2 Cheꞌ ñac ti loqꞌui ti barco Jesús, juntiquil winic tyʌcꞌlʌbil ti xiba ti loqꞌui yaꞌ ti chꞌujñʌjibʌl.

3 Jini winic yaꞌ jachix chumul ti chꞌujnijibʌl. Maꞌ majch chꞌujbi i cʌcheꞌ. Mi yicꞌotic cadena chꞌujbi i cʌchob.

4 Cabʌl tiꞌ jopꞌo i cʌchob ti cadena ti yoc tiꞌ cꞌʌb. Tsʌꞌʌch i tyucꞌu jini am bʌ ti cꞌʌb, tiꞌ tyopꞌo jini am bʌ ti yoc. Machꞌan majch chꞌujbi i yutsbin.

5 Ti beleꞌ qꞌuin ti qꞌuinil ti acꞌbʌlel muꞌ ti oñel ñumel ti wits yicꞌot yaꞌ baꞌ mi yujtyel mucoñel. Miꞌ low i bʌ ti tyun.

6 Cheꞌ tiꞌ ñajtyʌ ilʌ Jesús ti tyʌli ti ajñel. Ti cꞌoti ti ñoctyʌl tiꞌ tyojlel Jesús.

7 Cꞌam ti queji i pejcan. Ti yʌlʌ: ¿Chuqui a wom awicꞌotyon Jesús, jatyet i Yalobilet jini ñoj ñuc bʌ Dios? Mic wersa cꞌajtibeñet ti Dios chaꞌan mach a tyʌcꞌlañon, cheꞌen.

8 Chʌꞌʌch ti yʌlʌ como poj ujtyel i suben Jesús jini xiba: Xiba, loqꞌuen wʌꞌ tiꞌ pusicꞌal ili winic, cheꞌen.

9 Jesús tiꞌ cꞌajtibe: ¿Chuquiyes a cꞌabaꞌ cheꞌ yicꞌot? Jini xiba tiꞌ jacꞌʌ: Legión j cꞌabaꞌ joñon como yonlelon lojon, cheꞌen.

10 Chʌncol i wersa cꞌajtiben Jesús chaꞌan mach i choc loqꞌuel yaꞌ tiꞌ lumal gadarenojob.

11 Yaꞌ ti yebal wits chʌncol ti bucꞌbal yonlel chityam.

12 Jini xibajob tiꞌ cꞌajtibe Jesús: Xiqꞌuiyon lojon majlel yaꞌ baꞌan chityam. Acꞌʌyon lojon ochel ti chityam, cheꞌ ti yʌlʌ jini xibajob.

13 Cheꞌ jini, Jesús tsʌꞌʌch i yʌcꞌʌ yochel. Ti waꞌ loqꞌuiyob jini xibajob ti ili winic. Ti waꞌ ochiyob ti chityam. I yonlelob jini chityam. Cheꞌ bajcheꞌ dos mil yaꞌ añob. Cheꞌ jini ti jubiyob majlel ti ajñel ti queptyʌl. Tiꞌ chocoyob ochel i bʌ ti mal jaꞌ. Cheꞌ jini yaꞌ tiꞌ jicꞌtyʌyob jaꞌ.

14 Jini tsaꞌ bʌ i cʌñʌtyʌ chityam ti putsꞌiyob. Ti queji i yʌlob ñumel yaꞌ ti lum, yicꞌot yaꞌ ti otyotyel tyac. Cheꞌ jini, jini quixtyañujob ti majli i qꞌuelob chuqui ti ujti.

15 Cheꞌ ñac ti cꞌotyiyob yaꞌ baꞌan Jesús ti yilʌyob jini tsaꞌ bʌ tyʌcꞌlʌnti ti xibajob chꞌuj buchul, anix i pislel, tyojix i pusicꞌal. Ti wen quejiyob ti bʌqꞌuen quixtyañujob.

16 Jini tsaꞌ bʌ i yilʌyob ti queji i chaꞌ alob bajcheꞌ ti tyojꞌʌ jini tsaꞌ bʌ tyʌcꞌlʌnti ti xibajob yicꞌot bajcheꞌ ti ujti jini chityam.

17 Cheꞌ jini ti queji i wersa subeñob Jesús chaꞌan loqꞌuiquix majlel yaꞌ tiꞌ lum.

18 Cheꞌ ñac ti ochi ti mali barco Jesús, jini tsaꞌ bʌ tyʌcꞌlʌnti ti xibajob tiꞌ sube Jesús mi mux i yʌqꞌuen i majlel yicꞌot jeꞌel.

19 Jesús machꞌan ti yʌqꞌue i majlel. Pero tiꞌ sube: Cucux ti a wotyot yaꞌ baꞌan a piꞌʌlob. Subeñob pejtyel bajcheꞌ ti chaꞌlibeyet ñuc tyac bʌ a Yum Dios yicꞌot bajcheꞌ tiꞌ pꞌuntyʌyet. Cheꞌ ti yʌlʌ Jesús.

20 Ti majli jini winic. Ti queji i puc majlel tꞌan yaꞌ ti lum tyac Decápolis bʌ i cꞌabaꞌ. Ti queji i subeꞌ pejtyel bajcheꞌ ti cotyʌnti ti Jesús. Tsijcꞌ cheꞌob i pusicꞌal ti pejtyelel quixtyañujob.

21 Cheꞌ ñac ti chaꞌ cꞌaxi tyʌlel ti barco Jesús yaꞌ ti junwej jaꞌ ti wen cꞌotiyob quixtyañu. Ti cʌyle Jesús yaꞌ tiꞌ tiꞌ jaꞌ.

22 Ti tyʌli juntiquil ñuc bʌ yeꞌtyel tiꞌ templo israelob Jairo bʌ i cꞌabaꞌ. Cheꞌ ñac ti yilʌ Jesús ti waꞌ ñocle ti yebal yoc.

23 Ti queji i wersa suben: Jini xcꞌalʌl bʌ calobil yomox sajtyel. Laꞌ. Acꞌʌ a cꞌʌb tiꞌ pam i bʌcꞌtyal chaꞌan cꞌocꞌac. Cheꞌ ti yʌlʌ Jairo.

24 Jesús ti majli yicꞌot. Cheꞌ jini tiꞌ tsʌcleyob majlel yonlel quixtyañu. Motin muchꞌchꞌucꞌñayob majlel.

25 Yaꞌan yicꞌotyob juntiquil cꞌam bʌ xꞌixic. Cꞌʌlʌ doce años maꞌ mi lajmel ti loqꞌuel i chꞌichꞌel.

26 Cabʌl tiꞌ jopꞌo i tsꞌʌcan yujiloꞌ bʌ tsꞌacojel. Tiꞌ luꞌ jili pejtyel chʌ bʌ an i chaꞌan chaꞌan i cꞌʌn i tyojeꞌ i tsꞌʌcʌntyel. Machꞌan ti saj lajmi. Ti más nijli.

27 Ti queji i yubin bajcheꞌ chʌncol i chaꞌlen Jesús. Cheꞌ jini ti tyʌli tiꞌ pat Jesús yaꞌ baꞌ muchꞌquibil quixtyañujob. Tiꞌ tyʌlbe i pislel Jesús.

28 Tiꞌ bajñel ñaꞌtyʌ: Mi jin jach i pislel mic tyʌlben, jasʌl mic lajmel. Cheꞌ tiꞌ ñaꞌtyʌ jini cꞌam bʌ xꞌixic.

29 Ti waꞌ lajmi ti loqꞌuel i chꞌichꞌel. Ti yubi lajmenix i bʌcꞌtyal.

30 Tiꞌ waꞌ ñaꞌtyʌ Jesús chaꞌan ti cꞌʌjni i pꞌʌtyʌlel chaꞌan i lajmisan cꞌam bʌ. Tiꞌ waꞌ sutqui i bʌ yaꞌ baꞌ jomol quixtyañujob. Ti yʌlʌ: ¿Majchqui tiꞌ tyʌlbon c pislel? cheꞌen.

31 Cheꞌ jini, ajcʌntꞌañob i chaꞌan tiꞌ sube: Maꞌ wilan cabʌl wʌꞌ añonla. Cabʌl miꞌ petsꞌetyob. ¿Chucoch mi a cꞌajtin majchqui tsaꞌ bʌ i tyʌlʌyet? cheꞌob.

32 Jesús tiꞌ sut qꞌuele majchqui tsaꞌ bʌ i tyʌlbe i pislel.

33 Jini xꞌixic tsitsiña ti bʌqꞌuen. Tsaꞌix i ñaꞌtyʌ chʌ bʌ ti yubi tiꞌ bʌcꞌtyal. Ti ñocle ti yebal yoc Jesús. Tiꞌ luꞌ tsictisʌ chʌ bʌ yes ti yubi.

34 Jesús tiꞌ sube: Calobil, ti lajmiyet chaꞌan ti a chꞌujbiyon ti a pusicꞌal. Cucux ti ñʌchꞌtyʌlel a pusicꞌal. Cꞌoqꞌuet mi quejel a cʌytyʌl. Cheꞌ ti yʌlʌ Jesús.

35 Cheꞌ chʌncol tyo ti tꞌan Jesús ti tyʌli chꞌoyol bʌ ti yotyot am bʌ yeꞌtyel tiꞌ templo israelob. Tiꞌ subeyob i tyat jini xcꞌalʌl: Sajtyemix a walobil. ¿Chutyoquiyoch maꞌ chʌc mʌctyʌben i qꞌuin jini Maestro? Cheꞌ yʌlol Jairo.

36 Pero Jesús cheꞌ bajcheꞌ machꞌan ti yubi chʌncol bʌ i yʌlob tiꞌ chaꞌle. Tiꞌ sube jini am bʌ yeꞌtyel ti templo: Mach a chaꞌlen bʌqꞌuen. Chꞌujbiñon ti a pusicꞌal, cheꞌ Jesús.

37 Cheꞌ jini, jin jach Pedro yicꞌot Jacobo yicꞌot Juan i yijtsꞌin Jacobo ti yʌcꞌʌ majlel.

38 Yaꞌ ti cꞌotiyob ti yotyot am bʌ yeꞌtyel tiꞌ templo israelob. Ti waꞌle i qꞌueleꞌ yaꞌ baꞌ juꞌupojolob quixtyañu. Mucꞌob ti uqꞌuel, ti oñel.

39 Ti ochi Jesús. Tiꞌ cꞌajtibeyob: ¿Chucoch juꞌupojoletla? ¿Chucoch muqꞌuetla ti uqꞌuel? Machꞌan sajtyem. Wʌyʌl jach ili xcꞌalʌl. Cheꞌ ti yʌlʌ Jesús.

40 Cheꞌ jini tiꞌ wajleyob. Jesús tiꞌ xiqꞌuiyob chaꞌan i loqꞌuelob ti pañimil. Cheꞌ jini ti ochi ti yambʌ saj mal yaꞌ baꞌan jini xcꞌalʌl. Tiꞌ pʌyʌyob ochel i tyat i ñaꞌ jini xcꞌalʌl yicꞌot jini tsaꞌ bʌ i pʌyʌ majlel uxtiquil i piꞌʌlob ti xʌmbal.

41 Tiꞌ chucbe i cꞌʌb jini xcꞌalʌl. Tiꞌ sube tiꞌ tꞌan: Talita cumi. I sujmlel ti lac tꞌan: Xcꞌalʌl, mic subeñet, tyejchenix. Cheꞌ tiꞌ sube.

42 Ti waꞌ tyejchi. Ti queji ti xʌmbal. An doce años i chaꞌan. Tyoj bʌcꞌñʌjel quixtyañujob.

43 Jesús tiꞌ wen tiqꞌuiyob chaꞌan mach quejic i subeñob yañoꞌ bʌ. Tiꞌ subeyob chaꞌan i weꞌsañob jini xcꞌalʌl.