Ke xjal at T-xew Dios cyucꞌil ex ke xjal aj kꞌoj tiꞌj Crist
4
Akeye erman at ncꞌuꞌje cyiꞌje,
miꞌn txi cyocslaꞌne cyyol cycyakil pacbal yol in cymaꞌn ka tuꞌn Dios samaꞌn ke,
nok oꞌcx cykꞌoꞌnque cwent cyiꞌj,
tuꞌntzun tel cynicꞌe cyiꞌj ka te Dios ke ex ka miꞌn.
Porque nimcu pacbal nicꞌal yol in che bet cyxol xjal,
in cymaꞌn ka tuꞌn Dios samaꞌn ke.
2 Pero cꞌeleltzun cynicꞌe tiꞌj ka ax toc tuꞌn T-xew Dios in che yolin;
porque cycyakil pacbal yol,
ka in cychicꞌbaꞌn ka ax toc xjal te Jesucrist tej tul tzalu twitz txꞌotxꞌ,
entons te Dios xjal lu.
3 Pero cycyakil pacbal yol,
ka in cymaꞌn,
mya ax toc xjal te Jesucrist tej tul tzalu twitz txꞌotxꞌ,
myatzun te Dios xjal lu.
Atzun in tzaja ju yol lu tucꞌil ju aj kꞌoj tiꞌj Crist,
aju o cybiye ka tzul;
ex lu at cyxol xjal jaꞌlo.
4 Akeye tal ncꞌwaꞌle,
te Dios keye ex ma cub cyiꞌj pacbal nicꞌal yol cyuꞌne;
porque mas maꞌ toclen Dios aju at tuj cyanmiye twitz ju tajaw il at cyxol xjal.
5 Cye xjal ke,
cyjaꞌtzun in che yolin tiꞌj ju cye xjal,
ex in xi cybiꞌn xjal cyyol.
6 Atzun ke te Dios koꞌ.
Aju xjal ojtzkiꞌn Dios tuꞌn,
in xi tbiꞌn kyol;
atzunju xjal mya te Dios,
mintiꞌ in xi tbiꞌn kyol.
Cyjaꞌtzun nneꞌl knicꞌ tiꞌj alcyeju in yolin ax toc ex alcyeju mintiꞌ in yolin ax toc.
Ate Dios at tcꞌujlalil
7 Akeye erman at ncꞌuꞌje cyiꞌje,
kcꞌujlam kib kxolx,
porque aju kcꞌujlalil te Dioste;
ex cycyakil keju at cycꞌujlalil,
tcꞌwaꞌl Dios ke ex ojtzkiꞌn Dios cyuꞌn.
8 Alcye mintiꞌ tcꞌujlalil,
naꞌnx tel tnicꞌ tiꞌj Dios,
porque ate Dios at tcꞌujlalil.
9 Tuꞌn jlu ma tzaj tyecꞌun Dios tcꞌujlalil kiꞌj;
tuꞌnju tzaj t-samaꞌn Dios oꞌcxcu jun Tcꞌwaꞌl,
ul tzalu twitz txꞌotxꞌ tuꞌntzun tten kchwinklal nok tuꞌn.
10 Tuꞌntzun jlu nneꞌl knicꞌ tiꞌj ju tcꞌujlalil:
Mya akekoꞌ ma ko cꞌujlante Dios,
nok oꞌcx ate Dios ma ko tcꞌujla ex tzaj t-samaꞌn aju Tcꞌwaꞌl tuꞌn toc te chojbil kil.
11 Akeye erman at ncꞌuꞌje cyiꞌje,
ka ic tten tcꞌujlalil Dios kiꞌj,
ax icx ke kcꞌujlam kib kxolx.
12 Mi jun xjal o til twitz Dios,
pero ka ma kcꞌujla kib kxolx,
axtzun najl Dios tuj kanmi,
ex aju tcꞌujlalil Dios ma tzꞌaket-xix tuj kanmi.
13 Tuꞌntzun jlu nneꞌl knicꞌ tiꞌj ka ax najl koꞌ tucꞌil Dios,
ax icx te najl tuj kanmi,
porque ma tzaj tkꞌoꞌn Dios aju T-xew ke.
14 Ax koꞌye ma kile ex in xi kchicꞌbaꞌne ma tzaj t-samaꞌn Kman Dios aju Tcꞌwaꞌl tuꞌn toc te Colol cye xjal.
15 Alcye in tchicꞌbaꞌn ka ax toc Tcꞌwaꞌl Dios te Jesús,
ax najl Dios tuj tanmi,
ax icx te ax najl tucꞌil Dios.
16 Cyjaꞌtzun nneꞌl knicꞌ tiꞌj tcꞌujlalil Dios kiꞌj ex ma txi kocslaꞌn.
Ate Dios at tcꞌujlalil,
ex alcyeju at tcꞌujlalil tuj tanmi,
ax najl tucꞌil Dios,
ax icx te Dios ax najl tuj tanmi.
17 Tuꞌn jlu in tzꞌaket-xix kcꞌujlalil tuꞌntzun tkeꞌxix kcꞌuꞌj oc tul tkꞌijlalil jwisi;
ex ckebil kcꞌuꞌj,
porque ic tzaꞌn tten Jesucrist,
icxtzun ktenju tzalu twitz txꞌotxꞌ.
18 Ka at kcꞌujlalil mlay ko xob,
porque ka tzꞌaklxix kcꞌujlalil,
tuꞌn jlu nneꞌl tiꞌn ju xobajil.
Porque aju xobajil in tzaj tuꞌn tlaj ju castiw cyjaꞌ ttzaj;
cyjaꞌtzun alcye in xob,
naꞌnx ttzꞌaket tcꞌujlalil tuj tanmi.
19 In kcꞌujlaꞌn Dios,
porque tnejel ma ko cꞌujlanjtz tuꞌn.
20 Pero ka at jun xjal in tmaꞌn:
In ncꞌujlaꞌne Dios,
ka chi,
ex ka nneꞌl ticꞌun terman,
nicꞌal yol te;
porque ka mintiꞌ in tcꞌujlaꞌn xjal terman aju nnoꞌc tqueꞌyin,
ax mlay bant tuꞌn tcꞌujlanjtz Dios tuꞌn,
aju naꞌnx toc tqueꞌyin.
21 Ex atzun mandamyent jlu ma kcꞌam te Jesucrist,
in tmaꞌn:
Alcyeju cꞌujlaꞌn Dios tuꞌn,
ax icx cꞌujlam terman.