2 Jini Pilato tiꞌ cꞌajtibe Jesús: ¿Jatyet ba ñuc bʌ yumʌl i chaꞌan israelob? cheꞌen. Jesús tiꞌ jacꞌʌ: Melelʌch bajcheꞌ maꞌ wʌleꞌ, cheꞌen.

3 Jini curajob cabʌl tiꞌ jopꞌbeyob i mul Jesús.

4 Jini Pilato tiꞌ chaꞌ cꞌajtibe: ¿Machꞌa baꞌan chʌ bʌ maꞌ jaqꞌueꞌ? Ubin cabʌl chʌ bʌ tyac mi yʌlob ti a contra, cheꞌen.

5 Jesús machꞌan tiꞌ saj jacꞌʌ. Pilato mach yujil isujm chʌ bʌ och maꞌ tiꞌ saj jacꞌʌ.

6 I tyʌlelʌch cheꞌ i yorojlel qꞌuiñejel pascua Pilato mi yʌqꞌueꞌ ti cojlel juntiquil cʌchʌl bʌ, majchical jach muꞌ bʌ i cꞌajtin jini quixtyañujob.

7 Yaꞌan ti cʌchonibʌl yicꞌot stsʌnsajob tsaꞌ bʌ i contrajiyob gobierno, juntiquil Barrabás bʌ i cꞌabaꞌ.

8 Ti tyʌli quixtyañujob i cꞌajtiben Pilato i chaꞌlen bajcheꞌ i tyʌlel miꞌ chaꞌlen.

9 Pilato tiꞌ cꞌajtibeyob: ¿Laꞌ wom ba mic colbeñetla jini muꞌ bʌ laꞌ wʌl ti ñuc bʌ yumʌl i chaꞌan israelob? cheꞌen.

10 Como Pilato yujil isujm tsaꞌ jach i yʌcꞌʌyob Jesús tiꞌ cꞌʌb chaꞌan jach tiꞌ michꞌleyob jini ñuc bʌ curajob chaꞌan i ñuclel Jesús.

11 Pero jini ñuc bʌ curajob tiꞌ wersa xiqꞌui quixtyañujob chaꞌan mi cꞌajtiben Barrabás chaꞌan mi cojlel.

12 Pilato tiꞌ chaꞌ subeyob: ¿Cheꞌ jini chuqui laꞌ wom c tyumben iliyi muꞌ bʌ laꞌ wʌl ti ñuc bʌ yumʌl chaꞌan israelob? cheꞌen.

13 Cꞌam tiꞌ chaꞌ alʌyob: Laꞌ tsʌnsʌntic ti cruz, cheꞌob.

14 Pilato tiꞌ subeyob: ¿Chucoch? ¿Chuquiyes ti simaronlel tiꞌ chaꞌle? cheꞌen. Ti chaꞌ quejiyob ti cꞌam bʌ tꞌan: Laꞌ tsʌnsʌntic ti cruz, cheꞌob.

15 Pilato yom i chaꞌlen bajcheꞌ miꞌ mulan quixtyañujob. Jin chaꞌan tsʌꞌʌch i yʌcꞌʌ ti colel Barrabás. Cheꞌ ti ujti i yʌcꞌ ti jatsꞌol Jesús ti pʌchij ti yʌqꞌueyob tiꞌ cꞌʌb soldadojob chaꞌan i tsʌnsañob ti cruz.

16 Jini soldadojob yaꞌ tiꞌ pʌyʌyob majlel Jesús tiꞌ pat i yotyot ñuc bʌ yumʌl. Tiꞌ pʌyʌyob tyʌlel ti junmujchꞌlelob jini soldadojob.

17 Tiꞌ xojbeyob icꞌpucꞌan bʌ i pislel Jesús cheꞌ bajcheꞌ tiꞌ xojoyob ñuc bʌ yumʌlob ti ñoj oniyix. Ti yʌqꞌueyob i corona tiꞌ jol jalʌl bʌ ti chꞌix.

18 Jini soldadojob ti queji i wajleñob. Cꞌam ti yʌlʌyob: Ñoj ñuquet bʌ Yumʌl i chaꞌan israelob, cheꞌob.

19 Tiꞌ jatsꞌbeyob i jol ti i tyeꞌel jam. Tiꞌ tyujbʌyob. Ti ñocleyob cheꞌ bajcheꞌ colem i yeꞌtyel tiꞌ pꞌisiyob.

20 Cheꞌ ti ujti i wen wajleñob tiꞌ chaꞌ jochbeyob pislel icꞌpucꞌan bʌ i tsꞌijbal. Tiꞌ chaꞌ xojbeyob i pislel. Tiꞌ pʌyʌyob majlel chaꞌan i tsʌnsañob ti cruz.

21 Tiꞌ tsʌtsʌ subeyob juntiquil yaꞌ bʌ an yaꞌi chaꞌan i qꞌuecheꞌ majlel i cruzil Jesús. Jiñʌch Simón bʌ i cꞌabaꞌ, yaꞌ chꞌoyol ti yambʌ pañimil Cirene bʌ i cꞌabaꞌ, cꞌotyel mucꞌ ti matyeꞌel. Jiñʌch i tyat Alejandro yicꞌot Rufo.

22 Yaꞌ tiꞌ pʌyʌyob majlel Jesús ti jumpꞌej bujtyʌl Gólgota bʌ i cꞌabaꞌ. An i sujmlel i cꞌabaꞌ mi yʌl ti lac tꞌan, cheꞌ yilal bajcheꞌ i bʌquel jolʌl.

23 Tiꞌ jopꞌo i yʌqꞌueñob Jesús i japeꞌ vino xʌcꞌtyʌbil yicꞌot tsꞌac mirra bʌ i cꞌabaꞌ. Pero machꞌan tiꞌ japʌ.

24 Yaꞌ tiꞌ jocꞌchocoyob ti cruz. Tiꞌ pucbeyob i bʌ i pislel. Tiꞌ chaꞌleyob yajcaya chaꞌan i ñaꞌtyañob majchqui i chaꞌañob mi majlel.

25 Ti las nueve ti sʌcꞌan ti jocꞌchocoyob ti cruz.

26 Yaꞌ tsꞌijbubil ti chañelel i jol chuquiyes i mul. Ti yʌlʌ: Jiñʌch ñuc bʌ yumʌl i chaꞌan israelob, cheꞌ tsꞌijbubil.

27 Yaꞌ tiꞌ jocꞌchocoyob chaꞌtiquil ajxujchꞌob yicꞌot. Juntiquil an tiꞌ ñoj Jesús, juntiquil an tiꞌ tsꞌej.

28 Cheꞌ jini, ti tsꞌʌctiyi Tsꞌijbubil bʌ i Tꞌan Dios baꞌ mi yʌleꞌ: Ti tsijqui yicꞌotyob jini simaroñoꞌ bʌ. Cheꞌ wʌ tsꞌijbubil.

29 Jini yaꞌ bʌ ti ñumiyob tiꞌ wajleyob. Tiꞌ pʌntsꞌʌyob i jol. Ti yʌlʌyob: Aja cheꞌi, jini muꞌ bʌ i jemeꞌ templo muꞌ bʌ i chaꞌ waꞌchocon ti uxpꞌej jach qꞌuin:

30 Cotyan a bʌ. Juben ti cruz, cheꞌob.

31 Chʌꞌʌch jeꞌel jini ñuc bʌ curajob yicꞌot ajcʌntisajob chaꞌan i mandar israelob tiꞌ wajleyob. Tiꞌ subeyob i bʌ: Jini tiꞌ cotyʌ yañoꞌ bʌ pero i bajñel mach mejl i cotyan i bʌ, cheꞌob.

32 Mi jiñʌch Cristo jini yajcʌbil bʌ, mi jiñʌch ñuc bʌ yumʌl i chaꞌan israelob, laꞌ jubic ti cruz wale iliyi, cheꞌ jini mux lac chꞌujbin. Cheꞌ ti yʌlʌyob. Jinic tyo jini yaꞌ bʌ jocꞌolob ti cruz tiꞌ wajleyob Jesús jeꞌel.

33 Ti xinqꞌuinil ti icꞌʌ mulawil cꞌʌlʌl ti och an qꞌuin ti las tres.

34 Cheꞌ ti och an qꞌuin Jesús wen cꞌam tiꞌ chaꞌle tꞌan. Ti yʌlʌ: Eloi, Eloi, ¿lama sabactani? cheꞌen. Mi yʌl ti lac tꞌan: C Dios, c Dios, ¿chucoch ti a cʌyʌyon? cheꞌ mi yʌl ti lac tꞌan.

35 Cheꞌ ñac ti yubiyob chaꞌtiquil uxtiquil yaꞌ bʌ waꞌalob ti yʌlʌyob: Ubinla, chʌncox i pʌyeꞌ tyʌlel Elías tsaꞌ bʌ xiqꞌui i yʌleꞌ Dios, cheꞌob.

36 Juntiquil ti majli ti ajnel chaꞌan i yotsan vinagre yaꞌ ti chʌyoꞌ jaꞌ. Tiꞌ cʌchʌ ti ñiꞌ tyam bʌ tyeꞌ. Ti yʌqꞌue Jesús chaꞌan i tsuꞌeꞌ. Ti yʌlʌ: Pijtyanla. Laꞌ la quilan mi tyal Elías chaꞌan i juꞌsan ti cruz, cheꞌen.

37 Wen cꞌam tiꞌ chaꞌle tꞌan. Cheꞌ jini ti sajti.

38 Jini colem pisil jocꞌol bʌ ti templo ti tsijli ti xinil cꞌʌlʌl ti chan cꞌʌlʌl ti yebal.

39 Yaꞌ waꞌal tiꞌ tyojel i wut Jesús juntiquil capitán am bʌ tiꞌ wenta cien soldadojob i chaꞌan romanojob. Cheꞌ ñac ti yubi bajcheꞌ tiꞌ chaꞌle cꞌam bʌ tꞌan Jesús yicꞌot ti yilʌ bajcheꞌ ti sajti Jesús, ti yʌlʌ: Melelʌch ili winic i Yalobilʌch Dios. Cheꞌ ti yʌlʌ jini capitán.

40 Yaꞌ añob jeꞌel chaꞌtiquil uxtiquil xꞌixicob chʌncol i ñajtyʌ qꞌuelob chʌ bʌ mi yujtyel. Yaꞌan María chꞌoyol bʌ ti Magdala yicꞌot María i ñaꞌ Jacobo muꞌ bʌ i pejcʌntyel ti ijtsꞌiñʌl bʌ; jiñʌch i ñaꞌ José yicꞌot Salomé.

41 Cheꞌ ñac yaꞌ tyo añob ti Galilea jini xꞌixicob, tiꞌ tsʌcleyob majlel Jesús. Tiꞌ weꞌsʌyob. Yaꞌ añob jeꞌel yambʌ cabʌl xꞌixicob tsaꞌ bʌ i tsʌcleyob tyʌlel Jesús cꞌʌlʌ ti Jerusalén.

42 Tsaꞌix pꞌʌjqui qꞌuin, i qꞌuinilel bʌ cheꞌ miꞌ chajpañob chʌ bʌ yes jach mi quejel i cꞌʌñob cheꞌ ti yijcꞌʌlel cheꞌ ti qꞌuinilel cꞌaj oj.

43 Ti tyʌli José chꞌoyol bʌ ti lum Arimatea bʌ i cꞌabaꞌ. Jiñʌch juntiquil am bʌ ñuc bʌ yeꞌtyel ti comité Junta Suprema bʌ i cꞌabaꞌ. Jini José chʌncol i pijtyan i yumintyel Dios jeꞌel. Tiꞌ chꞌejlisʌ i bʌ chaꞌan i majlel baꞌan Pilato i cꞌajtiben i bʌcꞌtyal Jesús.

44 Tsijcꞌ cheꞌ i pusicꞌal Pilato cheꞌ ñac ti yubi sajtyemix Jesús. Tiꞌ pʌyʌ tyʌlel i capitán soldadojob chaꞌan i cꞌajtiben mi melelʌch.

45 Jini capitán ti yʌlʌ chaꞌan melelʌch. Cheꞌ jini, Pilato ti yʌqꞌue i chꞌʌmeꞌ majlel i bʌcꞌtyal Jesús jini José.

46 Cheꞌ jini José tiꞌ mʌñʌ jumpꞌojch i bʌjqꞌuil. Tiꞌ juꞌsʌ Jesús yaꞌ ti cruz. Tiꞌ bʌcꞌʌ ti bʌjqꞌuil. Yaꞌ tiꞌ chꞌujñʌ yaꞌ ti muconibʌl melel bʌ ti malil colem tyun. Cheꞌ jini, ti ñolqꞌui majlel wechel bʌ colem tyun chaꞌan i mʌjquil i tiꞌ muconibʌl.

47 Jini María chꞌoyol bʌ ti Magdala yicꞌot María i ñaꞌ José tiꞌ qꞌueleyob baꞌ ti chꞌujñʌnti Jesús.