2 ¿Chucoch miꞌ ñusañob tꞌan jini ajcʌntꞌañob a chaꞌan? Maꞌ miꞌ pocob i cꞌʌb cheꞌ mi quejel ti uchꞌel cheꞌ bajcheꞌ mi xijqꞌuelob chaꞌan jini tsaꞌ bʌ i chꞌujbiyob lac yumob ti ñoj oniyix. Cheꞌ ti yʌlʌyob.

3 Jesús tiꞌ jacꞌʌ: Ixcu jatyetla, ¿chucoch mi laꞌ ñusan i xicꞌojel Dios chaꞌan jach laꞌ wom laꞌ chꞌujbin tꞌan chaꞌan bajcheꞌ tiꞌ bajñel xiqꞌuiyob i bʌ i chaꞌlen lac yumob ti ñoj oniyix?

4 Como Dios ti yʌlʌ: Acꞌʌ ti ñuc laꞌ tyat laꞌ ñaꞌ. Jini muꞌ bʌ i yʌlꞌen i tyat i ñaꞌ, laꞌ sajtic. Cheꞌ an ti mandar.

5 Pero jatyetla, weñʌch mi laꞌ lolon aleꞌ cheꞌ an winic muꞌ bʌ i suben i tyat i ñaꞌ: Mach chꞌujbi j cotyañetla como ti pejtyelel chʌ bʌ jach an c chaꞌan tsaꞌix cʌqꞌue Dios, cheꞌetla.

6 Mi laꞌ wʌleꞌ chaꞌan majchical jach mi yʌl cheꞌ bajcheꞌ jini mach wersa miꞌ cotyan i tyat i ñaꞌ, cheꞌetla. Mi laꞌ chaꞌlen cheꞌ bajcheꞌ maꞌix i cꞌʌjnibal i xicꞌojel Dios chaꞌan jach laꞌ wom laꞌ jacꞌben bajcheꞌ tiꞌ bajñel xiqꞌuiyob i bʌ lac yumob ti ñoj oniyix.

7 Chaꞌchajp laꞌ pensal. Weñʌch bajcheꞌ tiꞌ tyajayetla ti tꞌan Isaías, jini tsaꞌ bʌ i xiqꞌui yʌleꞌ Dios ti ñoj oniyix. Dios tiꞌ cꞌʌmbe i tiꞌ. Ti yʌlʌ:

10 Cheꞌ jini Jesús tiꞌ chaꞌ pʌyʌyob tyʌlel jini quixtyañujob. Tiꞌ subeyob. Ñʌchꞌtyañla. Wen chꞌʌmbenla isujm.

11 Jini muꞌ bʌ i yochel ti i tiꞌ quixtyañujob machꞌan miꞌ bibiꞌtisañob. Miꞌ bibiꞌtisan quixtyañujob muꞌ bʌ i loqꞌuel tiꞌ pusicꞌal. Jiñʌch machꞌʌ yom i yilan Dios. Cheꞌ ti yʌlʌ Jesús.

12 Cheꞌ jini, jini ajcʌntꞌañob i chaꞌan tiꞌ lʌcꞌʌyob Jesús. Tiꞌ subeyob: ¿A wujil ba cheꞌ ti wen michꞌʌ fariseojob cheꞌ ñac ti yubiyob tsaꞌ bʌ a wʌlʌ? Cheꞌ ti yʌlʌyob.

13 Jesús tiꞌ jacꞌʌ: Chʌ bʌ jach bʌ cʌntisa machꞌʌ tyʌlem yaꞌ baꞌan c Tyat ti panchan mi quejel i jilel.

14 Laꞌ ajnic. Mutsꞌulob i wut jini chʌncol bʌ i pʌsꞌen bij yambʌ mutsꞌuloꞌ bʌ i wut, yubil. Cheꞌ jini cheꞌ juntiquil mutsꞌul bʌ i wut miꞌ pʌsꞌen bij yambʌ mutsꞌul bʌ i wut, ti chaꞌticlelob mi yajlelob ochel ti jowol bʌ lum. Cheꞌ ti yʌlʌ Jesús.

15 Cheꞌ jini, Pedro tiꞌ sube Jesús: Subeñon lojon i sujmlel jini lajoñel, cheꞌen.

16 Jesús tiꞌ jacꞌʌ: ¿Machꞌa baꞌan ti laꞌ ñaꞌtyʌ i sujmlel jatyetla jeꞌel? cheꞌen.

17 ¿Machꞌa baꞌan mi laꞌ ñaꞌtyan chaꞌan chʌ bʌ jach mi yochel ti lac tiꞌ ti lac ñʌcꞌ jach mi majlel? Cheꞌ jach mi ñumel ti lac ñʌcꞌ.

18 Pero tyʌlem ti i pusicꞌal muꞌ bʌ i loqꞌuel ti i tiꞌ quixtyañu. Jiñʌch muꞌ bʌ i bibiꞌtisan quixtyañu. Jiñʌch jini machꞌʌ yom i yilan Dios, cheꞌen.

19 Como tiꞌ pusicꞌal quixtyañu mi loqꞌuel machꞌʌ wen bʌ i pensal, yicꞌot tsʌnsa, yicꞌot cheꞌ miꞌ pejcan yambʌ xꞌixic, yicꞌot cheꞌ miꞌ chaꞌlen i tontojlel quixtyañu, yicꞌot xujchꞌ, yicꞌot lot, yicꞌot jopꞌtꞌan, cheꞌen.

20 Jiñʌch muꞌ bʌ i bibiꞌtisan quixtyañujob, jiñʌch machꞌʌ yom i yilan Dios. Maꞌ miꞌ bibiꞌtisan quixtyañu cheꞌ miꞌ chaꞌlen uchꞌel cheꞌ maꞌ miꞌ pocob i cꞌʌb bajcheꞌ tiꞌ bajñel xiqꞌuiyob i bʌ i chaꞌlen lac yumob ti ñoj oniyix. Cheꞌ ti yʌlʌ Jesús.

21 Jesús ti loqꞌui majlel. Ti majli yaꞌ ti lum tyac Tiro yicꞌot Sidón bʌ i cꞌabaꞌ.

22 Yaꞌ an juntiquil xꞌixic chꞌoyol bʌ ti pañimil Canaán pero yaꞌ chumul yaꞌ ti lum baꞌ ti cꞌoti Jesús. Ti tyʌli yaꞌ baꞌan Jesús. Ti cꞌam bʌ tꞌan ti yʌlʌ: C Yum, i jiñʌjlelet bʌ David tsaꞌ bʌ i choco tyʌlel Dios, pꞌuntyañon chaꞌan maꞌ cotyañon, cheꞌen. Ñoj wocol chʌncol i ñusan quixicꞌal chaꞌan an xiba tiꞌ pusicꞌal, cheꞌen.

23 Pero Jesús maꞌ tiꞌ saj jacꞌbe i tꞌan jini xꞌixic. Cheꞌ jini, ajcʌntꞌañob i chaꞌan Jesús tiꞌ sube Jesús: Suben chaꞌan sujtic jini xꞌixic como ti cꞌam bʌ tꞌan chʌncol i tsʌcleñonla majlel, cheꞌob.

24 Cheꞌ jini ti yʌlʌ Jesús: Dios tiꞌ chocoyon tyʌlel chaꞌan mij cotyan jini israelob jach bʌ max tyo bʌ baꞌan miꞌ chꞌujbiben i tꞌan, como jiñʌch cheꞌ bajcheꞌ tiñʌmeꞌ tsaꞌ bʌ sʌtyʌ i bijlel yubil, cheꞌen. [Tiñʌmeꞌ yom i yʌleꞌ oveja.]

25 Pero jini xꞌixic ti bej tyʌli i lʌqꞌueꞌ Jesús. Tiꞌ ñocchoco i bʌ ti yebal i yoc. Ti yʌlʌ: C Yum, cotyañon, cheꞌen.

26 Jesús tiꞌ sube: Mach yom mi chilbentyel i waj alpꞌeñalob chaꞌan jach mi chocbentyel yal tsꞌiꞌ yubil, cheꞌen. Chʌꞌʌch ti yʌlʌ Jesús chaꞌan ñaxan yom cotyʌnticob israelob.

27 Pero jini xꞌixic tiꞌ jacꞌʌ: Melelʌch bajcheꞌ maꞌ wʌl, c Yum. Pero jini i yal tsꞌiꞌ am bʌ ti yeꞌ mesa miꞌ cꞌuxeꞌ i xejtꞌil waj muꞌ bʌ i pꞌʌtsañob alpꞌeñalob, cheꞌen.

28 Jesús tiꞌ sube jini xꞌixic: Xꞌixic, ti jumpꞌej a pusicꞌal tsaꞌix a chꞌujbi chaꞌan chꞌujbi c chaꞌlen bajcheꞌ maꞌ cꞌajtibeñon. Laꞌ aqꞌuentiquet cheꞌ bajcheꞌ a wom, cheꞌen. Ti saj ora jach ti lajmi i yalobil.

29 Jesús ti loqꞌui majlel. Ti ñumi majlel yaꞌ tiꞌ tiꞌ colem joyol bʌ jaꞌ Galilea bʌ i cꞌabaꞌ. Yaꞌ ti letsi ti wits. Ti buchle.

30 Cabʌl quixtyañujob ti cꞌoti yaꞌ baꞌan Jesús. Tiꞌ pʌyʌyob tyʌlel machꞌʌ baꞌan i cꞌʌjnibal i yoc yicꞌot mutsꞌulob i wut, yicꞌot xꞌumaꞌob, yicꞌot machꞌʌ tsꞌʌcʌl yoc i cꞌʌb, yicꞌot cabʌl yañoꞌ bʌ. Tiꞌ pʌyʌyob tyʌlel ti yebal yoc Jesús. Tiꞌ lajmisʌyob.

31 Tyoj bʌcꞌñʌjel ti yubi quixtyañujob cheꞌ ñac ti yilʌ bajcheꞌ ti lajmisʌntiyob. Como xꞌumaꞌob ti chaꞌ quejiyob ti tꞌan. Chaꞌ wenix i yoc i cꞌʌb jini machꞌʌ tsꞌʌcʌl yoc i cꞌʌb. Ti chaꞌ queji ti xʌmbal jini machꞌʌ baꞌan i cꞌʌjnibal i yoc. Ti chaꞌ cꞌoti i wut jini mutsꞌuloꞌ bʌ i wut. Ti queji i subob i ñuclel Dios muꞌ bʌ i chꞌujutisañob israelob.

32 Cheꞌ jini Jesús tiꞌ pʌyʌ tyʌlel jini ajcʌntꞌañob i chaꞌan. Ti yʌlʌ: Pꞌumpꞌun mij qꞌuelob quixtyañujob como cꞌʌlʌ uxpꞌej qꞌuin wʌꞌ añob la quicꞌot. Maꞌ chʌ bʌ tiꞌ cꞌuxuyob. Mach com xicꞌob sujtyel ti yotyot cheꞌ wiꞌñayobix ame mi cꞌunꞌañob ti bij. Cheꞌ ti yʌlʌ Jesús.

33 Cheꞌ jini, ajcʌntꞌañob i chaꞌan ti yʌlʌ: ¿Bajcheꞌqui chꞌujbi c lojon tyajeꞌ waj wʌꞌ ti joch lum chaꞌan ñajꞌacob ñoj cabʌl quixtyañu? cheꞌob.

34 Jesús tiꞌ cꞌajtibeyob: ¿Jayqꞌuej waj an laꞌ chaꞌan? cheꞌen. Ti yʌlʌyob: An siete yicꞌot an chaꞌcojt uxcojt saj chʌy, cheꞌob.

35 Cheꞌ jini Jesús tiꞌ subeyob quixtyañujob chaꞌan mi buchtyʌlob ti lum.

36 Cheꞌ jini tiꞌ chꞌʌmʌ jini waj yicꞌot chʌy. Tiꞌ sube Dios wocox i yʌlʌ. Cheꞌ jini tiꞌ xetꞌe. Tiꞌ acꞌʌyob ajcʌntꞌañob i chaꞌan. Tiꞌ luꞌ pucbeyob majlel baꞌan pejtyelel quixtyañu.

37 Tiꞌ luꞌ cꞌuxuyob. Ti luꞌ ñajꞌʌyob. Cheꞌ jini, cheꞌ ti ujtiyob ti uchꞌel tiꞌ lotyoyob siete colem chiquib butꞌul i colojbal xejtꞌil tyac.

38 Cuatro mil winicob tsaꞌ bʌ i cꞌuxu jini waj yicꞌot chʌy. An xꞌixicob yicꞌot alpꞌeñalob jeꞌel pero maꞌ tiꞌ tsiquiyob jaytiquil.

39 Jesús tiꞌ subeyob sujtyel quixtyañujob. Cheꞌ jini ti majli ti barco ti pañimil Magdala bʌ i cꞌabaꞌ.