2 Jini Herodes tiꞌ subeyob jini yaꞌ bʌ añob yicꞌot: Jiñʌch jini Juan tsaꞌ bʌ yʌcꞌʌ chꞌʌm jaꞌ. Tsaꞌix tyejchi loqꞌuel baꞌan sajtyemoꞌ bʌ. Jini chaꞌan mi tsictiyel i pꞌʌtyʌlel i pʌseꞌ ñuc tyac bʌ i pꞌʌtyʌlel. Cheꞌ ti yʌlʌ Herodes. Como chʌꞌʌch ti lolon pensali Herodes como ti yʌcꞌʌ ti tsʌnsʌntyel jini Juan.

3 Como jini Herodes ti yʌcꞌʌ ti chucol jini Juan. Cʌchʌl i cꞌʌb ti cadena ti yotsʌyob ti cʌchol. Chʌꞌʌch tiꞌ chaꞌle chaꞌan ti caj jini Herodías, i yijñam Felipe. Jini Felipe jiñʌch i yijtsꞌin Herodes.

4 Como jini Juan tiꞌ sube Herodes: Mach yom cheꞌ maꞌ pʌyben i yijñam a wijtsꞌin, cheꞌen.

5 Jini Herodes yom i yʌcꞌ ti tsʌnsʌntyel Juan pero tiꞌ bʌcꞌñʌ quixtyañujob como tiꞌ pensaliyob chaꞌan jini Juan jiñʌch juntiquil tsaꞌ bʌ i xiqꞌui yʌleꞌ Dios.

6 Pero cheꞌ ñac ti tsꞌʌctiyi i qꞌuinilel i jabilel Herodes, ti tyʌli i yixicꞌal Herodías chaꞌan i bajñel chaꞌlen son yaꞌ ti tyojlel i wut pʌyʌloꞌ bʌ ti qꞌuinijel. Ñoj wen ti yilʌ Herodes jini son.

7 Jini Herodes tiꞌ waꞌchoco i tꞌan chaꞌan wersa mi quejel i yʌqꞌuen jini xcꞌalʌl chʌ bʌ jach yes miꞌ cꞌajtin.

8 Jini xcꞌalʌl ti majli i cꞌajtiben i ñaꞌ chʌ bʌ yom i cꞌajtiben jini Herodes. Cheꞌ jini ti chaꞌ majli yaꞌ baꞌan Herodes. Tiꞌ sube: Com maꞌ pit aqꞌueñon ti colem chꞌejew i jol jini Juan muꞌ bʌ i yʌcꞌ chꞌʌm jaꞌ, cheꞌen.

9 Ñoj chꞌʌjyem ti queji i yubin jini Herodes pero chaꞌan tiꞌ waꞌchoco i tꞌan tiꞌ tyojlel jini pʌyʌlob bʌ ti qꞌuinijel tiꞌ xiqꞌui ti aqꞌuentyel jini xcꞌalʌl jini tsaꞌ bʌ i cꞌajti.

10 Cheꞌ jini tiꞌ xiqꞌui majlel juntiquil chaꞌan miꞌ tyucꞌ tsepben loqꞌuel i jol Juan yaꞌ ti cʌchonibʌl.

11 Ti jumucꞌ tiꞌ pit chꞌʌmʌ tyʌlel i jol ti mal chꞌejew. Ti yʌqꞌue jini xcꞌalʌl. Ti majli i yʌqꞌuen i ñaꞌ.

12 Cheꞌ jini, ti tyʌliyob jini ajcʌntꞌañob i chaꞌan Juan. Tiꞌ chꞌʌmʌyob majlel i bʌcꞌtyal. Tiꞌ chꞌujñʌyob. Cheꞌ jini ti majliyob i subeñob Jesús.

13 Cheꞌ ñac ti subenti Jesús bajcheꞌ ti tsʌnsʌnti Juan, ti ochi ti barco chaꞌan mi bajñel majlel yaꞌ baꞌ jochol jini lum. Pero tiꞌ ñaꞌtyʌyob quixtyañujob baꞌ ti majli. Cheꞌ jini ti loqꞌuiyob ti lum tyac. Ti yoc tiꞌ tsʌcleyob majlel.

14 Cheꞌ ñac ti loqꞌui Jesús ti barco ti yilʌ yaꞌan yonlelob quixtyañu. Tiꞌ pꞌuntyʌyob chaꞌan yom i cotyañob. Tiꞌ lajmisʌ jini xcꞌamꞌañob tsaꞌ bʌ i pʌyʌyob tyʌlel.

15 Cheꞌ iqꞌuix quejel ti tyʌliyob baꞌan Jesús jini ajcʌntꞌañob i chaꞌan. Tiꞌ subeyob: Chʌncox i pꞌʌjquel qꞌuin. Machꞌan chʌ bʌ yes an wʌꞌi. Subeñob majlel quixtyañujob chaꞌan mi majlelob yaꞌ ti lʌcꞌʌl bʌ saj lum tyac chaꞌan i mʌñob chʌ bʌ miꞌ cꞌuxob, cheꞌob.

16 Jesús tiꞌ subeyob: Maꞌ chʌ bʌ och mi majlelob. Jatyetla yom mi laꞌ wʌqꞌueñob chʌ bʌ miꞌ cꞌuxob, cheꞌen.

17 Tiꞌ jacꞌʌyob: An joꞌqꞌuej jach lojon c waj yicꞌot chaꞌcojt chʌy, cheꞌob.

18 Jesús tiꞌ subeyob: Chꞌʌmʌla tyʌlel wʌꞌ baꞌañon, cheꞌen.

19 Cheꞌ jini tiꞌ subeyob quixtyañujob chaꞌan mi buchtyʌlob ti jam. Cheꞌ jini Jesús tiꞌ chꞌʌmʌ jini joꞌqꞌuej waj yicꞌot chaꞌcojt chʌy. Tiꞌ qꞌuele letsel ti panchan. Tiꞌ sube Dios wocox i yʌlʌ. Cheꞌ jini tiꞌ xetꞌe jini waj. Ti yʌqꞌueyob jini ajcʌntꞌañob i chaꞌan. Tiꞌ luꞌ pucbeyob ti pejtyelel quixtyañujob.

20 Tiꞌ luꞌ cꞌuxuyob. Tsaꞌix ñajꞌʌyob. Cheꞌ jini, cheꞌ ti ujtiyob ti uchꞌel tiꞌ lotyoyob doce chiquib i colojbal i xejtꞌil tyac.

21 Cheꞌ bajcheꞌ joꞌpꞌej mil winicob tiꞌ cꞌuxuyob jini waj yicꞌot chʌy. An xꞌixicob yicꞌot alpꞌeñalob jeꞌel pero maꞌan tiꞌ tsiquiyob jaytiquilob.

22 Jesús tiꞌ subeyob ochel ti barco jini ajcʌntꞌañob i chaꞌan, chaꞌan miꞌ ñaxan cꞌaxelob ti junxej colem joyol bʌ jaꞌ. Jesús tsaꞌ tyo cʌyle chaꞌan miꞌ subeñob majlel quixtyañujob.

23 Cheꞌ ti ujti i subeñob sujtyel ti letsi majlel Jesús yaꞌ ti wits chaꞌan miꞌ bajñel chaꞌlen oración. Cꞌʌlʌ ti ochi acꞌbʌlel i bajñel yaꞌan Jesús.

24 Yaꞌan jini barco ti xinil jaꞌ. An toñel bʌ icꞌ. Chʌncol i wetsꞌ ochel jaꞌ ti barco jini icꞌ.

25 Cheꞌ yomox sʌcꞌan ti tyʌli Jesús yaꞌ baꞌañob. Chʌncol ti xʌmbal tyʌlel ti pam jaꞌ.

26 Cheꞌ ñac ti yilʌyob chʌncol ti xʌmbal Jesús tiꞌ pam jaꞌ, tyoj bʌcꞌñʌjel ti yilʌyob jini ajcʌntꞌañob i chaꞌan. Ti quejiyob ti oñel chaꞌañob i bʌqꞌuen. Ti yʌlʌyob: Qꞌuele yaꞌan i wʌy quixtyañu. Cheꞌ ti lolon alʌyob.

27 Jesús tiꞌ pejcʌyob. Tiꞌ subeyob: Laꞌ lajmic laꞌ bʌqꞌuen. Joñoñʌch. Mach laꞌ bʌcꞌñañon, cheꞌen.

28 Cheꞌ jini, Pedro tiꞌ sube: C Yum, mi jatyetyʌch aqꞌueñon c tyʌlel yaꞌ baꞌañet ti pam jaꞌ, cheꞌen.

29 Jesús tiꞌ sube: Laꞌ, cheꞌen. Cheꞌ jini Pedro ti loqꞌui ti barco. Ti queji ti xʌmbal majlel ti pam jaꞌ chaꞌan mi majlel yaꞌ baꞌan Jesús.

30 Pero cheꞌ ñac ti yubi ñoj toñel bʌ icꞌ ti queji ti bʌqꞌuen Pedro. Ti queji i sujpꞌejl majlel ti mal jaꞌ. Ti cꞌam bʌ oñel ti yʌlʌ: C Yum, cotyañon, cheꞌen.

31 Ti saj ora jach Jesús tiꞌ chucbe i cꞌʌb. Ti yʌlʌ: Tsꞌityaꞌ jach chʌncol a chꞌujbiñon. ¿Chucoch maꞌan maꞌ chꞌujbiñon ti jumpꞌej jach a pusicꞌal? cheꞌen.

32 Cheꞌ ñac ti chaꞌ ochi ti barco Jesús yicꞌot Pedro ti waꞌ ñʌchꞌle jini toñel bʌ icꞌ.

33 Jini añob bʌ ti barco tiꞌ ñocchocoyob i bʌ ti yebal yoc Jesús. Ti yʌlʌyob: Melel jatyet i Yalobiletyʌch Dios, cheꞌob.

34 Jesús yicꞌot ajcʌntꞌañob i chaꞌan ti cꞌaxiyob ti jini colem joyol bʌ jaꞌ. Ti cꞌotiyob yaꞌ ti pañimil Genesaret bʌ i cꞌabaꞌ.

35 Cheꞌ ñac jini yaꞌ bʌ chumulob yaꞌi tiꞌ ñaꞌtyʌyob chaꞌan yaꞌan Jesús, tiꞌ pucuyob majlel tꞌan yaꞌ ti pejtyel pañimil. Tiꞌ pʌyʌyob tyʌlel baꞌan Jesús pejtyelel xcꞌamꞌañob.

36 Tiꞌ cꞌajtibeyob Jesús ti wocol tꞌan chaꞌan mi yʌqꞌuen i tyʌlben i yoquic jachix i bujc chaꞌan mi lajmel. Ti luꞌ lajmiyob ti pejtyelelob tsaꞌ bʌ tyʌlbe i bujc.