2 Yaꞌ ti cꞌoti quixtyañujob tsaꞌ bʌ i qꞌuecheyob tyʌlel juntiquil winic machꞌʌ baꞌan i cꞌʌjnibal yoc i cꞌʌb. Tyotsꞌol ti yab tiꞌ qꞌuecheyob tyʌlel. Cheꞌ ñac Jesús ti yilʌ chaꞌan tiꞌ chꞌujbi jini quixtyañujob chaꞌan an i pꞌʌtyʌlel i lajmisan jini cꞌam bʌ, tiꞌ sube jini machꞌʌ baꞌan i cꞌʌjnibal yoc i cꞌʌb: Piꞌʌl, tijicñisan a pusicꞌal. Ñusʌbilix a mul. Cheꞌ ti yʌlʌ Jesús.

3 Cheꞌ jini, yaꞌan chaꞌtiquil uxtiquil ajcʌntisajob chaꞌan i mandar israelob. Ti queji i pensaliñob tiꞌ pusicꞌal: Jini winic chʌncol jach i cuyeꞌ i bʌ ti Dios. Cheꞌ tiꞌ pensaliyob tiꞌ pusicꞌal.

4 Pero yujil isujm Jesús chʌ bʌ chʌncol i bajñel pensaliñob tiꞌ pusicꞌal. Jin chaꞌan tiꞌ subeyob: ¿Chucoch muqꞌuetla ti simaron bʌ pensal? cheꞌen.

5 ¿Baqui bʌ más wocol mic suben mi laꞌ wʌl? ¿Más wocol ba mic suben ñusʌbilix a mul o más wocol ba mic suben, tyejchenix, chaꞌlenix xʌmbal? choꞌon, cheꞌen.

6 Wale mi quej c pʌsꞌeñetla chaꞌan an c pꞌʌtyʌlel chaꞌan mic ñusʌbeñob i mul añoꞌ bʌ ti mulawil, Joñon i Piꞌʌlon bʌ Quixtyañujob. Cheꞌ jini, tiꞌ sube machꞌʌ baꞌan i cꞌʌjnibal yoc i cꞌʌb: Mic subeñet, tyejchen. Chꞌʌmʌx majlel a wab. Cucux ti a wotyot. Cheꞌ ti yʌlʌ Jesús.

7 Jini tsaꞌ bʌ lajmisʌnti yoc i cꞌʌb ti tyejchi. Ti majli ti yotyot.

8 Cheꞌ ñac ti yilʌ quixtyañujob chʌ bʌ ti ujti, ti quejiyob ti bʌqꞌuen. Tiꞌ subeyob i ñuclel Dios como tsiquil tsaꞌix aqꞌuenti quixtyañu i pꞌʌtyʌlel Dios chaꞌan miꞌ lajmisan quixtyañujob.

9 Cheꞌ jini, ti loqꞌui majlel Jesús yaꞌi. Ti yilʌ juntiquil xchꞌʌm tyojoñel Mateo bʌ i cꞌabaꞌ. Yaꞌ buchul baꞌ miꞌ chaꞌleñob tyojoñel. Jesús tiꞌ sube: Tsʌcleñon majlel, cheꞌen. Cheꞌ jini Mateo ti tyejchi. Tiꞌ tsʌcle majlel Jesús.

10 Ti ujti cheꞌ Jesús yicꞌot ajcʌntꞌañob i chaꞌan ti majliyob ti uchꞌel yaꞌ ti yotyot Mateo. Yaꞌan jeꞌel cabʌl xlot bʌ xchꞌʌm tyojoñelob yicꞌot yambʌ quixtyañujob añob i mul. Motin mucꞌob ti uchꞌel.

11 Cheꞌ ñac jini fariseojob tiꞌ qꞌueleyob tiꞌ cꞌajtibeyob ajcʌntꞌañob i chaꞌan Jesús: ¿Bajcheꞌqui isujm cheꞌ miꞌ piꞌleñob ti uchꞌel laꞌ maestro jini xlot bʌ xchꞌʌm tyojoñelob yicꞌot yambʌ xmulilob? Cheꞌ ti yʌlʌyob.

12 Jesús ti yubi bajcheꞌ ti subenti ajcʌntꞌañob i chaꞌan. Jin chaꞌan tiꞌ sube jini fariseojob: Jini cꞌocꞌob bʌ mach cꞌʌjnibal mi tsꞌʌcʌntyel, jin jach jini cꞌamꞌoꞌ bʌ, cheꞌen.

13 Cucuxla. Pensalinla i sujmlel ili tꞌan tiꞌ Tsꞌijbubil bʌ i Tꞌan Dios baꞌ mi yʌleꞌ: Jini com bʌ, jiñʌch chaꞌan mi laꞌ pꞌuntyan laꞌ piꞌʌlob chaꞌan laꞌ wom laꞌ cotyañob. Más wen mij qꞌueleꞌ cheꞌ bajcheꞌ mi laꞌ wʌqꞌueñon pulem bʌ c majtyan. Cheꞌ tsꞌijbubil tiꞌ tꞌan Dios. Cheꞌ ti yʌlʌ Jesús. Machꞌan ti tyʌliyon c pʌyeꞌ muꞌ bʌ i lolon aleꞌ maꞌix i mul. Pero ti tyʌliyon c pʌyeꞌ quixtyañujob añoꞌ bʌ i mul chaꞌan miꞌ qꞌuextyan i pensal i cʌyeꞌ i mul. Cheꞌ ti yʌlʌ Jesús.

14 Jini ajcʌntꞌañob i chaꞌan Juan tsaꞌ bʌ yʌcꞌʌ chꞌʌm jaꞌ ti tyʌliyob yaꞌ baꞌan Jesús. Tiꞌ cꞌajtibe: ¿Bajcheꞌqui isujm chaꞌan joñon lojon yicꞌot fariseojob mi lojon cabʌl c chaꞌlen chꞌajb chaꞌan muꞌ bʌ lojon j cꞌux, muꞌ bʌ lojon cap pero machꞌan baꞌ bʌ ora mi chaꞌleñob chꞌajb ajcʌntꞌañob a chaꞌan? cheꞌob.

15 Jesús tiꞌ subeyob: ¿Muꞌ ba i chaꞌleñob chꞌajb chaꞌan muꞌ bʌ i cꞌuxob, muꞌ bʌ i japob pʌyʌloꞌ bʌ ti qꞌuiñejel ñujpuñel cheꞌ yaꞌ tyo an yicꞌotyob ajñujpuñel, maꞌ wʌl? Machꞌan. Pero tyal tyo i yorojlel mi pʌjyel loqꞌuel ajñujpuñel ti tyojel quixtyañujob. Cheꞌ jini mi quejel i chꞌajbañob i bʌ. Cheꞌ ti yʌlʌ Jesús.

16 Tiꞌ chaꞌle yambʌ lajoñel Jesús. Ti yʌlʌ: Machꞌan majch miꞌ cꞌʌñeꞌ tsꞌijiꞌ bʌ pisil chaꞌan mi lʌjweꞌ tsuculix bʌ i pislel. Mucꞌ jach i chaꞌ tsijlel loqꞌuel jini tsijib tyo bʌ cheꞌ miꞌ comꞌan. Cheꞌ jini más colemix mi loqꞌuel i tsijlemal. Cheꞌ ti yʌlʌ Jesús.

17 Tiꞌ chaꞌle yambʌ lajoñel. Ti yʌlʌ: Mach yom cojlic ochel ti tsucul bʌ pʌjchij bʌ yajnib cheꞌ chʌncol tyo i mejlel vino bʌ lembal. Como jini vino bʌ lembal mi yʌcꞌ ti tyojmel tsucul bʌ pʌchij bʌ yajnib. Mi tyojmel yajnib. Cheꞌ jini mi bejquel. Jin chaꞌan yom mi yotsañob tsijiꞌ bʌ vino ti tsijiꞌ bʌ yajnib. Cheꞌ jini mi cʌñʌtyʌntyel vino yicꞌot yajnib jeꞌel chaꞌan mach jilic. Cheꞌ ti yʌlʌ Jesús.

18 Cheꞌ ñac muꞌ tyo ti tꞌan Jesús chaꞌan jini ujtyel bʌ yʌleꞌ, yaꞌ ti cꞌoti juntiquil ñuc bʌ i yeꞌtyel ti templo israelob. Ti ñocle ti yebal yoc Jesús. Ti yʌlʌ: Ujtyel tyo i sajtyel quixicpꞌeñal. Pero muqꞌuic a tyʌlel a wʌcꞌ a cꞌʌb tiꞌ pam i bʌcꞌtyal, muꞌ tyo i chaꞌ cuxtiyel. Cheꞌ ti yʌlʌ jini ñuc bʌ yeꞌtyel.

19 Cheꞌ jini, Jesús yicꞌot ajcʌntꞌañob i chaꞌan ti loqꞌuiyob majlel yicꞌot jini ñuc bʌ i yeꞌtyel.

20 Cheꞌ ñac an ti bij Jesús yaꞌ ti tyʌli juntiquil cꞌam bʌ xꞌixic. Cꞌʌlʌ doce años maꞌ ti lajmi ti loqꞌuel i chꞌichꞌel. Ti tyʌli jini xꞌixic yaꞌ tiꞌ pat Jesús. Tiꞌ tyʌlbe i yoc i bujc Jesús.

21 Como jini xꞌixic tiꞌ bajñel pensali: Mi jinic jach mij cꞌotyel c tyʌlben i pislel Jesús mux c lajmel. Cheꞌ tiꞌ pensali.

22 Jesús tiꞌ sutqui i bʌ. Tiꞌ qꞌuele jini xꞌixic. Tiꞌ sube: Tijicñisan a pusicꞌal, calobil. Tsaꞌix lajmiyet chaꞌan ti a chꞌujbi mi quejel a lajmel mi ti a tyʌlʌ c bujc. Jin jach bʌ ora ti waꞌ lajmi jini xꞌixic.

23 Cheꞌ ñac ti cꞌoti Jesús yaꞌ ti yotyot ñuc bʌ yeꞌtyel ti templo israelob, ti yilʌ yaꞌan ajnijca músicajob. Chajpʌbilob chaꞌan i majlelob yicꞌotyob i chꞌujñan chꞌujlelʌl. Muꞌ ti ñoj cꞌam bʌ uqꞌuel quixtyañujob.

24 Jesús tiꞌ subeyob: Loqꞌuenla wʌꞌi. Machꞌan sajtyem ili xcꞌalʌl. Wʌyʌl jach. Cheꞌ ti yʌlʌ Jesús. Jini quixtyañujob tiꞌ wajleyob Jesús como yujil isujm chaꞌan sajtyemix xcꞌalʌl.

25 Pero Jesús tiꞌ xiqꞌuiyob loqꞌuel. Cheꞌ jini ti ochi yaꞌ baꞌan xcꞌalʌl. Tiꞌ chucbe i cꞌʌb. Ti chaꞌ cuxtiyi. Ti tyejchi jini xcꞌalʌl.

26 Ti pujqui majlel tꞌan ti pejtyelel pañimil yaꞌi chaꞌan jini tsaꞌ bʌ tsictiyi.

27 Cheꞌ ti loqꞌui Jesús yaꞌi tiꞌ tsʌcleyob majlel chaꞌtiquil mutsꞌuloꞌ bʌ i wut. Cꞌam ti quejiyob ti tꞌan. Ti yʌlʌyob: Jesús, i jiñʌjlelet bʌ David, chocolet bʌ tyʌlel ti Dios, qꞌueleyon lojon ti pꞌumpꞌun chaꞌan a cotyañon lojon. Cheꞌ ti yʌlʌyob.

28 Cheꞌ ñac ti ochi Jesús ti otyot ti lʌcꞌʌyob jini mutsꞌuloꞌ bʌ i wut. Jesús tiꞌ cꞌajtibeyob: ¿Muꞌ ba laꞌ chꞌujbin chaꞌan chꞌujbi c chaꞌlibeñetla jini? Cheꞌ ti yʌlʌ Jesús. Tiꞌ jacꞌʌyob: Mucꞌʌch, c Yum, cheꞌob.

29 Cheꞌ jini Jesús tiꞌ tyʌlbeyob i wut. Ti yʌlʌ: Laꞌ lajmiquetla cheꞌ bajcheꞌ ti laꞌ chꞌujbi. Cheꞌ ti yʌlʌ Jesús.

30 Ti cꞌoti i wut tiꞌ chaꞌticlelob. Cheꞌ jini Jesús tiꞌ wersa subeyob: Maꞌ mi laꞌ saj suben quixtyañujob bajcheꞌ tic lajmisʌbeyetla laꞌ wut. Cheꞌ ti yʌlʌ Jesús.

31 Pero ujtyel tyo i loqꞌuel yaꞌ baꞌan Jesús, ti quejiyob i waꞌ puqueꞌ majlel tꞌan ti pejtyelel pañimil bajcheꞌ ti lajmisʌntiyob.

32 Cheꞌ ñac chʌncol tyo i loqꞌuelob jini tsaꞌ bʌ lajmisʌbentiyob i wut, ti cꞌoti baꞌan Jesús chaꞌtiquil uxtiquil chʌncol bʌ i pʌyeꞌ tyʌlel juntiquil xꞌumaꞌ am bʌ i xibʌjlel tiꞌ pusicꞌal.

33 Ora jach ti queji ti tꞌan jini xꞌumaꞌ cheꞌ ñac Jesús tiꞌ chocbe loqꞌuel i xibʌjlel tiꞌ pusicꞌal. Tyoj bʌcꞌñʌjel ti yubi quixtyañujob. Ti yʌlʌyob: Machꞌan baꞌ bʌ ora ti niqꞌui ujti ñuc bʌ baꞌan lac piꞌʌlob israelob bajcheꞌ ujtyel la quilan, cheꞌob.

34 Pero jini fariseojob ti yʌlʌyob: Ili winic miꞌ choqueꞌ loqꞌuel xibajob tiꞌ pꞌʌtyʌlel jach i yajaw xiba. Cheꞌ ti lolon alʌyob.

35 Jesús ti ñumi majlel ti pejtyelel lum tyac yicꞌot ti ajchumtyʌl tyac. Yaꞌ ti ochi ti jujumpꞌej i templo israelob chaꞌan i cʌntisañob jini wen tꞌan bajcheꞌ chʌncol ti yumintyel Dios am bʌ ti panchan. Tiꞌ lajmisʌbeyob baꞌic jach bʌ cꞌamꞌan yicꞌot wocol tyac.

36 Cheꞌ ñac ti yilʌ Jesús bajcheꞌ miꞌ muchꞌquiñob i bʌ quixtyañujob baꞌical jach ti ñumi majlel ti cʌntisa, tiꞌ wen pꞌuntyʌyob chaꞌan yom i cotyañob tiꞌ wocol. Wen pꞌumpꞌuñob bajcheꞌ tiꞌ ñusʌyob qꞌuin. Chꞌʌjyemob. Cꞌuñob tiꞌ bʌcꞌtyal. Ti yilʌyob cheꞌ bajcheꞌ tiñʌmeꞌob machꞌʌ baꞌan ajcʌñʌtya i chaꞌan. [Tiñʌmeꞌ yom i yʌleꞌ oveja.]

37 Tiꞌ sube ajcʌntꞌañob i chaꞌan: Melel an cabʌl cꞌajbal pero machꞌan cabʌl xcꞌajbalob, cheꞌen. Jiñʌch yom i yʌl cheꞌ bajcheꞌ an cabʌl yom bʌ i cotyʌntyel, chaꞌan jach maꞌix cabʌl ajsubtꞌañob.

38 Jin chaꞌan cꞌajtibenla Dios como jiñʌch i yum cꞌajbal chaꞌan i choqueꞌ majlel ajtroñelob ti cꞌajbal. Cheꞌ ti yʌlʌ Jesús.