2 Jesús tiꞌ subeyob: Cheꞌ ti och an qꞌuin mi laꞌ wʌleꞌ: Utsil ijcꞌʌl como chʌchʌc yaꞌ ti chan, cheꞌetla.

3 Yicꞌot ti sʌcꞌan mi laꞌ wʌl: Tyal jaꞌal wale como chʌchʌc yaꞌ ti chan yicꞌot an tyocal, cheꞌetla. Chaꞌchajp laꞌ pensal. Mi laꞌ ñaꞌtyan mi tyal jaꞌal o mi utsil quejel, pero machꞌan mi laꞌ ñaꞌtyan chʌ bʌ yes chʌncol i yujtyel wʌꞌ ti mulawil aunque mi laꞌ qꞌuel chʌ bʌ tyac chʌncol c chaꞌlen.

4 Jini simaron bʌ quixtyañujob machꞌʌ yom i chꞌujbin Dios miꞌ cꞌajtibeñob chaꞌan yomob i pʌsꞌentyel i señʌjlel c pꞌʌtyʌlel. Pero jini jach mi quejel i pʌsꞌentyelob bajcheꞌ ti ajni chaꞌan jumpꞌej seña ti ñoj oniyix juntiquil tsaꞌ bʌ i xiqꞌui yʌleꞌ Dios Jonás bʌ i cꞌabaꞌ. Cheꞌ ti yʌlʌ Jesús. Maꞌan chʌ bʌ yambʌ ti yʌlʌyob fariseojob yicꞌot saduceojob. Ti sujti Jesús.

5 Cheꞌ ñac tiꞌ cꞌaxiyob ti colem joyol bʌ jaꞌ, machꞌan cꞌajal i chaꞌan i chꞌʌmob majlel waj jini ajcʌntꞌañob i chaꞌan Jesús.

6 Cheꞌ jini, Jesús tiꞌ subeyob: Tsajibiletla yom. Cʌñʌtyan laꞌ bʌ chaꞌan jini levadura muꞌ bʌ i yʌqꞌuen i wos i bʌ caxlan waj i chaꞌan bʌ fariseojob yicꞌot saduceojob, cheꞌen.

7 Ti queji i pejcañob i bʌ jini ajcʌntꞌañob i chaꞌan Jesús. Ti yʌlʌyob: Chʌꞌʌch chʌncol i yʌleꞌ chaꞌan machꞌan ti lac chꞌʌmʌ tyʌlel lac caxlan waj, cheꞌob.

8 Jesús tiꞌ ñaꞌtyʌ chʌ bʌ chʌncol i yʌlob. Tiꞌ subeyob: ¿Chucoch chʌncox laꞌ lolon al cheꞌ machꞌan laꞌ caxlan waj? Max tyo baꞌan chʌncol laꞌ chꞌujbiñon ti jumpꞌej laꞌ pusicꞌal chaꞌan an c pꞌʌtyʌlel.

9 ¿Machꞌa baꞌan cꞌajal laꞌ chaꞌan jini joqꞌuej waj tsaꞌ bʌ c xetꞌbeyob chaꞌan i cꞌuxob cinco mil winicob? ¿Machꞌa baꞌan cꞌajal laꞌ chaꞌan jaypꞌej chiquib tsaꞌ bʌ laꞌ lotyo i colojbal i xejtꞌil tyac?

10 ¿Machꞌa baꞌan cꞌajal laꞌ chaꞌan jini siete waj tsaꞌ bʌ c xetꞌbeyob chaꞌan i cꞌuxob cuatro mil winicob? ¿Machꞌa baꞌan cꞌajal laꞌ chaꞌan jaypꞌej chiquib ti laꞌ lotyo i colojbal i xejtꞌil tyac?

11 ¿Chucoch machꞌan ti laꞌ chꞌʌmbe isujm chaꞌan mach caxlan wajic chʌncol c tyajeꞌ ti tꞌan cheꞌ mic subeñetla chaꞌan mi laꞌ cʌñʌtyan laꞌ bʌ chaꞌan levadura muꞌ bʌ i yʌqꞌuen i wos i bʌ jini caxlan waj i chaꞌan bʌ fariseojob yicꞌot saduceojob? cheꞌen.

12 Cheꞌ jini, tiꞌ chꞌʌmbeyob isujm chaꞌan tiꞌ subeyob chaꞌan i cʌñʌtyañob i bʌ chaꞌan i cʌntisa fariseojob yicꞌot saduceojob, mach chaꞌanic levadura muꞌ bʌ i yʌqꞌuen i wos i bʌ caxlan waj.

13 Cheꞌ ñac ti cꞌoti Jesús lʌcꞌʌl ti lum Cesarea Filipo bʌ i cꞌabaꞌ tiꞌ cꞌajtibe ajcʌntꞌañob i chaꞌan: ¿Chuqui mi yʌl quixtyañujob? ¿Majchonqui bʌ i Piꞌʌl Quixtyañujob mi yʌlob? cheꞌen.

14 Ti yʌlʌyob: Chaꞌtiquil uxtiquil mi yʌlob jatyet Juañet tsa bʌ i yʌcꞌʌ chꞌʌm jaꞌ, cheꞌob. Yañoꞌ bʌ mi yʌlob Elíasjet, cheꞌob. Yicꞌot yañoꞌ bʌ mi yʌlob Jeremíasjet o mi yambʌ tsaꞌ bʌ i xiqꞌui yʌleꞌ Dios ti ñoj oniyix, cheꞌob. Cheꞌ tiꞌ jacꞌʌ ajcʌntꞌañob i chaꞌan Jesús.

15 Cheꞌ jini, Jesús tiꞌ cꞌajtibeyob: Jixcu jatyetla, ¿majchonqui mi laꞌ wʌl? cheꞌen.

16 Cheꞌ jini tiꞌ jacꞌʌ Pedro: Jatyet jini yajcʌbil bʌ i chaꞌan cuxul bʌ Dios muꞌ bʌ a pejcʌntyel ti Cristo, cheꞌen.

17 Cheꞌ jini ti yʌlʌ Jesús: Tijicña a pusicꞌal Simón, i yalobilet bʌ Jonás como mi junticlec quixtyañu ti yʌqꞌueyet a ñaꞌtyan bajcheꞌ jini. Pero jini c Tyat am bʌ ti panchan ti yʌqꞌuet a ñaꞌtyan majchonqui, cheꞌen.

18 Mic subeñet chaꞌan a cꞌabaꞌ Pedro yom i yʌl tyun. Machꞌʌ baꞌan majch chꞌujbi i nijcan colem bʌ tyun, chʌꞌʌch bajcheꞌ jini maꞌ majch chꞌujbi i nijcʌbeñet a pusicꞌal chaꞌan maꞌ cʌy a chꞌujbiñon. Machꞌan mi quejel i jotyob jini yom bʌ i yʌcꞌob ti sajtyel muꞌ tyo bʌ quejel i yoque chꞌujbiñon ti tyal tyo bʌ ora.

19 Mi quej cʌqꞌueñet a weꞌtyel chaꞌan jini muꞌ bʌ i yochelob yaꞌ baꞌ muꞌ ti yumʌl Dios. Jini muꞌ bʌ a wʌqꞌuen a tꞌan chaꞌan miꞌ chaꞌlen quixtyañu chꞌujbi i chaꞌlen. Chʌꞌʌch Dios jeꞌel mi yʌcꞌ i tꞌan i chaꞌlen. Mi machꞌan maꞌ wʌqꞌuen a tꞌan chaꞌan chꞌujbi i chaꞌlen, mach chꞌujbi i chaꞌlen, cheꞌ jini. Chʌꞌʌch Dios jeꞌel machꞌan mi yʌcꞌ i tꞌan i chaꞌlen. Cheꞌ ti subenti Pedro ti Jesús.

20 Cheꞌ jini Jesús tiꞌ wersa tiqꞌui ajcʌntꞌañob i chaꞌan chaꞌan machꞌan miꞌ subeñob mi junticlec chaꞌan jiñʌch Cristo, jini yajcʌbil bʌ i chaꞌan Dios.

21 Ti jim bʌ ora Jesús ti queji i wen suben ajcʌntꞌañob i chaꞌan chʌ bʌ yes mi quejel i yujtyel tyac. Tiꞌ wʌ subeyob chaꞌan wersa mi majlel yaꞌ ti Jerusalén. Chaꞌan yaꞌi jini xñoxob añoꞌ bʌ i yeꞌtyel yicꞌot ñucoꞌ bʌ curajob yicꞌot ajcʌntisajob chaꞌan mandar i chaꞌan israelob mi quejel i yʌqꞌuen i ñusan cabʌl wocol. Mi quejel i tsʌnsʌntyel pero ti yuxpꞌejlel qꞌuin mi quejel i chaꞌ tyejchel loqꞌuel baꞌan sajtyemoꞌ bʌ. Cheꞌ ti wʌ subeyob.

22 Cheꞌ jini, Pedro tiꞌ bajñel pʌyʌ majlel Jesús ti jumpat. Ti queji i tiqꞌueꞌ. Ti yʌlʌ: C Yum, laꞌ i pꞌuntyañet Dios. Mach cheꞌic mi quejel a wujtyel, cheꞌen.

23 Pero Jesús tiꞌ sutqui i bʌ i qꞌuel Pedro. Tiꞌ sube: Loqꞌuen wʌꞌ baꞌ añon como chʌncol a ñaꞌtyan cheꞌ bajcheꞌ miꞌ ñaꞌtyan Satanás. Chʌncol a jopꞌ a mʌctyʌbeñon c chaꞌlen chʌ bʌ yom i pusicꞌal Dios. Machꞌan maꞌ ñaꞌtyan bajcheꞌ yom Dios, jin jach bajcheꞌ miꞌ mulan quixtyañujob. Cheꞌ ti subenti Pedro.

24 Cheꞌ jini Jesús tiꞌ sube ajcʌntꞌañob i chaꞌan: Mi an majch yom i tsʌcleñon, laꞌ i cʌy muꞌ bʌ i bajñel mulan i niqꞌui chaꞌlen. Laꞌ i ñusan wocol ti jujumpꞌej qꞌuin chaꞌan ti caj chʌncol i chꞌujbiñon. Aunque mi sajtyel tij caj, laꞌ i tsʌcleñon majlel, cheꞌen.

25 Jini yom bʌ i lolon bajñel cʌñʌtyan i bʌ mi quejel i sʌtyeꞌ i cuxtyʌlel machꞌʌ yujil jilel. Pero jini muꞌ bʌ i yʌcꞌ i bʌ chaꞌañon mi quejel i cotyʌntyel. Cheꞌ ti yʌlʌ Jesús.

26 ¿Chutyoqui i cꞌʌjnibal i chaꞌan quixtyañu miꞌ lolon ganarin pejtyel chʌ bʌ tyac am bʌ ti ili mulawil mi machꞌan tiꞌ tyaja i cuxtyʌlel machꞌʌ yujil jilel? Como machꞌan bajcheꞌ chꞌujbi i saj mʌñeꞌ i cuxtyʌlel machꞌʌ yujil jilel.

27 Como Joñon i Piꞌʌlon bʌ Quixtyañujob mic majlel ti panchan. Cheꞌ jini mi quejel c chaꞌ tyʌlel tiꞌ ñuclel c Tyat am bʌ ti panchan yicꞌot ajtroñelob i chaꞌan Dios chꞌoyoloꞌ bʌ ti panchan. Ti jim bʌ ora mi quejel cʌqꞌuen jujuntiquil i tyojol i chaꞌlibal yubil mi weñʌch o mi mach wen, cheꞌen.

28 Melel mic subeñetla, wʌꞌ añob machꞌʌ baꞌan mi quejel i sajtyelob jintyo mi yilañoñob, Joñon i Piꞌʌlon bʌ Quixtyañu, cheꞌ mic chaꞌ tyʌlel c chaꞌlen yumʌl. Cheꞌ ti yʌlʌ Jesús.