2 Cabʌl quixtyañu tiꞌ tsʌcleyob majlel Jesús como tsaꞌix i yilʌyob tiꞌ pʌsʌ ñuc tyac bʌ i pꞌʌtyʌlel cheꞌ ñac tiꞌ lajmisʌ ajcꞌamꞌañob.

3 Cheꞌ jini, Jesús ti letsi ti jumpꞌej bujtyʌl. Yaꞌi ti buchle yicꞌot ajcʌntꞌañob i chaꞌan.

4 Lʌcꞌʌlix i yorojlel pascua bʌ qꞌuin i chaꞌan israelob.

5 Cheꞌ ñac ti yilʌ Jesús ñoj cabʌl quixtyañu chʌncol i tsʌcleñob tiꞌ sube Felipe: ¿Baqui mi quejel lac mʌñeꞌ waj chaꞌan pejtyelel ili quixtyañujob? cheꞌen.

6 Chʌꞌʌch ti yʌlʌ Jesús chaꞌan jach miꞌ tsictisan bajcheꞌ mi quejel i jaqꞌueꞌ Felipe. Come Jesús wʌ yujil isujm chʌ bʌ yes mi quejel i chaꞌlen.

7 Cheꞌ jini, Felipe tiꞌ jacꞌʌ: Mach jastyay mi ti laj cꞌʌñʌ doscientos denarios chaꞌan mi lac mʌmbeñob waj chaꞌan i cꞌuxob yaꞌ tsꞌityaꞌ jach ti jujuntiquil, cheꞌen. [Doscientos denarios i tyojol doscientos días toñel.]

8 Cheꞌ jini, Andrés, juntiquil ajcʌntꞌan i chaꞌan Jesús i yijtsꞌin Simón Pedro ti yʌlʌ:

9 Umbaꞌan juntiquil alob am bʌ joqꞌuej i waj melel bʌ ti cebada. An chaꞌcojt i chʌy jeꞌel. ¿Pero chʌ bʌ yes i cꞌʌjnibal jini cheꞌ ñoj cabʌl quixtyañu? Cheꞌ ti yʌlʌ Andrés.

10 Cheꞌ jini, Jesús tiꞌ subeyob: Subenla ti pejtyelel chaꞌan mi buchtyʌlob, cheꞌen. Yaꞌan cabʌl jam. Cheꞌ bajcheꞌ joꞌpꞌej mil winicob ti buchleyob.

11 Cheꞌ jini, Jesús tiꞌ chꞌʌmʌ jini waj. Tiꞌ sube Dios wocox i yʌlʌ. Ti yʌqꞌue ajcʌntꞌañob i chaꞌan. Tiꞌ pucbeyob ti pejtyelel yaꞌ bʌ buchulob. Chʌꞌʌch tiꞌ pucbeyob jeꞌel jini chʌy. Ti aqꞌuentiyob cheꞌ bajcheꞌ cꞌamel yom i cꞌuxob.

12 Cheꞌ ñac tsaꞌix ñajꞌʌyob, Jesús tiꞌ sube ajcʌntꞌañob i chaꞌan: Lotyola ti pejtyelel i xejtꞌil tyac waj tsaꞌ bʌ colojbʌyi chaꞌan maꞌ mi lolon jilel, cheꞌen.

13 Tiꞌ lotyoyob jini tsaꞌ bʌ colojbʌyi. Tiꞌ butꞌuyob doce chiquib i xejtꞌil tyac jini cebada bʌ waj.

14 Cheꞌ jini, cheꞌ ñac ti yilʌ jini quixtyañujob jini ñuc bʌ i pꞌʌtyʌlel tsaꞌ bʌ i pʌsʌ Jesús, ti yʌlʌyob: Melelʌch jiñʌch juntiquil ñuc bʌ tsaꞌ bʌ i xiqꞌui i yʌleꞌ Dios wersa bʌ yom mi tyʌlel ti mulawil, cheꞌob.

15 Pero Jesús yujil isujm chaꞌan wersa yom i yotsañob ti ñuc bʌ yumʌl i chaꞌañob. Jin chaꞌan ti chaꞌ bajñel majli ti chan bʌ wits.

16 Cheꞌ bʌ acꞌbʌlelix jini ajcʌntꞌañob i chaꞌan Jesús ti jubi majlel tiꞌ tiꞌ colem joyol bʌ jaꞌ.

17 Ti ochiyob ti barco. Ti queji i cꞌaxelob ti jini colem joyol bʌ jaꞌ chaꞌan mi majlel ti lum Capernaum bʌ i cꞌabaꞌ. Iqꞌuix. Pero Jesús max tyo ti jubi tyʌlel ti bujtyʌl.

18 Ti queji ti ñumel pꞌʌtyʌl bʌ icꞌ. Ti queji i wen letsel jini jaꞌ.

19 Cheꞌ ñac tsaꞌix i bej ñijcʌyob majlel barco cheꞌ bajcheꞌ jumpꞌej legua, ti yilʌyob Jesús chʌncol i lʌqꞌueꞌ tyʌlel barco. Chʌncol ti xʌmbal tyʌlel tiꞌ pam jaꞌ. Tiꞌ chaꞌleyob bʌqꞌuen.

20 Pero Jesús tiꞌ subeyob: Joñoñʌch. Mach yom laꞌ chaꞌlen bʌqꞌuen, cheꞌen.

21 Cheꞌ jini, cꞌajacña i yoj ti queji i yubiñob. Tiꞌ pʌyʌyob ochel Jesús ti barco. Ora jach ti cꞌotiyob tiꞌ tiꞌ jaꞌ baꞌ yomob majlel.

22 Ti yijcꞌʌlel ti queji i ñaꞌtyañob quixtyañujob tsaꞌ bʌ cʌyle ti junxej colem joyol bʌ jaꞌ chaꞌan tsaꞌix majliyob ajcʌntꞌañob i chaꞌan Jesús ti jini cojach bʌ barco yaꞌ bʌ an. Tiꞌ ñaꞌtyʌyob maꞌix ti sujti Jesús yicꞌotyob.

23 Pero ti jumucꞌ ti cꞌoti yambʌ barco tyac yaꞌ ti lum Tiberias bʌ i cꞌabaꞌ lʌcꞌʌl baꞌ tiꞌ cꞌuxuyob jini waj cheꞌ ñac lac Yum tiꞌ sube Dios wocox i yʌlʌ.

24 Cheꞌ ñac jini quixtyañujob ti queji i ñaꞌtyan mach bej yaꞌic an Jesús mi ajcʌntꞌañobic i chaꞌan jeꞌel, ti ochiyob ti barco tyac. Ti majliyob ti Capernaum chaꞌan i sajcañob.

25 Cheꞌ ñac ti cꞌoti ti junxej colem joyol bʌ jaꞌ jini quixtyañujob tiꞌ tyajayob Jesús. Tiꞌ cꞌajtibeyob: Maestro, ¿bajcheꞌqui ora ti juliyet?

26 Pero Jesús tiꞌ subeyob: Melel mic subeñetla: Mi laꞌ sajcañon chaꞌan jach ti laꞌ cꞌuxu jini waj jintyo ti ñajꞌʌyetla. Machꞌan mi laꞌ sajcañon chaꞌan ti caj ti laꞌ chꞌʌmeꞌ isujm jini ñuc bʌ c pꞌʌtyʌlel.

27 Mach yom mi jin jach mi laꞌ chaꞌlen toñel chaꞌan laꞌ tyaj waj muꞌ jach bʌ i jilel. Pero yom mi laꞌ chaꞌlen wersa jeꞌel chaꞌan laꞌ tyajeꞌ muꞌ bʌ i jalijel muꞌ bʌ i yʌqꞌueñetla laꞌ cuxtyʌlel machꞌʌ yujil jilel. Jiñʌch jini waj muꞌ bʌ cʌqꞌueñetla Joñon i Piꞌʌlon bʌ Quixtyañujob como Dios c Tyat tsaꞌix i yʌcꞌon tic wenta chaꞌan cʌqꞌueñob i cuxtyʌlel machꞌʌ yujil jilel, cheꞌen.

28 Cheꞌ jini, tiꞌ cꞌajtibeyob Jesús: ¿Chʌ bʌ ti toñel yom mi lojon c chaꞌlen chaꞌan mi lojon c chaꞌlen jini yom bʌ Dios? cheꞌob.

29 Jesús tiꞌ jacꞌʌ: Jini yom bʌ Dios jiñʌch chaꞌan mi laꞌ chꞌujbiñon tsaꞌ bʌ chojquiyon tyʌlel ti Dios, cheꞌen.

30 Cheꞌ jini, jini quixtyañujob tiꞌ cꞌajtibe Jesús: ¿Chuqui ti seña chꞌujbi a pʌsꞌeñon lojon chaꞌan mi lojon quilan chaꞌan mi lojon j chꞌujbin chaꞌan melel a tꞌan? ¿Chuqui ti ñuc tyac bʌ a pꞌʌtyʌlel maꞌ pʌs?

31 Lac yumob ti ñoj oniyix tiꞌ cꞌuxuyob maná yaꞌ ti tyʌquin bʌ joch lum cheꞌ bajcheꞌ mi yʌleꞌ ti Tsꞌijbubil bʌ i Tꞌan Dios: Dios ti yʌqꞌueyob uchꞌel tyʌlem bʌ ti panchan. Cheꞌ tsꞌijbubil, cheꞌob.

32 Jesús tiꞌ jacꞌʌ: Melel mic subeñetla: Mach jinic Moisés ti yʌqꞌueyob uchꞌel tyʌlem bʌ ti panchan. C Tyatyʌch tsaꞌ bʌ i choco tyʌlel jini uchꞌel. Jiñʌch muꞌ bʌ i yʌqꞌueñetla jini isujm bʌ uchꞌel tyʌlem bʌ ti panchan.

33 Como jini uchꞌel yubil muꞌ bʌ i yʌqꞌueñetla Dios jiñʌch juntiquil tsaꞌ bʌ jubi tyʌlel ti panchan. Jiñʌch mi yʌqꞌueñob tsijiꞌ bʌ i cuxtyʌlel jini añoꞌ bʌ ti mulawil, cheꞌen.

34 Cheꞌ jini, tiꞌ subeyob Jesús: C Yum, bej aqꞌueñon lojon jini uchꞌel cheꞌob.

35 Jesús tiꞌ subeyob: Joñon jini uchꞌel muꞌ bʌ yʌqꞌueñetla laꞌ cuxtyʌlel machꞌʌ yujil jilel. Jini muꞌ bʌ i yochel tic chaꞌan maꞌix baꞌ bʌ ora mi quejel i yubin wiꞌñal yubil. Jini muꞌ bʌ chꞌujbiñon chaꞌan melel c tꞌan maꞌix baꞌ bʌ ora mi quejel i yubin tyʌquin tiꞌ yubil.

36 Pero cheꞌ bajcheꞌ tic subeyetla machꞌan mi laꞌ chꞌujbiñon aunque ti laꞌ wilʌyon.

37 Ti pejtyelel muꞌ bʌ i yʌqꞌueñon c Tyat mi yochel tic chaꞌan. Jini muꞌ bʌ i yochel tic chaꞌan maꞌ mic chaꞌ choc sujtyel.

38 Como maꞌ ti jubiyon tyʌlel ti panchan chaꞌan mic chaꞌlen chʌ bʌ bajñel com. Pero ti tyʌliyon chaꞌan c chaꞌlen chʌ bʌ yom jini tsaꞌ bʌ i chocoyon tyʌlel.

39 Jini yom bʌ c Tyat ti panchan tsaꞌ bʌ i chocoyon tyʌlel jiñʌch chaꞌan maꞌ mic sʌt mi junticlec jini tsaꞌ bʌ i yʌqꞌueyon. Pero yom chaꞌan mic tyechob loqꞌuel baꞌan sajtyemoꞌ bʌ cheꞌ mic chaꞌ tyʌlel ti cojix bʌ qꞌuin.

40 Jini yom bʌ tsaꞌ bʌ i chocoyon tyʌlel jiñʌch chaꞌan ti pejtyelel muꞌ bʌ i ñaꞌtyan chaꞌan i Yalobilon Dios, muꞌ bʌ i chꞌujbin chaꞌan melel c tꞌan mi yʌqꞌuentyel i cuxtyʌlel machꞌʌ yujil jilel. Dios yom chaꞌan mic chaꞌ tyechisan loqꞌuel baꞌan sajtyemoꞌ bʌ cheꞌ mic chaꞌ tyʌlel ti cojix bʌ qꞌuin, cheꞌen.

41 Jin chaꞌan jini israelob añoꞌ bʌ yeꞌtyel ti queji i tyajob ti machꞌʌ wen bʌ tꞌan Jesús chaꞌan ti caj ti yʌlʌ: Cheꞌ joñon uchꞌelʌlon tsaꞌ bʌ jubi tyʌlel ti panchan, cheꞌen.

42 Ti yʌlʌyob: ¿Machꞌa jinic jini Jesús i yalobil José? Mi laj cʌmben i tyat, i ñaꞌ. ¿Bajcheꞌqui isujm cheꞌ mi yʌl i bʌ ti jubi tyʌlel ti panchan? cheꞌob.

43 Cheꞌ jini, Jesús tiꞌ subeyob: Cʌyʌ laꞌ tyajon ti machꞌʌ wen bʌ tꞌan.

44 Maꞌ majch chꞌujbi i yochel tic chaꞌan mi maꞌ mi ñaxan nijcʌbentyel i pusicꞌal chaꞌan tic Tyat tsaꞌ bʌ i chocoyon tyʌlel. Joñon mi quejel c tyech loqꞌuel baꞌan sajtyemoꞌ bʌ ti cojix bʌ qꞌuin.

45 Ti jun tyac tsaꞌ bʌ i tsꞌijbuyob jini tsaꞌ bʌ i xiqꞌui i yʌleꞌ Dios ti ñoj oniyix mi yʌleꞌ: Mi quejel i luꞌ cʌntisʌntyel ti Dios, cheꞌob. Ti pejtyelel muꞌ bʌ i ñʌchꞌtyʌben i tꞌan c Tyat muꞌ bʌ i cʌntisʌntyel tic Tyat mi quejel i yochel tic chaꞌan.

46 Maꞌ majch ti yilʌ c Tyat. Joñon jach tsaꞌ bʌ quilʌ como yʌꞌʌch tyʌlemon ti Dios.

47 Melel mic subeñetla: Jini muꞌ bʌ i chꞌujbiñon anix i cuxtyʌlel machꞌʌ yujil jilel.

48 Joñon uchꞌelʌlon muꞌ bʌ cʌqꞌueñob i cuxtyʌlel.

49 Aunque laꞌ yumob ti ñoj oniyix tiꞌ cꞌuxuyob jini uchꞌel tyʌlem bʌ ti panchan maná bʌ i cꞌabaꞌ yaꞌ ti tyʌquin bʌ joch lum pero ti pejtyelel ti sajtiyob.

50 Pero jini uchꞌel tsaꞌ bʌ jubi tyʌlel ti panchan chʌncol bʌ cʌl, jini muꞌ i cꞌux jini uchꞌel maꞌix mi quejel i sajtyelob.

51 Joñoñʌch jini cuxul bʌ uchꞌel tsaꞌ bʌ jubi tyʌlel ti panchan. Jini muꞌ bʌ i cꞌux ili uchꞌel mi quejel i yajñel ti beleꞌ ora. Jini uchꞌel muꞌ bʌ cʌqꞌueñob jiñʌch c bʌcꞌtyal. Mi cʌcꞌ c bʌcꞌtyal chaꞌan beleꞌ cuxul mi yajñel jini añoꞌ bʌ ti mulawil, cheꞌen.

52 Jini israelob añoꞌ bʌ yeꞌtyel ti queji i tyajob tiꞌ tꞌan. Ti yʌlʌyob: ¿Bajcheꞌqui chꞌujbi i yʌqꞌueñonla laj cꞌux i bʌcꞌtyal? cheꞌob.

53 Jin chaꞌan Jesús tiꞌ subeyob: Melel mic subeñetla mi maꞌ mi laꞌ cꞌux c bʌcꞌtyal Joñon i Piꞌʌlon bʌ Quixtyañujob, mi maꞌ mi laꞌ jap c chꞌichꞌel maꞌix laꞌ cuxtyʌlel machꞌʌ yujil jilel.

54 Jini muꞌ bʌ i cꞌux c bʌcꞌtyal muꞌ bʌ i jap c chꞌichꞌel anix i cuxtyʌlel machꞌʌ yujil jilel. Joñon mic tyechisan loqꞌuel baꞌan sajtyemoꞌ bʌ ti jini cojix bʌ qꞌuin cheꞌ mic chaꞌ tyʌlel.

55 Como jini c bʌcꞌtyal miꞌ lajmisan wiꞌñal. Jinic chꞌichꞌel miꞌ lajmisan tyʌquin tiꞌ yubil.

56 Jini muꞌ bʌ i cꞌux c bʌcꞌtyal, muꞌ bʌ i jap c chꞌichꞌel mi yajñel quicꞌot. Joñon mi cajñel quicꞌot jeꞌel.

57 An i cuxtyʌlel c Tyat tsaꞌ bʌ i chocoyon tyʌlel. Cuxul mi cajñel chaꞌan tic Tyat. Chʌꞌʌch jeꞌel, jini muꞌ bʌ i cꞌux c bʌcꞌtyal cuxul mi yajñel chaꞌan ti joñon.

58 Jini muꞌ bʌ i cꞌux chʌncol bʌ cʌl tsaꞌ bʌ jubi tyʌlel ti panchan mach lajal yicꞌot tsaꞌ bʌ i cꞌuxuyob laꞌ yumob ti ñoj oniyix maná bʌ i cꞌabaꞌ pero ti luꞌ sajtiyob. Jini muꞌ bʌ i cꞌux muꞌ bʌ cʌl, bej cuxul mi yajñel ti beleꞌ ora. Joñoñʌch jini uchꞌel. Cheꞌ ti yʌlʌ Jesús.

59 Jesús tiꞌ cʌntisʌyob ili tyac yaꞌ baꞌ muchꞌquibilob ti templo i chaꞌan israelob yaꞌ ti lum Capernaum bʌ i cꞌabaꞌ.

60 Cheꞌ ñac ti yubiyob jini cʌntisa cabʌl tsaꞌ bʌ tsʌcleyob Jesús ti yʌlʌyob: Leco iliyi cʌntisa. ¿Majchqui yom i bej ñʌchꞌtyan? cheꞌob.

61 Yujil isujm Jesús chaꞌan chʌncolob ti tꞌan ti caj jini tsaꞌ bʌ i yʌlʌ. Tiꞌ cꞌajtibeyob: ¿Tyoj bʌcꞌñʌjelet ba la chaꞌan ti caj ili c tꞌan?

62 ¿Chuqui mi quejel laꞌ wʌl muqꞌuic laꞌ wilan mic letsel majlel ti panchan Joñon i Piꞌʌlon bʌ Quixtyañujob baꞌ añon ti ñaxan?

63 Jini Chꞌujul bʌ c Chꞌujlel mi yʌqꞌueñob i cuxtyʌlel machꞌʌ yujil jilel. Cheꞌ i bajñel c bʌcꞌtyal jach maꞌix mi yʌqꞌueñob i cuxtyʌlel. Jini tꞌan tsaꞌ bʌ c subeyetla i chaꞌañʌch Chꞌujul bʌ c Chꞌujlel. Jini tꞌan mi yʌqꞌueñob i cuxtyʌlel machꞌʌ yujil jilel.

64 Pero an chaꞌtiquil uxtiquil machꞌʌ baꞌan miꞌ chꞌujbin chaꞌan chꞌujbi cʌqꞌueñetla laꞌ cuxtyʌlel, cheꞌen. Como Jesús yujil isujm majchqui jini machꞌʌ baꞌan tiꞌ chꞌujbi. Yujil isujm majchqui jini muꞌ bʌ quejel i yʌcꞌ tiꞌ cꞌʌb i contra.

65 Jesús ti yʌlʌ: Jin chaꞌan tic subeyetla maꞌ majch chꞌujbi i yochel tic chaꞌan mi maꞌ mi ñijcʌbentyel i pusicꞌal tic Tyat ti panchan, cheꞌen.

66 Ti jim bʌ ora cabʌl tsaꞌ bʌ i tsʌcleyob Jesús tiꞌ cʌyʌyob. Machꞌan tiꞌ bej tsʌcleyob ti xʌmbal.

67 Cheꞌ jini, Jesús tiꞌ cꞌajtibe jini doce ajcʌntꞌañob i chaꞌan: ¿Laꞌ wom ba laꞌ cʌyon jeꞌel? cheꞌen.

68 Pero Simón Pedro tiꞌ jacꞌʌ: C Yum, ¿majchqui chꞌujbi lojon c tsʌclen? Jatyet a bajñel maꞌ subeñon lojon tꞌan chaꞌan mi lojon c tyajeꞌ j cuxtyʌlel machꞌʌ yujil jilel.

69 Ti lojon c chꞌujbi chaꞌan chꞌujbi a wʌqꞌueñon lojon j cuxtyʌlel. Cujil lojon isujm jatyet jini yajcʌbilet bʌ i Yalobil jini cuxul bʌ Dios, cheꞌ ti yʌlʌ Pedro.

70 Jesús tiꞌ jacꞌʌ: ¿Machꞌa doce tic yajcʌyetla? Pero juntiquil i chaꞌan xiba. Cheꞌ ti yʌlʌ Jesús.

71 Cheꞌ ñac ti yʌlʌ Jesús cheꞌ bajcheꞌ jini, tiꞌ tyaja ti tꞌan Judas Iscariote, i yalobil bʌ Simón. Como jini Judas mi quejel i yʌcꞌ Jesús tiꞌ cꞌʌb i contra aunque i piꞌʌl jini yambʌ once ajcʌntꞌañob i chaꞌan Jesús.