2 Pꞌumpꞌun mij qꞌuel ili quixytañujob chaꞌan com j cotyañob. Uxpꞌelix qꞌuin wʌꞌan quicꞌotyob. Maꞌix chʌ bʌ tiꞌ cꞌuxuyob.

3 Mi tic chocoyob majlel ti yotyot cheꞌ wiꞌñayobix, cꞌoꞌojl mi quejel i cꞌun añob ti bij. An ñajt bʌ chꞌoyolob. Cheꞌ ti yʌlʌ Jesús.

4 Jini ajcʌntꞌañob tiꞌ jacꞌʌyob: ¿Baqui chꞌujbi lac tyajeꞌ waj chaꞌan i cꞌuxob wʌꞌ baꞌ jochol lum? cheꞌob.

5 Jesús tiꞌ jacꞌbeyob: ¿Jayqꞌuejqui waj an laꞌ chaꞌan? cheꞌen. Tiꞌ jacꞌʌyob: Siete, cheꞌob.

6 Cheꞌ jini tiꞌ luꞌ xiqꞌuiyob buchtyʌl ti lum pejtyel jini quixtyañu. Tiꞌ chꞌʌmʌ jini siete waj. Tiꞌ sube wocox i yʌlʌ Dios. Cheꞌ jini, ti queji i xetꞌe tyac. Ti queji i yʌqꞌuen jini ajcʌntꞌañob chaꞌan i pucbeñob i bʌ. Ti queji i pucbeñob quixtyañujob.

7 An i chaꞌañob jeꞌel chaꞌcojt uxcojt biqꞌuit bʌ chʌy. Cheꞌ jini tiꞌ chaꞌle oración Jesús. Tiꞌ subeyob ajcʌntꞌañob i chaꞌan chaꞌan i pucbeñob.

8 Ti luꞌ weꞌiyob. Ti luꞌ ñajꞌʌyob. Cheꞌ jini tiꞌ lotyoyob siete ñuqui chiquib butꞌul tyac i colojbal i xejtꞌil tyac chʌy yicꞌot waj.

9 Lʌcꞌʌl cuatro mil jini tsaꞌ bʌ i cꞌuxuyob waj yicꞌot chʌy. Cheꞌ jini Jesús tiꞌ subeyob i luꞌ sujtyel.

10 Ti ochiyob ti barco Jesús yicꞌot ajcʌntꞌañob i chaꞌan. Ti majliyob ti lʌcꞌʌlel saj lum Dalmanuta bʌ i cꞌabaꞌ.

11 Ti tyʌliyob junmujchꞌ fariseojob bʌ i cꞌabaꞌ. Ti queji i contrajibeñob i tꞌan Jesús. Yom pʌsꞌenticob i pꞌʌtyʌlel Jesús tyʌlem bʌ ti panchan chaꞌan miꞌ qꞌuelob mi melelʌch bajcheꞌ miꞌ chaꞌlen Jesús.

12 Jesús cꞌam tiꞌ japʌ icꞌ chaꞌan mach yom yubin. Ti yʌlʌ: ¿Chucoch miꞌ cꞌajtin i qꞌuelbeñoñob c pꞌʌtyʌlel wʌꞌ bʌ añob ti mulawil? Melel mic subeñetla machꞌan mi quej laꞌ pʌsꞌentyel c pꞌʌtyʌlel . Cheꞌ ti yʌlʌ Jesús.

13 Jesús tiꞌ cʌyʌyob jini quixtyañujob. Ti chaꞌ ochi ti barco. Ti majli ti junxej jaꞌ.

14 Ti ñajayi i chaꞌan i chꞌʌmob majlel chʌ bʌ yes miꞌ cꞌuxob jini ajcʌntꞌañob i chaꞌan Jesús. Jumpꞌej jach caxlan waj yaꞌan yicꞌotyob ti barco.

15 Cheꞌ jini Jesús tiꞌ wersa subeyob: Tsajibiletla yom. Cʌñʌtyan laꞌ bʌ chaꞌan jini levadura muꞌ bʌ yʌqꞌuen i wos i bʌ caxlan waj i chaꞌan bʌ fariseojob yicꞌot i chaꞌan bʌ Herodes. Cheꞌ ti yʌlʌ Jesús.

16 Ti queji i motin pejcañob i bʌ ajcʌntꞌañob i chaꞌan Jesús. Ti yʌlʌyob: Chʌꞌʌch chʌncol i yʌleꞌ chaꞌan machꞌan ti lac chꞌʌmʌ tyʌlel laj caxlan waj, cheꞌob.

17 Jesús tiꞌ ñaꞌtyʌ chuqui ti yʌlʌyob. Tiꞌ subeyob: ¿Chucoch mi laꞌ lolon aleꞌ cheꞌ machꞌan laꞌ caxlan waj? ¿Machꞌa baꞌan mi laꞌ chꞌʌmben isujm? ¿Machꞌa baꞌan mi laꞌ ñaꞌtyan cheꞌ mi laꞌ wubin jini lajoñel? ¿Tsʌts tyo ba laꞌ pusicꞌal?

18 Lolon an laꞌ wut. ¿Machꞌa baꞌan mi laꞌ wilan pañimil? Lolon an laꞌ chiquin. ¿Machꞌa baꞌan mi laꞌ wubin? ¿Machꞌa baꞌan cꞌajal laꞌ chaꞌan chʌ bʌ ti ujti?

19 Cheꞌ ñac tic xetꞌbeyob joꞌqꞌuej waj jini cinco mil quixtyañu, ¿jaypꞌejqui chiquib ti laꞌ lotyo i colojbal i xejtꞌil tyac? cheꞌ Jesús. Jini ajcʌntꞌañob tiꞌ jacꞌʌyob: Doce, cheꞌob.

20 Jesús ti queji i chaꞌ aleꞌ: Cheꞌ ñac an siete waj chaꞌan cuatro mil quixtyañu, ¿jaypꞌejqui ñuqui chiquib ti laꞌ lotyo i colojbal i xejtꞌil tyac? cheꞌen. Tiꞌ jacꞌʌyob: Siete, cheꞌob.

21 Jesús tiꞌ subeyob: ¿Max tyo baꞌan mi laꞌ chꞌʌmben isujm? cheꞌ Jesús.

22 Yaꞌ ti cꞌotiyob ti lum Betsaida bʌ i cꞌabaꞌ. Tiꞌ pʌyʌyob tyʌlel juntiquil mutsꞌul bʌ i wut yaꞌ baꞌan Jesús. Tiꞌ subeyob Jesús chaꞌan i tyʌleꞌ.

23 Jesús tiꞌ chucbe i cꞌʌb jini mutsꞌul bʌ i wut. Tiꞌ pʌyʌ loqꞌuel yaꞌ ti lum. Tiꞌ bombe i yaꞌlel i tiꞌ ti i wut. Ti yʌcꞌʌ i cꞌʌb tiꞌ wut jini mutsꞌul bʌ i wut. Tiꞌ cꞌajtibe: ¿Am ba chʌ bʌ maꞌ wilan? Cheꞌ tiꞌ cꞌajtibe jini winic.

24 Ti queji i yilan pañimil jini winic. Ti yʌlʌ: Mi quilan winicob. Pero cheꞌ bajcheꞌ tyeꞌ mi quilan mucꞌ bʌ ti xʌmbal. Cheꞌ ti yʌlʌ.

25 Jesús tiꞌ chaꞌ acꞌʌ i cꞌʌb tiꞌ wut jini mutsꞌul bʌ i wut. Ti lajmi i wut. Tiꞌ chꞌuj qꞌuele pañimil.

26 Jesús tiꞌ xiqꞌui majlel ti yotyot. Tiꞌ sube: Mach ochet ti lum. Maꞌ majch maꞌ saj suben yaꞌ ti lum. Cheꞌ ti yʌlʌ Jesús.

27 Ti loqꞌui majlel Jesús yicꞌot ajcʌntꞌañob i chaꞌan. Ti majliyob yaꞌ ti saj tyac bʌ lum yaꞌ ti Cesarea Filipo bʌ i cꞌabaꞌ. Cheꞌ ñac yaꞌ tyo añob ti bij Jesús tiꞌ cꞌajtibeyob: ¿Majchonqui mi yʌl quixtyañujob? cheꞌen.

28 Tiꞌ jacꞌʌyob: Mi yʌlob jatyet Juan tsaꞌ bʌ yʌcꞌʌ chꞌʌm jaꞌ. An muꞌ bʌ yʌlob Elíaset. Yañoꞌ bʌ mi yʌlob jatyet juntiquil tsaꞌ bʌ i xiqꞌui yʌleꞌ Dios. Cheꞌ ti yʌlʌyob jini ajcʌntꞌañob.

29 Jesús tiꞌ cꞌajtibeyob: Ixcu jatyetla, ¿majchonqui mi laꞌ wʌl? cheꞌen. Pedro tiꞌ jacꞌbe: Jatyet jini yajcʌbil bʌ i chaꞌan Dios muꞌ bʌ i pejcʌntyel ti Cristo, cheꞌen.

30 Jesús tiꞌ wersa tiqꞌuiyob chaꞌan machꞌan majch miꞌ subeñob.

31 Jesús ti queji i cʌntisañob añʌch chaꞌan i wersa ñusan wocol. Ti yʌlʌ: Joñon i Piꞌʌlon Quixtyañujob mi quejel i michꞌ qꞌuelon xñoxob añoꞌ bʌ yeꞌtyel yicꞌot ñuc bʌ curajob i chaꞌan israelob yicꞌot ajcʌntisajob chaꞌan i mandar israelob, cheꞌen. Tiꞌ subeyob mi quejel i tsʌnsʌntyel yicꞌot mi quejel i chaꞌ tyejchel loqꞌuel baꞌan sajtyemoꞌ bʌ ti yuxpꞌejlelel qꞌuin.

32 Ñoj tsiquilʌch bajcheꞌ tiꞌ subeyob. Pedro tiꞌ bajñel pʌyʌ majlel Jesús ti jumpat. Ti queji i tiqꞌueꞌ.

33 Pero Jesús tiꞌ sutqui i bʌ i qꞌuel jini ajcʌntꞌañob. Ti queji i tiqꞌueꞌ Pedro. Ti yʌlʌ: Loqꞌuen wʌꞌ bʌꞌ añon como chʌncol a ñaꞌtyan cheꞌ bajcheꞌ miꞌ ñaꞌtyan Satanás. Machꞌan maꞌ ñaꞌtyan bajcheꞌ yom Dios, jin jach bajcheꞌ miꞌ mulan quixtyañujob. Cheꞌ ti yʌlʌ Jesús.

34 Jesús tiꞌ chaꞌ pʌyʌyob tyʌlel jini muchꞌquibiloꞌ bʌ quixtyañu yicꞌot ajcʌntꞌañob i chaꞌan. Tiꞌ subeyob: Mi an majch yom i tsʌcleñon majlel laꞌ i cʌyeꞌ muꞌ bʌ i bajñel niqꞌui chaꞌlen. Laꞌ i ñusan wocol aunque mi sajtyel ti cruz ti caj miꞌ tsʌcleñon majlel.

35 Jini yom bʌ i bajñel cʌñʌtyan i bʌ mi quejel i sʌtꞌe i cuxtyʌlel machꞌʌ yujil jilel. Jini muꞌ bʌ i yʌcꞌ i bʌ chaꞌañon, chaꞌan jini wen bʌ tꞌan mi quejel i cʌñʌtyʌntyel.

36 Anic winic muꞌ bʌ i luꞌ ganarin pejtyelel am bʌ ti mulawil, ¿chutyoqui i cꞌʌjnibal i chaꞌan mi machꞌan ti tyaja i cuxtyʌlel machꞌʌ yujil jilel?

37 Como maꞌan bajcheꞌ chꞌujbi i saj mʌñeꞌ i cuxtyʌlel machꞌʌ yujil jilel.

38 Mi an majch miꞌ quisniñon yicꞌot cheꞌ miꞌ quisnibeñon ili c tꞌan wʌꞌ ti mulawil baꞌan jini muꞌ bʌ i cʌyob Dios yicꞌot jini añoꞌ bʌ i mul, cheꞌ jini mi quej j quisnin jeꞌel ili quixtyañujob Joñon i Piꞌʌlon Quixtyañujob yaꞌ bʌ mic tyʌlel tiꞌ ñuclel c Tyat yicꞌot chꞌujul bʌ ajtroñelob i chaꞌan Dios chꞌoyol bʌ ti panchan.