2 Cheꞌ ñac yaꞌ añob ti yʌjni i ñiꞌ i wut Jesús ti yilʌyob. Lemlaw ti majli i ñiꞌ i wut lajal bajcheꞌ qꞌuin. Wen sʌsʌc ti majli i pislel lajal bajcheꞌ i sʌclel pañimil.

3 Ti ora jach ti yilʌyob yaꞌan Moisés yicꞌot Elías. Chʌncolob ti tꞌan yicꞌot Jesús.

4 Cheꞌ jini, Pedro tiꞌ sube Jesús: C Yum, cꞌotyajax cheꞌ wʌꞌ añonla wʌꞌwʌꞌi. Laꞌ c meleꞌ lojon uxpꞌej lechiꞌpat. Jumpꞌej a chaꞌan, jumpꞌej i chaꞌan Moisés yicꞌot jumpꞌej i chaꞌan Elías. Cheꞌ ti yʌlʌ Pedro.

5 Cheꞌ muꞌ tyo ti tꞌan Pedro, ti tyʌli jumpꞌej lemlaw bʌ tyocal tsaꞌ bʌ mosoyob. Cheꞌ jini ti yubiyob ajtꞌan yaꞌ ti mal tyocal tsaꞌ bʌ yʌlʌ: Jiñʌch pꞌuntyʌbil bʌ calobil. Ñoj utsꞌat mij qꞌuel. Ñʌchꞌtyʌbenla i tꞌan. Cheꞌ ti yʌlʌ jini ajtꞌan.

6 Cheꞌ ñac ti yubiyob ajtꞌan jini ajcʌntꞌañob i chaꞌan Jesús tiꞌ ñocchocoyob i bʌ ti lum. Bʌbʌqꞌuen ti yubiyob.

7 Cheꞌ jini Jesús ti majli yaꞌ baꞌañob. Tiꞌ tyʌlbeyob i quejlop. Tiꞌ subeyob: Tyejchenla. Mach laꞌ chaꞌlen bʌqꞌuen, cheꞌen.

8 Cheꞌ ñac tiꞌ qꞌueleyob ti suttyʌlel, maꞌix tsiquil yañoꞌ bʌ. Jin jachix Jesús yaꞌan.

9 Cheꞌ ñac chʌncol i jubelob tyʌlel ti wits Jesús tiꞌ tiqꞌuiyob. Tiꞌ subeyob: Maꞌan majch mi laꞌ saj suben jini tsaꞌ bʌ laꞌ wilʌ jintyo mic tyejchel loqꞌuel baꞌan sajtyemoꞌ bʌ, Joñon i Piꞌʌlon bʌ Quixtyañujob, cheꞌen.

10 Cheꞌ jini, ajcʌntꞌañob i chaꞌan Jesús tiꞌ cꞌajtibe: ¿Chuquiyes i sujmlel cheꞌ mi yʌlob jini ajcʌntisajob chaꞌan mandar i chaꞌan israelob chaꞌan ñaxan wersa mi tyʌlel Elías? cheꞌob.

11 Jesús tiꞌ jacꞌbeyob: Melelʌch ñaxan mi tyʌlel Elías chaꞌan miꞌ tyojꞌisan pejtyelel chʌ bʌ an. Ti wiꞌil mi tyʌlel jini muꞌ bʌ i choc tyʌlel Dios, cheꞌen.

12 Pero mic subeñetla chaꞌan tsajni Elías pero maꞌan majch tiꞌ ñaꞌtyʌ mi jiñʌchi. Tiꞌ luꞌ tyʌcꞌlʌyob. Tiꞌ tsʌnsʌyob. Chʌꞌʌch joñon jeꞌel i Piꞌʌlon bʌ Quixtyañujob mi quejel quilan wocol tiꞌ cꞌʌbob.

13 Cheꞌ jini, ajcʌntꞌañob i chaꞌan Jesús tiꞌ chꞌʌmbeyob isujm chaꞌan jini tsaꞌ bʌ i yʌlʌ Jesús chaꞌan Elías jiñʌch Juan tsaꞌ bʌ yʌcꞌʌ chꞌʌm jaꞌ chʌncol bʌ i tyaj ti tꞌan.

14 Ti cꞌotiyob Jesús yicꞌot ajcʌntꞌañob i chaꞌan yaꞌ baꞌan quixtyañujob. Cheꞌ jini juntiquil winic ti tyʌli yaꞌ baꞌan Jesús. Ti ñocle ti yebal yoc Jesús.

15 Ti yʌlʌ: C Yum, pꞌuntyan chaꞌan a wom a cotyan jini aloꞌ bʌ calobil. An qꞌuinil mi yʌqꞌuen jitsꞌcuyel. Ñoj cabʌl miꞌ ñusan wocol. Cabʌl mi yajlel ochel ti cꞌajc. Cabʌl mi yajlel ochel ti jaꞌ, cheꞌen.

16 Tic pʌyʌ tyʌlel wʌꞌ baꞌan ajcʌntꞌañob a chaꞌan chaꞌan miꞌ lajmisan, pero machꞌan ti mejliyob. Cheꞌ ti yʌlʌ jini winic.

17 Cheꞌ jini Jesús ti yʌlʌ: Max tyo baꞌan majch miꞌ chꞌujbin wʌꞌ bʌ an ti mulawil, yubil. ¿Jaypꞌej tyo qꞌuin wersa yom wʌꞌ añon quicꞌotyetla? ¿Jaypꞌej tyo qꞌuin chꞌujbi j cuchbeñetla i tsʌtslel laꞌ pusicꞌal? Pʌyʌ tyʌlel a walobil wʌꞌ baꞌañon. Cheꞌ ti yʌlʌ Jesús.

18 Cheꞌ jini Jesús tiꞌ tiqꞌui jini xiba. Tiꞌ choco loqꞌuel tiꞌ pusicꞌal alob. Ti saj ora jach ti lajmi jini alob.

19 Cheꞌ jini, ajcʌntꞌañob i chaꞌan tiꞌ bajñel pejcʌyob Jesús. Ti yʌlʌyob: ¿Chucoch machꞌan ti mejli lojon c choqueꞌ loqꞌuel jini xiba? cheꞌob.

20 Jesús ti yʌlʌ: Chaꞌan machꞌan mi laꞌ chꞌujbin ti jumpꞌej jach laꞌ pusicꞌal. Como melel mic subeñetla: Mi muqꞌuic laꞌ chꞌujbiñon ti jumpꞌej laꞌ pusicꞌal aunque yaꞌ tsꞌityaꞌ jach cheꞌ bajcheꞌ yoque tsꞌintyʌl i bʌcꞌ mostaza, chꞌujbi laꞌ suben jini wits chaꞌan i chꞌuyeꞌ loqꞌuel i bʌ wʌꞌi chaꞌan mi majlel ti ochel ti colem jaꞌ. Cheꞌ jini yaꞌ mi majlel jini wits. Muqꞌuic laꞌ chꞌujbin ti jumpꞌej jach laꞌ pusicꞌal machꞌan chʌ bʌ machꞌʌ chꞌujbi laꞌ chaꞌlen, cheꞌen.

21 Pero jini xiba tsaꞌ bʌ tyʌcꞌlʌ jini alob, jin jach ti oración yicꞌot ti chꞌajb chꞌujbi i chojquel loqꞌuel. Cheꞌ ti yʌlʌ Jesús.

22 Cheꞌ motin mucꞌob ti xʌmbal majlel Jesús yicꞌot ajcʌntꞌañob i chaꞌan yaꞌ ti pañimil Galilea bʌ i cꞌabaꞌ ti queji i subeñob: Joñon i Piꞌʌlon bʌ Quixtyañujob mi quejel cʌjqꞌuel tiꞌ cꞌʌb quixtyañujob.

23 Mi quejel i tsʌnsañoñob. Cheꞌ tsaꞌix tsʌnsʌntiyon, ti yuxpꞌejlel qꞌuin mi quejel c chaꞌ loqꞌuel baꞌan sajtyemoꞌ bʌ. Cheꞌ ti yʌlʌ Jesús. Wen chꞌʌjyem ti yubiyob jini ajcʌntꞌañob i chaꞌan, chaꞌan jini tsaꞌ bʌ yʌlʌ Jesús.

24 Cheꞌ ñac Jesús yicꞌot ajcʌntꞌañob i chaꞌan ti cꞌotiyob yaꞌ ti lum Capernaum bʌ i cꞌabaꞌ, jini xchꞌʌm tyojoñel chaꞌan templo ti majliyob i pejcan jini Pedro. Ti yʌlʌ: Ixcu jini laꞌ maestro, ¿machꞌa baꞌan miꞌ tyojeꞌ tyojoñel chaꞌan templo? Cheꞌ ti yʌlʌ.

25 Pedro tiꞌ jacꞌʌ: Muꞌ cu i tyojeꞌ, cheꞌen. Cheꞌ jini, cheꞌ ñac ti ochi Pedro ti otyot cheꞌ max tyo baꞌan chʌ bʌ ti yʌlʌ, Jesús ti queji i yʌleꞌ: ¿Bajcheꞌ maꞌ pensalin, Simón? ¿Majchqui mi yʌqꞌueñob tyojoñel jini yumʌlob wʌꞌ ti mulawil? ¿Jim ba jini añoꞌ bʌ ti yotyot? ¿Jim ba yañoꞌ bʌ? Cheꞌ ti yʌlʌ Jesús.

26 Pedro tiꞌ jacꞌʌ: Jini yañoꞌ bʌ, cheꞌen. Jesús ti yʌlʌ: Cheꞌ jini, mach i wenta i wersa tyojeꞌ jini am bʌ ti yotyot, cheꞌen.

27 Pero chaꞌan maꞌan majch miꞌ michꞌqꞌuelet ti caj machꞌan ti a tyojo, cucu yaꞌ ti colem joyol bʌ jaꞌ. Choco ochel a mʌscap. Jini ñaxan bʌ chʌy muꞌ bʌ i chuqueꞌ a mʌscap, locꞌsan. Cheꞌ maꞌ cawben i tiꞌ yaꞌ mi quejel a tyajeꞌ junwejch tyaqꞌuin jasʌl bʌ chaꞌan maꞌ tyojeꞌ a tyojoñel yicꞌot c chaꞌan. Chꞌʌmʌ majlel jini tyaqꞌuin. Tyojo jini tyojoñel. Cheꞌ ti yʌlʌ Jesús.