Tuꞌn kocslabl in cub tiꞌj mya baꞌn at twitz txꞌotxꞌ
5
Cycyakil keju in xi cyocslaꞌn ka ate Jesús ju Crist aju at toclen tuꞌn Dios,
atzun ke tcꞌwaꞌl Diosju;
ex cycyakil keju cꞌujlaꞌn Mambaj cyuꞌn,
ax icx cꞌujlaꞌn ke tcꞌwaꞌl Mambaj cyuꞌn.
2 Ka cꞌujlaꞌn Dios kuꞌn ex ka ma che japun ke tmandamyent kuꞌn,
tuꞌntzunju nneꞌl knicꞌ tiꞌj ka cꞌujlaꞌn ke tcꞌwaꞌl Dios kuꞌn.
3 Ka cꞌujlaꞌn Dios kuꞌn,
che japunel ke tmandamyent kuꞌn;
ex ke tmandamyent mya cyuw ke.
4 Porque cycyakil keju ma che oc te tcꞌwaꞌl Dios,
in cub tiꞌj ju mya baꞌn cyuꞌn,
aju at twitz txꞌotxꞌ.
Cyjaꞌtzun tten nok tuꞌnju kocslabl in cub tiꞌj mya baꞌn kuꞌn,
aju at twitz txꞌotxꞌ.
5 ¿Alcyetzunju in cub tiꞌj mya baꞌn tuꞌn,
aju at twitz txꞌotxꞌ?
¿Myapetzun aju in xi tocslaꞌn ka ate Jesús Tcꞌwaꞌl Dios?
Atzunju.
Keju testiw in che yolin ax toc tiꞌj Tcꞌwaꞌl Dios
6 Ate Jesucrist ul,
o byan tuj aꞌ ex el tchcꞌel twitz crus;
mya nok oꞌcx o byan tuj aꞌ,
ax icx el tchcꞌel.
Axju Xewbaj Xjan testiw tiꞌj jlu,
porque aju Xewbaj Xjan ax toc tyol.
7 At ox testiw [tuj cyaꞌj in che yolin tiꞌj jlu,
ex atzun ke jlu:
Mambaj,
tucꞌix ju Yol,
tucꞌix Xewbaj Xjan;
akeju ox testiw lu junx cyten.
8 Ex at ox testiw twitz txꞌotxꞌ],
ex atzun ke jlu:
Aju Xewbaj Xjan,
tucꞌix ju aꞌ,
ex ju tchcꞌel Jesucrist;
ex akeju ox lu ax yol in cymaꞌn.
9 Ka ma txi kocslaꞌn aju cyyol xjal,
yajtzun tyol Dios,
¿myapetzun mas maꞌ toclen tuꞌn t-xi kocslaꞌn?
Porque atzun tyol Dios jlu tzaj tchicꞌbaꞌn tiꞌj Tcꞌwaꞌl.
10 Alcye ma tzꞌocslan tiꞌj Tcꞌwaꞌl Dios,
in tnaꞌn tuj tanmi ka ax toc tyol Dios.
Alcye mintiꞌ ma txi tocslaꞌn tyol Dios,
nnoꞌc Dios nicꞌal yol tuꞌn,
porque mintiꞌ ma txi tocslaꞌn tyol Dios aju tzaj tchicꞌbaꞌn tiꞌj Tcꞌwaꞌl.
11 Atzunju yol lu tzaj tchicꞌbaꞌn Dios ke:
Ma tzaj tkꞌoꞌn Dios kchwinklal te jumajx,
ex aju chwinklal lu tuꞌnju Tcꞌwaꞌl in tzaj tkꞌoꞌn.
12 Alcye at Tcꞌwaꞌl Dios tucꞌil,
at tchwinklal;
pero alcye mintiꞌ Tcꞌwaꞌl Dios tucꞌil,
mintiꞌ tchwinklal.
In tkꞌoꞌn Juan juntl maj cynabl ocslal
13 Tcyakil jlu ma txi ntzꞌibane cyeye,
akeye ma che ocslane tiꞌj Tcꞌwaꞌl Dios,
tuꞌntzun tkeꞌxix cycꞌuꞌje tiꞌj ka at cychwinklale te jumajx.
14 Ka at jun ma txi kkanin te Dios ic tzaꞌnx ju tajbil,
in ko tzaj tbiꞌn,
cyjaꞌtzun tten in keꞌxix kcꞌuꞌj tiꞌj.
15 Baꞌn kuꞌn in tzaj tbiꞌn Dios alcyeju ma txi kkanin te;
cyjaꞌtzun ax icx baꞌn kuꞌn in kcꞌmoꞌn aju ma txi kkanin te.
16 Ka at jun ocslal ma til in binchan terman il,
mya jun il in tzaj camic tuꞌn,
baꞌn tuꞌn tcubsan twitz Dios tiꞌj terman,
ex ctzajel tkꞌoꞌn Dios tchwinklal terman;
in xi nmaꞌne jlu cyiꞌj keju in che binchan il,
ka mya jun il in tzaj camic tuꞌn.
At il in tzaj camic tuꞌn.
Mintiꞌ in xi nmaꞌne tuꞌn kcubsan twitz Dios tiꞌj jlu.
17 Tcyakilju mya baꞌn in kbinchaꞌn,
atzun ilju;
pero at il mintiꞌ in tzaj camic tuꞌn.
18 Baꞌn kuꞌn,
akeju ma che oc te tcꞌwaꞌl Dios mya cucx in che binchan il;
porque cwentin ke tuꞌn Tcꞌwaꞌl Dios,
ex mintiꞌ in che tzyet tuꞌn tajaw il.
19 Baꞌn kuꞌn,
te Dios koꞌ,
ex cycyakil xjal twitz txꞌotxꞌ ateꞌ tjakꞌ tipumal tajaw il.
20 Ex baꞌn kuꞌn,
o tzul aj Tcꞌwaꞌl Dios ex ma tzaj tkꞌoꞌn knabl tuꞌn kojtzkinte alcyeju Dios axix toc.
Ax atoꞌ tucꞌil ju Dios axix toc,
ex tucꞌil Jesucrist aju Tcꞌwaꞌl.
Atzunte Diosju axix toc ex kꞌolte kchwinklal te jumajx.
21 Akeye tal ncꞌwaꞌle,
ten cycwente cyiꞌje tuꞌn miꞌn cycꞌulune cywitz ke tilbilal.
Icxwitju.