2 Soldadojob ti yʌqꞌueyob corona tiꞌ jol jalʌl bʌ ti chꞌix. Tiꞌ xojbeyob icꞌpucꞌan bʌ i pislel.

3 Cheꞌ jini, tiꞌ lʌcꞌʌyob Jesús. Tiꞌ wajleyob. Ti yʌlʌyob: Ñoj ñuquet bʌ Yumʌl i chaꞌan israelob, cheꞌob. Cheꞌ jini tiꞌ jatsꞌʌyob tiꞌ cꞌʌb.

4 Cheꞌ jini Pilato ti chaꞌ loqꞌui i pejcan israelob. Tiꞌ subeyob: Qꞌuelela. Mic pʌy tyʌlel Jesús wʌꞌ baꞌ añetla chaꞌan mi laꞌ wen ñaꞌtyan machꞌan tic saj tyajbe i mul, cheꞌen.

5 Cheꞌ jini ti loqꞌui tyʌlel Jesús. Xojol i chaꞌan corona tiꞌ jol jalʌl bʌ ti chꞌix. Xojol i chaꞌan icꞌpucꞌan bʌ i pislel. Pilato tiꞌ subeyob: Umbaꞌan jini winic, cheꞌen.

6 Cheꞌ ñac jini ñuc bʌ curajob yicꞌot policíajob tiꞌ qꞌueleyob Jesús ti quejiyob ti cꞌam bʌ tꞌan. Ti yʌlʌyob: Laꞌ tsʌnsʌntic ti cruz, laꞌ tsʌnsʌntic ti cruz, cheꞌob. Pilato tiꞌ subeyob: Pʌyʌla majlel jatyetla. Tsʌnsanla ti cruz jatyetla. Como joñon machꞌan mic saj tyajben i mul, cheꞌen.

7 Pero jini israelob ti yʌlʌyob: Añʌch lojon c mandar baꞌ mi yʌl wersa yom tsʌnsʌntic como tiꞌ cuyu i bʌ ti i Yalobil Dios, cheꞌob.

8 Cheꞌ ñac ti yubi Pilato ili tꞌan, más tiꞌ bʌcꞌñʌ i yʌcꞌ ti tsʌnsʌntyel Jesús.

9 Cheꞌ jini, Pilato ti chaꞌ ochi ti mal baꞌ miꞌ chaꞌlen melojel. Tiꞌ cꞌajtibe Jesús: ¿Baqui chꞌoyolet? cheꞌen. Pero Jesús chꞌuj ñʌchꞌʌl. Maꞌ chʌ bʌ ti saj alʌ.

10 Pilato tiꞌ sube: ¿Machꞌa baꞌan mi quejel a jacꞌbeñon c tꞌan? ¿Mach ba a wujil añʌch c pꞌʌtyʌlel chaꞌan cʌqꞌuet ti sajtyel ti cruz yicꞌot añʌch c pꞌʌtyʌlel jeꞌel chaꞌan cʌqꞌuet ti cojlel? cheꞌen.

11 Jesús ti yʌlʌ: Machic Dios ti yʌqꞌueyet a pꞌʌtyʌlel machꞌan chʌ bʌ chꞌujbi a saj tyumbeñon. Jin chaꞌan más on i mul jini añoꞌ bʌ i yeꞌtyel chaꞌan israelob tsaꞌ bʌ yʌcꞌʌyon ti a cꞌʌb. Cheꞌ ti yʌlʌ Jesús.

12 Ti jin jach bʌ ora Pilato ti queji i wen sajcan bajcheꞌ chꞌujbi i yʌcꞌ ti cojlel Jesús. Pero israelob ti queji i yʌlob ti cꞌam bʌ tꞌan: Mi ti a wʌcꞌʌ ti cojlel jini winic, machꞌan mi quejel a wajñel ti uts yicꞌot ñoj ñuc bʌ yumʌl. Como majchical jach mi sub i bʌ ti ñuc bʌ yumʌl miꞌ pʌs i bʌ tiꞌ contra ñoj ñuc bʌ yumʌl, cheꞌob.

13 Cheꞌ ñac ti yubi Pilato ili tꞌan ti majli baꞌ mi buchtyʌl cheꞌ miꞌ chaꞌlen melojel. Yaꞌ baꞌ buchul, ti tꞌan hebreojob mi pejcʌntyel ti Gabata. Ti lac tꞌan yom i yʌl ajnibʌl pech melel bʌ ti tyun tyac. Tiꞌ xiqꞌui tyʌlel Jesús jini Pilato.

14 Xinqꞌuinilix. An tyo jumpꞌej qꞌuin mi quejel i qꞌuinilel pascua. Cheꞌ jini Pilato tiꞌ sube israelob. Lax an ñuc bʌ Yumʌl laꞌ chaꞌan, cheꞌen.

15 Pero ti cꞌam bʌ tꞌan ti yʌlʌyob: Laꞌ sajtic, laꞌ sajtic. Laꞌ tsʌnsʌntic ti cruz, cheꞌob. Pilato tiꞌ subeyob: ¿Yom ba cʌcꞌ ti sajtyel ti cruz ñuc bʌ Yumʌl laꞌ chaꞌan mi laꞌ wʌl? cheꞌen. Pero jini ñuc bʌ curajob ti yʌlʌyob: Machꞌan yambʌ ñuc bʌ yumʌl lojon c chaꞌan. Jin jach César, cheꞌob.

16 Cheꞌ jini, Pilato ti yʌcꞌʌ Jesús ti cꞌʌb chaꞌan i tsʌnsañob ti cruz. Tiꞌ pʌyʌyob majlel.

17 Ti loqꞌui majlel Jesús qꞌuechel majlel i cruzil ti bujtyʌl La Calavera bʌ i cꞌabaꞌ. Ti i tꞌan hebreojob mi yʌl Gólgota. An i sujmlel i cꞌabaꞌ mi yʌleꞌ ti lac tꞌan cheꞌ yilal bajcheꞌ bʌquel jolʌl. Qꞌuechel i chaꞌan i cruzil ti majli.

18 Yaꞌ tiꞌ jocꞌchocoyob ti cruz Jesús yicꞌot yambʌ chaꞌtiquil winic, juntiquil ti jujunwejl. Jesús an ti xinil.

19 Pilato tiꞌ xiqꞌui ti tsꞌijbuntyel tꞌan tiꞌ chañelel i jol Jesús yaꞌ ti cruz. Mi yʌl ili tꞌan: Jesús chꞌoyol bʌ ti Nazaret, ñuc bʌ Yumʌl i chaꞌan israelob. Chʌꞌʌch tsꞌijbubil yaꞌ ti chañelel i jol.

20 Cabʌl israelob tiꞌ qꞌueleyob chʌ bʌ tsꞌijbubil como lʌcꞌʌl Jerusalén baꞌ tiꞌ jocꞌchocoyob ti cruz yicꞌot tsꞌijbubil tꞌan ti uxchajp tꞌan tyac, tiꞌ tꞌan hebreojob yicꞌot ti griego yicꞌot ti latín.

21 Jin chaꞌan ñuc bʌ curajob i chaꞌan bʌ israelob ti majliyob i suben Pilato: Mach a tsꞌijbun: Ñuc bʌ Yumʌl i chaꞌan israelob. Cheꞌ yom a tsꞌijbun: Tiꞌ subu i bʌ ti ñuc bʌ Yumʌl i chaꞌan israelob, cheꞌet, cheꞌob.

22 Pero Pilato tiꞌ subeyob: Jini tsaꞌix bʌ c tsꞌijbu, chʌꞌʌch mi cʌytyʌl, cheꞌen.

23 Cheꞌ ñac ti ujti i jocꞌchocon Jesús ti cruz jini soldadojob tiꞌ tꞌoxoyob i pislel. Ti chʌnticlelob junlajal tiꞌ tyajayob. Cheꞌ jini, tiꞌ qꞌueleyob pʌl bʌ i bujc mach bʌ baꞌan tsꞌisil. Joy jalʌl jach ti pejtyelel.

24 Cheꞌ jini tiꞌ subeyob i bʌ: Mach lac tsil. Más i cꞌʌjnibal mi lac chaꞌlen yajcaya chaꞌan mi laj qꞌuel majchqui miꞌ chꞌʌm, cheꞌob. Chʌꞌʌch ti tsꞌʌctiyi Tsꞌijbubil bʌ i Tꞌan Dios baꞌ mi yʌl: Tiꞌ pucuyob i bʌ c pislel chaꞌan ti yajcaya. Cheꞌ tsꞌijbubil. Chʌꞌʌch tiꞌ chaꞌle soldadojob.

25 Yaꞌ ti lʌcꞌʌlel i cruzil Jesús yaꞌan i ñaꞌ yicꞌot i yijtsꞌin i ñaꞌ, yicꞌot María i yijñam Cleofas yicꞌot María chꞌoyol bʌ ti Magdala.

26 Jesús tiꞌ qꞌuele i ñaꞌ yicꞌot jini ajcʌntꞌan muꞌ bʌ i wen pꞌuntyʌntyel yaꞌ waꞌal ti i tꞌejl i ñaꞌ. Cheꞌ jini Jesús tiꞌ sube i ñaꞌ: Xꞌixic, jini yaꞌ bʌ waꞌal ti a tꞌejl laꞌ ajnic cheꞌ bajcheꞌ a walobil, cheꞌen.

27 Cheꞌ jini tiꞌ sube jini juntiquil ajcʌntꞌan i chaꞌan: Cʌñʌtyan c ñaꞌ cheꞌ bajcheꞌ mi a ñaꞌ, cheꞌen. Ti jin jach bʌ qꞌuin tiꞌ pʌyʌ ochel i ñaꞌ Jesús ti yotyot jini ajcʌntꞌan.

28 Cheꞌ ti ujti i yʌleꞌ bajcheꞌ jini, Jesús tiꞌ ñaꞌtyʌ tsaꞌix tsꞌʌctiyi pejtyelel chʌ bʌ yom tyac. Chaꞌan mi tsꞌʌctiyel bajcheꞌ wʌ tsꞌijbubil tiꞌ tꞌan Dios, Jesús ti yʌlʌ: Tyʌquin c tiꞌ, cheꞌen.

29 Yaꞌan jumpꞌej ucꞌun butꞌul ti paj bʌ vino. Cheꞌ jini juntiquil tiꞌ tsꞌaja chʌyoꞌ jaꞌ ti vino. Tiꞌ cʌchʌ ti i cꞌʌb tyeꞌ hisopo bʌ i cꞌabaꞌ. Ti letsʌ ti tiꞌ Jesús.

30 Jesús tiꞌ tsꞌuꞌu jini paj bʌ vino. Cheꞌ jini ti yʌlʌ: Tsaꞌix luꞌ tsꞌʌctiyi tsaꞌ bʌ tyʌliyon c chaꞌlen, cheꞌen. Ti tinle. Ti sajti.

31 Ijcꞌʌl tyo i qꞌuinilel pascua cheꞌ ñac ti sajti Jesús. Jini pascua ñoj ñuc bʌ i qꞌuinilel cꞌaj oj i chaꞌan israelob. Mach yomob cheꞌ yaꞌ tyo añob ti cruz jini uxtiquil cheꞌ ti qꞌuin. Jin chaꞌan tiꞌ cꞌajtibeyob Pilato chaꞌan i xicꞌ soldadojob i xulben i tseñecꞌ ti yuxticlelob chaꞌan sajtic ti más ora jach yicꞌot chaꞌan miꞌ chꞌʌmob majlel chꞌujlelʌl.

32 Cheꞌ jini, soldadojob tiꞌ xulbeyob i tseñecꞌ jini winic am bʌ ti ñaxan bʌ cruz yicꞌot jeꞌel jini am bʌ ti junwejl baꞌan Jesús.

33 Pero cheꞌ ñac ti cꞌotiyob yaꞌ baꞌan Jesús ti yilʌyob cheꞌ sajtyemix. Jin chaꞌan machꞌan tiꞌ xulbeyob i tseñecꞌ.

34 Pero aunque sajtyemix Jesús, juntiquil soldado tiꞌ jeqꞌue ti yebal i chꞌiꞌlat Jesús ti lanza. Ti waꞌ loqꞌui i chꞌichꞌel yicꞌot jaꞌ.

35 Joñon chʌncol bʌ c chaꞌ sub jini tsaꞌ bʌ c yoque ilʌ. Melelʌch c tꞌan. Cujil isujm ñoj melel bʌ tꞌan chʌncol bʌ c subeñetla. Chʌncol c subeñetla chaꞌan laꞌ chꞌujbin jeꞌel.

36 Chʌꞌʌch ti ujti tyac chaꞌan mi tsꞌʌctiyel Tsꞌijbubil bʌ i Tꞌan Dios baꞌ mi yʌl: Machꞌan mi quejel i xulbeñob mi juntsꞌijtic i bʌquel. Cheꞌ wʌ tsꞌijbubil.

37 An yambʌ tꞌan ti Tsꞌijbubil bʌ i Tꞌan Dios jeꞌel baꞌ mi yʌl: Mi quejel i chaꞌ qꞌuelob jini tsaꞌ bʌ i jeqꞌueyob. Cheꞌ wʌ tsꞌijbubil ti ñoj oniyix.

38 Cheꞌ ñac sajtyemix Jesús, jini José chꞌoyol bʌ ti Arimatea ti majli baꞌan Pilato chaꞌan i cꞌajtiben loqꞌuel i bʌcꞌtyal Jesús chaꞌan i chꞌujñan. Pilato ti yʌcꞌʌ i tꞌan. Cheꞌ jini José ti majli i chꞌʌm i bʌcꞌtyal Jesús. Jini José jiñʌch juntiquil tsaꞌ bʌ i tsʌcle Jesús jeꞌel pero ti mucul jach chaꞌan ti caj i bʌcꞌñan i piꞌʌlob israeloꞌ bʌ.

39 Ti cꞌoti Nicodemo jeꞌel yaꞌ baꞌ ti sajti Jesús. Jiñʌch jini tsaꞌ bʌ ñaxan cꞌoti i pejcan Jesús ti acꞌbʌlel. Tiꞌ chꞌʌmʌ tyʌlel cheꞌ bajcheꞌ treinta kilos chʌbʌcña bʌ pimel tyac mirra bʌ i cꞌabaꞌ. Xʌcꞌtyubil yicꞌot yambʌ pimel áloes bʌ i cꞌabaꞌ.

40 José yicꞌot Nicodemo tiꞌ juꞌsʌbe i bʌcꞌtyal Jesús. Tiꞌ bʌcꞌʌyob ti bʌjqꞌuil xʌcꞌtyʌbilix yicꞌot chʌbʌcña bʌ pimel tyac. I tyʌlel miꞌ chaꞌleñob israelob chaꞌan i chajpañob chꞌujlelʌl chaꞌan i chꞌujñan.

41 Yaꞌ baꞌ tiꞌ tsʌnsʌyob Jesús ti cruz yaꞌan jumpejt pʌcꞌʌbʌl. Yaꞌ ti pʌcꞌʌbʌl yaꞌan jumpꞌej tsijiꞌ bʌ i muconibʌl piquil bʌ ti mal colem tyun. Max tyo baꞌan majch ti chꞌujñʌnti yaꞌi.

42 Quejel tyo mucꞌ i qꞌuinilel cꞌaj oj chaꞌan israelob. Jin chaꞌan José yicꞌot Nicodemo tiꞌ chꞌujñʌ i bʌcꞌtyal Jesús yaꞌ ti mal muconibʌl como lʌcꞌʌl an.