2 Jesús ti yilʌ chaꞌpꞌej jucub yaꞌ ti i tiꞌ jini colem joyol bʌ jaꞌ. Tsaꞌix loqꞌuiyob ajchuc chʌyob ti i jucub como chʌncox i wutsob i chim.

3 Jesús ti ochi ti jumpꞌej jucub i chaꞌan bʌ Simón. Tiꞌ sube chaꞌan miꞌ tsꞌitya nijcan majlel jucub chaꞌan mero i cʌyob i bʌ. Cheꞌ jini Jesús ti buchle ti jucub. Ti queji i cʌntisan quixtyañujob cheꞌ yaꞌan ti jucub. Quixtyañujob añob ti tiꞌ jaꞌ.

4 Cheꞌ ñac ti ujti ti cʌntisa Jesús tiꞌ sube Simón: Nijcan majlel jucub yaꞌ baꞌ tyam bʌ jaꞌ. Choco ochel laꞌ chim yaꞌ yaꞌi chaꞌan laꞌ chuqueꞌ chʌy, cheꞌen.

5 Simón tiꞌ jacꞌʌ: Maestro, ti lojon c chaꞌle troñel cꞌʌlʌ ti ñumi acꞌbʌlel pero maꞌix chʌ bʌ ti lojon c tyaja. Pero chaꞌan ti a xiqꞌuiyon lojon mux c choqueꞌ ochel c chim, cheꞌ ti yʌlʌ Simón.

6 Cheꞌ ñac tiꞌ chocoyob ochel i chim tiꞌ chucuyob yonlel chʌy jintyo ti queji i tyujquel jini chimol chʌy.

7 Cheꞌ jini tiꞌ pʌsꞌeyob tiꞌ cꞌʌb i piꞌʌlob ti troñel ti yambʌ jucub chaꞌan mi cꞌotyel i cotyañob. Ti cꞌotiyob. Tiꞌ butꞌuyob chaꞌpꞌej jucub ti chʌy. Yomox sujpꞌel ti jaꞌ jini jucub.

8 Cheꞌ ñac ti yilʌ Simón Pedro bajcheꞌ ti ujti tiꞌ ñocchoco i bʌ ti yebal yoc Jesús. Ti yʌlʌ: Loqꞌuen tic tyojlel c Yum como xmulilon, cheꞌ Pedro.

9 Como tyoj bʌcꞌñʌjel Pedro yicꞌot ti pejtyelel yaꞌ bʌ añob yicꞌotyob chaꞌan wen yonlel chʌy tsaꞌ bʌ i chucuyob.

10 Cheꞌ jeꞌel Jacobo yicꞌot Juan i yalobilob Zabedeo i piꞌʌlob ti troñel jini Simón tyoj bʌcꞌñʌjel jeꞌel. Pero Jesús tiꞌ sube Simón: Mach yom a chaꞌlen bʌqꞌuen. Wale jach mi cotsañet chaꞌan a sajcʌbeñon quixtyañu muꞌ bʌ i quejel i chꞌujbiñon, cheꞌen.

11 Cheꞌ jini cheꞌ tsaꞌix cꞌoti yicꞌot i jucub ti tiꞌ lum tiꞌ luꞌ cʌyʌyob chʌ bʌ an i chaꞌan. Tiꞌ tsʌcleyob majlel Jesús.

12 Cheꞌ ñac yaꞌan Jesús ti jumpꞌej lum ti cꞌoti juntiquil winic am bʌ chʌ bʌ yes pasem ti pʌchʌlel muꞌ bʌ i pʌcꞌmisʌben majlel i bʌcꞌtyal. Cheꞌ ñac ti yilʌ Jesús tiꞌ pʌcchoco i bʌ ti yebal yoc Jesús. Tiꞌ cꞌajti: C Yum, mi a wom chꞌujbiyʌch a lajmisañon. Cheꞌ ti subenti Jesús.

13 Cheꞌ jini Jesús tiꞌ tyʌlbe i cꞌʌb cheꞌ chʌncol i yʌleꞌ: Comʌch. Mic lajmisañet, cheꞌ yʌlol jini winic. Cheꞌ chʌncol tyo ti tꞌan Jesús ti waꞌ lajmi jini pasem bʌ ti pʌchʌlel.

14 Cheꞌ jini Jesús tiꞌ xiqꞌui chaꞌan maꞌan majch miꞌ suben mi junticlec. Tiꞌ sube: Cucux, cheꞌ jach maꞌ majlel a pʌsꞌen a bʌ cura. Yaꞌi maꞌ wʌqꞌuen i majtyan Dios chʌꞌʌch bajcheꞌ ti yʌlʌ Moisés ti mandar chaꞌan mi yilañob tsʌꞌʌch lajmiyet. Cheꞌ ti yʌlʌ Jesús.

15 Pero ti bej más ajli chaꞌan i ñuclel Jesús. Cabʌl quixtyañujob tiꞌ muchꞌquiyob i bʌ chaꞌan i yubibeñob i tꞌan yicꞌot chaꞌan i lajmisʌbentyel i cꞌamꞌan.

16 Pero Jesús ti bajñel majli baꞌ machꞌan quixtyañujob. Yaꞌi tiꞌ mele oración.

17 Junyaj cheꞌ chʌncol ti cʌntisa Jesús yaꞌ buchulob chaꞌtiquil uxtiquil fariseojob yicꞌot ajcʌntisajob chaꞌan i mandar israelob. Chꞌoyolob ti pejtyelel saj lum tyac ti pañimil Galilea bʌ i cꞌabaꞌ yicꞌot loqꞌuem ti Judea bʌ pañimil yicꞌot ti Jerusalén bʌ lum. Ti tsictiyi an i pꞌʌtyʌlel Dios yicꞌot Jesús cheꞌ tiꞌ lajmisʌ ajcꞌamꞌañob.

18 Cheꞌ jini ti cꞌoti chaꞌtiquil uxtiquil winicob. Tiꞌ cuchuyob tyʌlel ti ab juntiquil winic machꞌʌ baꞌan i cꞌʌjnibal yoc i cꞌʌb. Yom i yotsañob ti otyot yaꞌ baꞌan Jesús.

19 Pero machꞌan tiꞌ tyaja bajcheꞌ mi yotsañob chaꞌan cʌlʌx an quixtyañu. Cheꞌ jini ti letsiyob ti pam jini otyot. Tiꞌ locꞌsʌbeyob i xʌñil como pamacña i jol jini otyot. Yaꞌan ti ab jini quixtyañu tiꞌ juꞌsʌbeyob yaꞌ ti mal otyot. Ti cꞌoti ti xiñil yaꞌ baꞌ waꞌal Jesús.

20 Cheꞌ ti yilʌ chʌncol i chꞌujbiñob tiꞌ pusicꞌal, ti queji ti tꞌan Jesús. Tiꞌ sube jini xcꞌamꞌan: Piꞌʌl, ñusʌbilix a mul, cheꞌ ti yʌlʌ Jesús.

21 Cheꞌ jini, ajcʌntisajob chaꞌan i mandar israelob yicꞌot jini junmujchꞌ fariseojob ti queji i pensaliñob: ¿Majchqui jini winic chʌncol jach bʌ i cuyeꞌ i bʌ ti Dios ti i tꞌan? Maꞌan majch chꞌujbi i ñusan mulil. Jini jach Dios, cheꞌob ti i pusicꞌal.

22 Pero Jesús yujil isujm chʌ bʌ chʌncol i bajñel alob ti i pusicꞌal. Tiꞌ subeyob: ¿Chucoch chʌꞌʌch mi laꞌ wʌleꞌ ti laꞌ pusicꞌal?

23 ¿Baqui bʌ más wocol mic suben mi laꞌ wʌl? ¿Wocol ba mic suben ñusʌbilix a mul? ¿Wocol ba mic suben tyejchenix, chaꞌlenix xʌmbal? Cheꞌ ti yʌlʌ Jesús.

24 Wʌꞌʌch mi laꞌ wilan añʌch c pꞌʌtyʌlel chaꞌan mic ñusʌbeñob i mul jini wʌꞌ bʌ añob ti mulawil Joñon i Piꞌʌlon Quixtyañujob, cheꞌ ti yʌlʌ Jesús. Cheꞌ jini tiꞌ sube jini winic machꞌʌ baꞌan i cꞌʌjnibal yoc i cꞌʌb: Mic subeñet, tyejchen. Chꞌʌmʌx majlel a wab. Cucux ti a wotyot, cheꞌ ti yʌlʌ Jesús.

25 Ti ora jach jini machꞌʌ baꞌan i cꞌʌjnibal yoc i cꞌʌb ti waꞌ tyejchi yaꞌ tiꞌ tyojlelob. Tiꞌ chꞌʌmʌ majlel i yab. Ti sujti majlel ti yotyot. Chʌncol i sub i ñuclel lac Yum.

26 Ti pejtyelel tyoj bʌcꞌñʌjelob ti yilʌyob quixtyañu. Ti yʌlʌyob ñucʌch Dios. Añob cabʌl i bʌqꞌuen. Ti yʌlʌyob: Sajmʌl ti la quilʌ tyoj bʌcꞌñʌjelonla yubil, cheꞌob.

27 Ti wiꞌil ti loqꞌui majlel Jesús yaꞌyaꞌi. Ti yilʌ juntiquil xchꞌʌm tyojoñel Leví bʌ i cꞌabaꞌ. Yaꞌ buchul baꞌ miꞌ chaꞌleñob tyojoñel. Jesús tiꞌ sube: Tsʌcleñon majlel, cheꞌen.

28 Cheꞌ jini Leví ti tyejchi. Tiꞌ luꞌ cʌyʌ chʌ bʌ an i chaꞌan. Tiꞌ tsʌcle majlel Jesús.

29 Cheꞌ jini Leví tiꞌ mele colem qꞌuin ti i yotyot chaꞌan Jesús. Yaꞌañob jeꞌel cabʌl añoꞌ bʌ i yeꞌtyel chaꞌan i chꞌʌmob tyojoñel yicꞌot yañoꞌ bʌ. Yaꞌ buchulob ti mesa yicꞌotyob.

30 Pero jini fariseojob yicꞌot ajcʌntisajob chaꞌan i mandar israelob ti queji i tyajob ti tꞌan jini ajcʌntꞌañob i chaꞌan Jesús. Tiꞌ subeyob: ¿Chucoch mi laꞌ chaꞌlen uchꞌel laꞌ wicꞌot muꞌ bʌ i chꞌʌmob tyojoñel yicꞌot yambʌ xmulilob? cheꞌob.

31 Jesús tiꞌ subeyob: Mach i cꞌʌjnibal tsꞌʌcʌntyel jini cꞌocꞌoꞌ bʌ. Jini jach jini cꞌamoꞌ bʌ yom tsꞌʌcʌntyel.

32 Maꞌan ti tyʌliyon c pʌyob jini muꞌ bʌ i lolon alob machꞌʌ baꞌan i mul. Ti tyʌliyon c pʌyob jini muꞌ bʌ i ñatyan i mul chaꞌan i qꞌuextyan i pensal i cʌyob i mul, cheꞌ ti yʌlʌ Jesús.

33 An quixtyañujob chʌncol bʌ i poj cʌyob uchꞌel chaꞌan ti caj tsaꞌ bʌ i chꞌujbiyob. Jini ti queji i cꞌajtibeñob Jesús: ¿Chucoch cabʌl miꞌ cʌñʌtyañob i bʌ yicꞌot cabʌl miꞌ chaꞌleñob oración jini muꞌ bʌ i cʌmbeñob i tꞌan Juan yicꞌotyob muꞌ bʌ i cʌmbeñob i tꞌan fariseojob? Pero jini ajcʌntꞌañob a chaꞌan miꞌ beleꞌ chaꞌleñob uchꞌel. Cheꞌ tiꞌ cꞌajtibeyob Jesús.

34 Jesús tiꞌ jacꞌʌ: ¿Muꞌ ba i chaꞌleñob chꞌajb jini muꞌ bʌ i tyʌlelob i qꞌuelob cheꞌ an qꞌuiñejel cheꞌ mi yujtyel ñujpuñel cheꞌ yaꞌ tyo an yicꞌotyob ili ajñujpuñel? Machꞌan miꞌ poj cʌyob uchꞌel cheꞌ yaꞌ tyo an jini ajñujpuñel.

35 Pero tyal tyo i yorojlel mi pʌjyel loqꞌuel ajñujpuñel tiꞌ tyojel quixtyañujob. Cheꞌ jini mi quejel i chꞌajbañob i bʌ ti yan tyo bʌ qꞌuin, cheꞌ ti yʌlʌ Jesús.

36 Cheꞌ jeꞌel ti yʌlʌ yambʌ lajoñel: Maꞌan majch mi tsileꞌ loqꞌuel tsꞌityaꞌ pisil am bʌ ti tsijiꞌ bʌ i pislel chaꞌan i lʌweꞌ i tsucul pislel. Mi chʌꞌʌch miꞌ chaꞌlen mi yʌcꞌ ti jilel jini tsijiꞌ bʌ i pislel yicꞌot jeꞌel mach wen mi yajñel jini tsijiꞌ bʌ yicꞌot tsucul bʌ i pislel como mi quejel i comꞌan, cheꞌen.

37 Cheꞌ jeꞌel mach yom cojlic ochel ti tsucul pʌchij bʌ yajnib vino cheꞌ chʌncol tyo i mejlel jini vino bʌ lembal. Como jini vino bʌ lembʌl mi yʌcꞌ ti tyojmel jini tsucul pʌchij bʌ yajnib. Cheꞌ jini mi bejquel jini vino. Mi tyojmel yajnib.

38 Jin chaꞌan yom mi yotsañob tsijib vino ti tsijib tyo bʌ yajnib. Cheꞌ jini mi cʌñʌtyʌntyel vino cheꞌ yicꞌot yajnib jeꞌel chaꞌan mach jilic, cheꞌ ti yʌlʌ Jesús.

39 Maꞌan majch yom i japeꞌ tsijib vino mi tsaꞌix i ñaxan japʌ wajalix bʌ mejli bʌ vino como mi yʌleꞌ más sumuc jini wajalix bʌ, cheꞌob. Cheꞌ ti yʌlʌ Jesús.