2 Jin chaꞌan jini fariseojob yicꞌot ajcʌntisajob chaꞌan israelob ti queji i tyajeꞌ ti tꞌan Jesús. Ti yʌlʌyob: Ili winic miꞌ pʌyeꞌ ochel xmulilob. Miꞌ chaꞌlen uchꞌel yicꞌotyob. Cheꞌ ti queji i yʌlob.

3 Cheꞌ jini Jesús tiꞌ subeyob ti lajoñel bʌ tꞌan.

4 Ti yʌlʌ: Laꞌ lac poj al cheꞌ bajcheꞌ jini. An juntiquiletla an laꞌ chaꞌan cien tiñʌmeꞌ. Pero tiꞌ sʌtyʌ i bʌ juncojt. ¿Chuqui mi quejel a waꞌ chaꞌlen cheꞌ jini? ¿Mach ba baꞌan maꞌ cʌyeꞌ jini noventa y nueve yaꞌ ti jamilol chaꞌan majliquet a sʌclan jini tsaꞌ bʌ sʌtyʌ i bijlel jintyo maꞌ tyajeꞌ?

5 Cheꞌ maꞌ tyajeꞌ maꞌ qꞌuecheꞌ tyʌlel ti a quejlop. Cꞌajacña a woj maꞌ wubin, cheꞌ jini.

6 Cheꞌ maꞌ cꞌotyel ti a wotyot maꞌ pʌyeꞌ tyʌlel ti pejtyelel utsoꞌ bʌ a wicꞌot yicꞌot jini lʌcꞌʌloꞌ bʌ ti chumtyʌl. Maꞌ subeñob: Yom luꞌ cꞌajacña la coj como tic tyaja c tiñʌmeꞌ tsaꞌ bʌ i sʌtyʌ i bijlel. Cheꞌ ti yʌlʌ Jesús ti lajoñel bʌ tꞌan.

7 Ti yʌlʌ jeꞌel: Mic subeñetla chaꞌan más cꞌajacñayob i yoj mi quejel i yubiñob jini añoꞌ bʌ ti panchan cheꞌ an juntiquil xmulil muꞌ bʌ i qꞌuextyan i pensal i cʌyeꞌ i mul cheꞌ bajcheꞌ cheꞌ an noventa y nueve tyojoꞌ bʌ quixtyañujob machꞌʌ baꞌan ti yotsʌyob i mul. Cheꞌ ti yʌlʌ Jesús.

8 Ti yambʌ lajoñel bʌ tꞌan Jesús ti yʌlʌ: Laꞌ lac poj al: An juntiquil xꞌixic am bʌ diez plata bʌ tyaqꞌuin. Tiꞌ sʌtyʌ jumpꞌej. ¿Machꞌa baꞌan mi quejel i tsuqꞌueꞌ cas, miꞌ wen misun i yotyot? Miꞌ chʌc bej sʌclan cꞌʌlʌ jintyo miꞌ tyajeꞌ.

9 Cheꞌ miꞌ tyajeꞌ miꞌ pʌyeꞌ tyʌlel jini utsoꞌ bʌ yicꞌot, yicꞌot lʌcꞌʌloꞌ bʌ ti chumtyʌl. Miꞌ subeñob: Yom luꞌ cꞌajacña la coj como tsaꞌix c tyaja c tyaqꞌuin tsaꞌ bʌ c sʌtyʌ. Cheꞌ mi quejel i yʌleꞌ jini xꞌixic. Cheꞌ tiꞌ chaꞌle lajoñel bʌ tꞌan Jesús.

10 Ti yʌlʌ jeꞌel: Mic subeñetla chaꞌan chʌꞌʌch mi quejel i yubin cꞌajacña bʌ i yoj jini ajtroñelob i chaꞌan Dios chꞌoyol bʌ ti panchan cheꞌ miꞌ qꞌuextyan i pensal i cʌyeꞌ i mul juntiquil xmulil. Cheꞌ ti yʌlʌ Jesús.

11 Jesús ti yʌlʌ jeꞌel: An juntiquil winic an chaꞌtiquil aloꞌ bʌ i yalobil.

12 Jini ijtsꞌiñʌl bʌ tiꞌ sube i tyat: C tyat, tꞌoxbeñon pejtyelel chʌ bʌ an a chaꞌan bajcheꞌ cꞌamel miꞌ tyajon, cheꞌen. Cheꞌ jini i tyat tiꞌ tꞌox yʌqꞌueyob chʌ bʌ an i chaꞌan bajcheꞌ cꞌamel miꞌ tyajob ti jujuntiquil.

13 Cheꞌ ti ñumi chaꞌpꞌej uxpꞌej qꞌuin jini ijtsꞌiñʌl bʌ tiꞌ luꞌ choño chʌ bʌ an i chaꞌan. Cheꞌ jini yicꞌot pejtyelel i tyaqꞌuin ti majli ti ñajt bʌ pañimil baꞌ ti luꞌ cꞌʌñʌ ti pejtyelel tyaqꞌuin chaꞌan bibajax bajcheꞌ tiꞌ chaꞌle.

14 Pero cheꞌ tsaꞌix luꞌ jili ti pejtyelel i tyaqꞌuin, ti queji ti sʌjlel ti pejtyelel chʌ bʌ jach miꞌ cꞌuxob quixtyañujob yaꞌ ti jini pañimil. Cheꞌ jini, jini alob ti queji i yubin wiꞌñal.

15 Cheꞌ jini ti majli i sʌclan toñel yaꞌ baꞌan juntiquil winic. Jini tiꞌ xiqꞌui majlel ti jamilol chaꞌan i cʌñʌtyʌben i chityam.

16 Chaꞌan ñoj wiꞌñal ti yubi yom i cꞌuxeꞌ jini cheꞌ bʌ bajcheꞌ bitsꞌ yilal muꞌ bʌ i yʌqꞌuen i cꞌuxeꞌ chityam. Pero maꞌan majch miꞌ tsꞌin aqꞌuen.

17 Cheꞌ jini ti queji i pensalin: Yaꞌ baꞌan c tyat an cabʌl i yajtoñelob. Wen mi yʌqꞌuentyel i yuchꞌel. Maꞌix mi jilel i yuchꞌel pero wʌꞌi chʌncol c sajtyel ti wiꞌñal.

18 Mi quejel c chaꞌ sujtyel baꞌan c tyat. Mi quejel c suben: C tyat, tsaꞌix c chaꞌle mulil tiꞌ tyojlel Dios yicꞌot ti a tyojlel.

19 Mach bej weñon chaꞌan maꞌ pejcañon ti a walobil. Otsañon cheꞌ bajcheꞌ a wajtoñel jach. Chʌꞌʌch tiꞌ pensali jini alob.

20 Cheꞌ jini ti loqꞌui majlel chaꞌan mi chaꞌ cꞌotyel ti yotyot i tyat. Pero i tyat tiꞌ qꞌuele cheꞌ ñajt tyo i tyʌlel. Tiꞌ wen pꞌuntyʌ. Ti majli ti ajñel i tyaj tyʌlel. Tiꞌ waꞌ meqꞌue. Tiꞌ ñupu.

21 Cheꞌ jini, jini alob tiꞌ sube i tyat: C tyat, tsaꞌix c chaꞌle mulil tiꞌ tyojlel Dios yicꞌot ti a tyojlel. Mach bej weñon chaꞌan maꞌ pejcañon ti a walobil. Cheꞌ ti yʌlʌ jini alob.

22 Pero i tyat tiꞌ sube i yajtoñelob: Chꞌʌmʌ tyʌlel ti saj ora jach jini más wen bʌ pislel. Waꞌ xojbenla i pislel. Aqꞌuenla i sortija. Aqꞌuenla i zapatos, cheꞌen. [Sortija yom i yʌleꞌ mʌpcꞌaꞌ.]

23 Pʌyʌla tyʌlel jini sejel bʌ wacax jini jujpꞌem bʌ. Tsʌnsanla, mi quejel lac chaꞌlen uchꞌel. Mi quejel lac meleꞌ qꞌuiñejel, cheꞌen.

24 Como jini calobil cheꞌ bajcheꞌ sajtyemix pero tsaꞌix chaꞌ cuxtiyi yubil. Cheꞌ bajcheꞌ tiꞌ sʌtyʌ i bijlel pero tsaꞌix lac chaꞌ tyaja. Cheꞌ ti yʌlʌ i tyat jini alob. Tiꞌ wen quejiyob ti qꞌuiñejel.

25 Cheꞌ ñac ti cꞌoti ti yotyot i tyat jini ijtsꞌiñʌl yaꞌ tyo an ti cholel jini ascuñʌl bʌ. Cheꞌ ñac chʌncox i sujtyel ti toñel cheꞌ lʌcꞌʌlix i cꞌotyel ti yotyot ti yubi i tꞌan música yicꞌot son.

26 Cheꞌ jini tiꞌ pʌyʌ juntiquil ajtroñel yaꞌ bʌꞌan. Tiꞌ cꞌajtibe: ¿Chuqui mucꞌob? cheꞌen.

27 Jini ajtroñel ti yʌlʌ: Tsaꞌix juli jini a wijtsꞌin. A tyat tiꞌ xiqꞌui ti tsʌnsʌntyel jini sejel wacax jini jujpꞌem bʌ. Como cꞌocꞌ ti chaꞌ juli a wijtsꞌin, cheꞌen.

28 Pero jini ascuñʌl ti michꞌʌ. Pero chaꞌan mach yom i yochel ti yotyot i tyat ti majli i wersa suben chaꞌan mi yochel majlel.

29 Pero jini ascuñʌl bʌ ti yʌlʌ: A wujil jaypꞌej jab tic wen chaꞌlibeyet a troñel. Machꞌan baꞌ bʌ ora tic saj ñusʌbeyet a tꞌan. Pero machꞌan ti a wʌcꞌon mi juncojtic saj chibu chaꞌan mic meleꞌ qꞌuiñejel yicꞌot jini amigojoꞌ bʌ c chaꞌan, cheꞌen.

30 Pero wale chaꞌan ti chaꞌ cꞌoti jini a walobil tsaꞌ bʌ luꞌ cꞌʌñʌ a tyaqꞌuin ti pejtyelel machꞌʌ wen tsaꞌix a waꞌ tsʌnsʌbe sejel wacax jini jujpꞌem bʌ, cheꞌen.

31 Cheꞌ jini i tyat tiꞌ sube: Pero calobil, beleꞌ wʌch an quicꞌotyet. Ti pejtyelel chʌ bʌ an c chaꞌan luꞌ a chaꞌañʌch jeꞌel, cheꞌen.

32 Pero wale yomʌch lac meleꞌ qꞌuiñejel. Yom cꞌajaña la coj. Como jini a wijtsꞌin cheꞌ bajcheꞌ sajtyemix pero ti chaꞌ cuxtiyi yubil. Cheꞌ bajcheꞌ tiꞌ sʌtyʌ i bijlel pero tsaꞌix lac chaꞌ tyaja. Cheꞌ ti yʌlʌ i tyat.