2 Cheꞌ tiꞌ qꞌuinilel cꞌaj oj ti queji ti cʌntisa yaꞌ ti i templo israelob. Yonlel quixtyañu tsaꞌ bʌ yubibeyob i cʌntisa tsijcꞌ cheꞌob i pusicꞌal. Ti yʌlʌyob: ¿Bajcheꞌqui miꞌ niqꞌui ñaꞌtyan jini? ¿Majchqui ti yʌqꞌue chaꞌan chꞌujbiyic i niqꞌui ñaꞌtyan? ¿Bajcheꞌqui miꞌ tyaj i pꞌʌtyʌlel chaꞌan i niqꞌui pʌseꞌ ñuc tyac bʌ i pꞌʌtyʌlel?

3 Jiñʌch jini xmel buchlibʌl. Jiñʌch i yalobil María i yʌscun Jacobo yicꞌot José yicꞌot Judas yicꞌot Simón. Jiñʌch i yʌscun jini xcꞌalʌlob wʌꞌ bʌ an la quicꞌot. Cheꞌ ti yʌlʌyob. Jin chaꞌan maꞌ tiꞌ chꞌujbiyob Jesús.

4 Jesús tiꞌ subeyob: Jini muꞌ bʌ i xiqꞌueꞌ yʌleꞌ Dios maꞌ mi qꞌuejlel ti ñuc tiꞌ lumal yaꞌ baꞌan i piꞌʌlob, yaꞌ ti yotyot. Ti yan tyac jach bʌ lum mi qꞌuejlel ti ñuc. Cheꞌ ti yʌlʌ Jesús.

5 Machꞌan ti mejli i pʌseꞌ mi jumpꞌejlic ñuc bʌ i pꞌʌtyʌlel Jesús yaꞌi. Jin jach tiꞌ tyʌlbeyob i bʌcꞌtyal chaꞌtiquil uxtiquil cꞌamoꞌ bʌ. Tiꞌ cꞌoqꞌuisʌyob.

6 Chꞌʌjyem ti yubi Jesús chaꞌan machꞌan tiꞌ chꞌujbibeyob mi melel i tꞌan. Cheꞌ jini ti ñumi majlel ti cʌntisa ti yan tyac bʌ lum yaꞌ tiꞌ tꞌejl tyac i lumal.

7 Jesús tiꞌ pʌyʌ jini doce ajcʌntꞌañob i chaꞌan. Chaꞌchaꞌtiquil tiꞌ xiqꞌui majlel. Ti yʌqꞌueyob i pꞌʌtyʌlel chaꞌan i choc tyacob loqꞌuel xibajob.

8 Tiꞌ subeyob chaꞌan machꞌic i niqꞌui chꞌʌmob majlel yaꞌ ti bij. Jin jach miꞌ chꞌʌmob majlel i ñʌꞌ tyeꞌ. Mach yom i chꞌʌmob majlel i morral mi wajobic, mi tyaqꞌuiñobic.

9 Yom miꞌ lʌpob i cactiꞌ. [Cactiꞌ yom i yʌleꞌ patsꞌ.] Jumpꞌoch jach i bujc yom i lʌpob. Mach yom chaꞌpꞌojch. Cheꞌ tiꞌ subeyob.

10 Ti chaꞌ queji ti tꞌan Jesús. Tiꞌ subeyob: Cheꞌ mi laꞌ wochel ti jumpꞌej otyot yaꞌ mi laꞌ wajñel jintyo mi laꞌ chaꞌ loqꞌuel majlel.

11 Yaꞌ baꞌ maꞌ mi yotsañetla ti yotyot baꞌ mach yom i yubibeñetyob laꞌ tꞌan mi laꞌ waꞌ chaꞌ loqꞌuel majlel. Cheꞌ mi laꞌ loqꞌuel majlel mi laꞌ chijcun loqꞌuel i tsꞌujbeñal laꞌ woc chaꞌan i ñaꞌtyañob mach wen bajcheꞌ miꞌ melob. Melel mic subeñetla, cheꞌ ti yorojlel melojel más wocol mi quej i yubiñob jini machꞌʌ baꞌan ti yotsʌyetla cheꞌ bajcheꞌ yaꞌ bʌ añob ti Sodoma yicꞌot ti Gomorra. Cheꞌ ti yʌlʌ Jesús.

12 Cheꞌ jini ti majliyob i sub ñumel tꞌan jini docejob chaꞌan i qꞌuextyan i pensal i cʌy i mul quixtyañujob.

13 Tiꞌ chocoyob loqꞌuel cabʌl xibajob jeꞌel. Ti yulbeyob aceite cabʌl cꞌamꞌoꞌ bʌ. Tiꞌ lajmisʌyob.

14 Jini ñuc bʌ yumʌl Herodes bʌ i cꞌabaꞌ ti yubi chʌ bʌ tiꞌ chaꞌle Jesús, como pejtyelel tiꞌ wen cʌmbeyob bajcheꞌ tiꞌ chaꞌle. Jin chaꞌan Herodes ti lolon alʌ: Jiñʌch jini Juan tsaꞌ bʌ i yʌcꞌʌ chꞌʌm jaꞌ ti chaꞌ tyejchi loqꞌuel yaꞌ baꞌan sajtyemoꞌ bʌ. Jin chaꞌan mi tsictiyel i pꞌʌtyʌlel ti toñel, cheꞌ ti lolon alʌ Herodes.

15 Yañoꞌ bʌ ti yʌlʌyob: Jiñʌch Elías juntiquil tsaꞌ bʌ i xiqꞌui yʌleꞌ Dios ti ñoj oniyix, cheꞌob. Yañoꞌ bʌ ti yʌlʌyob: Jiñʌch juntiquil muꞌ bʌ xiqꞌueꞌ yʌleꞌ Dios cheꞌ bajcheꞌ juntiquil tsaꞌ bʌ xiqꞌui yʌleꞌ Dios ti ñoj oniyix, cheꞌob.

16 Cheꞌ ñac ti yubi Herodes chʌ bʌ tiꞌ chaꞌle Jesús ti queji yʌleꞌ: Tic xiqꞌui ti tsepol loqꞌuel i jol jini Juan pero wale tiꞌ chaꞌ tyejchi loqꞌuel yaꞌ baꞌan sajtyemoꞌ bʌ, cheꞌen.

17 Ti caj Herodías, Herodes ti yotsʌ ti cʌchol Juan. Tiꞌ cʌchʌ yicꞌot cadena yaꞌ ti cʌchonibʌl. Jini Herodías i yijñam i yijtsꞌin Herodes, Felipe bʌ i cꞌabaꞌ. Pero Herodes tiꞌ chilbe i yijñam i yijtsꞌin.

18 Cheꞌ jini, Juan tiꞌ sube Herodes: Mach wen cheꞌ maꞌ pʌyben i yijñam a wijtsꞌin, cheꞌ tiꞌ sube.

19 Tsꞌaꞌ ti yubi Herodías. Yom i yʌcꞌ ti tsʌnsʌntyel Juan pero mach chꞌujbi i tsʌnsan,

20 como Herodes tiꞌ bʌcꞌñʌ Juan. Tiꞌ ñaꞌtyʌ wen miꞌ chaꞌlen Juan. Juan ti yoque acꞌʌ i bʌ ti Dios. Jin chaꞌan tiꞌ wen cʌñʌtyʌ chaꞌan maꞌ chʌ bʌ mi tyumbentyel ti Herodías. Cheꞌ mi yubiben i tꞌan Juan, Herodes maꞌ tiꞌ ñaꞌtyʌ chuqui ti yʌlʌ pero tiꞌ mula i ñʌchꞌtyʌben.

21 Herodías tiꞌ tyajbe i yorojlel i ñaꞌtyan bajcheꞌ mi quej i yʌcꞌ ti tsʌnsʌntyel Juan cheꞌ miꞌ tsꞌʌctiyel i qꞌuinilel i jabilel Herodes. Herodes tiꞌ pʌyʌ tyʌlel ti qꞌuiñejel ñucoꞌ bʌ i yeꞌtyel yicꞌot capitañob yicꞌot wen ricojoꞌ bʌ yaꞌ ti Galilea.

22 Ti tyʌli i yixicꞌal Herodías. Tiꞌ bajñel chaꞌle son. Cꞌajacña i yoj Herodes yicꞌot jini yaꞌ bʌ añob. Herodes tiꞌ sube jini xcꞌalʌl: Cꞌajtibeñon jiñʌch chʌ bʌ a wom mi cʌqꞌueñet, cheꞌ ti yʌlʌ.

23 Tiꞌ waꞌchoco i tꞌan Herodes chaꞌan wersa mi quej i yʌqꞌen jini xcꞌalʌl chʌ bʌyic jach yes miꞌ cꞌajtin mi jinic tyo mi ti tꞌox chꞌʌmʌ pañimil muꞌ bʌ yeꞌtyelin Herodes.

24 Jini xcꞌalʌl ti majli baꞌan i ñaꞌ. Tiꞌ cꞌajtibe: ¿Chuquiyes yom j cꞌajtin wale? Cheꞌ ti yʌlʌ. I ñaꞌ tiꞌ jacꞌʌ: Cꞌajtiben i jol Juan, jini muꞌ bʌ i yʌcꞌ chꞌʌm jaꞌ. Cheꞌ tiꞌ sube.

25 Jini xcꞌalʌl ti waꞌ majli baꞌan Herodes. Tiꞌ sube: Com maꞌ pit aqꞌueñon ti ora jach ti colem chꞌejew i jol Juan muꞌ bʌ i yʌcꞌ chꞌʌm jaꞌ, cheꞌen.

26 Wen chꞌʌjyem ti yubi Herodes pero miꞌ quisnin i ñusʌben i tꞌan ili xcꞌalʌl como tiꞌ waꞌchoco i tꞌan tiꞌ tyojlel pʌyʌloꞌ bʌ ti qꞌuiñejel.

27 Tiꞌ waꞌ xiqꞌui majlel juntiquil soldado chaꞌan i chꞌʌmeꞌ tyʌlel i jol Juan.

28 Cheꞌ jini ti majli. Tiꞌ tyucꞌ tsepbe loqꞌuel i jol Juan yaꞌ ti mal cʌchonibʌl. Tiꞌ pit chꞌʌmʌ tyʌlel ti chꞌejew. Ti yʌqꞌue jini xcꞌalʌl. Cheꞌ jini, ti majli i yʌqꞌuen i ñaꞌ.

29 Cheꞌ ñac ti yubiyob jini tsaꞌ bʌ i cʌmbeyob i tꞌan Juan ti tyʌli i chꞌʌmꞌeñob majlel i bʌcꞌtyal. Cheꞌ jini tiꞌ mucuyob.

30 Tiꞌ chaꞌ muchꞌquiyob i bʌ baꞌan Jesús jini yajcʌbiloꞌ bʌ ajsubtꞌañob ñumel. Tiꞌ subeyob Jesús pejtyel tsaꞌ bʌ i chaꞌleyob yicꞌot tsaꞌ bʌ i cʌntisʌyob.

31 Jesús tiꞌ subeyob: Conla yaꞌ baꞌ jochol lum chaꞌan laꞌ tsꞌityaꞌ cꞌaj laꞌ woj, cheꞌen. Como chʌncol i beleꞌ tyʌlel i majlel quixtyañujob jinic tyo mach ujtyob i chaꞌan uchꞌel.

32 Cheꞌ jini ti majliyob ti barco. Ti bajñel cꞌotiyob yaꞌ baꞌ jochol lum.

33 Cabʌl ti yilʌyob cheꞌ ñac ti majliyob. Tiꞌ ñaꞌtyʌyob Jesúsʌch. Ti majliyob ti ajñel chꞌoyolob tyac bʌ ti pejtyel lum. Ñaxan ti cꞌotiyob.

34 Cheꞌ ñac ti loqꞌui Jesús ti barco ti yilʌ yaꞌan yonlel quixtyañu. Tiꞌ pꞌuntyʌyob chaꞌan yom i cotyañob como chʌꞌʌch añob cheꞌ bajcheꞌ tiñʌmeꞌ machꞌʌ baꞌan majch miꞌ cʌñʌtyan. Cheꞌ jini, an cʌbʌl chʌ bʌ ti queji i cʌntisañob.

35 Cheꞌ iqꞌuix quejel ti tyʌliyob baꞌan Jesús ajcʌntꞌañob i chaꞌan. Tiꞌ subeyob Jesús: Iqꞌuix quejel. Maꞌ majch chumul wʌꞌwʌꞌi.

36 Subeñob majlel chaꞌan mi majlelob yaꞌ ti otyotyel yicꞌot yaꞌ ti lʌcꞌʌl tyac bʌ lum chaꞌan i mʌñob chʌ bʌ miꞌ cꞌuxob como maꞌ chʌ bʌ añob i chaꞌan, chaꞌan i cꞌuxob, cheꞌob.

37 Jesús tiꞌ subeyob: Jatyetla yom mi laꞌ wʌqꞌuen chʌ bʌ miꞌ cꞌuxob, cheꞌen. Jini ajcʌntꞌañob tiꞌ jacꞌʌyob: ¿Yom ba majlicon lojon quisan doscientos denarios c mʌñeꞌ lojon waj chaꞌan i cꞌuxob? cheꞌob.

38 Jesús tiꞌ cꞌajtibeyob: ¿Jayqꞌuejqui waj an laꞌ chaꞌan? Cucu, qꞌuelela, cheꞌen. Cheꞌ ñac ti queji i ñaꞌtyañob tiꞌ subeyob Jesús: Añʌch joꞌqꞌuej waj yicꞌot chaꞌcojt chʌy, cheꞌob.

39 Cheꞌ jini, Jesús tiꞌ sube quixtyañujob chaꞌan miꞌ buchtyʌlob ti jujunmujchꞌ yaꞌ ti yʌyʌx bʌ jam.

40 Ti jujunmujchꞌ ti buchleyob ti cien tyac yicꞌot cincuenta tyac.

41 Cheꞌ jini Jesús tiꞌ chꞌʌmʌ jini joꞌqꞌuej waj yicꞌot chaꞌcojt chʌy. Tiꞌ qꞌuele letsel ti panchan. Tiꞌ sube Dios wocox i yʌlʌ. Tiꞌ xetꞌe jini waj. Ti yʌqꞌueyob ajcʌntꞌañob i chaꞌan chaꞌan i luꞌ pucbeñob quixtyañujob. Yicꞌot chaꞌcojt chʌy tiꞌ luꞌ xetꞌbeyob.

42 Tiꞌ luꞌ cꞌuxuyob ti pejtyelelob. Ti luꞌ ñajꞌʌyob.

43 Tsaꞌ tyo i lotyoyob doce chiquib i colojbal i xejtꞌil waj yicꞌot chʌy.

44 Cinco mil winicob tsaꞌ bʌ i cꞌuxuyob jini waj yicꞌot chʌy.

45 Jesús tiꞌ waꞌ subeyob ochel ti barco jini ajcʌntꞌañob i chaꞌan, chaꞌan mi ñaxan majlelob ti junxej jaꞌ yaꞌ ti lum Betsaida bʌ i cꞌabaꞌ. Jesús tsaꞌ tyo cʌyle chaꞌan i subeñob sujtyel quixtyañujob.

46 Cheꞌ ñac ujtyel i subeñob sujtyel ti letsi majlel Jesús yaꞌ ti wits i chaꞌlen oración.

47 Cheꞌ ñac ti ochi acꞌbʌlel yaꞌ añob ti barco ti xinil jaꞌ ajcʌntꞌañob i chaꞌan. Yaꞌ bajñel an Jesús ti wits.

48 Jesús ti yilʌ chaꞌan wocol chʌncol i nijcañob majlel barco jini ajcʌntꞌañob como chʌncol i chojquel ti icꞌ. Cheꞌ yomox sʌcꞌan ti tyʌli Jesús yaꞌ baꞌañob. Chʌncox ti xʌmbal tyʌlel tiꞌ pam jaꞌ. Cheꞌ bajcheꞌ mi quej i pitsꞌ ñumel Jesús ti yilʌyob.

49 Cheꞌ ñac ti yilʌyob chʌncol ti xʌmbal tiꞌ pam jaꞌ tiꞌ lolon ñaꞌtyʌyob i wʌy jach quixtyañu yaꞌ majlel ti yilʌyob. Ti quejiyob ti oñel.

50 Como ti pejtyelelob ti yilʌ. Ti wen quejiyob ti bʌqꞌuen. Cheꞌ jini Jesús ti queji i pejcañob. Tiꞌ subeyob: Lajmenla ti bʌqꞌuen. Joñoñʌch. Mach laꞌ bʌcꞌñañon, cheꞌen.

51 Ti ochi ti barco yaꞌ baꞌ añob. Ti ñʌchꞌle jini icꞌ. Tsijcꞌ cheꞌob i pusicꞌal, tyoj bʌcꞌñʌjelob.

52 Como machꞌan tiꞌ ñaꞌtyʌyob bajcheꞌ i sujmlel chaꞌan jini waj cheꞌ tiꞌ weꞌsʌyob cinco milob como tsʌtsob i pusicꞌal.

53 Cheꞌ tsaꞌix cꞌaxiyob ti junxej colem joyol bʌ jaꞌ ti cꞌotiyob ti lomtyʌl Genesaret bʌ i cꞌabaꞌ. Yaꞌ tiꞌ tiꞌ jaꞌ tiꞌ cʌchʌyob cʌytyʌl barco.

54 Cheꞌ ñac ti loqꞌuiyob ti barco jini quixtyañujob tiꞌ waꞌ cʌñʌyob Jesús

55 Ajñel ti tyʌliyob baꞌan Jesús tyʌlemoꞌ bʌ ti pejtyel lum tyac. Tiꞌ chꞌuyuyob tyʌlel xcꞌamꞌañob tyotsꞌoloꞌ bʌ baꞌic jach ti yubiyob yaꞌan Jesús.

56 Yaꞌ baꞌ ti ochi majlel Jesús ti baꞌic jach bʌ lum yicꞌot ti yaloꞌ lum tyac yicꞌot ti otyotyel tyacob tiꞌ pʌyʌyob majlel xcꞌamꞌañob yaꞌ ti calle tyac. Tiꞌ wersa cꞌajtibeyob i tyʌlbeñob mi jinic jachix i yoc i pislel Jesús. Jini tsaꞌ bʌ i tyʌlbeyob ti lajmiyob.