2 ―Ana'ojic ti chib xa c'ac'al sc'an li sq'uinal ti c'alal iloq'uic ta mozoil ti ba'yi jtot jme'tique. Ja'o chi'aq'ue entrucal, chisjipanic ta cruz, vo'on ti co'ol crixchanootique ―xiyutoticotic.

3 Ti totil paleetique, xchi'uc ti much'utic ta xchanubtasvanic yilel ta smantaltac Rioxe, xchi'uc ti cajmeltsanejc'optique, istsob sbaic ta sti' sna ti totil palee, ja' ti Caifase. 4 Isa'ic ti c'u to xi xu' tsmucultsaquic ti Jesuse yu'un tsc'an tsmilic.

5 ―Más lec mu ya'uc jtsactic lavi ta q'uine naca me licuc o sjol li jchi'iltactique ―xut sbaic.

6 Ibat ta Betania ti Jesuse. Tey ic'ot ta sna Simón ti ip to'ox ta leprae. 7 Tey ic'ot jun ants, yich'oj c'otel slimete meltsanbil ta alabastro ton, noj ta ya'lel muil nichim. Toyol tajmec stojol. C'alal tey chotol ta mexa ti Jesuse, ja'o iscoconbe ta sjol ti sbel slimetee yu'un iyich' ta muc'. 8 Ti c'alal iquilticotic li vo'oticotique, licapoticotic o.

―¿C'u yu'un ti yech no'ox ta smal li ya'lel muil nichime? 9 Más lec ti ixchonuque, yu'un toyol stojol. Li stojole xu' chich' me'onetic ti yechuque ―xichioticotic.

10 Ti Jesuse sna'oj ti c'usi ijnopticotique.

―Vo'oxuc ta amulic ti chat yo'on li antse. Li c'usi liyac'bee, lec. 11 Li me'onetique li' onox achi'uquique. Li vo'one muc bu jal li' jchi'ucoxuque. 12 Ti liscoconbe li ya'lel muil nichime, ja' seña ti chimuquee. 13 Ta melel chacalbeic, chvinaj onox ta sjunlej balamil ti vo'on chcac' acuxlejalic ta sbatel osile. Chvinaj noxtoc ti liscoconbe ya'lel muil nichim li antse ―xiyutoticotic ti Jesuse.

14 Ti jun jchi'ilticotic ti lajchavo'oticotic oe, ja' ti Judas Iscariotee, ba sc'opon ti totil paleetique.

15 ―¿C'u yepal chavac'becon mi chacac'beic entrucal ti Jesuse? ―xut.

I'ac'bat treinta plata. 16 Ti Judase isa' ti c'u to xi xu' chac' entrucal ti Jesuse.

17 Ti c'alal ilic li q'uin ti chich' ve'el pan ti muc bu yich'oj svuquesobil xch'ute ―¿Bu chac'an ti chba jmeltsanticotic li ch'iom chij ti ta jti'tic ta sq'uinal ti c'alal iloq'uic ta mozoil ti ba'yi jtot jme'tique? ―xcuticotic ti Jesuse.

18 ―Batanic ta Jerusalén. Ja' xc'ot ac'oponic li much'u lec xcojtiquintique. “Li' la chtal jti'ticotic ta ana li chij ta q'uine yu'un la po'ot xa xmile li Jchanubtasvaneje”, xavutic c'otel ―xiyutoticotic ti Jesuse.

19 Ijch'unticotic ti c'usi iyal ti Jesuse, ijmeltsanticotic ti jve'elticotique.

20 C'alal ic' xa'ox osile, ijchol jbaticotic ta mexa xchi'uc ti Jesuse. 21 Ti c'alal yolel chive'oticotique ―Ta melel chacalbeic, oy junoxuc ti chavaq'uicon entrucale ―xiyutoticotic ti Jesuse.

22 Ti c'alal ica'iticotique, icat o co'onticotic.

―Cajval ¿mi vo'on van? ―xcuticotic jujuntal.

23 ―I'i. Ja' li much'u jun jpulatu chive' jchi'uque. 24 Ta melel vo'on ti co'ol crixchanootique chquich' milel chac c'u cha'al ts'ibabil onox ta sc'op Rioxe. Abol sba li much'u chiyac' entrucale. Más lec ti manchuc i'ayane ―xi ti Jesuse.

25 Ti Judase ti snopoj xa onox ti chac' entrucal ti Jesuse ―Jchanubtasvanej, ¿mi vo'on van? ―xi uc.

―Vo'ot ―x'utat yu'un ti Jesuse.

26 Ti c'alal yolel chive'oticotique, istam jp'ej pan ti Jesuse. “Colaval” xut ti Rioxe, ja'o ixut ti pane.

―Ilo, ve'anic. Li'i ja' jbec'tal jtacupal ―xiyutoticotic.

27 Istam noxtoc jun baso ya'lel uva, “colaval” xut ti Rioxe.

―Uch'an acotolic. 28 Li'i ja' jch'ich'el, ja' seña ti chc'ot onox ti c'usi ts'acal to iyal ti Jtote ti ta jch'ich'el chtoj lamulique. 29 Chacalbeic ti mu xa bu chcuch' li ya'lel uvae. Ja'to chcuch' ti c'alal tey xa tsobolotic jcotoltic yo' bu chac' jpas mantal ti Jtote ―xiyutoticotic ti Jesuse.

30 Ti c'alal laj jq'uevujintaticotic ti Rioxe, libatoticotic ta vits Olivotic.

31 ―Li' ta jliquele chacomtsanicon acotolic. Ts'ibabil onox: “Ti Rioxe ta la xac' ta milel ti much'u st'ujoj chispasotic ta mantale. Ti c'alal xmilee, ta la stani sbaic ech'el ti xchi'iltaque, co'ol la c'u cha'al chij ti ta stani sba ech'el mi imile li xchabielique”, xi ts'ibabil. 32 Ti c'alal xicha'cuxie, chibat ta Galilea. Tey xa chc'ot ataicon ―xiyutoticotic ti Jesuse.

33 ―Ac'u mi xascomtsan li yantique, pero li vo'one mu xajcomtsan ―xi li Pedroe.

34 ―Ta melel chacalbe, lavi ta ac'ubaltique ti c'alal mu to'ox ch-oc' queleme, ox'ech'el xa'ox aval ti mu xavojtiquinone ―x'utat yu'un ti Jesuse.

35 ―Muc ta alel mi co'ol lilajotique. Jamal chcal ti xacojtiquine ―xi li Pedroe.

Ja' yech icalticotic uc.

36 Tey lic'ototicotic ta Getsemaní sbi xchi'uc ti Jesuse.

―Chotlanic li'toe yu'un chba jc'opon Riox le'toe ―xiyutoticotic.

37 Ti Jesuse ja' iyic' ech'el li Pedroe xchi'uc xcha'va'al screm ti Zebedeoe. Iyat la yo'on ti Jesuse. Yan la sba yo'on iya'i.

38 ―Chcat co'on tajmec, chicham ya'el. Comanic li'toe. Mu me xavayic uc ―x'utatic la li oxvo'e.

39 Ti Jesuse ijelav to la ech'el jset'. Isquejan la sba, ja'o la isnijan sba ta balamil noxtoc. Isc'opon la Riox.

―Tot, ti xu'uc to ti mu xichame, lec. Pero ma'uc me xc'ot li c'usi chal co'on jtuque, ja' ac'u jpas li c'usi chac'an li vo'ote ―xi la isc'opon Riox ti Jesuse.

40 Ti c'alal laj sc'opon Rioxe, isut la tal yo' bu li oxvo' jchi'iltaque. Vayemic la yul staelic. I'albat li Pedroe:

―¿Mi mu xcuch avu'unic junuc ora ya'el li vayele? 41 Mu me xavayic, c'oponic Riox yo' mu xapasic o li c'usitic chopole. Ta melel avo'onicuc ac'oponic Riox, pero lapat axoconique mu xu' yu'un ―x'utat la.

42 Ti Jesuse ba la sc'opon Riox noxtoc:

―Tot, yu'un avaloj ti chichame, xu' xicham ―xi la.

43 Ti c'alal isut tale, vayemic yul staelic noxtoc li oxvo'e yu'un la mu xcuch cha'iic li vayele. 44 Ti Jesuse ba la sc'opon Riox ta yox'ech'elal. Ja' no la yech iyal chac c'u cha'al iyal ta ba'yie. 45 Ti c'alal isut tale ―Xu' mi chavayic toe. Mi chacuxic to, cuxic. Ista xa yora ti chi'aq'ue entrucal ta stojol jmulaviletic, vo'on ti co'ol crixchanootique. 46 Licanic, batic. Q'uelavilic, le' xa xtal li much'u chiyac' entrucale ―xiyutoticotic ti Jesuse.

47 Ti c'alal xyaquet chlo'ilaj ti Jesuse, ja'o tey ic'ot ti Judase. Ja' lajchavo'oticotic o ta yajchanc'op ti Jesuse. Ep crixchanoetic xchi'inoj c'otel; oy yespadaic, oy ste'ic. Ja' stacojic ech'el ti totil paleetique xchi'uc ti cajmeltsanejc'optic, vo'otic li j'israelotique. 48 Ti Judase yaloj xa onox la c'u x'elan chac' entrucal ti Jesuse:

―Ti much'u ta jbuts'e, ja' me xatsaquic ―xi ono la.

49 Ti Judase inopoj yo' bu ti Jesuse:

―¿Mi li'ote? Jchanubtasvanej ―xut.

Ja'o isbuts'.

50 ―Jchi'iltic, ti c'usi tal apase, paso ta ora ―x'utat yu'un ti Jesuse.

Ja'o inopoj ti crixchanoetique, istsaquic ti Jesuse, ixchuquic.

51 Oy jun jchi'ilticotic ta yajchanc'op ti Jesuse, isloq'ues yespada, istuch'be jun xchiquin ti smozo más totil palee.

52 ―Tic'o ta sna lavespadae ―x'utat yu'un ti Jesuse―. Ti much'u chmilvan ta espadae ja' no'ox yech ta espada ta xcham uc. 53 ¿Mi mu xana' ti xu' ta jc'opon ta ora ti Jtote yo' xistacbe o tal más ta sesenta mil yaj'anjeltac spojicone? 54 Pero ma'uc yech ta jpas, yu'un persa ta xc'ot ti c'usi ts'ibabil ta sc'op Rioxe ―x'utat yu'un ti Jesuse.

55 Ti Jesuse iyalbe ti crixchanoetique.

―¿C'u yu'un ti ta espada ta te' tal atsaquicon chac c'u cha'al j'eleq'ue? Ti tey onox chichanubtasvan ta ti' muc'ta templo jujun c'ac'ale, ¿c'u yu'un ti mu teyuc no'ox atsaquicon ya'ele? 56 Ti x'elan tal atsaquicone, ja' ic'ot ti yech onox sts'ibaojic ti yaj'alc'optac Riox ti ta vo'nee ―xi ti Jesuse.

Vo'oticotic li yajchanc'opoticotique lijatavoticotic. Stuc xa tey ijcomtsanticotic ti Jesuse.

57 Ti c'alal istsaquic ti Jesuse, li' iyiq'uic tal ta sna Caifase, ja' ti totil palee. Tey tsobol ti much'utic ta xchanubtasvanic yilel ta smantaltac Rioxe, xchi'uc ti cajmeltsanejc'optique. 58 Li Pedroe nomnomtic tijil tal ta spat ti Jesuse. Ti c'alal iyul ta sna ti más totil palee, ixchi'in la ta chotlej ta ti'na jayvo' jchabiejtemplo yu'un la tsc'an cha'i c'u x'elan chcom o sc'oplal ti Jesuse.

59 Ti totil paleetique xchi'uc ti cajmeltsanejc'optique, lic la sa'ic cha'vo' xchi'ilic ta meltsanejc'op ti co'ol c'usi chalique yu'un la tsa'beic smul ti Jesuse yo' xmile oe. 60 Pero mu la bu istaic ti cha'vo' co'ol c'usi chalique. Yech no la ti ep jnopmulile, mu la co'oluc ti c'usi chalique. Isva'an la sbaic otro cha'vo' jnopmulil.

61 ―Li vinic li'i ca'yojticotic ti iyal ti xu' tslomes li stemplo Rioxe, ti xu' la chcha'va'an ta oxib c'ac'ale ―xiic la.

62 Ti totil palee isva'an la sba.

―¿C'u yu'un ti mu xatac'ave? ¿Mi yech avaloj chac taje? ―xut la ti Jesuse.

63 Mi jp'el mu la bu itac'av ti Jesuse. Ti totil palee isjac'be la noxtoc:

―Ti Riox cuxul ta sbatel osile cha'i li c'usi chajac'bee. Jamal xavalboticotic mi vo'ot ti st'ujojot Riox chapasoticotic ta mantale. ¿Mi vo'ot Xch'amalot ti Rioxe? ―xut la.

64 ―Vo'on ―xi la ti Jesuse―. Chacalbeic noxtoc, vo'on ti co'ol crixchanootique, chavilic chlic jpas ta mantal crixchanoetic ta syu'el ti Rioxe. Ts'acal to chil scotol crixchanoetic ti ta toc chicha'sut tale ―xi la ti Jesuse.

65 Ti más totil palee isjat la sc'u', yu'un la istabe xa smul ti yaloje.

―Ica'itic xa ti tsp'is sba ta Rioxe. ¿C'u xa stu cu'untic yan rextico? 66 ¿C'usi chanopic uc? ―xut la ti xchi'iltac ta meltsanejc'ope.

―Ac'u chamuc ta jmoj ―xiic la.

67 Ja'o la istubtabeic sat ti Jesuse, ismajic la. Jlom la ist'axbeic ta majel sat.

68 ―Mi yech chaval ti vo'ot Cristoote, alo ca'tic much'u lasmaj ―xutic la.

69 Li Pedroe tey la chotol ta ti'na. Ital la c'oponatuc yu'un jun quiarail:

―Li vo'ot uque ja' achi'il li Jesuse ti liquem tal ta Galileae ―x'utat la.

70 Li Pedroe iyal la yo' bu tsobolique ti mu xojtiquin ti Jesuse:

―Mu jna' li c'usi chavale ―xut la.

71 Ja'o la ibat ta ti'be li Pedroe. I'ojtiquine la yu'un otro jun quiarail.

―Li vinic le'e ja' xchi'il li Jesus Nazarete ―xut la ti crixchanoetic ti tey tsobolique.

72 ―Lojriox mu xcojtiquin li vinic chavale ―xi la li Pedroe.

73 Ta jliquel o tal la sc'oponel yu'un crixchanoetic li Pedroe:

―Ta melel ja' achi'il li Jesuse yu'un ja' yech chac'opoj chac c'u cha'al chc'opoje ―x'utat la.

74 ―Lojriox mu xcojtiquin li vinic chavalique ―xi la.

Ja'o la i'oc' quelem. 75 Li Pedroe iyul la ta sjol ti yech onox i'albat yu'un ti Jesuse: “Ti c'alal mu to'ox ch-oc' queleme, ox'ech'el xa'ox aval ti mu xavojtiquinone”, x'utat onox yu'un ti Jesuse. Iloc' la li Pedroe, ba la yoq'uita sba tajmec.