ jaꞌ. Pero ajcʌntꞌañob i chaꞌan machꞌan tiꞌ ñaꞌtyʌyob mi jiñʌch Jesús.

5 Cheꞌ jini Jesús tiꞌ subeyob: Piꞌʌlob, ¿machꞌa baꞌan ti laꞌ chucu chʌy? cheꞌen. Tiꞌ jacꞌʌyob: Machꞌan, cheꞌob.

6 Cheꞌ jini Jesús tiꞌ subeyob: Chocola ochel laꞌ chimol chʌy tiꞌ ñoj jucub. Mi quejel laꞌ chuqueꞌ chʌy, cheꞌen. Chʌꞌʌch tiꞌ chaꞌleyob. Cheꞌ jini machꞌan ti mejli i chucob loqꞌuel i chimol chʌy ti jaꞌ chaꞌan ti caj i yonlel chʌy tsaꞌ bʌ i chucuyob.

7 Cheꞌ jini, jini ajcʌntꞌan i chaꞌan Jesús tsaꞌ bʌ wen pꞌuntyʌnti ti Jesús tiꞌ sube Pedro: Jiñʌch lac Yum, cheꞌen. Cheꞌ ñac Simón Pedro ti yubibe i tꞌan chaꞌan lac Yumʌch tiꞌ waꞌ chaꞌ xojo i bujc (como jocholix i chaꞌan). Tiꞌ choco ochel i bʌ ti jaꞌ. Ti queji ti ñuxejel.

8 Jini yambʌ ajcʌntꞌañob i chaꞌan Jesús ti cꞌoti tiꞌ tiꞌ jaꞌ ti jucub como an jach cheꞌ bajcheꞌ cien metro i ñajtlel. Tiꞌ tyujcꞌʌyob tyʌlel jini chimol chʌy butꞌul bʌ ti chʌy.

9 Cheꞌ ñac ti cꞌoti tiꞌ tiꞌ jaꞌ tiꞌ qꞌueleyob ñutsulix cꞌajc. Yaꞌan chʌy tiꞌ pam cꞌajc. Chʌncol i ticwisan waj jeꞌel.

10 Jesús tiꞌ subeyob: Chꞌʌmʌla tyʌlel chaꞌcojt uxcojt chʌy tsaꞌ bʌ ujti laꞌ chuqueꞌ, cheꞌen.

11 Simón Pedro ti ochi ti jucub. Tiꞌ tyujcꞌʌ tyʌlel cꞌʌlʌ tiꞌ tiꞌ lum jini chimol chʌy butꞌul bʌ ti colem chʌy. An ciento cincuenta y tres chʌy. Aunque wen on jini chʌy machꞌan ti tyujqꞌui jini chimol chʌy.

12 Cheꞌ jini Jesús tiꞌ subeyob: Laꞌixla ti uchꞌel, cheꞌen. Machꞌan majch tiꞌ cꞌajtibe majchqui jini Jesús como luꞌ yujilob isujm ajcʌntꞌañob i chaꞌan Jesús chaꞌan lac Yumʌch.

13 Cheꞌ jini Jesús tiꞌ lʌcꞌʌ cꞌajc baꞌañob. Tiꞌ chꞌʌmʌ waj tiꞌ cꞌʌb. Tiꞌ pucbeyob. Chʌꞌʌch jeꞌel tiꞌ chaꞌle yicꞌot chʌy.

14 Jiñʌch i yuxyajlel Jesús tiꞌ pʌsʌ i bʌ baꞌan ajcʌntꞌañob i chaꞌan cheꞌ tsaꞌix tyejchi loqꞌuel baꞌan sajtyemoꞌ bʌ.

15 Cheꞌ ti ujtiyob ti uchꞌel, Jesús tiꞌ cꞌajtibe Simón Pedro: Simón i yalobil Jonás, ¿más ba maꞌ pꞌuntyañon bajcheꞌ ili yañoꞌ bʌ? cheꞌen. Pedro tiꞌ jacꞌʌ: Mucꞌʌch, c Yum. A wujil isujm mic pꞌuntyañet, cheꞌen. Jesús tiꞌ sube: Aqꞌuen i bucꞌbal c saj tiñʌmeꞌob cheꞌ jini, cheꞌen. [Tiñʌmeꞌ yom i yʌleꞌ oveja.]

16 Jesús tiꞌ chaꞌ cꞌajtibe: Simón i yalobil Jonás, ¿muꞌ ba a wen pꞌuntyañon? cheꞌen. Pedro tiꞌ jacꞌʌ: Mucꞌʌch c Yum. A wujil isujm mic pꞌuntyañet, cheꞌen. Jesús tiꞌ sube: Aqꞌuen i bucꞌbal c tiñʌmeꞌob, cheꞌen.

17 Ti uxyajlel Jesús tiꞌ cꞌajtibe: Simón i yalobil Jonás, ¿muꞌ ba a pꞌuntyañon? cheꞌen. Chꞌʌjyem ti yubi Pedro cheꞌ uxyajlel tiꞌ chaꞌ cꞌajtibe mi mux i pꞌuntyan Jesús. Tiꞌ sube: C Yum, luꞌ a wujil isujm. A wujil isujm mic pꞌuntyañet, cheꞌen. Jesús tiꞌ sube: Aqꞌuen i bucꞌbal c tiñʌmeꞌob, cheꞌen.

18 Melel mic subeñet cheꞌ ñac max tyo baꞌan cabʌl a jabilel ti a bajñel xojo a pislel. Tsajniyet baꞌic jach a wom majlel chaꞌan ti a bajñel xiqꞌui a bʌ. Pero cheꞌ ñoxetix mi quejel a sʌtsꞌ a cꞌʌb chaꞌan yambʌ miꞌ pʌyet majlel baꞌ mach a wom majlel. Cheꞌ yʌlol Pedro.

19 Cheꞌ ti yʌlʌ Jesús chaꞌan i tsictisan bajcheꞌ mi quejel i sajtyel Pedro yicꞌot chaꞌan bajcheꞌ mi quejel i tsictisan i ñuclel Dios. Cheꞌ jini, Jesús tiꞌ sube: Bej tsʌcleñon, cheꞌen.

20 Muꞌ ti xʌmbal Pedro yicꞌot Jesús. Pedro tiꞌ sutqui i bʌ. Ti yilʌ ajcʌntꞌan i chaꞌan Jesús muꞌ bʌ i wen pꞌuntyʌntyel ti Jesús chʌncol i tsʌcleñob. Jiñʌch yaꞌ bʌ buchul tiꞌ tꞌejl Jesús cheꞌ ñac ti motin uchꞌiyob tsaꞌ bʌ i cꞌajtibe Jesús: C Yum, ¿majchqui jini muꞌ bʌ i yʌqꞌuet ti cʌchol? cheꞌen.

21 Cheꞌ ñac ti yilʌ Pedro jini muꞌ bʌ i pꞌuntyʌntyel ti Jesús, Pedro tiꞌ cꞌajtibe Jesús: C Yum, ¿jixcu jini, chʌ bʌ mi quejel i tyumbentyel jini? cheꞌen.

22 Jesús tiꞌ jacꞌʌ: Comic bej cuxul mi yajñel jintyo mic chaꞌ tyʌlel mach a wenta. Jatyet yom a bej tsʌcleñon, cheꞌen. Cheꞌ yʌlol Pedro.

23 Cheꞌ jini ti queji i yʌlob jini hermañujob machꞌan mi quejel i sajtyel jini Juan. Pero Jesús machꞌan ti yʌlʌ chaꞌan machꞌan mi quejel i sajtyel. Tsaꞌ jach i yʌlʌ: Comic bej cuxul mi yajñel jintyo mic chaꞌ tyʌlel mach a wenta, cheꞌen.

24 Joñon ajcʌntꞌañon i chaꞌan Jesús tsaꞌ bʌ quilʌ tyac tsaꞌ bʌ c tsꞌijbu. Cujil melel tsaꞌ bʌ c tsꞌijbu. Joñon jini tsaꞌ bʌ pꞌuntyʌntiyon ti Jesús.

25 An tyo cabʌl tsaꞌ bʌ i chaꞌle Jesús mach bʌ baꞌan ti tsꞌijbunti ti jun. Muqꞌuic i luꞌ tsꞌijbuntyel ti jujunchajp i chaꞌlibal Jesús, ñoj cabʌl jun mi yocꞌan jintyo machꞌan baꞌ och wʌꞌ ti mulawil yubil. Amén.