3 Tuꞌn tipumal Dios ma tzaj kꞌoꞌn ke tcyakilju in ajben tuꞌn tten kchwinklal ex tuꞌn kniman te Dios;

ma tzaj kꞌoꞌn jlu ke tuꞌnju ojtzkiꞌn Dios kuꞌn,

aju o txconte ke tuꞌn tajwalil ex tnabl tbanilxix.

4 Tuꞌn jlu ma tzaj tmaꞌn Dios ke jun yol tbanilxix ex maꞌ t-xilen;

tuꞌn jlu tuꞌn tten kchwinklal junx tucꞌil Dios,

ex tuꞌn kel ok tiꞌj cybinchben xjal puro tzꞌil,

porque in pon cycꞌuꞌj tiꞌj mya baꞌn.

5 Atzun cyeye jaꞌlo,

tzꞌoc tililx cyuꞌne mya nok oꞌcx tuꞌn tten cyocslable,

ax icx tuꞌn cytene baꞌn tuj tcyakil;

ex mya nok oꞌcx tuꞌn cytene baꞌn tuj tcyakil,

ax icx tuꞌn tten cyojtzkible;

6 ex mya nok oꞌcx tuꞌn tten cyojtzkible,

ax icx tuꞌn cyjacꞌunte cyibe;

ex mya nok oꞌcx tuꞌn cyjacꞌunte cyibe,

ax icx tuꞌn tten cypasense;

ex mya nok oꞌcx tuꞌn tten cypasense,

ax icx tuꞌn cynimane te Dios;

7 ex mya nok oꞌcx tuꞌn cynimane te Dios,

ax icx tuꞌn toc cyitzꞌin cyibe;

ex mya nok oꞌcx tuꞌn toc cyitzꞌin cyibe,

ax icx tuꞌn tten cycꞌujlalile.

8 Porque ka ma cybinchaye tcyakil jlu ex ka ma che chmet-xix,

mlay che oque te cyꞌaj,

ex mlay che cyaj tene mintiꞌwt twitz cyakꞌunbene tuj ojtzkibl te Kajaw Jesucrist.

9 Atzun jun xjal mintiꞌ in tbinchaꞌn tcyakil jlu,

sjumj tiꞌj twitz,

ex moẍ te;

ex ma tzicꞌ tnaꞌl tuꞌn ka o txꞌjet tuj til ojtxi.

10 Cyjaꞌtzun erman,

tzꞌoc tililx cyuꞌne tuꞌn tkeꞌxix cycꞌuꞌje tuꞌnju o che txquete tuꞌn Dios ex o che jaw scꞌoꞌne tuꞌn;

porque ka ma cybinchaye jlu,

mlayx che cub tzꞌake.

11 Cyjaꞌtzun ctzajel kꞌoꞌn cyeye tuꞌn cyocxe tuꞌn tcyakil tzalajbil tuj jun cawbil te jumajx te Kajaw ex Clolke Jesucrist.

12 Cyjaꞌtzun,

cucx cxel nmaꞌne jlu cyeye tuꞌn ttzaj cynaꞌne,

masque baꞌn cyuꞌne,

ex tzyuꞌnxix cyuꞌne aju yol axix toc at cyucꞌile.

13 Porque baꞌn tuj nwitze tuꞌn tjaw ncꞌasune cynable naꞌnxtok ncyime,

14 porque baꞌn wuꞌne chꞌix tcyim nximlale tuꞌn taj wanmiye tuj cyaꞌj,

ic tzaꞌn ma tzaj tmaꞌn Kajaw Jesucrist weye.

15 Ax icx cꞌoquel tilil wuꞌne tuꞌn t-xi nmaꞌne jlu cyeye tuꞌntzun cucx tuꞌn ttzaj cynaꞌne,

ncyimlenxiye.

16 Porque ma txi kchicꞌbaꞌne cyeye aju tipumal Kajaw Jesucrist ex ju tulel,

mya jun yol laꞌjbil ma txi kmaꞌne cyeye ex mya jun sbubl,

nok oꞌcx ma txi kmaꞌne cyeye porque o kile tajwalil Jesucrist tuꞌnx tbakꞌ kwitze.

17 O kile tej ttzaj tkꞌoꞌn Kman Dios nimbil te Jesús tucꞌix nim toclen,

tzaj kꞌajt Dios tuj t-spicꞌumal in koptzꞌaj wen,

ex tma:

Atzun Ncꞌwaꞌle jlu cꞌujlaꞌnxix wuꞌne,

in chin tzalaje tiꞌj,

chi Dios.

18 Ax koꞌye o binte ju yol lu tej ttzaj kꞌmaꞌn tuj cyaꞌj,

tej ktene tucꞌil Jesús twi witz jatum cub ten Dios.

19 Ax icx at jun yol kucꞌil mas segurxix,

aju cyyol ke t-sanjel Dios;

ic tten ju yol lu ic tzaꞌn ttxan tzaj in cꞌant tuj klolj.

Cyjaꞌtzun,

baꞌn tuꞌn t-xi cykꞌoꞌn cywiꞌye tiꞌj acutzun in cub spicꞌun,

ex acutzun in jaꞌwil ju cheꞌw aju jakolte t-xe cyaꞌj,

tuꞌn t-spicꞌbanjtz tuj cyanmiye.

20 Pero tnejel tzꞌelx cynicꞌe tiꞌj jlu:

Aju cyyol ke t-sanjel Dios tzꞌiban tuj Tuꞌjil mlay pujet kuꞌn tuꞌn kex knabl.

21 Porque mintiꞌ e pacban ke t-sanjel Dios tuꞌn cyex cyajbil;

nok oꞌcx te Dios in che ajben ke xjal lu,

xi cymaꞌn ju yol aju tzaj tmaꞌn Dios cye,

porque ẍakluꞌn ke tuꞌn Xewbaj Xjan.