AJU TCABIN UꞌJ XI TTZꞌIBAN APOSTL JUAN
Jun kꞌolbebl tuꞌn apostl Juan
1
Akine ansyan,
in xi ntzꞌibane teya erman xuꞌj,
cyucꞌix ke tala scꞌoꞌmaj tuꞌn Dios;
ax toc cꞌujlaꞌn keye wuꞌne,
ex mya nok oꞌcx wuꞌne,
ax icx cyuꞌn cycyakil keju ojtzkiꞌn ju yol axix toc cyuꞌn.
2 Cꞌujlaꞌn keye wuꞌne tuꞌn tlaj ju yol axix toc at tuj kanmi ex ax ctel kucꞌil te jumajx.
3 Ctzajel kꞌoꞌn xtalbil cyeye tuꞌn Kman Dios ex tuꞌn Jesucrist aju Tcꞌwaꞌl,
ex ctzajel kꞌakꞌan cycꞌuꞌj cyiꞌje,
ex tuꞌn tkeꞌxix cycꞌuꞌje,
tuꞌnju ma che oc lpeꞌye tiꞌj ju yol axix toc ex at cycꞌujlalile.
Aju mandamyent tuꞌn tten kcꞌujlalil
4 Nimxix ma chin tzalaje tuꞌnju ma wile junjun tala in che oc lpeꞌ tiꞌj ju yol axix toc,
ic tzaꞌnx ju mandamyent tzaj tmaꞌn Kman Dios ke.
5 Jaꞌlotzun chin cubsale twitza erman xuꞌj,
tuꞌn kcꞌujlante kib kxolx.
Mya jun acꞌaj mandamyent in xi ntzꞌibane teya,
nok oꞌcx aju mandamyent at kucꞌil atxix t-xe tnejel.
6 Ka cꞌujlaꞌn Dios kuꞌn,
che japunel ke tmandamyent kuꞌn.
Axtzun tmandamyent jlu ic tzaꞌn o cybiye atxix t-xe tnejel,
tuꞌn tten cycꞌujlalile.
Keju in che sbun
7 Porque nimcu in che bet tuj tcyakil twitz txꞌotxꞌ,
in cymaꞌn ka mya ax toc xjal te Jesucrist tej tul tzalu twitz txꞌotxꞌ.
Akeju in che kꞌmante jlu sbul ke ex aj kꞌoj ke tiꞌj Crist.
8 Ten cycwente cyiꞌje tuꞌn miꞌn tnaj twitz cyakꞌunbene,
nok oꞌcx tzꞌoc tililx cyuꞌne tuꞌn cycꞌmonteye jun twi cycꞌuꞌje tzꞌaklxix.
9 Ka at jun xjal nneꞌl txalpuj ex mintiꞌ in cyaj ten tuj t-xnakꞌtzbil Crist,
mintiꞌ Dios tucꞌil;
atzun teju ma cyaj ten tuj t-xnakꞌtzbil Crist,
atzunju at Kman Dios tucꞌil ex at Tcꞌwaꞌl Dios tucꞌil.
10 Ka at jun xjal ma pon cyucꞌile ex mya a xnakꞌtzbil lu in tmaꞌn,
miꞌn tzꞌocx cycꞌmoꞌne tuj cyjaye ex miꞌn txi cykꞌolbeꞌne;
11 porque alcyeju ma txi kꞌolben te,
at toclen tiꞌj ju tbinchben xjal mya baꞌn lu.
Jun yol te mancbil
12 At nimcu tuꞌn t-xi nmaꞌne cyeye,
pero miꞌn wajbile tuꞌn t-xi ntzꞌibane tuj uꞌj ex tuꞌn tint;
porque ximan wuꞌne tuꞌn nxiꞌye cyucꞌile ex tuꞌn nyoline cyucꞌile ex tuꞌn toc kqueꞌyin kwitz,
tuꞌntzun ktzalaj nimxix.
13 In xi kꞌolbeꞌna cyuꞌn ke tal termaniya aju scꞌoꞌmaj tuꞌn Dios.
Icxwitju.