Jesús tiꞌ lajmisʌ winic machꞌʌ baꞌan i cꞌʌjnibal yoc i cꞌʌb
2
Jesús ti chaꞌ ochi yaꞌ ti Capernaum. Ti queji i yubiñob quixtyañu cheꞌ yaꞌan ti otyot.2 Ti queji i waꞌ muchꞌquiñob i bʌ. Maꞌ ti luꞌ ochiyob mi jinic tyo tiꞌ tiꞌ otyot. Cheꞌ jini, Jesús ti queji i subeñob i tꞌan Dios.
3 Cheꞌ jini, chʌntiquil winic tiꞌ pʌyʌyob tyʌlel yaꞌ baꞌan Jesús juntiquil winic machꞌʌ baꞌan i cꞌʌjnibal yoc i cꞌʌb.
4 Pero maꞌ ti mejliyob ti ochel yicꞌotyob tiꞌ mal como cʌlʌx an quixtyañu. Pamacña i jol jini otyot. Ti letsiyob i locꞌsʌbeñob i xʌñil jini otyot chaꞌan tyocol baꞌ mi yotsañob jini cꞌam bʌ. Cheꞌ jini, tiꞌ juꞌsʌbeyob i yab jini cꞌam bʌ.
5 Cheꞌ ti yilʌ Jesús chʌncol i chꞌujbin tiꞌ pusicꞌal, ti queji ti tꞌan. Tiꞌ sube jini cꞌam bʌ: Calobil, ñusʌbilix a mul, cheꞌen.
6 Yaꞌ buchul chaꞌtiquil uxtiquil ajcʌntisajob chaꞌan i mandar israelob. Chʌncol i yʌlob tiꞌ pusicꞌal:
7 ¿Chucoch cheꞌ muꞌ ti tꞌan ili winic? Chʌncol jach i cuy i bʌ ti Dios. Maꞌan majch chꞌujbi i ñusʌbeñonla lac mul, sólo jin jach Dios cheꞌob tiꞌ pusicꞌal jini ajcʌntisajob.
8 Pero Jesús tiꞌ ñaꞌtyʌ chʌ bʌ yes chʌncol yʌlob tiꞌ pusicꞌal. Tiꞌ subeyob: ¿Chucoch cheꞌ chʌncoletla ti tꞌan ti laꞌ pusicꞌal bajcheꞌ jini?
9 ¿Baqui bʌ más wocol mic suben mi laꞌ wʌl jini cꞌam bʌ? ¿Más wocol ba mic suben ñusʌbilix a mul? ¿Más wocol ba mic suben, tyejchenix, chꞌʌmʌx majlel a wab, chaꞌlenix xʌmbal? Cheꞌ ti yʌlʌ Jesús.
10 Yʌꞌʌch mi laꞌ wilan añʌch c pꞌʌtyʌlel chaꞌan mic ñusʌbeñob i mul añoꞌ bʌ ti mulawil Joñon i Piꞌʌlon Quixtyañujob, cheꞌ ti yʌlʌ Jesús. Jesús tiꞌ sube jini winic machꞌʌ baꞌan i cꞌʌjnibal yoc i cꞌʌb:
11 Mic subeñet: Tyejchen, chꞌʌmʌx majlel a wab, cucux ti a wotyot, cheꞌen.
12 Ti waꞌ tyejchi. Tiꞌ chꞌʌmʌ majlel i yab. Ti loqꞌui yaꞌ baꞌañob. Cheꞌ jini, tsijcꞌ cheꞌob i pusicꞌal quixtyañujob. Tiꞌ subeyob i ñuclel Dios. Ti yʌlʌyob: Maꞌ baꞌ la quila cheꞌ bajcheꞌ iliyi, cheꞌob.
Jesús tiꞌ pʌyʌ majlel Leví
13 Jesús ti chaꞌ majli tiꞌ tiꞌ colem joyol bʌ jaꞌ. Cheꞌ ñac tiꞌ muchꞌquiyob i bʌ baꞌan Jesús ti pejtyelel quixtyañujob, tiꞌ cʌntisʌyob.
14 Cheꞌ ñac ti ñumi Jesús ti yilʌ yaꞌ an winic Leví bʌ i cꞌabaꞌ i yalobil Alfeo. Buchul ti yeꞌtyel i chꞌʌm tyojoñel. Jesús tiꞌ sube: Tsʌcleñon majlel, cheꞌen. Cheꞌ jini ti tyejchi. Tiꞌ tsʌcle majlel Jesús.
15 Tiꞌ chaꞌle uchꞌel Jesús ti yotyot Leví. Yaꞌ buchulob jeꞌel yicꞌot Jesús yicꞌot ajcʌntꞌañob i chaꞌan cabʌl añoꞌ bʌ yeꞌtyel chaꞌan i chꞌʌmol tyojoñel yicꞌot yambʌ xmulilob. Como cabʌl tsaꞌ bʌ i tsʌcleyob tyʌlel.
16 Jini ajcʌntisajob chaꞌan i mandar israelob yicꞌot fariseojob ti yilʌyob chʌncol ti weꞌel Jesús yicꞌotyob tsaꞌ bʌ i lolon alʌyob más añoꞌ bʌ i mul yicꞌot xchꞌʌm tyojoñelob. Cheꞌ jini, ti queji i subeñob ajcʌntꞌañob i chaꞌan Jesús: ¿Bajcheꞌqui isujm cheꞌ miꞌ piꞌlen ti weꞌel xchꞌʌmob tyojoñel yicꞌot yambʌ xmulilob? cheꞌob.
17 Cheꞌ ñac ti yubi Jesús, tiꞌ subeyob: Jini cꞌocꞌoꞌ bʌ mach i cꞌʌjnibal tsꞌʌcʌntyel, jin jach cꞌamoꞌ bʌ yom tsꞌʌcʌntyel. Machꞌan ti tyʌliyon c pʌyob jini muꞌ bʌ i lolon alob machꞌan i mul. Ti tyʌliyon c pʌyob jini muꞌ bʌ i ñaꞌtyan an i mul. Cheꞌ tiꞌ chaꞌle lajoñel Jesús.
Tiꞌ cꞌajtibeyob Jesús i sujmlel chaꞌan i chꞌajbʌntyel uchꞌel
18 Tiꞌ chaꞌleyob chꞌajb chaꞌan muꞌ bʌ i cꞌuxob jini tsaꞌ bʌ i cʌmbeyob i tꞌan Juan yicꞌot fariseojob. Junyaj cheꞌ mucꞌob ti chꞌajb chaꞌtiquil uxtiquil ti tyʌliyob baꞌan Jesús. Tiꞌ cꞌajtibeyob: ¿Chucoch miꞌ chaꞌleñob chꞌajb jini tsaꞌ bʌ i cʌmbeyob i tꞌan Juan yicꞌot tsaꞌ bʌ i cʌmbeyob i tꞌan fariseojob pero machꞌan miꞌ chaꞌleñob chꞌajb jini ajcʌntꞌañob a chaꞌan? cheꞌob.
19 Jesús tiꞌ jacꞌʌ: ¿Muꞌ ba i chaꞌleñob chꞌajb chaꞌan muꞌ bʌ i cꞌuxob, muꞌ bʌ i japob jini muꞌ bʌ i tyʌlelob i qꞌuel qꞌuiñejel cheꞌ mi yujtyel ñujpuñel cheꞌ yaꞌ tyo an yicꞌotyob ajñujpuñel? Machꞌan miꞌ poj cʌyob uchꞌel cheꞌ yaꞌ tyo an ajñujpuñel.
20 Pero tyal tyo i yorojlel miꞌ pʌjyel loqꞌuel ajñujpuñel tiꞌ tyojlel quixtyañujob. Cheꞌ jini, mi quejel i chꞌajbañob i bʌ ti yan tyo bʌ qꞌuin, cheꞌ ti yʌlʌ Jesús.
21 Ti yambʌ lajoñel ti yʌlʌ: Mach yom cꞌʌjñel tsijiꞌ bʌ pisil chaꞌan i lʌjweꞌ tsuculix bʌ i pislel. Mucꞌ jach i chaꞌ tsijlel loqꞌuel jini tsijib tyo bʌ cheꞌ mi comꞌan. Cheꞌ jini más colemix mi loqꞌuel i tsijlemal. Cheꞌ ti yʌlʌ Jesús.
22 Ti yambʌ lajoñel ti yʌlʌ: Mach yom cojlic ochel ti tsucul pʌchij bʌ yajnib vino cheꞌ chʌncol tyo i mejlel jini vino bʌ lembal. Como jini vino mi yʌcꞌ ti tyojmel jini tsucul pʌchij bʌ yajnib. Cheꞌ jini, mi bejquel. Miꞌ tyojmel yajnib. Mi yotsañob tsijib vino ti tsijib tyo bʌ yajnib. Cheꞌ ti yʌlʌ Jesús.
Jini ajcʌntꞌañob tiꞌ tyucꞌbeyob trigo cheꞌ ti yorojlel cꞌaj oj
23 Ti jumpꞌej i qꞌuinilel cꞌaj oj ti ñumi majlel Jesús tiꞌ mal trigojol yicꞌot ajcʌntꞌañob i chaꞌan. Jini ajcʌntꞌañob tiꞌ tyucꞌuyob i wut jini trigo cheꞌ bʌ bajcheꞌ arroz yilal cheꞌ ti ñumiyob.
24 Cheꞌ jini, fariseojob ti queji i subeñob Jesús: ¿Chucoch miꞌ chaꞌlen tiqꞌuil bʌ cheꞌ ti qꞌuinilel cꞌaj oj? cheꞌob.
25 Jesús tiꞌ jacꞌbeyob: ¿Machꞌa baꞌan ti laꞌ qꞌuele yaꞌ ti jun bajcheꞌ tiꞌ chaꞌle David ti ñoj oniyix cheꞌ ñac ti yubiyob wiꞌñal David yicꞌot i piꞌʌlob?
26 Cheꞌ ñac ñuc bʌ cura i chaꞌan israelob jini Abiatar bʌ i cꞌabaꞌ, David ti ochi tiꞌ templo Dios. Tiꞌ cꞌuxu jini waj tsaꞌ bʌ ajqꞌui ti mesa tsaꞌ bʌ i yʌqꞌueyob tiꞌ majtyan Dios. Tiqꞌuil chaꞌan maꞌ majch miꞌ cꞌuxeꞌ jini waj, jin jach am bʌ i yeꞌtyel tiꞌ templo Dios miꞌ cꞌuxeꞌ. David tiꞌ cꞌuxu. Ti yʌqꞌue i piꞌʌlob. Cheꞌ ti yʌlʌ Jesús.
27 Cheꞌ jeꞌel tiꞌ subeyob: Chaꞌañobʌch i wenlel quixtyañujob ti ajqꞌui i qꞌuinilel cꞌaj oj. Machꞌan ti ajqꞌui quixtyañujob ti mulawil chaꞌan i más acꞌob ti ñuc i qꞌuinilel cꞌaj oj.
28 Jin chaꞌan joñoñʌch i Piꞌʌlon Quixtyañujob an tic wenta cʌleꞌ chʌ bʌ yom ujtic ti i qꞌuinilel cꞌaj oj. Cheꞌ ti yʌlʌ Jesús como i yʌcꞌbal.