Ti chaꞌ tyejchi loqꞌuel Jesús baꞌan sajtyemoꞌ bʌ
16
Cheꞌ ñac ti ñumi i yorojlel cꞌaj oj jini María chꞌoyol bʌ ti Magdala yicꞌot María i ñaꞌ Jacobo yicꞌot Salomé tiꞌ mʌñʌyob yowocña bʌ pimel perfume i wentyʌlel chaꞌan mi majlelob i yʌcꞌob tiꞌ bʌcꞌtyal Jesús tsaꞌ bʌ sajti. I tyʌlelʌch cheꞌ tiꞌ chaꞌleyob muquejel israelob.2 Cheꞌ ti wen sʌcꞌan ti ñaxan bʌ qꞌuin ti semana ti majliyob ti muconibʌl. Chʌncol i pasel qꞌuin ti cꞌotiyob.
3 Cheꞌ ñac yaꞌ tyo añob ti bij chʌncol i subeñob i bʌ: ¿Majchqui mi quejel i locꞌsʌbeñonla jini wechel bʌ colem tyun yaꞌ bʌ an tiꞌ tiꞌ muconibʌl? cheꞌob.
4 Ti queji i yilañob tsaꞌix locꞌsʌnti jini tyun. Yoque colem jini tyun.
5 Ti ochiyob yaꞌ ti mali baꞌ chꞌujñʌbil Jesús. Ti yilayob yaꞌ buchul juntiquil alob yaꞌ tiꞌ ñoj. Xojol i chaꞌan pʌl bʌ i bujc, yoque sʌsʌc bʌ. Tyoj bʌcꞌñʌjelob ti yilʌyob.
6 Jini alob tiꞌ subeyob: Mach laꞌ chaꞌlen bʌqꞌuen. Chʌncol laꞌ sʌclan Jesús chꞌoyol bʌ ti Nazaret jini tsaꞌ bʌ i tsʌnsʌyob ti cruz. Tsaꞌix chaꞌ tyejchi. Machꞌanix wʌꞌ ani. Qꞌuelela wʌꞌi baꞌ tiꞌ sʌtsꞌ chocoyob.
7 Cucula. Suben ajcʌntꞌañob i chaꞌan Jesús yicꞌot Pedro. Yaꞌ mi quej i ñaxan majlel Jesús i pijtyañetla yaꞌ ti Galilea. Yaꞌ mi quej laꞌ wilan chʌꞌʌch bajcheꞌ tiꞌ subetla wajali, cheꞌ ti yʌlʌ jini alob.
8 Cheꞌ jini ti loqꞌuiyob ti ajñel yaꞌ ti muconibʌl. Tsitsiñayob ti bʌqꞌuen. Machꞌan majch tiꞌ subeyob como mucꞌob ti wen bʌqꞌuen.
Jesús tiꞌ pʌsʌ i bʌ baꞌan María chꞌoyol bʌ ti Magdala
9 Cheꞌ ñac ti chaꞌ tyejchi loqꞌuel baꞌan sajtyemoꞌ bʌ Jesús ti ñaxan bʌ qꞌuin ti semana cheꞌ yomox sʌcꞌan, ñaxan ti yilʌ María chꞌoyol bʌ ti Magdala. Jiñʌch tsaꞌ bʌ i chocbe loqꞌuel Jesús siete xibajob.
10 Jini María chꞌoyol bʌ ti Magdala ti majli i subeñob jini tsaꞌ bʌ i tsʌcleyob ti xʌmbal Jesús. Chꞌʌjyemob. Chʌncolob ti uqꞌuel jini tsaꞌ bʌ i tsʌcleyob Jesús, ti cꞌoti i tyajob María.
11 Cheꞌ ñac ti yubiyob tsaꞌix chaꞌ cuxtiyi Jesús, cheꞌ ñac tsaꞌix i yilʌ María chꞌoyol bʌ ti Magdala machꞌan tiꞌ chꞌujbiyob.
Jesús tiꞌ pʌsʌ i bʌ baꞌan ajcʌntꞌañob i chaꞌan
12 Ti wiꞌil Jesús ti tsictiyi yaꞌ ti bij cheꞌ ñac chʌncol i majlelob chaꞌtiquilob. Mero yʌñʌlix i wut ti yilʌyob.
13 Jini chaꞌtiquil ti chaꞌ sujti i subeñob yañoꞌ bʌ i piꞌʌlob. Chʌꞌʌch jeꞌel machꞌan tiꞌ chꞌujbibeyob i tꞌan.
Tiꞌ xiqꞌuiyob majlel ti subtꞌan yajcʌbiloꞌ bʌ ajsubtꞌañob ñumel
14 Wiꞌil tyo tiꞌ pʌsʌ i bʌ Jesús baꞌan jini oncejob. Yaꞌ chʌncolob ti weꞌel. Tiꞌ wen subeyob chʌ bʌ och machꞌan ti chꞌujbiyob. Tsʌtsob i pusicꞌal como machꞌan tiꞌ chꞌujbiyob mi melel i tꞌan jini tsaꞌ bʌ i yilʌyob cheꞌ ti chaꞌ tyejchi loqꞌuel Jesús baꞌan sajtyemoꞌ bʌ.
15 Tiꞌ subeyob: Cucula tiꞌ pejtyelel mulawil. Subenla ti pejtyelel quixtyañujob jini wen bʌ tꞌan chaꞌan laꞌ cotyʌntyel.
16 Jini muꞌ bʌ i chꞌujbin, muꞌ bʌ i chꞌʌm jaꞌ mi quejel i cotyʌntyel. Pero jini mach bʌ baꞌan miꞌ chꞌujbin wʌ alʌlix mi quejel i majlel i xotꞌ i mul.
17 Mi quej i tsictiyel ñuc bʌ c pꞌʌyʌlel tiꞌ tyojlel muꞌ bʌ i chꞌujbiñon. Jini muꞌ bʌ i cꞌʌn j cꞌabaꞌ mi quejel i chocob loqꞌuel xibajob. Mi quejel i chaꞌleñob tꞌan ti yan tyac bʌ tꞌan.
18 Mi tiꞌ chucuyob lucum tiꞌ cꞌʌb, mi tiꞌ japʌyob am bʌ i venenojlel machꞌan chʌ bʌ mi quejel i tyumbentyel. Mi quejel i yʌcꞌob i cꞌʌb tiꞌ pam i bʌcꞌtyal jini ajcꞌamꞌañob, cheꞌ jini mi lajmelob. Cheꞌ ti yʌlʌ Jesús.
Ti letsi majlel ti panchan Jesús
19 Cheꞌ ti ujti i pejcan ajcʌntꞌañob i chaꞌan , tsaꞌix pʌjyi letsel lac Yum Jesús ti panchan. Yaꞌ ti buchle tiꞌ ñoj Dios chaꞌan tsiquil añʌch i ñuclel.
20 Cheꞌ jini, ti loqꞌuiyob majlel yaꞌi. Tiꞌ subuyob jini wen bʌ tꞌan chaꞌan laj cotyʌntyel ti pejtyelel lum tyac. Lac Yum tiꞌ tyem chaꞌle toñel yicꞌotyob ti i Chꞌujlel. Tiꞌ pʌsʌ melelʌch ili tꞌan cheꞌ ñac tiꞌ tsictisʌ ñuc bʌ i pꞌʌtyʌlel Jesús yicꞌotyob. Amén.