Ja' li' yaloj ti itsaque ti Jesuse
18
Ti c'alal laj sc'opon Riox ti Jesuse, liloc'oticotic ech'el xchi'uc. Lijelavoticotic ta jech uc'um, Cedrón sbi. Tey lic'ototicotic yo' bu ts'unbil olivotique. 2 Ti Judase spasoj xa trate ti chac' entrucal ti Jesuse. Yiloj li olivotic uque yu'un tey onox chic'otilanoticotic xchi'uc ti Jesuse. 3 Iyic' ech'el jayvo' solteroetic, xchi'uc jayvo' jchabiejtemplo, xchi'uc ti jfariseoetique. Ti c'alal ibatique, yich'oj ech'el yespadaic, xchi'uc stojic, xchi'uc slamparaic. 4 Ti Jesuse sna'oj onox ti c'usitic ta xcha'leate, ba snup ti jtsacvanejetique.―¿Much'u chasa'ic? ―xut.
5 ―Ja' ta jsa'ticotic ti Jesus Nazarete ―xiic.
―Vo'on ―x'utatic yu'un ti Jesuse.
Tey ti Judas uque, ja' ti much'u iyac' entrucale. 6 Ti c'alal “vo'on”, xi ti Jesuse, ti jtsacvanejetique valapat ibatic, ilomic ta lum.
7 ―¿Much'u chasa'ic? ―x'utatic noxtoc yu'un ti Jesuse.
―Ja' ta jsa'ticotic ti Jesus Nazarete ―xiic.
8 ―Lacalbeic xa ti vo'one. Mi jtuc no'ox chasa'icone, ac'u baticuc li jchi'iltac li'i ―x'utatic yu'un ti Jesuse.
9 Ti x'elan iyale, ja' yo' xc'ot o ti c'usi iyalbe ti Stote: “Ti jayvo' avac' yich'icon ta muq'ue, mi jun muc xch'ay cu'un”, xi onox. 10 Tey sjelp'unoj yespada ti Simon Pedroe. Ora isloq'ues ta sna, istuch'be jun xchiquin smozo ti más totil palee. Sbats'ichiquin istuch'be. Malco sbi ti vinique.
11 ―Tic'o ta sna lavespadae. Mu xapojon yu'un persa ta xcac' jvocol chac c'u cha'al yaloj ti Jtote ―x'utat yu'un Jesús ti Pedroe.
Ja' li' yaloj ti iyiq'uic ech'el ta stojol más totil pale ti Jesuse
12 Ti capitan solteroe, xchi'uc ti yajsolterotaque, xchi'uc scotol ti jchabiejtemploe, ja' istsaquic ti Jesuse, ixchuquic. 13 Ba'yi iyiq'uic ech'el ta sna ti Anase. Yu'un ja' sni'mol ti Caifase. Ti Caifase ja'o sjabilal ochem ta más totil paleal ti c'alal icham ti Jesuse. 14 Ja' ti Caifase ti iyalbe ti xchi'iltac ta meltsanejc'ope: “Más lec mi jun no'ox vinic chlaje; ja' chopol mi lilajotic jcotoltique”, ti xi onoxe.
Ja' li' yaloj ti i'otesat ta sti' sna Anás ti Pedroe
15 Vo'on li Juanone xchi'uc ti Simon Pedroe tijiloticotic ech'el ta spat ti Jesuse. Li vo'one xiyojtiquin ti totil pale Anase. Ti c'alal i'och ta sti' sbe totil pale ti Jesuse, tijil li'och uc. 16 Ti Pedroe tey icom ta pat moc. Yu'un ti xiyojtiquin ti totil palee, ba jc'opon ti jchabiejti'moque ti ac'u yotesel ta yut moc ti Pedro uque. I'otesat yu'un ti tseb ti chchabi ti'moque.
17 ―¿Mi mu vo'oticot yajchanc'opot li vinique? ―x'utat yu'un jchabiejti'moc ti Pedroe.
―Mu vo'onicon ―xi.
18 Ti smozotac totil palee xchi'uc jayvo' jchabiejtemplo stsoyoj sc'oq'uic yu'un tol sic. Tey va'ajtic chc'atinic. Tey va'al chc'atin ti Pedro uque.
Ja' li' yaloj ti ja' ba'yi oy c'usi ijac'bat yu'un totil pale Anas ti Jesuse
19 ―¿Much'utic lavajchanc'optaque? ¿C'usitic chavac' ta chanel? ―x'utat yu'un totil pale Anas ti Jesuse.
20 ―Ta sat scotol crixchanoetic lichanubtasvan ta bic'tal temploetic xchi'uc ta ti' muc'ta templo yo' bu ta stsob sbaic li jchi'iltactique. Mu ta mucluc lichanubtasvan. 21 ¿C'u yu'un ti chajac'bone? Ti yechuque, ja' jac'bo ti much'utic iya'iic ti c'usitic icale yu'un sna'ojic ―xi ti Jesuse.
22 Ora imaje yu'un jun jchabiejtemplo ti tey va'al ta sts'ele.
―¿C'u yu'un ti x'elan chatac'be li totil palee? ―x'utat yu'un jchabiejtemplo ti Jesuse.
23 ―Mi chopol ti c'usi icale, albon ca'i ti c'usi chopol ical ava'ie. Ti mi lec ti c'usi icale, ¿c'u yu'un ti amajone? ―x'utat yu'un ti Jesuse.
24 Ti Anase iyal ti ac'u chucbatuc sc'ob ti Jesuse. Istacbe ech'el ti totil pale Caifase.
Ja' li' yaloj ti iyal ti Pedroe ti mu xojtiquin ti Jesuse
25 Ti c'alal tey to'ox ta yut na ti Jesuse, ti Pedroe tey va'al chc'atin ta pana.
―¿Mi mu vo'oticot yajchanc'opot li vinique? ―x'utat yu'un ti much'utic tey co'ol chc'atin xchi'uque.
―Mu vo'onicon ―xi.
26 Tey jun smozo ti totil pale Anase. Ja' xchi'il ti much'u ituch'bat xchiquine.
―¿Mi mu vo'oticot ti laquil ta olivotic xchi'uc li vinique? ―x'utat yu'un ti mozoile.
27 ―Mu vo'onicon ―xi noxtoc ti Pedroe.
Ja'o xa i'oc' quelem.
Ja' li' yaloj ti iyiq'uic ech'el ta stojol covierno Pilato ti Jesuse
28 Ti Jesuse iyiq'uic loq'uel ta sna ti Caifase, iyiq'uic ech'el ta spalacio covierno. Naca to'ox sacjaman ti c'alal ic'otique. Ti paleetique xchi'uc ti xchi'iltaque muc x'ochic ta opisina yu'un xch'unojic ti ta sta o smulic ta stojol Riox mi tscap sbaic xchi'uc ti much'utic nom liquemic tale. Mi iscap sbaique, mu xu' sti'ic chij ta sq'uinal ti c'alal iloq'uic ta mozoil ti ba'yi jtot jme'ticotique. 29 Yech'o un iloc' tal ta yopisina ti covierno Pilatoe.
―¿C'usi smul avu'unic li vinic aviq'uic tale? ―x'utatic yu'un Pilato ti cajmeltsanejc'opticotique.
30 ―Ti ch'abluc smule, muc xquic'ticotic tal ti yechuque ―xutic.
31 ―Iq'uic ech'el, ba meltsanbeic sc'oplal ta aley atuquic ―x'utatic yu'un ti Pilatoe.
―Li vo'oticotique muc bu avalojboticotic mantal ti xu' ximilvanoticotique. Vo'ot ti c'u xachie yu'un ja' avabtel ―xutic Pilato ti cajmeltsanejc'opticotique.
32 Ti i'och ta sc'ob Pilato ti Jesuse, ja' ic'ot ti iyal ti ta cruz ta xchame. 33 Ti Pilatoe i'och ta yopisina, iyic' ochel ti Jesuse.
―¿Mi yech ti vo'ot chapas ta mantal lachi'iltac ta jurioale? ―xut.
34 ―¿Mi atuc no'ox anop taje, o mi oy much'u layalbe? ―xi ti Jesuse.
35 ―Li vo'one ma'uc jurioon, mu c'u jcuenta o. Ja' layic' tal lachi'iltaque xchi'uc li totil paleetique. ¿C'usi amul? ―x'utat yu'un ti Pilatoe.
36 ―Ti muchu liyalbe ta jpas mantale, ma'uc crixchano. Ti crixchanouc liyalbee, lispoj li jvinictaque, muc xi'aq'ue entrucal ta sc'ob cajmeltsanejc'opticotic ti yechuque, muc xiyiq'uic tal ti yechuque. Pero ma'uc crixchano liyalbe ―xi ti Jesuse.
37 ―Yu'un vo'ot chapas mantal che'e ―x'utat yu'un ti Pilatoe.
―Vo'on. Ti tal ayancon li' ta sba balamile, ja' tal cal li c'usitic yeche. Scotol ti much'utic tsc'an cha'iic li c'usitic yeche, ja' cha'iic li c'usitic chcale ―xi ti Jesuse.
38 ―¡Li'toe mu c'usi yech! ―xi ti Pilatoe.
C'alal laj yal chac taje, iloc' noxtoc ti Pilatoe, ba sc'opon ti cajmeltsanejc'opticotique.
―Ch'abal smul chca'i li vo'one. 39 Yu'un ti nopem xava'iic ti chajloq'uesbeic ta chuquel jun achi'ilic ta sq'uinal ti c'alal iloq'uic ta mozoil ti ba'yi atot ame'ique, ¿mi ja' chajcoltabeic li'i ti chal ti ja' chaspasic ta mantale? ―xut.
40 Ja'o x'avlajetic xa liquel scotolic noxtoc:
―¡Le'e, mu me xacolta! ¡Ja' loq'ueso li Barrabase! ―xiic.
Ti Barrabase j'elec'.