2 Cʌchʌl tiꞌ pʌyʌyob majlel. Ti yʌcꞌʌyob tiꞌ wenta ñuc bʌ yumʌl Poncio Pilato bʌ i cꞌabaꞌ.

3 Cheꞌ ñac jini Judas, jini tsaꞌ bʌ yʌcꞌʌ Jesús tiꞌ cꞌʌb i contrajob, ti yilʌ chaꞌan mi quejel i yʌcꞌob ti sajtyel Jesús, ñoj chꞌʌjyem ti queji yubin. Tiꞌ qꞌuextyʌ i pensal chaꞌan jini tsaꞌ bʌ i chaꞌle. Tiꞌ jopꞌo i sutquibeñob jini treinta sʌsʌc tyaqꞌuin tsaꞌ bʌ i yʌqꞌue ñuc bʌ curajob yicꞌot xñoxob añoꞌ bʌ i yeꞌtyel.

4 Tiꞌ subeyob: Tic tyaja c mul chaꞌan ti cʌcꞌʌ ti sajtyel juntiquil machꞌʌ baꞌan i mul, cheꞌen. Pero tiꞌ jacꞌʌyob: ¿Chucoch lojon c chaꞌan maꞌ wʌl? A bajñel a wenta jach a bʌ, cheꞌob.

5 Cheꞌ jini, Judas tiꞌ choco jini tyaqꞌuin ti lum yaꞌ tiꞌ mal templo. Ti loqꞌui majlel. Tiꞌ jichꞌ cʌchʌ i bʌ. Ti sajti.

6 Jini ñuc bʌ curajob tiꞌ lotyoyob jini tyaqꞌuin. Ti yʌlʌyob: Mach wen mi la cotsan ti yajnib ofrenda como jiñʌch i tyojol winic chaꞌan ti ajqꞌui ti sajtyel, cheꞌob.

7 Ti wiꞌil tiꞌ lajayob i tꞌan chaꞌan i cꞌʌñeꞌ jini tyaqꞌuin chaꞌan i mʌñeꞌ lum baꞌ chꞌujbi i chꞌujñʌntyel ñumel jach bʌ mucꞌ bʌ quixtyañujob tsaꞌ bʌ sajti yaꞌ baꞌañob. Mi pejcʌntyel jini lum ti Campo del Alfarero. Jini yom i yʌl i lum ajmel pꞌejt.

8 Pero cꞌʌlʌ wale iliyi mi pejcantyel jini lum ti lum mʌñʌl bʌ ti tyaqꞌuin i tyojol winic.

9 Chʌꞌʌch ti tsꞌʌctiyi i tꞌan jini tsaꞌ bʌ xiqꞌui yʌleꞌ Dios ti ñoj oniyix Jeremías bʌ i cꞌabaꞌ. Ti yʌlʌ: Tiꞌ chaꞌ chꞌʌmʌyob jini treinta sʌsʌc tyaqꞌuin, jiñʌch i tyojol tsaꞌ bʌ i wʌ alʌyob israelob muꞌ bʌ i yʌcꞌob chaꞌan i tyojol juntiquil winic.

10 Tiꞌ cꞌʌñʌyob chaꞌan i mʌn lum muꞌ bʌ i pejcʌntyel tiꞌ lum ajmel pꞌejt, cheꞌ bajcheꞌ tiꞌ subeyon lac Yum. Cheꞌ ti yʌlʌ Jeremías.

11 Ti pʌjyi majlel Jesús ti i tyojlel Pilato. Tiꞌ cꞌajtibe Jesús: ¿Jatyet ba ñuc bʌ yumʌlet i chaꞌan israelob? cheꞌen. Jesús tiꞌ jacꞌʌ: Melelʌch bajcheꞌ maꞌ wʌl, cheꞌen.

12 Cheꞌ ñac jini ñuc bʌ curajob yicꞌot xñoxob añoꞌ bʌ i yeꞌtyel baꞌan israelob tiꞌ jopꞌbeyob i mul Jesús, machꞌan chʌ bʌ yes tiꞌ saj jacꞌʌ Jesús.

13 Cheꞌ jini, ti yʌlʌ Pilato: ¿Machꞌa baꞌan maꞌ wubin pejtyel chʌ bʌ yes chʌncol i yʌlob ti a contra? cheꞌen.

14 Pero chꞌuj ñʌchꞌʌl Jesús. Maꞌ chʌ bʌ ti yʌlʌ. Tyoj bʌcꞌñʌjel ti queji yubin jini ñuc bʌ yumʌl.

15 I tyʌlelʌch cheꞌ ti yorojlel i qꞌuiñelel pascua jini ñuc bʌ yumʌl mi yʌcꞌ ti colel juntiquil cʌchʌl bʌ winic. Mi yʌqꞌuen quixtyañujob i yajcan majchqui mi cojlel.

16 Yaꞌ cʌchʌl juntiquil Barrabás bʌ i cꞌabaꞌ. Wen cʌñʌl chaꞌan ti i simaronlel.

17 Cheꞌ yaꞌ muchꞌquibilob quixtyañu Pilato tiꞌ cꞌajtibeyob: ¿Majchqui laꞌ wom mij colbeñetla? ¿Jim ba Barrabás o jim ba Jesús muꞌ bʌ i pejcʌntyel ti Cristo jini yajcʌbil bʌ i chaꞌan Dios? cheꞌen.

18 Chʌꞌʌch ti yʌlʌ jini Pilato como yujil isujm tsaꞌ jach i yʌcꞌʌyob Jesús tiꞌ cꞌʌb chaꞌan tiꞌ michꞌ qꞌueleyob Jesús jini ñuc bʌ curajob chaꞌan i ñuclel.

19 Cheꞌ ñac yaꞌ tyo buchul Pilato yaꞌ baꞌ miꞌ chaꞌlen melojel i yijñam tiꞌ choco tyʌlel tꞌan. Ti yʌlʌ: Mach yom chʌ bʌ maꞌ tyumben jini tyoj bʌ winic como sajmʌl tic ñajal an chʌ bʌ bʌbʌqꞌuen bʌ ti quilʌ chaꞌan ti caj jini winic, cheꞌen.

20 Pero jini ñuc bʌ curajob yicꞌot xñoxob añoꞌ bʌ i yeꞌtyel baꞌan israelob tiꞌ wersa xiqꞌuiyob quixtyañujob chaꞌan i cꞌajtin i coleꞌ Barrabás, chaꞌan mi yʌjqꞌuel ti tsʌnsʌntyel Jesús.

21 Jini ñuc bʌ yumʌl tiꞌ chaꞌ cꞌajtibeyob quixtyañujob: Ti jini chaꞌtiquil, ¿majchqui laꞌ wom mi cʌcꞌ ti colel? cheꞌen. Tiꞌ jacꞌʌyob: Barrabás, cheꞌob.

22 Pilato tiꞌ subeyob: ¿Chuquiyes laꞌ wom mic tyumben jini Jesús muꞌ bʌ i pejcʌntyel ti Cristo? cheꞌen. Tiꞌ luꞌ jacꞌʌyob: Laꞌ tsʌnsʌntic ti cruz, cheꞌob.

23 Cheꞌ jini, Pilato tiꞌ subeyob: ¿Chucoch? ¿Chuqui ti simaronlel tiꞌ chaꞌle? cheꞌen. Pero ti chaꞌ quejiyob ti cꞌam bʌ tꞌan. Ti yʌlʌyob: Laꞌ tsʌnsʌntic ti cruz, cheꞌob.

24 Pilato tiꞌ ñaꞌtyʌ maꞌ chʌ bʌ yambʌ chꞌujbi i chaꞌlen como ti utsi quejiyob ti más cꞌam bʌ tꞌan. Cheꞌ jini Pilato tiꞌ xiqꞌui juntiquil i chꞌʌmben tyʌlel jaꞌ. Tiꞌ poco i cꞌʌb tiꞌ tyojlel pejtyelel quixtyañu. Ti yʌlʌ: Mach c wentajic mi ti laꞌ tsʌnsʌ jini winic machꞌʌ baꞌan i mul. Chꞌʌmʌla ti laꞌ bajñel wenta, cheꞌen.

25 Quixtyañujob tiꞌ luꞌ jacꞌʌyob: An ti lojon c wenta yicꞌot i wenta lojon c jiñʌjlel chaꞌan mi sajtyel jini winic, cheꞌob.

26 Cheꞌ jini Pilato ti yʌcꞌʌ ti colel Barrabás. Tiꞌ xiqꞌui ti jatsꞌol Jesús ti pʌchij am bʌ yicꞌot tsucu tyaqꞌuin. Ti yʌcꞌʌ ti cꞌʌb soldadojob chaꞌan i tsʌnsañob ti cruz.

27 Cheꞌ jini i soldadojob ñoj ñuc bʌ yumʌl tiꞌ pʌyʌyob majlel Jesús yaꞌ ti pat i yotyot. Yaꞌ tiꞌ muchꞌquiyob i bʌ junmujchꞌ soldadojob. Yaꞌan Jesús ti xiñil.

28 Tiꞌ jochbeyob i pislel Jesús. Tiꞌ xojbeyob chʌchʌc bʌ.

29 Ti yʌqꞌueyob i corona tiꞌ jol jalʌl bʌ ti chꞌix yicꞌot i tyeꞌel jam ti ñoj bʌ i cꞌʌb. Cheꞌ jini ti lolon ñocleyob ti yebal yoc Jesús cheꞌ bajcheꞌ ñuc i yeꞌtyel tiꞌ pꞌisiyob. Tiꞌ wen wajleyob. Ti yʌlʌyob: Ñoj ñuquet bʌ Yumʌl i chaꞌan israelob, cheꞌob.

30 Tiꞌ tyujbʌyob. Tiꞌ chucuyob i tyeꞌel jam am bʌ ti i cꞌʌb. Tiꞌ cꞌʌñʌ i jatsꞌbeyob i jol Jesús.

31 Cheꞌ ti ujti i wen wajleñob tiꞌ chaꞌ jochbeyob jini chʌchʌc bʌ pislel. Tiꞌ chaꞌ xojbeyob i pislel. Cheꞌ jini tiꞌ pʌyʌyob majlel chaꞌan i tsʌnsan ti cruz.

32 Cheꞌ chʌncol i pʌyob majlel Jesús yaꞌ ti bij chaꞌan i tsʌnsañob ti cruz, yaꞌ tiꞌ tyajayob juntiquil winic Simón bʌ i cꞌabaꞌ chꞌoyol bʌ ti Cirene. Tiꞌ xiqꞌuiyob chaꞌan i qꞌuechben majlel i cruzil Jesús.

33 Yaꞌ ti cꞌotiyob ti jumpꞌej bujtyʌl Gólgota bʌ i cꞌabaꞌ. An i sujmlel i cꞌabaꞌ mi yʌl ti lac tꞌan, cheꞌ yilal bajcheꞌ i bʌquel jolʌl.

34 Tiꞌ jopꞌo i yʌqꞌueñob Jesús i japeꞌ vino xʌcꞌtyʌbil yicꞌot tsꞌac hiel bʌ i cꞌabaꞌ chaꞌan i lʌmben ñoj wocol bʌ muꞌ bʌ quejel yubin cheꞌ mi sajtyel ti cruz. Cheꞌ ñac Jesús tiꞌ mitsꞌtiꞌi, machꞌan tiꞌ japʌ.

35 Cheꞌ ñac ti ujti i jocꞌchocoñob ti cruz Jesús, jini soldadojob tiꞌ pucbeyob i bʌ i pislel. Tiꞌ chaꞌleyob yajcaya chaꞌan i ñaꞌtyañob majchqui i chaꞌan mi majlel. Chʌꞌʌch tiꞌ tsꞌʌctiyi i tꞌan tsaꞌ bʌ xiqꞌui yʌleꞌ Dios ti ñoj oniyix. Ti wʌ alʌ: Mi quejel i chaꞌleñob yajcaya chaꞌan i pucbeñob i bʌ c pislel. Cheꞌ tiꞌ tyaja ti tꞌan Jesús jini tsaꞌ bʌ i xiqꞌui yʌleꞌ Dios ti ñoj oniyix.

36 Yaꞌ ti buchleyob soldadojob chaꞌan i qꞌuelob Jesús.

37 Yaꞌ tsꞌijbubil tꞌan ti cruz ti chañelel i jol chuquiyes i mul. Ti yʌlʌ: Jiñʌch Jesús ñuc bʌ Yumʌl i chaꞌan israelob. Chʌꞌʌch tsꞌijbubil.

38 Yaꞌ tiꞌ jocꞌchocoyob chaꞌtiquil ajxujchꞌob jeꞌel. Juntiquil tiꞌ ñoj Jesús, juntiquil tiꞌ tsꞌej.

39 Jini tsaꞌ bʌ ñumiyob tiꞌ wajleyob. Tiꞌ pʌntsꞌuyob i jol.

40 Ti yʌlʌyob: Jatyet muꞌ bʌ a jemeꞌ templo, muꞌ bʌ a chaꞌ waꞌchocon ti uxpꞌej qꞌuin, cotyan a bʌ. Mi i yalobilet Dios, juben ti cruz, cheꞌob.

41 Chʌꞌʌch jeꞌel jini ñuc bʌ curajob yicꞌot ajcʌntisajob chaꞌan i mandar israelob, yicꞌot fariseojob, yicꞌot xñoxob añoꞌ bʌ i yeꞌtyel baꞌan israelob tiꞌ luꞌ wajleyob. Tiꞌ subuyob i bʌ:

42 Jini tiꞌ cotyʌyob yañoꞌ bʌ pero i bajñel mach mejl i cotyan i bʌ. Jiñʌch ñuc bʌ Yumʌl chaꞌan israelob mi yʌl. Mi jiñʌch, laꞌ jubic ti cruz. Cheꞌ jini mux lac chꞌujbin jeꞌel.

43 Jini tiꞌ subeyonla chaꞌan i yalobilʌch Dios. Ti yʌlʌ chaꞌan Dios miꞌ bej cotyan, cheꞌen. Mi chʌꞌʌchi, laꞌ i cotyan wale iliyi mi yom, cheꞌob. Chʌꞌʌch tiꞌ lolon wajleyob Jesús.

44 Jinic tyo jini ajxujchꞌob yaꞌ bʌ jocꞌolob ti cruz yicꞌot tiꞌ wajleyob jeꞌel.

45 Cheꞌ jini ti icꞌʌ pejtyelel mulawil cꞌʌlʌ xinqꞌuinil cꞌʌlʌ ti och an qꞌuin ti las tres.

46 Cheꞌ yomox tyaj och an qꞌuin, wen cꞌam tiꞌ chaꞌle tꞌan Jesús. Ti yʌlʌ: Elí, Elí, ¿lama sabactani? cheꞌen. Mi yʌl ti lac tꞌan: C Dios, c Dios, ¿chucoch ti a cʌyʌyon? Cheꞌ mi yʌleꞌ ti lac tꞌan.

47 Cheꞌ ñac ti yubiyob chaꞌtiquil uxtiquil yaꞌ bʌ añob, ti yʌlʌyob: Ubinla, chʌncox i pʌyeꞌ tyʌlel Elías, jini tsaꞌ bʌ xiqꞌui yʌleꞌ Dios ti ñoj oniyix, cheꞌob.

48 Juntiquil jini yaꞌ bʌ añob ti waꞌ majli ti ajñel chaꞌan i chꞌʌm tyʌlel chʌyoꞌjaꞌ. Tiꞌ tsꞌaja ti paj bʌ vino. Cheꞌ jini tiꞌ cʌchʌ ti niꞌ tye. Ti letsi baꞌan Jesús chaꞌan i tsꞌuꞌeꞌ.

49 Pero jini yañoꞌ bʌ ti yʌlʌyob: Laꞌ ajnic. Laꞌ lac pijtyan la quilan mi tyal Elías chaꞌan i cotyan, cheꞌob.

50 Wen cꞌam tiꞌ chaꞌ chaꞌle tꞌan Jesús. Cheꞌ jini ti sajti.

51 Ti jin jach bʌ ora jini colem bʌ pisil jocꞌol bʌ ti templo ti tsijli ti xinil cꞌʌlʌ ti chan cꞌʌlʌ ti yebal. Ti ñumi yujquel lum. Ti jejmi colem tyun tyac.

52 Ti jajmi muconibʌl tyac baꞌ chꞌujñʌbil sajtyemoꞌ bʌ. Cabʌl ti chaꞌ cuxtiyi i bʌcꞌtyal tsaꞌ bʌ sajtiyob tsaꞌ bʌ chꞌujbiyob Dios cheꞌ max tyo ti sajtiyob.

53 Ti loqꞌuiyob majlel baꞌ chꞌujñʌbil cheꞌ ñac ti tyejchi loqꞌuel baꞌan sajtyemoꞌ bʌ Jesús. Ti majliyob yaꞌ ti Jerusalén muꞌ bʌ i pejcʌntyel ti chꞌujul bʌ lum, baꞌ cabʌl tiꞌ qꞌueleyob.

54 Yaꞌ waꞌalob chaꞌan i qꞌuelob Jesús jini soldadojob yicꞌot i capitán soldadojob. Chaꞌan tiꞌ qꞌueleyob yujquel lum yicꞌot pejtyel chʌ bʌ ti ujti cheꞌ ti sajti Jesús ti wen quejiyob ti bʌqꞌuen. Ti yʌlʌyob: Melelʌch i Yalobil Dios jini winic, cheꞌob.

55 Yaꞌan cabʌl xꞌixic chʌncol bʌ i ñajtyʌ qꞌuelob chʌ bʌ mi yujtyel. Cꞌʌlʌ Galilea tiꞌ tsʌcleyob tyʌlel Jesús. Tiꞌ weꞌsʌyob. Tiꞌ cotyʌyob.

56 Yaꞌan yicꞌotyob jeꞌel jini María chꞌoyol bʌ ti Magdala yicꞌot María i ñaꞌ Jacobo yicꞌot José yicꞌot yambʌ xꞌixic i ñaꞌ i yalobilob Zebedeo.

57 Cheꞌ iqꞌuix quejel ti cꞌoti juntiquil rico bʌ winic chꞌoyol bʌ ti Arimatea, José bʌ i cꞌabaꞌ. Jini tiꞌ tsʌcle majlel Jesús jeꞌel.

58 Jini ti majli yaꞌ baꞌan Pilato chaꞌan i cꞌajtiben i bʌcꞌtyal Jesús. Pilato tiꞌ xiqꞌui soldadojob chaꞌan i yʌqꞌueꞌ.

59 José tiꞌ juꞌsʌ Jesús ti cruz. Tiꞌ bʌcꞌʌ ti sʌc bʌ bʌjqꞌuil.

60 Tiꞌ chꞌujñʌ yaꞌ ti tsijiꞌ bʌ muconibʌl piqꞌuil bʌ ti mal colem tyun. I bajñel i chaꞌan José jini muconibʌl. Max tyo baꞌan majch ti chꞌujñʌnti yaꞌi. Cheꞌ jini tiꞌ ñolqꞌui majlel colem tyun chaꞌan i mʌjquil i tiꞌ baꞌ ti chꞌujñʌnti. Cheꞌ jini ti majli José.

61 Yaꞌañob María chꞌoyol bʌ ti Magdala yicꞌot jini yambʌ María buchulob yaꞌ ti tyojel muconibʌl.

62 Ti yijcꞌʌlel cheꞌ tsaꞌix ñumi i qꞌuinilel cheꞌ i tyʌlel ti luꞌ chajpʌyob chʌ bʌ yes jach mi quejel i cꞌʌñob cheꞌ ti qꞌuinilel cꞌaj oj, jini ñuc bʌ curajob yicꞌot fariseojob ti majliyob i pejcañob Pilato.

63 Ti yʌlʌyob: Ñuc bʌ yumʌlet, chʌncol lojon c chaꞌ cꞌajtisan chʌ bʌ ti yʌlʌ jini ajlot bʌ winic cheꞌ ñac cuxul tyo. Ti yʌlʌ cheꞌ mi ñumel uxpꞌej qꞌuin mi quejel i tyejchel loqꞌuel baꞌan sajtyemoꞌ bʌ. Cheꞌ ti yʌlʌ.

64 Jin chaꞌan com lojon maꞌ xiqꞌueꞌ majlel soldadojob chaꞌan cꞌʌlʌ uxpꞌej qꞌuin miꞌ wen cʌñʌtyañob i muconibʌl Jesús ame majlicob ajcʌntꞌañob i chaꞌan ti acꞌbʌlel i xujchꞌiñob loqꞌuel i bʌcꞌtyal. Cheꞌ jini ti wiꞌil mi quejel i subeñob quixtyañujob chaꞌan ti tyejchi loqꞌuel baꞌan sajtyemoꞌ bʌ. Cheꞌ jini más tyo leco mi majlel jini lot cheꞌ bajcheꞌ ti ñaxan, cheꞌob.

65 Pilato tiꞌ subeyob: Umbaꞌan soldadojob bajcheꞌ ti laꞌ cꞌajti. Cucula. Wen cʌñʌtyanla jini muconibʌl bajcheꞌ jach laꞌ wom, cheꞌen.

66 Ti majliyob. Tiꞌ wen ñupꞌuyob i tiꞌ muconibʌl chaꞌan ñoj tsiquil mi an majch miꞌ tyʌleꞌ. Cheꞌ jini, yaꞌ tiꞌ cʌyʌyob jini soldadojob chaꞌan i cʌñʌtyan jeꞌel.