2 Cheꞌ jini ti majli ti ajñel baꞌan Simón Pedro yicꞌot yambʌ ajcʌntꞌan i chaꞌan Jesús muꞌ bʌ i wen pꞌuntyʌntyel ti Jesús. María tiꞌ subeyob: Tsaꞌix i chꞌʌmʌyob majlel i bʌcꞌtyal Jesús lac Yum yaꞌ ti muconibʌl. Mach cujila baqui ti yʌcꞌʌyob. Cheꞌ ti yʌlʌ María.

3 Cheꞌ jini Pedro yicꞌot yambʌ ajcʌntꞌan i chaꞌan Jesús ti loqꞌuiyob majlel. Ti majliyob ti muconibʌl.

4 Jini chaꞌtiquilob ti majliyob ti motin ajñel pero jini yambʌ más ajñel ti majli. Ñaxan ti cꞌoti yaꞌ ti muconibʌl.

5 Ti cotle i yojchꞌon ti malil. Ti yilʌ yaꞌan i bʌjqꞌuil Jesús pero machꞌan ti ochi ti mal.

6 Ti jumucꞌlel ti cꞌoti Simón Pedro. Ti ochi ti mali muconibʌl. Ti yilʌbe i bʌjqꞌuil Jesús jeꞌel yaꞌ tiꞌ cʌyʌ.

7 Ti yila yaꞌan i mosil i jol Jesús. Bʌlʌl. Parte an. Pʌquilʌbil.

8 Cheꞌ jini ti ochi jeꞌel jini yambʌ ajcʌntꞌan tsaꞌ bʌ ñaxan cꞌoti ti muconibʌl. Ti yilʌbe i bʌjqꞌuil. Tiꞌ chꞌujbi chaꞌan tsaꞌix tyejchi loqꞌuel Jesús baꞌan sajtyemoꞌ bʌ.

9 Como max tyo i chꞌʌmꞌeyob isujm jini Tsꞌijbubil bʌ i Tꞌan Dios chaꞌan mi quejel i tyejchel loqꞌuel Jesús baꞌan sajtyemoꞌ bʌ.

10 Cheꞌ jini, ti sujtiyob ti yotyot jini chaꞌtiquil ajcʌntꞌañob i chaꞌan Jesús.

11 Pero María ti cʌyle yaꞌ ti pat muconibʌl. Cheꞌ chʌncol ti uqꞌuel ti cotle i qꞌueleꞌ i mal muconibʌl.

12 María ti yilʌ chaꞌtiquil ajtoñel i chaꞌan Dios chꞌoyol bʌ ti panchan. Xojol i chaꞌan sʌsʌc bʌ i pislel. Buchulob yaꞌ baꞌ tiꞌ sʌtsꞌchoconti Jesús. Juntiquil an tiꞌ tyojel i jol. Yambʌ juntiquil an tiꞌ tyojel baꞌan i yoc.

13 Jini ajtroñelob i chaꞌan Dios chꞌoyoloꞌ bʌ ti panchan tiꞌ cꞌajtibe María: ¿Chucoch muqꞌuet ti uqꞌuel? cheꞌob. María tiꞌ jacꞌʌ: ¿Chucoch ti laꞌ pʌyʌ majlel jini c Yum? Mach cujil isujm baqui ti laꞌ wʌcꞌʌ, cheꞌen.

14 Ujtyel jach tyo i yʌlbal tiꞌ sutqui i bʌ. Tiꞌ qꞌuele yaꞌan Jesús. Pero machꞌan tiꞌ ñaꞌtyʌ mi Jesús.

15 Cheꞌ jini Jesús tiꞌ sube: ¿Chucoch muqꞌuet ti uqꞌuel? ¿Majchqui maꞌ sʌclan? cheꞌen.

María tiꞌ lolon pensali jiñʌch ajcʌñʌtya pʌcꞌʌbʌl. Tiꞌ sube: Mi jatyet ti a chꞌʌmʌ majlel i bʌcꞌtyal, subeñon baqui ti a wʌcꞌʌ chaꞌan mic chꞌʌmeꞌ majlel, cheꞌen.

16 Cheꞌ jini Jesús tiꞌ sube: María, cheꞌen. Tiꞌ sutqui i bʌ i suben ti hebreo tꞌan: Raboni, cheꞌen. Yom i yʌleꞌ Maestro.

17 Jesús tiꞌ sube: Mach yom a tyʌlon como max tyo letson yaꞌ baꞌan c Tyat, pero suben quermañujob chaꞌan mi quej c letsel yaꞌ baꞌan c Tyat, laꞌ Tyat jeꞌel, c Dios, laꞌ Dios jeꞌel, cheꞌen.

18 Cheꞌ jini María chꞌoyol bʌ ti Magdala ti majli i suben ajcʌntꞌañob i chaꞌan Jesús chaꞌan tsaꞌix i yilʌ lac Yum yicꞌot tiꞌ subeyob tsaꞌ bʌ subenti jeꞌel.

19 Ti jin jach bʌ qꞌuin ti ñaxan bʌ qꞌuin ti semana muchꞌquibilob ajcʌntꞌañob i chaꞌan Jesús ti icꞌan. Ñupꞌul i tiꞌ otyot tyac chaꞌan i bʌcꞌñan israelob añoꞌ bʌ i yeꞌtyel. Ti ochi Jesús yaꞌ ti xinil baꞌañob. Ti yʌqꞌueyob saludo. Ti yʌlʌ: Laꞌ ñʌchꞌlec laꞌ pusicꞌal, cheꞌen.

20 Cheꞌ ñac Jesús ti ujti i yʌleꞌ jini, tiꞌ pʌsꞌeyob i cꞌʌb yicꞌot i chꞌiꞌlat. Cꞌajacña i yoj ti yubiyob ajcʌntꞌañob i chaꞌan cheꞌ ñac ti yilʌyob chaꞌan lac yumʌch.

21 Jesús tiꞌ chaꞌ subeyob: Laꞌ ñʌchꞌlec laꞌ pusicꞌal. Como c Tyat ti panchan tiꞌ chocoyon tyʌlel. Chʌꞌʌch mic choquetla majlel jeꞌel, cheꞌen.

22 Cheꞌ jini, tiꞌ wujtyʌyob. Tiꞌ subeyob: Chꞌʌmʌla Chꞌujul bʌ c Chꞌujlel, cheꞌen.

23 Jesús tiꞌ subeyob: Cheꞌ mi laꞌ ñusʌben i mul juntiquil quixtyañu ñusʌbilix i mul. Mi machꞌan mi laꞌ ñusʌben i mul an tyo tiꞌ mul, cheꞌen.

24 Pero Tomás, jiñʌch juntiquil i docejlel ajcʌntꞌañob i chaꞌan Jesús muꞌ bʌ i pejcʌntyel ti Lut machꞌan yaꞌan cheꞌ ñac ti cꞌoti Jesús.

25 Ti wiꞌil yambʌ ajcʌntꞌañob i chaꞌan Jesús tiꞌ subeyob Tomás: Ti lojon quilʌ lac Yum, cheꞌob. Pero Tomás tiꞌ subeyob: Mi machꞌan mi quilʌben i lojweñal ti lawux am bʌ tiꞌ cꞌʌb, mi machꞌan mi cotsan c yal cꞌʌb ti lojweñal tiꞌ chꞌiꞌlat mach mic chꞌujbin mi tsaꞌix tyejchi loqꞌuel baꞌan sajtyemoꞌ bʌ, cheꞌen.

26 Cheꞌ ti ñumi ocho qꞌuin ti chaꞌ muchꞌquiyob i bʌ ajcʌntꞌañob i chaꞌan Jesús. Jim bʌ ora yaꞌan Tomás jeꞌel. Cheꞌ jini, aunque ñupꞌul i tiꞌ tyac otyot ti ochi Jesús. Ti waꞌle ti xiñilob. Ti yʌqꞌueyob saludo. Tiꞌ subeyob: Laꞌ ñʌchꞌlec laꞌ pusicꞌal, cheꞌen.

27 Cheꞌ jini, tiꞌ sube Tomás: Otsan a yal cꞌʌb tij cꞌʌb baꞌ lojwem. Qꞌuele j cꞌʌb. Choco tyʌlel a cꞌʌb. Otsan wʌꞌ tic chꞌiꞌlat. Mach yom bej chaꞌchajb a pusicꞌal. Chꞌujbiñon joñʌñʌch. Cheꞌ ti subenti Tomás.

28 Cheꞌ jini, Tomás tiꞌ jacꞌʌ: C Yum, c Dios, cheꞌen.

29 Jesús tiꞌ sube: Tomás, wale maꞌ chꞌujbiñon chaꞌan ti a wilʌyon. Tijicñayob jini muꞌ bʌ i chꞌujbiñoñob cheꞌ max tyo ti yilʌyon. Cheꞌ ti yʌlʌ Jesús.

30 Tsaꞌ tyo i pʌsʌ cabʌl yan tyac bʌ ñuc tyac bʌ i pꞌʌtyʌlel Jesús tiꞌ tyojlel ajcʌntꞌañob i chaꞌan machꞌʌ baꞌan tsꞌijbubil ti ili jun.

31 Pero ti tsꞌijbunti tyac ili chaꞌan laꞌ chꞌujbin chaꞌan jiñʌch yajcʌbil bʌ i chaꞌan Dios jini Jesús yicꞌot chaꞌan i Yalobilʌch Dios. Chaꞌan cheꞌ mi laꞌ chꞌujbin Jesús añix laꞌ cuxtyʌlel muꞌ bʌ i yʌqꞌueñonla.