4 Porque mintiꞌ cub tnajsaꞌn Dios cyil ke anjel e binchan il,

nok oꞌcx e cuꞌtz t-xoꞌn tuꞌn cycuꞌpun tuj infierni,

e ocx tkꞌoꞌn tuj pres tuj klolj,

cꞌaloꞌn ke tuꞌn caden,

in che ayon tiꞌj tkꞌijlalil jwisi.

5 Ex mintiꞌ cub tnajsaꞌn Dios cyil xjal e ten ojtxi,

nok oꞌcx tzaj tkꞌoꞌn Dios kꞌekab cyibaj cycyakil xjal mya nimal Dios ke;

oꞌcx te Noé clet tuꞌn cyucꞌix wuktl xjal,

porque xi tpacbaꞌn Noé cye xjal tuꞌn cybinchante aju tzꞌaklxix.

6 Ax icx ju tnam Sodoma tucꞌix ju tnam Gomorra,

cub tkꞌoꞌn Dios cysentens biꞌx tuꞌn cynaj,

biꞌx e cub tzaꞌjix;

a jlu oc te jun techal tiꞌj ju castiw ctzajel cyibaj ke xjal mya nimal Dios ke.

7 Atzunte Lot o clet tuꞌn Dios;

ate Lot tzꞌaklxix ex tzaj nimxix tbis tuꞌn tlaj cybinchben xjal mya baꞌn mintiꞌ in cyjacꞌuꞌn chꞌin cyib.

8 Porque ate Lot ax najl cyxol,

ex tuꞌnju tzꞌaklxix te Lot,

cyjaꞌtzun tzaj taꞌw tuj tanmi tcyakil kꞌij tej tqueꞌyinte cybinchben xjal mya baꞌn ex tej tbinte tiꞌj.

9 Cyjaꞌtzun at tipumal Kajaw tuꞌn cyclet ke xjal nimal Dios oc cyoc tuj joybil cyiꞌj,

ex at tipumal tuꞌn cycub tzyuꞌn ke xjal mya tzꞌaklxix ex biꞌx tuꞌn tcub cycastiw acutzun nnuꞌl canun tkꞌijlalil jwisi.

10 Tnejelxix cbel cysentens keju cucx in cybinchaꞌn tajbil cychibjal,

ex in pon cycꞌuꞌj tiꞌj nimcu,

ex in cytzꞌilsan cyib.

Nneꞌl cyicꞌun keju at cyoclen,

mintiꞌ tchi tuj cywitz,

puro jawni ke,

mintiꞌ chꞌin cyxobil tuꞌn cyyasun cyiꞌj keju at mas cyoclen tuj cyaꞌj.

11 Pero ke anjel,

masque at nimxix cyipumal ex nimxix cyoclen,

pero mintiꞌ in che yasun cyiꞌj ke txkantl at nimxix cyoclen,

ex mintiꞌ in cymaꞌn twitz Kajaw tuꞌn tcub cysentens.

12 Pero ke xjal lu ic tzaꞌn jil ke,

porque ke jil in che itzꞌj tuꞌn cytzyet ex tuꞌn cynaj,

ex mintiꞌ in che ximan tiꞌj;

icxtzun ke xjal lu che najel cyuꞌnx cyib,

porque in che yolin mya baꞌn tiꞌj ju mintiꞌ nneꞌl cynicꞌ tiꞌj.

13 Oc cycꞌmaꞌ jun castiw tiꞌj cybinchben mya baꞌn,

atzun mas in che tzalaj tiꞌj ju achbil in bant cyuꞌn kꞌijl;

ic cyten ic tzaꞌn jun tzꞌil cyxole,

in tzaj cychꞌixwiye cyuꞌn,

in che tzalaj tiꞌj ju cysbubl oc in che waꞌn cyucꞌile.

14 Oꞌcx toc cywitz cyiꞌj xuꞌj tuꞌn cyyaẍin;

mintiꞌ in baj cygan tiꞌj tuꞌn cybinchan il;

in che xmoxin cyiꞌj keju mya cyuw cyten;

ma nakꞌet cyanmi tuꞌn tpon cycꞌuꞌj tiꞌj nimcu;

ex ma cub cysentens tuꞌn Dios tuꞌn cynaj.

15 Aju be jikun tiꞌj ma cyaj cycolin,

ex ma che el txalpuj tiꞌj;

ma che oc lpeꞌ tiꞌj Balaam aju tcyꞌajal Beor,

cub t-ximan Balaam tuꞌn tbinchante mya baꞌn,

porque toc tcꞌuꞌj tiꞌj tuꞌn tcambante pwak.

16 Oc ilin Balaam tuꞌnju tbinchben mya baꞌn,

porque jun bur miban yolin bant tyolin ic tzaꞌn jun xjal;

masque t-sanjel Dios te Balaam,

pero maket tuꞌn bur tuꞌnju mintiꞌ tnabl.

17 Ic cyten ke xjal lu ic tzaꞌn jun twi aꞌ mintiꞌ aꞌ in bet tuj,

ex ic cyten ic tzaꞌn muj xupin tuꞌn cykꞌikꞌ;

at jun lugar puro kloljxix banimaj cye jatum tuꞌn cyten te jumajx.

18 Porque nok in che yolin te cynimbil cyib ex nokx gan cyyol,

in che xmoxin cyiꞌj keju cꞌitzke che etz ok cyxol keju in che ankꞌin tuj sbubl,

in xi cymaꞌn cye ka baꞌn tuꞌn cybinchante aju tajbil cychibjal.

19 In xi cymaꞌn cye ka tuꞌn cytzokpet,

pero ax ke tzyuꞌn ke ic tzaꞌn jun majen tuꞌn cybinchante tcyakil mya baꞌn.

Porque alcye jun xjal ma cub tiꞌj tuꞌn juntl,

nnoꞌc te tmajen juntl,

porque ma cub tiꞌj tuꞌn juntl.

20 Ax toc otok che etz colpaj tuj ttzꞌilil at twitz txꞌotxꞌ tuꞌnju el cynicꞌ tiꞌj Kajaw ex Clol ke Jesucrist,

pero ka ma baj cysacun juntl maj cyib tuj ttzꞌilil ex ka ma cub cyiꞌj tuꞌn,

mas in cheꞌx tuj tilil ic tzaꞌn nej.

21 Porque mas baꞌnwtlo nokwit mintiꞌ el cynicꞌ tiꞌj ju be jikun tiꞌj,

pero lu ma cyaj cycolin aju mandamyent xjan tzaj kꞌoꞌn cye,

ex otok tzꞌel cynicꞌ tiꞌj nej.

22 Pero atzun ma japun cyiꞌj aju tal twitz yol axix toc in tmaꞌn cyjaꞌ:

Ke txꞌyan in che aj meltzꞌaj loꞌlte cyxaꞌw,

ex ke boch otok baj txꞌjet cyiꞌj nej,

in cheꞌx juntl maj tuj xokꞌl.