2 Yaꞌ ti tsꞌajc tsaꞌ bʌ i cꞌʌñʌ i joy mʌcob Jerusalén an jumpꞌej i tiꞌ i cꞌabaꞌ Ovejajob. Yaꞌan jumpꞌej colem bʌ i yajnib jaꞌ Betesda bʌ i cꞌabaꞌ. An joꞌpꞌej i corredor tyac tiꞌ joytyʌlel.

3 Yaꞌ tsol tyotsꞌolob cabʌl ajcꞌamꞌañob; mutsꞌuloꞌ bʌ i wut yicꞌot mach bʌ wen tyacob i yoc yicꞌot machꞌʌ baꞌan i cꞌʌjnibal yoc i cꞌʌb. Ti luꞌ pijtyʌyob chaꞌan mi ñijcʌntyel jaꞌ.

4 Como an jach i yorojlel mi jubel ajtroñel i chaꞌan Dios chꞌoyol bʌ ti panchan. Mi jubel tyʌlel chaꞌan i nijcan jini jaꞌ. Jini muꞌ bʌ i ñaxan ochel cheꞌ tsaꞌix nijcʌnti jaꞌ ti lajmisʌnti chʌ bʌ jach tyac ti chʌmel.

5 Yaꞌan jeꞌel juntiquil winic am bʌ i cꞌamꞌan cꞌʌlʌ treinta y ocho años.

6 Cheꞌ ñac ti yilʌ Jesús yaꞌ tyotsꞌol tiꞌ ñaꞌtyʌ anix cabʌl jabilel yaꞌ tyotsꞌol. Tiꞌ sube jini ajcꞌamꞌan: ¿A wom ba lajmiquet? cheꞌen.

7 Jini ajcꞌamꞌan tiꞌ jacꞌʌ: Machꞌan majch mi yotsañon ti jaꞌ cheꞌ mi nijcʌntyel jini jaꞌ. Jujunyaj cheꞌ com ochel an majch yambʌ mi ñaxan ochel, cheꞌen.

8 Jesús tiꞌ sube: Tyejchen. Lotyox a pojp. Chaꞌlenix xʌmbal, cheꞌen.

9 Ti jin jach bʌ ora ti lajmisʌnti jini winic. Tiꞌ lotyo i pojp. Ti queji ti xʌmbal. Pero i yorojlel cꞌaj oj i chaꞌan israelob.

10 Jini israelob tiꞌ sube tsaꞌ bʌ lajmisʌnti: I yorojlelix cꞌaj oj. Tiqꞌuil chaꞌan a chꞌʌmeꞌ majlel a pojp, cheꞌob.

11 Jini winic tiꞌ jacꞌʌ: Jini tsaꞌ bʌ i lajmisʌyon tiꞌ subon: Lotyox a pojp. Chaꞌlenix xʌmbal. Cheꞌ tiꞌ subon, cheꞌen.

12 Cheꞌ jini, tiꞌ cꞌajtibeyob jini tsaꞌ bʌ lajmisʌnti: ¿Majchqui jini tsaꞌ bʌ i subet: Lotyox a pojp, chaꞌlenix xʌmbal? cheꞌob.

13 Pero machꞌan tiꞌ ñaꞌtyʌ jini winic majchqui jini tsaꞌ bʌ i lajmisʌ como an ñoj cabʌl quixtyañu. Jesús ti loqꞌui majlel ti xinilob.

14 Ti wiꞌil Jesús tiꞌ tyaja jini winic ti templo. Tiꞌ sube: Qꞌuele awilan, wale lajmeñetix. Mach yom maꞌ chaꞌ chaꞌlen mulil ame an chʌ bʌ yes más tsʌts bʌ wocol mi quejel a wʌqꞌuentyel a ñusan, cheꞌen.

15 Jini winic ti majli i suben israelob chaꞌan jiñʌch Jesús tsaꞌ bʌ i lajmisʌ.

16 Jin chaꞌan israelob tiꞌ tyʌcꞌlʌyob Jesús. Ti queji i pensalin i tsʌnsañob Jesús chaꞌan jach tiꞌ chaꞌle lajmisaya ti yorojlel cꞌaj oj.

17 Pero Jesús tiꞌ subeyob: Cꞌʌlʌ wale iliyi c Tyat ti panchan miꞌ chaꞌlen wen bʌ toñel. Joñon jeꞌel mic chaꞌlen wen bʌ, cheꞌen.

18 Jin chaꞌan más yomox i tsʌnsañob Jesús jini israelob. Como mach jinic jach tiꞌ chaꞌle lajmisaya ti yorojlel cꞌaj oj, pero chaꞌan ti caj jeꞌel tiꞌ laja i bʌ yicꞌot Dios. Como ti yʌlʌ i Tyatyʌch Dios.

19 Cheꞌ jini, Jesús tiꞌ subeyob: Melel mic subeñetla: Joñon i Yalobilon Dios. Machꞌan chʌ bʌ chꞌujbi c chaꞌlen tic bajñelil. Jin jach muꞌ bʌ quilan i chaꞌlen c Tyat mic chaꞌlen jeꞌel. Ti pejtyelel chʌ bʌ jach miꞌ chaꞌlen c Tyat ti panchan mic chaꞌlen jeꞌel.

20 Como c Tyat ti panchan miꞌ pꞌuntyañon. Miꞌ pʌsꞌeñon ti pejtyelel chʌ bʌ jach miꞌ chaꞌlen. Muꞌ tyo quejel c pʌsꞌeñetla más ñuc tyac bʌ. Tyoj bʌcꞌñʌjelet bʌ la mi quej laꞌ wubin.

21 Como cheꞌ bajcheꞌ c Tyat ti panchan miꞌ tyech loqꞌuel quixtyañujob baꞌan sajtyemoꞌ bʌ chʌꞌʌch bajcheꞌ mi yʌqꞌuen i chaꞌ cuxtiyel chʌꞌʌch joñon jeꞌel i Yalobilon mi cʌcꞌ ti cuxtiyel majchical jach com bʌ cʌqꞌuen i cuxtyʌlel.

22-23 C Tyat ti panchan tsaꞌix i yʌqꞌueyon tic wenta chaꞌan mic chaꞌlen melojel. Maꞌix majch miꞌ meleꞌ. Chaꞌan ti pejtyelel quixtyañujob mi lajal qꞌuelon ti ñuc bajcheꞌ miꞌ qꞌuelob ti ñuc c Tyat ti panchan. Jini machꞌʌ baꞌan miꞌ qꞌuelon ti ñuc maꞌix miꞌ qꞌuel ti ñuc c Tyat jeꞌel tsaꞌ bʌ i chocoyon tyʌlel.

24 Melel mic subeñetla: Jini muꞌ bʌ i yoque ñʌchꞌtyan c tꞌan yicꞌot muꞌ bʌ i chꞌujbin Dios tsaꞌ bʌ i chocoyon tyʌlel anix i chaꞌan i cuxtyʌlel machꞌʌ yujil jilel. Maꞌix mi yʌqꞌuentyel i xotꞌeꞌ mulil como tsaꞌix aqꞌuenti i cuxtyʌlel machꞌʌ yujil jilel.

25 Melel mic subeñetla: Chaꞌan ti tyʌliyon, tyal i yorojlel cheꞌ mi quejel i yubin c tꞌan i Yalobilon Dios jini sajtyemoꞌ bʌ. Jini muꞌ bʌ i jacꞌbeñon c tꞌan mi yʌqꞌuentyel i cuxtyʌlel machꞌʌ yujil jilel.

26 Como c Tyat an i pꞌʌtyʌlel chaꞌan mi yʌqꞌuen quixtyañujob i cuxtyʌlel machꞌʌ yujil jilel. Cheꞌ jeꞌel tsaꞌix i yʌcꞌon i pꞌʌtyʌlel como i Yalobilon chaꞌan cʌqꞌuen i cuxtyʌlel quixtyañu machꞌʌ yujil jilel.

27 Tsaꞌix i yʌcꞌon tic wenta c chaꞌlen melojel chaꞌan Joñon i Piꞌʌlon bʌ Quixtyañujob.

28 Mach yom tyoj bʌcꞌñʌjeletla mi laꞌ wubin como tyal i yorojlel jini sajtyemoꞌ bʌ mi quejel i yubibeñon c tꞌan Joñon i Piꞌʌlon bʌ Quixtyañujob, cheꞌen.

29 Mi quejel i loqꞌuel tyʌlel baꞌ chꞌujñʌbilob. Jini tsaꞌ bʌ i chaꞌle wen bʌ mi quejel i cuxtiyel chaꞌan ti beleꞌ ora. Pero jini tsaꞌ bʌ i chaꞌleyob machꞌʌ wen mi quejel i tyejchel loqꞌuel chaꞌan i xotꞌeꞌ i mul.

30 Machꞌan chʌ bʌ chꞌujbi c chaꞌlen chaꞌan jach com tic bajñel c pusicꞌal. Mic chaꞌlen melojel jiñʌch bajcheꞌ mic subentyel tic Tyat. Tyojʌch mic chaꞌlen melojel como mic chaꞌlen bajcheꞌ yom c Tyat ti panchan tsaꞌ bʌ i chocoyon tyʌlel. Maꞌix mic chaꞌlen bajcheꞌ bajñel com tic pusicꞌal.

31 Mi tic bajñel subu chaꞌan chocolon tyʌlel, mach yom chꞌujbinticon.

32 Pero an yambʌ muꞌ bʌ i sub chaꞌan chocolon tyʌlel. Cꞌʌjnibalʌch mi chꞌujbintyel i tꞌan.

33 Jatyetla tiꞌ laꞌ choco majlel winicob baꞌan Juan chaꞌan laꞌ cꞌajtiben majchqui jini Juan. Jini ti yʌcꞌʌyon ti cʌjñel chaꞌan chocolon tyʌlel ti Dios.

34 Pero mach wersa i yʌcꞌon ti cʌjñel quixtyañu. Chʌncol jach c subeñetla chaꞌan melelʌch i tꞌan Juan chaꞌan chꞌujbi laꞌ tyaj laꞌ cotyʌntyel.

35 Jini Juan cheꞌ bajcheꞌ tsꞌʌbʌl bʌ pat cas muꞌ bʌ i wen pʌs i cꞌʌcꞌal. Jatyetla poj tijicñayetla cheꞌ ñac ti laꞌ ñʌchꞌtyʌ chʌ bʌ ti yʌlʌ.

36 Pero an chʌ bʌ más ñuc tyac bʌ bajcheꞌ i tꞌan Juan muꞌ bʌ i yʌcꞌ ti cʌjñel majchonqui. Jini ñuc tyac bʌ c pꞌʌtyʌlel mi yʌcꞌon ti cʌjñel chaꞌan chocolon tyʌlel ti Dios. Jini miꞌ tsictisan chaꞌan c Tyat ti panchan tiꞌ chocoyon tyʌlel.

37 Cheꞌ jeꞌel aunque machꞌan baꞌ bʌ ora ti laꞌ wubibe i tꞌan c Tyat machꞌan baꞌ bʌ ora ti laꞌ wilʌ. Pero c Tyat ti panchan tsaꞌ bʌ i chocoyon tyʌlel mi yʌcꞌon ti cʌjñel chaꞌan chocolon tyʌlel i chaꞌan.

38 Pero machꞌan ti laꞌ ñoj chꞌujbi chaꞌan melel i tꞌan jini tsaꞌ bʌ i yʌcꞌʌyon ti cʌjñel chaꞌan chocolon tyʌlel ti Dios. Como maꞌ ti laꞌ chꞌujbiyon tsaꞌ bʌ chojquiyon tyʌlel tic Tyat ti panchan.

39 Jatyetla mi laꞌ wen qꞌueleꞌ jini Tsꞌijbubil bʌ i Tꞌan Dios chaꞌan laꞌ wom laꞌ tyaj laꞌ cuxtyʌlel machꞌʌ yujil jilel. Pero jiñʌch jini Tsꞌijbubil bʌ i Tꞌan Dios mi yʌcꞌon ti cʌjñel.

40 Jatyetla mach laꞌ wom laꞌ chꞌujbin chaꞌan chocolon tyʌlel chaꞌan mi laꞌ wʌqꞌuentyel laꞌ cuxtyʌlel machꞌʌ yujil jilel.

41 Maꞌ mic sajcan i sujbel c ñuclel ti quixtyañujob.

42 Pero mij cʌñetla. Cujil isujm chaꞌan machꞌan mi laꞌ pꞌuntyan Dios.

43 C Tyat ti panchan tiꞌ chocoyon tyʌlel pero machꞌan mi laꞌ chꞌujbiñon. Pero mi an majch mi bajñel tyʌlel mi quejel laꞌ lolon chꞌujbin.

44 ¿Bajcheꞌqui chꞌujbi laꞌ chꞌujbiñon cheꞌ mi laꞌ bej sajcan laꞌ ñuclel tiꞌ tyojlel laꞌ piꞌʌlob? Pero maꞌix mi laꞌ jopꞌ laꞌ tyaj laꞌ ñuclel tiꞌ tyojlel Dios.

45 Mach yom mi laꞌ lolon pensalin chaꞌan joñon mi quejel c sub laꞌ mul tiꞌ tyojlel c Tyat ti panchan. Pero añʌch juntiquil muꞌ bʌ i sub laꞌ mul. Jiñʌch Moisés muꞌ bʌ laꞌ chꞌujbin chaꞌan melel i tꞌan mi laꞌ lolon al.

46 Como mi muqꞌuic laꞌ chꞌujbin chaꞌan melel i tꞌan Moisés mi laꞌ chꞌujbin jeꞌel chaꞌan Dios tiꞌ chocoyon tyʌlel. Como Moisés tiꞌ tsꞌijbu chaꞌañon.

47 Pero mi maꞌ mi laꞌ chꞌujbin chaꞌan melel jini tsaꞌ bʌ i tsꞌijbu Moisés ti ñoj oniyix, ¿bajcheꞌqui mi quejel laꞌ chꞌujbin chaꞌan melel jini muꞌ bʌ c subeñetla? Cheꞌ ti yʌlʌ Jesús.