2 Ti c'alal yolel chive'oticotic xchi'uc ti Jesuse, ti Judas screm Simón Iscariotee yulesbil xa'ox ta sjol yu'un ti pucuje ti ja' chac' entrucal ti Jesuse. 3-4 Ti Jesuse, ac'u mi sna'oj ti ja' ac'bil scuentain scotol yu'un ti Jtotic Rioxe, ti ja' tacbil tal yu'un ti Rioxe, ti ch-iq'ue sutele, isco'oltas sba chac c'u cha'al mozoil. Iva'i, isloc' spimilc'u', ixch'ic ta xch'ut jlic toalla. 5 Isq'ueb vo' ta pocobc'obol, ja' ispoc o li cocticotique. C'alal laj spocboticotique, liscusboticotic ta toalla ti xch'icoj ta xch'ute.

6 Ti c'alal chpocbat xa'ox yoc ti Simon Pedroe ―Cajval, ma'uc yech smelol ti vo'ot chapoc li coque ―xut.

7 ―Li c'usi ta jpase mu xana'be smelol lavie. Ts'acal to chul ta ajol ―x'utat yu'un ti Jesuse.

8 ―Li vo'one mu xcac' apoc li coque ―xi ti Pedroe.

―Ti mi muc bu chajpoque, mu xu' chba achi'inon ―x'utat.

9 ―Cajval, ma'uc no'ox xapoc li coque che'e. Poco li jc'ob uque, tsebiltason noxtoc ―xut ti Jesuse.

10 ―Ti much'u atinem xa onoxe mu xa persauc xich' atintasel sjunlej. Xu' ti yoc xa no'ox xich' pocbele yu'un atinem xa onox. Li vo'oxuque lec xa lavo'onique pero mu acotolicuc ―xiyutoticotic ti Jesuse.

11 Sna'oj xa ti Jesuse ti ja' ch-ac'on o entrucal yu'un ti Judase, yech'o ti iyal ti mu jcotolticoticuc ti lec li co'onticotique.

12 Ti c'alal laj spoc li cocticotique, ixcha'lap ti spimilc'u'e, ichoti ta mexa noxtoc. Ja' yech lic yalboticotic:

―¿Mi xana'ic c'usi smelol ti ijpoc lavoquique? 13 Li vo'oxuque “Jchanubtasvanej, Cajval”, xavuticon. Lec ti yech chavalique. Ta melel ti vo'on Avajvalicone. 14 Ac'u mi vo'on Avajvalicon, ac'u mi Avajchanubtasvanejicon, pero ijpoc lavoquique. Ja' me yech xapasic uc. Mu me xatoy abaic, coltao me abaic. 15 Ti x'elan lacac'be avilique, ja' ta jc'an ti yech chapasic uque. 16 Ta melel chacalbeic, li much'u ch-abtej no'oxe mu tsotsuc yabtel; ja' tsots yabtel li yajval abtele. Li much'u mantal no'ox ta xch'une mu tsotsuc yabtel; ja' tsots yabtel li much'u tspasvan ta mantale. 17 Ava'iic xa. Mi yech chapasique, jun avo'onic.

18 ’Mu acotolicuc ti x'elan chacalbeique. Vo'on ti lajt'ujique, yu'un quiloj c'u x'elan avo'onic. Oy junoxuc ti chacrontainicone ja' yo' xc'ot o chac c'u cha'al ts'ibabil jc'oplal ta sc'op Rioxe: “Ti much'u co'ol chive' jchi'uque ja' chiscrontain”, xi onox ts'ibabil. 19 Ti ba'yi lacalbeic chac taje, ja' yo' mu xavicta o abaic ta xch'unel ti liquemon tal ta vinajele ti c'alal chavilic chc'ot yeche. 20 Ta melel chacalbeic, ti much'utic ta xch'unic ti c'usi chavalic a'yuque, vo'oxuc ti chajtaquic ech'ele, co'ol xchi'uc vo'on chixch'unbeic ya'el. Ja' no'ox yech chch'unbeic ya'el ti Jtot uque, yu'un ja' listac tal ―xiyutoticotic ti Jesuse.

21 Ti c'alal laj yal chac taje, i'och ta at-o'on. Ja' yech lic yalboticotic:

―Ta melel chacalbeic, oy junoxuc ti chavaq'uicon entrucale ―xiyutoticotic.

22 Li vo'oticotique jq'uelq'uelbe jba jsaticotic yu'un mu jna'ticotic much'u junucal ti yech tspase. 23 Vo'on ti más sc'anojon ica'i ti Jesuse, tey ts'eel chive' ta xocon. 24 Ti Simon Pedroe liyac'be seña ta sc'ob ti ac'u jac'be ti Jesuse ti much'u junucal ti yech tspase. 25 Yu'un ti tey ts'eelon ta xocon ti Jesuse, ijac'be:

―Cajval, ¿much'u li chavale? ―xcut.

26 ―Ja' li much'u ta jts'ajbe pan sve'e ―xiyut.

Ists'aj jset' pan, ja' iyac'be ti Judas screm Simón Iscariotee. 27 C'alal isve' pan ti Judase, ja'o ixch'unbe smantal ti Satanase.

―Ti c'usi avaloj chapase, ba paso ta ora ―x'utat yu'un ti Jesuse.

28 Ti jayvo' chololoticotic ta mexae, mi ja'uc jun muc xul ta jolticotic c'u yu'un ti x'elan iyalbee. 29 Yu'un ja' xchabioj yav jtaq'uinticotic ti Judase, jlom ijnopticotic ti albil xa yu'un ti Jesuse ti oy c'usi chba sman tal ti chtun cu'unticotic ta q'uine. Jlom ijnopticotic ti albil xa yu'un ti Jesuse ti oy c'usi chba yac'be li me'onetique. 30 C'alal laj sve' pan ti Judase, ja'o iloc' ech'el. Ic' xa'ox osil ti c'alal iloc' ech'ele.

31 C'alal ibat xa'ox ti Judase, ti Jesuse ja' yech lic yalboticotic:

―Ista xa yora chiyac' ta ich'el ta muc' ti Rioxe, vo'on ti co'ol crixchanootique. Ja' no'ox yech chcac' ta ich'el ta muc' uc. 32 Ti chcac' ta ich'el ta muq'ue, chiyac' xa no'ox ta ich'el ta muc' uc. 33 Jch'amaltac, mu xa bu jal li' chajchi'inique. Chasa'icon. Ja' chac c'u cha'al icalbe li jchi'iltactique, ja' no'ox yech chacalbeic uc. Ti bu chibate, mu to xu' chabatic. 34 Chacalbeic ach' mantal, c'ano me abaic. Ja' me yech xac'an abaic chac c'u cha'al jc'anojoxuque. 35 Mi ac'anoj abaique, ja' chil o scotol crixchanoetic ti ach'unojic ti c'usi lacalbeique ―xiyutoticotic.

36 ―Cajval, ¿bu chabat? ―xi ti Simon Pedroe.

―Ti bu chibate mu to xu' xachi'inon ech'el lavie. Ts'acal to chabat ―x'utat.

37 ―Cajval, ¿c'u yu'un ti mu to xu' xajchi'in ech'el lavie? Mu xixi' mi chismilic uque ―xi ti Pedroe.

38 ―Yech chanop ti mu xaxi'e. Ta melel chacalbe, lavi ta ac'ubaltique ti c'alal mu to'ox ch-oc' queleme, ox'ech'el xa'ox aval ti mu xavojtiquinone ―x'utat yu'un ti Jesuse.