2 Jini ti yilʌyob cheꞌ maꞌ tiꞌ pocoyob i cꞌʌb cheꞌ ti quejiyob ti weꞌel chaꞌtiquil uxtiquil ajcʌntꞌañob i chaꞌan Jesús bajcheꞌ mi xijqꞌuelob chaꞌan tsaꞌ bʌ i chꞌujbiyob ti ñoj oniyix. Jin chaꞌan tiꞌ tyajayob ti tꞌan.

3 (I tyʌlel jini fariseojob yicꞌot pejtyel yañoꞌ bʌ israelob miꞌ wen pocob i cꞌʌb. Cheꞌ maꞌ jal miꞌ pocob i cꞌʌb machꞌan miꞌ weꞌejelob, chaꞌan i chꞌujbibeñob i tꞌan tyac i yumob ti ñoj oniyix.

4 Cheꞌ mi sujtyelob ti mʌñoñel mi maꞌ miꞌ pocob i cꞌʌb ti caj bajcheꞌ miꞌ chꞌujbiñob maꞌ mi weꞌejelob. Tiꞌ bej cʌñʌyob majlel cabʌl i tꞌan tyac i yumob ti ñoj oniyix chaꞌan wen miꞌ chꞌujbibeñob jini tꞌan chaꞌan bajcheꞌ yom pocol jini weꞌib tyac yicꞌot i pꞌejt tyac yicꞌot i yajnib tyac melel tyac bʌ ti tsucu tyaqꞌuin yicꞌot wʌyibʌl tyac.)

5 Jin chaꞌan jini fariseojob yicꞌot ajcʌntisajob chaꞌan i mandar israelob tiꞌ cꞌajtibeyob Jesús: ¿Chucoch maꞌ miꞌ chꞌujbiñob i tꞌan tyac lac yumob ti ñoj oniyix jini ajcʌntꞌañob a chaꞌan? Maꞌ miꞌ pocob i cꞌʌb cheꞌ mi weꞌejelob bajcheꞌ ti xijqꞌuiyonla, cheꞌob.

6 Jesús tiꞌ jacꞌbeyob: Melelʌch i tꞌan Isaías tsaꞌ bʌ i tsꞌijbu ti ñoj oniyix chaꞌan bajcheꞌ mi laꞌ wajñel. Chaꞌchajp laꞌ pensal. Isaías tiꞌ tsꞌijbu:

8 Como jatyetla mi laꞌ cʌy i xicꞌojel Dios chaꞌan laꞌ chꞌujbiben i tꞌan oñoꞌtꞌanix bʌ quixtyañujob chaꞌan bajcheꞌ mi laꞌ poc laꞌ pꞌejt tyac yicꞌot laꞌ wuchꞌib tyac yicꞌot chʌ bʌ mi laꞌ niqꞌui chaꞌlen tyac. Cheꞌ tiꞌ subeyob Jesús.

9 Tiꞌ subeyob jeꞌel: Melelʌch, cheꞌ jach bajcheꞌ alas jach i tꞌan Dios mi laꞌ chaꞌlen, chaꞌan jach laꞌ wom laꞌ chꞌujbiben i tꞌan tyac laꞌ yumob ti ñoj oniyix.

10 Como Moisés ti yʌlʌ: Acꞌʌ ti ñuc laꞌ tyat laꞌ ñaꞌ. Jini muꞌ bʌ i yʌlꞌen i tyat i ñaꞌ laꞌ sajtic. Cheꞌ an ti mandar Moisés.

11 Pero jatyetla weñʌch mi laꞌ lolon aleꞌ cheꞌ an winic muꞌ bʌ i suben i tyat i ñaꞌ: Mach chꞌujbix j cotyañetla como ti pejtyelel chʌ bʌ jach an c chaꞌan jiñʌch Corbán cheꞌetla. (Corbán yom i yʌl i majtyan Dios tsaꞌ bʌ i yʌqꞌue.)

12 Mi chʌꞌʌch mi yʌl bajcheꞌ jini, cheꞌ jini mach wersa miꞌ cotyan i tyat i ñaꞌ mi laꞌ wʌl.

13 Cheꞌ mi laꞌ chaꞌlen bajcheꞌ jini, maꞌ i cꞌʌjnibal i xicꞌojel Dios mi laꞌ chaꞌlen chaꞌan jach i subal laꞌ yumob ti ñoj oniyix. Jiñʌch mi laꞌ chaꞌ cꞌʌn laꞌ cʌntisan laꞌ walobilob. Chʌꞌʌch mi laꞌ bej ocꞌ isan chʌ bʌ tyac bajcheꞌ iliyi. Cheꞌ ti yʌlʌ Jesús.

14 Jesús tiꞌ chaꞌ pʌyʌyob tyʌlel quixtyañujob. Tiꞌ subeyob: Luꞌ ñʌchꞌtyanla ti laꞌ pejtyelel. Ñaꞌtyanla.

15 Jini an tyac bʌ ti mulawil machꞌan miꞌ bibiꞌtisañob quixtyañujob cheꞌ mi yochel tiꞌ ñʌcꞌ. Miꞌ bibiꞌtisañob quixtyañu muꞌ bʌ i loqꞌuel tiꞌ pusicꞌal. Jiñʌch jini machꞌʌ yom i yilan Dios.

16 Jini yom bʌ i chꞌʌmben isujm ili tꞌan, pensalinla. Cheꞌ ti yʌlʌ Jesús.

17 Cheꞌ ñac ti loqꞌui Jesús yaꞌ baꞌan quixtyañujob ti ochi ti otyot. Cheꞌ jini, ajcʌntꞌañob i chaꞌan ti queji i cꞌajtibeñob chuqui i sujmlel jini lajoñel.

18 Jesús tiꞌ subeyob: ¿Machꞌa baꞌan mi laꞌ ñaꞌtyan jatyetla jeꞌel? ¿Machꞌa baꞌan mi laꞌ chꞌʌmben isujm jini muꞌ bʌ i yochel ti mal quixtyañu machꞌan miꞌ bibiꞌtisañob? Maꞌan bajcheꞌ yilal mi yilan Dios.

19 Como mach yaꞌic tiꞌ pusicꞌal mi yochel, tiꞌ ñʌcꞌ jach mi majlel. Mucꞌ jach i ñumel, cheꞌ tiꞌ yʌlʌ Jesús. Chʌꞌʌch tiꞌ cʌntisʌyob pejtyelel i bʌl lac ñʌcꞌ luꞌ weñʌch.

20 Jesús tiꞌ subeyob jeꞌel: Jini muꞌ bʌ i loqꞌuel tiꞌ pusicꞌal quixtyañujob jiñʌch muꞌ bʌ i bibiꞌtisañob, jiñʌch mach bʌ yom i yilan Dios.

21 Como loqꞌuem tiꞌ pusicꞌal quixtyañujob mi tyʌlel bibajax bʌ i pensal, yicꞌot cheꞌ an i tontojlel yicꞌot cheꞌ miꞌ pejcan yambʌ winic yambʌ xꞌixic, yicꞌot tsʌnsa,

22 yicꞌot xujchꞌ, yicꞌot cheꞌ miꞌ michꞌqꞌuel chʌ bʌ an i chaꞌan i piꞌʌl ti chumtyʌl, yicꞌot simaronlel, yicꞌot lot, yicꞌot cheꞌ bibajax miꞌ chaꞌlen, yicꞌot cheꞌ bajñel jin jach yom chʌ bʌ niqꞌui an i chaꞌan, yicꞌot jopꞌtꞌan yicꞌot cheꞌ yom i chan isan i bʌ yicꞌot maꞌix tyoj mi yajñel.

23 Yaꞌ jach luꞌ loqꞌuem tiꞌ pusicꞌal quixtyañujob pejtyel jini mach bʌ wen. Jiñʌch muꞌ bʌ i bibiꞌtisañob quixtyañujob, jiñʌch mach bʌ yom i yilan Dios. Cheꞌ ti yʌlʌ Jesús.

24 Jesús ti loqꞌui majlel. Ti majli cꞌʌlʌl ti lʌcꞌʌlel jini lum tyac Tiro yicꞌot Sidón bʌ i cꞌabaꞌ. Yaꞌ ti ochi ti jumpꞌej otyot. Jesús mach yom ubintic cheꞌ yaꞌ an. Pero machꞌan ti mejli ti mucul ajñel.

25 Yaꞌan juntiquil xꞌixic tsaꞌ bʌ waꞌ ubi cheꞌ yaꞌan Jesús. An juntiquil xcꞌalʌl bʌ i yalobil tyʌcꞌlʌbil bʌ ti xiba. Cheꞌ ñac ti yubi cheꞌ yaꞌan Jesús ti waꞌ tyʌli baꞌan Jesús. Ti ñocle ti yebal yoc.

26 Chꞌoyol ti yambʌ pañimil Sirofenicia bʌ i cꞌabaꞌ. Ti tyʌli i cꞌajtiben Jesús chaꞌan i choc loqꞌuel jini xibaꞌ am bʌ tiꞌ pusicꞌal yalobil.

27 Jesús tiꞌ sube: Laꞌ ñaxan weꞌicob alpꞌeñalob. Como mach yom lac chilben i waj alpꞌeñal chaꞌan jach lac choquen yal tsꞌiꞌ, cheꞌen. Chʌꞌʌch ti yʌlʌ chaꞌan ñaxan yom cotyʌnticob israelob.

28 Jini xꞌixic tiꞌ jacꞌʌ: Melelʌch bajcheꞌ maꞌ wʌl, c Yum. Pero jini i yal tsꞌiꞌ am bʌ ti yebal mesa miꞌ cꞌuxeꞌ i xejtꞌi waj muꞌ bʌ i pꞌʌtsañob alpꞌeñalob, cheꞌen.

29 Jesús tiꞌ jacꞌʌ: Chaꞌan weñʌch bajcheꞌ ti a jacꞌʌ, cucux. Tsaꞌix loqꞌui xiba tiꞌ pusicꞌal a walobil, cheꞌen.

30 Cheꞌ ñac ti cꞌoti jini xꞌixic ti yotyot tiꞌ tyaja yalobil tyotsꞌol ti wʌyib como loqꞌuemix jini xiba.

31 Jesús ti chaꞌ loqꞌui majlel yaꞌ ti lʌcꞌʌlel lum Tiro bʌ i cꞌabaꞌ. Ti ñumi majlel ti Sidón yicꞌot ti lum tyac Decápolis bʌ i cꞌabaꞌ. Cꞌʌlʌ ti cꞌoti yaꞌ ti colem joyol bʌ jaꞌ Galilea bʌ i cꞌabaꞌ.

32 Tiꞌ pʌyʌyob tyʌlel baꞌan Jesús juntiquil xcojc. Wocol miꞌ chaꞌlen tꞌan jeꞌel. Tiꞌ cꞌajtibeyob Jesús chaꞌan yʌcꞌ i cꞌʌb ti jini winic.

33 Jesús tiꞌ chaꞌ pʌyʌ majlel jini winic yaꞌ baꞌ jochol. Ti yotsʌbe i yal cꞌʌb tiꞌ chiquin. Tiꞌ tyujbʌ. Tiꞌ tyʌlbe yacꞌ jini xcojc.

34 Tiꞌ qꞌuele letsel ti panchan Jesús. Cꞌam tiꞌ japʌ icꞌ. Tiꞌ sube jini xcojc: Efata, cheꞌen. Yom yʌl ti lac tꞌan: Laꞌ jajmic, cheꞌen.

35 Ti waꞌ jajmi i chiquin jini winic. Ti tyojꞌʌ yacꞌ. Tyojix ti queji ti tꞌan.

36 Jesús tiꞌ wen tiqꞌui jini tsaꞌ bʌ i pʌyʌ tyʌlel jini xcojc chaꞌan machic i subeñob mi juntiquilic. Cheꞌ ñac tiꞌ subeyob Jesús chaꞌan mach i yʌlob, cheꞌ jini ti bej queji i yutsi pucob majlel tꞌan.

37 Cabʌl tsijcꞌ cheꞌob bʌ i pusicꞌal quixtyañu. Ti yʌlʌyob: Ñoj wen pejtyel chʌ bʌ yes miꞌ chaꞌlen. Wen yujil i yʌqꞌuen i yubin tꞌan xcojcob, yujil i yʌqꞌuen i chaꞌlen tꞌan xꞌumaꞌob, cheꞌob.