AJU TNEJEL UꞌJ XI TTZꞌIBAN APOSTL JUAN
Aju yol in tkꞌoꞌn chwinklal
1
In xi ntzꞌibane cyeye tiꞌj ju Yol te chwinklal,
aju at atxix t-xe tnejel,
aju o kbiye ex o kile,
aju o tzꞌoc kqueꞌyine tuꞌn tbakꞌ kwitze ex o tzꞌoc kmacoꞌne tuꞌn kkꞌabe.
2 Porque o tzaj yecꞌun ju chwinklal,
ex o kile,
ex in xi kmaꞌne ax toc tiꞌj;
ex in xi kkꞌoꞌne tkanil cyeye tiꞌj ju chwinklal te jumajx,
aju at tucꞌil Dios Mambaj ex o tzaj yecꞌun keye,
3 Aju ma kile ex ma kbiye,
axtzunju in xi kpacbaꞌne cyeye tuꞌntzun tten kmojbabl kib;
ex aju kmojbabl kib,
tucꞌil Kman Dios ex tucꞌil Jesucrist aju Tcꞌwaꞌl.
4 In xi ntzꞌibane tcyakil jlu cyeye tuꞌntzun cytzalaje nimxix.
Ate Dios spicꞌun
5 Atzunju yol lu o kbiye te Jesucrist ex in xi kpacbaꞌne cyeye:
ate Dios spicꞌun ex mintiꞌ chꞌin klolj at tucꞌil.
6 Ka in kmaꞌn ka at kmojbabl kib tucꞌil Dios ex ka cucx kbet tuj klolj,
in ko nicꞌan yol ex mintiꞌ in ko oc lpeꞌ tiꞌj ju yol axix toc.
7 Pero ka in ko bet tuj spicꞌun ic tzaꞌn te Dios at tuj spicꞌun,
at kmojbabl kib kxolx,
ex aju tchcꞌel Jesucrist aju Tcꞌwaꞌl Dios nneꞌl ttxꞌjoꞌn tcyakilju kil.
8 Ka in kmaꞌn ka mintiꞌ kil,
in ksbun kib kuꞌnx kib,
ex ju yol axix toc mintiꞌ tuj kanmi.
9 Pero ka ma jatz kpaꞌn kil twitz Dios,
cnajsetel kil tuꞌn ex cꞌelel ttxꞌjoꞌn tcyakil mya baꞌn tuj kanmi,
porque ate Dios tzꞌaklxix ex baꞌn tuꞌn tkeꞌ kcꞌuꞌj tiꞌj.
10 Ka ma kma bajx ko binchan il,
nnoꞌc kkꞌoꞌn Dios nicꞌal yol,
ex aju tyol mintiꞌ tuj kanmi.