2 ―Más lec mu ya'uc jtsactic lavi ta q'uine naca me licuc o sjol li jchi'iltactique ―xut la sbaic.

3 Ti c'alal tey ta Betania ti Jesuse, tey la chve' ta mexa ta sna Simón ti ip to'ox ta leprae. Ja'o la tey ic'ot jun ants, yich'oj la c'otel slimete meltsanbil ta alabastro ton. Noj la ta ya'lel muil nichim, nardo sbi. Toyol tajmec stojol. Isc'asbe la snuc' ti slimetee. Ti sbele iscoconbe la ta sjol ti Jesuse. 4 Oy la jayvo' icapic o.

―¿C'u yu'un ti yech no'ox ta smal li ya'lel nardoe? 5 Más lec ti ixchonuque, yu'un más ta oxib cien denario stojol ti yechuque. Li stojole xu' chich' me'onetic ti yechuque ―xut la sbaic.

Yu'un la chopol iyilic ti x'elan ispas ti antse.

6 ―¿C'u yu'un ti x'elan chavalique? Anchanic xa. Li c'usi liyac'bee lec. 7 Li me'onetique li' onox achi'inojique, c'usuc no'ox ora xu' chac'uxubinic. Yan li vo'one muc bu jal li' jchi'ucoxuque. 8 Li antse ispas xa ti c'usi xu' cha'ie. Ti liscoconbe li ya'lel nardoe, ja' seña ti chimuquee. 9 Ta melel chacalbeic, chvinaj onox ta sjunlej balamil ti vo'on chcac' acuxlejalic ta sbatel osile. Chvinaj noxtoc ti liscoconbe ya'lel nardo li antse ―x'utatic la yu'un ti Jesuse.

10 Ti Judas Iscariotee ja' lajchavo'ic o ta yajchanc'op ti Jesuse. Ja' la ba sc'opon ti totil paleetique yu'un la tspas trate ti chac' entrucal ti Jesuse. 11 Ti c'alal iya'i ti totil paleetique, xmuyubajic xa la tajmec.

―Chacac'beticotic taq'uin ―xutic la ti Judase.

Ti Judase isa' la ti c'u to xi xu' chac' entrucal ti Jesuse.

12 Ti c'alal ilic li q'uin ti chich' ve'el pan ti muc bu yich'oj svuquesobil xch'ute, c'alal tsmilic li ch'iom chijetic scuenta li sq'uinal ti c'alal iloq'uic ta mozoil ti ba'yi jtot jme'ticotique, li lajchavo'e isjac'beic la ti Jesuse:

―¿Bu chac'an ti chba jmeltsanticotic li ch'iom chij ti ta jti'tic ta q'uine? ―xutic la.

13 Itaqueic la tal cha'vo' yu'un ti Jesuse.

―Batanic ta Jerusalén. Tey chataic ta be jun vinic scuchoj jp'ej q'uib ya'al. Ja' nap'letaic ech'el. 14 Ti bu ch-oche xc'ot ac'oponic li yajval nae. Ja' yech xc'ot avalbeic: “Li' listacoticotic tal li Jchanubtasvaneje: ¿Bu la jc'olucal chavac'boticotic lanae ti ta jti'ticotic o li chij ta q'uine xchi'uc li cajchanc'optaque?” xavutic c'otel. 15 Tey chac' avilic jc'ol ta xcha'cojol sjol sna, lec muc', ch'ubabil xa. Ja' tey xameltsanic li jve'eltique ―x'utatic la tal li cha'vo'e.

16 Italic la, i'ochic la tal ta yutil jteclum. Ja' la yech istaic chac c'u cha'al i'albatic tal yu'un ti Jesuse. Ja' la tey ismeltsanic ti ve'lil scuenta q'uine.

17 Ti c'alal i'och orisyone, tsobolic la yulel ta na xchi'uquic ti Jesuse. 18 Ti c'alal cholol chve'ic ta mexae ―Ta melel chacalbeic, oy junoxuc ti li' tsobol chive'otique chavaq'uicon entrucal ―x'utatic la.

19 Ti c'alal iya'iique, iyat la yo'onic.

―¿Mi vo'on van? ―xiic la jujuntal.

20 ―Ta alajchava'alique, ja' li much'u jun jpulatu chive' jchi'uque ja' chiyac' entrucal. 21 Vo'on ti co'ol crixchanootique, chquich' milel chac c'u cha'al ts'ibabil onox ta sc'op Rioxe. Abol sba li much'u chiyac' entrucale. Más lec ti manchuc i'ayane ―xi la ti Jesuse.

22 Ti c'alal yolel chve'ique, istam la jp'ej pan ti Jesuse. “Colaval” xut la ti Rioxe, ja'o la ixut ti pane, i'ac'batic la li lajchavo'e.

―Ilo, ve'anic. Li'i ja' jbec'tal jtacupal ―x'utatic la.

23 Istam la noxtoc jun baso ya'lel uva, “colaval” xut la ti Rioxe, ja'o la i'ac'batic noxtoc. Iyuch'ic la scotolic.

24 ―Li'i ja' jch'ich'el, ja' seña ti chc'ot onox ti c'usi ts'acal to iyal ti Jtote ti ta jch'ich'el chtoj lamulique. 25 Ta melel chacalbeic ti mu xa bu chcuch' li ya'lel uvae. Ja'to chcuch' ti c'alal tey xa tsobolotic jcotoltic yo' bu chac' jpas mantal ti Rioxe ―x'utatic la yu'un ti Jesuse.

26 Ti c'alal laj sq'uevujintaic ti Rioxe, ibatic la ta vits Olivotic.

27 ―Li' ta jliquele chacomtsanicon acotolic. Ts'ibabil onox: “Ti Rioxe ta la xac' ta milel li much'u st'ujoj chispasotic ta mantale. Ti c'alal xmilee, ta la stani sbaic ech'el ti xchi'iltaque, co'ol la c'u cha'al chij ti ta stani sba ech'el mi imile li xchabielique”, xi ts'ibabil. 28 Ti c'alal xicha'cuxie, chibat ta Galilea. Tey xa chc'ot ataicon ―x'utatic la yu'un Jesús li lajchavo'e.

29 ―Ac'u mi xascomtsan li yane, li vo'one mu xajcomtsan ―xi la li Pedroe.

30 ―Ta melel chacalbe, lavi ta ac'ubaltique ti c'alal mu to'ox ch-oc' xcha'oq'uelal li queleme, ox'ech'el xa'ox aval ti mu xavojtiquinone ―x'utat la yu'un ti Jesuse.

31 ―Muc ta alel mi co'ol lilajotique. Jamal chcal ti xacojtiquine ―xi la tajmec li Pedroe.

Ja' la yech iyal scotolic.

32 Tey la ic'otic ta Getsemaní sbi xchi'uquic ti Jesuse.

―Chotlanic li'toe yu'un chba jc'opon Riox le'toe ―x'utatic la.

33 Oxvo' no la i'iq'ueic ech'el yu'un ti Jesuse, ja'ic la li Pedroe, xchi'uc li Jacoboe, xchi'uc li Juane. Ti Jesuse iyat la yo'on. Yan la sba yo'on iya'i.

34 ―Chcat co'on tajmec, chicham ya'el. Comanic li'toe, mu me xavayic uc ―x'utatic la li oxvo'e.

35 Ti Jesuse ijelav to la ech'el jset'. Isquejan la sba, ja'o la isnijan sba ta balamil noxtoc. Isc'opon la Riox, ja' la isc'anbe ti xu'uc to mu xchame.

36 ―Tot, mu c'usi vocol chava'i. Ti xu'uc to ti mu xichame, lec. Pero ma'uc me xc'ot li c'usi chal co'on jtuque, ja' ac'u jpas li c'usi chac'an li vo'ote ―xi la ti Jesuse.

37 Isut la tal yo' bu li oxvo'e. Vayemic la yul staelic. I'albat la li Pedroe:

―Simón, ¿mi vayemot? ¿Mi mu xcuch avu'un junuc ora ya'el li vayele? 38 Mu me xavayic, c'oponic Riox yo' mu xapasic o li c'usitic chopole. Ta melel avo'onicuc ac'oponic Riox, pero lapat axoconique mu xu' yu'un ―x'utatic la.

39 Ti Jesuse ba la sc'opon Riox noxtoc. Ja' no la yech iyal chac c'u cha'al iyal ta ba'yie. 40 Ti c'alal isut tale, vayemic la yul staelic noxtoc li oxvo'e, yu'un la mu xcuch cha'iic li vayele. Mu xa la sna'ic c'uxi chtac'avic. 41 Ti Jesuse ba la sc'opon Riox yox'ech'elal. Ti c'alal isut tale, vayemic la yul staelic noxtoc.

―Xu' mi chavayic toe. Mi chacuxic to, cuxic. Más lec ta'luc o xa. Yu'un ista xa yora ti chi'aq'ue entrucal ta stojol jmulaviletic, vo'on ti co'ol crixchanootique. 42 Licanic, batic. Q'uelavilic, le' xa xtal li much'u chiyac' entrucale ―x'utatic la yu'un ti Jesuse.

43 Ti c'alal xyaquet chlo'ilaj ti Jesuse, ja'o la tey ic'ot ti Judase, ja' lajchavo'ic o ta yajchanc'op ti Jesuse. Xchi'uc la c'otel epal crixchanoetic, oy la yespadaic, oy la ste'ic. Ja' la stacojic ech'el ti totil paleetique, xchi'uc ti much'utic ta xchanubtasvanic yilel ta smantaltac Rioxe, xchi'uc ti jmeltsanejc'opetique. 44 Ti Judase, ti snopoj xa onox ti chac' entrucal ti Jesuse, yaloj xa la c'u x'elan chac' iluc ti Jesuse:

―Ti much'u ta jbuts'e, ja' me xatsaquic. Lec me xachabiic ech'el ―xi onox la.

45 Ti c'alal ic'ot ti Judase, inopoj la yo' bu ti Jesuse.

―Jchanubtasvanej ―xut la.

Ja'o la isbuts'. 46 Ja'o la inopoj ti crixchanoetique, istsaquic la ti Jesuse.

47 Oy la jun isloq'ues la yespada, istuch'be la jun xchiquin ti smozo más totil palee. 48 Ti Jesuse iyalbe la ti crixchanoetique:

―¿C'u yu'un ti ta espada ta te' tal atsaquicon chac c'u cha'al j'eleq'ue? 49 Ti tey onox chichanubtasvan ta ti' muc'ta templo jujun c'ac'ale, ¿c'u yu'un ti mu teyuc no'ox atsaquicon ya'ele? Ti x'elan tal atsaquicone, ja' ic'ot ti yech onox ts'ibabil comel ta sc'op Rioxe ―xi la ti Jesuse.

50 Li buluchvo'e ijatav la scotolic, stuc xa la tey iscomtsanic ti Jesuse.

51 Oy jun sva'lej crem nap'al ital ta spat ti Jesuse. Ch'abal sc'u', jlic no'ox manta svoloj o sba. Itsaque ox. 52 Pero ijatav, c'ajom itabat ta tsaquel ti manta svoloj o sbae. Xt'anet xa ech'el.

53 Ti Jesuse iyiq'uic la tal ta stojol ti más totil palee. Istsob la sba scotolic ti totil paleetique, xchi'uc ti jmeltsanejc'opetique, xchi'uc ti much'utic ta xchanubtasvanic yilel ta smantaltac Rioxe. 54 Li Pedroe nomnomtic la tijil tal ta spat ti Jesuse. Ti c'alal iyul ta sna ti más totil palee, ixchi'in la ta chotlej ta ti'na jayvo' jchabiejtemplo, tey la ic'atin xchi'uc.

55 Ti totil paleetique xchi'uc ti cajmeltsanejc'opticotique, lic la sa'ic cha'vo' xchi'ilic ta meltsanejc'op ti co'ol c'usi chalique yu'un la tsa'beic smul ti Jesuse yo' la xmile oe. Pero mu la bu istaic ti cha'vo' co'ol c'usi chalique. 56 Yech no la ti ep jnopmulile, mu la co'oluc ti c'usi chalique. 57 Isva'an la sba yan jnopmulil.

58 ―Li vinic li'i ca'yojticotic ti iyal ti xu' tslomes li templo li'i ti meltsanbil ta c'obole, ti xu' la chchava'an ta oxib c'ac'ale, mu xa la ta c'oboluc chva'i ―xiic la.

59 Mu la co'oluc ti c'usi iyalique.

60 Ti más totil palee isva'an la sba ta o'lol.

―¿C'u yu'un ti mu xatac'ave? ¿Mi yech avaloj chac taje? ―xut la ti Jesuse.

61 Mi jp'el mu la bu itac'av ti Jesuse. Ti totil palee isjac'be la noxtoc:

―¿Mi vo'ot Cristoot ti yaloj Riox chapasoticotic ta mantale? ¿Mi vo'ot Xch'amalot ti Rioxe? ―xut la.

62 ―Vo'on ―xi la ti Jesuse―. Vo'on ti co'ol crixchanootique chavilic chlic jpas ta mantal crixchanoetic ta syu'el ti Rioxe. Ts'acal to chil scotol crixchanoetic ti ta toc chicha'sut tale ―xi la ti Jesuse.

63 Ti totil palee isjat la sc'u', yu'un la istabe xa smul ti yaloje.

―¿C'u xa stu cu'untic yan rextico? 64 Ica'itic xa ti tsp'is sba ta Rioxe. ¿C'usi chanopic uc? ―xut la ti xchi'iltac ta meltsanejc'ope.

―Ac'u chamuc ta jmoj ―xiic la.

65 Ti jlome lic la stubtaic ti Jesuse. Ismacbeic la sat, ismajic la.

―¿Much'u li lasmaje? ―xutic la.

Ti jchabiejtemploe imajvanic la uc.

66 Ti Jesuse tey la ta xcha'cojol jolna. Li Pedroe tey la icom ta ti'na. Ital la jun squiara ti más totil palee. 67 I'ile la ti tey chc'atin li Pedroe. Iq'uelbat la sat.

―Li vo'ote ja' achi'il li Jesus Nazarete ―x'utat la yu'un ti quiaraile.

68 ―Mu xcojtiquin. Mu jna' li c'usi chavale ―xi la li Pedroe.

Ja'o la ibat ta ti'be li Pedroe. Ja'o la i'oc' quelem. 69 Li Pedroe i'ile la noxtoc yu'un ti quiaraile.

―Li vinic le'e ja' xchi'il li Jesuse ―x'utatic la yu'un quiarail ti much'utic tey tsobolique.

70 ―Mu xcojtiquin ―xi la noxtoc li Pedroe.

Ta jliquel o ja' la yech lic albatuc noxtoc yu'un ti much'utic tey tsobolique:

―Yech ti ja' achi'ile yu'un xvinaj ti jgalileaote. Ja' yech chac'opoj chac c'u cha'al chc'opojique ―x'utat la.

71 ―Lojriox mu xcojtiquin li vinic chavalique ―xi la.

72 Ja'o la i'oc' xcha'oq'uelal quelem. Li Pedroe iyul la ta sjol ti yech onox i'albat yu'un ti Jesuse: “Ti c'alal mu to'ox ch-oc' xcha'oq'uelal queleme, ox'ech'el xa'ox aval ti mu xavojtiquinone”, x'utat onox la yu'un ti Jesuse. Ti c'alal iyul ta sjole, iyoq'uita la sba.