Ma ko oc te tcꞌwaꞌl Dios
3
Che ximane tiꞌj,
maꞌxix tcꞌujlalil Kman Dios kiꞌj,
porque ma tzꞌoc kbi tcꞌwaꞌl Dios,
ex ax toc tcꞌwaꞌl Dios koꞌ.
Cyjaꞌtzun,
mintiꞌ nneꞌl cynicꞌ xjal kiꞌj,
porque mintiꞌ nneꞌl cynicꞌ tiꞌj Dios.
2 Akeye erman at ncꞌuꞌje cyiꞌje,
ma ko oc te tcꞌwaꞌl Dios jaꞌlo;
ex naꞌnx ttzaj yecꞌun tzaꞌn ko oquel.
Pero baꞌn kuꞌn,
oc tyecꞌunte tib Jesucrist,
ko oquel ic tzaꞌnx te,
porque oc kilaꞌ tzaꞌn queꞌyin.
3 Ex cycyakil keju in che ayon tiꞌj Crist ex kꞌukl cycꞌuꞌj tiꞌj,
in sakix tuj tanmi,
ic tzaꞌn te Crist sak te.
4 Cycyakil keju in che binchan il in che icꞌ tibaj tley Dios,
porque ka ma ko icꞌ tibaj ley atzun ilju.
5 Baꞌn cyuꞌne,
ul aj Jesucrist twitz txꞌotxꞌ tuꞌn tel tiꞌn kil,
atzun te mintiꞌ o binchan il.
6 Cyjaꞌtzun,
aju xjal ax taꞌ tucꞌil Crist mintiꞌ in binchan il;
pero aju in binchan il bajx til xjal Crist ex bajx tzꞌel tnicꞌ tiꞌj.
7 Akeye tal ncꞌwaꞌle,
cuchiwt tuꞌn miꞌn cyel txalpuje tuꞌn juntl.
Alcye in tbinchaꞌn aju tzꞌaklxix,
tzꞌaklxix te,
ic tzaꞌn te Crist tzꞌaklxix te.
8 Pero alcyeju in binchan il,
te tajaw il te;
porque ate tajaw il binchan il tzajnix bant atxix t-xe tnejel.
Tuꞌntzun tlaj jlu ul aj Tcꞌwaꞌl Dios twitz txꞌotxꞌ,
tuꞌntzun tcub xitj tcyakil takꞌunben tajaw il.
9 Jun xjal ka ax toc ma tzꞌoc te tcꞌwaꞌl Dios mintiꞌ in binchan il,
porque tiyjil Dios te ex mlay bant cucx tuꞌn tbinchan il,
porque tcꞌwaꞌl Dios te.
10 Tuꞌntzun jlu nneꞌl nicꞌbaj cyiꞌj alcye ke tcꞌwaꞌl Dios ex alcye ke tcꞌwaꞌl tajaw il;
porque tcyakilju mintiꞌ in tbinchaꞌn aju tzꞌaklxix,
myatzun te Diosju,
ax icx mya te Dios aju mintiꞌ in tcꞌujlaꞌn terman.
Kcꞌujlam kib kxolx
11 Porque atzunju yol lu o cybiye atxix t-xe tnejel:
Tuꞌn kcꞌujlante kib kxolx.
12 Ex miꞌn ko oc ic tzaꞌn te Caín,
te tajaw il te ex cub tbyoꞌn aju titzꞌin.
¿Tikuꞌntzun cub tbyoꞌn?
Porque mya baꞌn aju tbinchben Caín,
atzun te titzꞌin baꞌn tbinchben.
13 Erman,
miꞌn che labine tiꞌj ka ma che el icꞌune cyuꞌn xjal.
14 Baꞌn kuꞌn ma ko etz tuj camic,
ma ko ul tuj chwinklal porque in che kcꞌujlaꞌn ke erman.
Alcye mintiꞌ in tcꞌujlaꞌn terman,
ax taꞌ tuj camic.
15 Aju xjal nneꞌl ticꞌun terman,
byol xjal te;
ex baꞌn cyuꞌne mi jun byol xjal ctel tchwinklal te jumajx.
16 Tiꞌjtzun jlu nneꞌl knicꞌ tiꞌj tcꞌujlalil Dios,
porque xi tkꞌon tib Jesucrist tuꞌn tcyim tuꞌn klaj;
ax icx ke baꞌn tuꞌn t-xi kkꞌon kib tuꞌn kcyim tuꞌn cylaj kerman.
17 Pero ka at jun xjal nimcu at te tzalu twitz txꞌotxꞌ,
ex ka ma til xjal terman atx taj aju in ajben te,
ex in cub t-xcꞌayin,
¿tzaꞌntzun tten tuꞌn tmante ka at tcꞌujlalil Dios tuj tanmi?
18 Akeye tal ncꞌwaꞌle,
miꞌn kcꞌujla kib nok tuꞌn kyol ex tuꞌn ktziꞌ;
nok oꞌcx kcꞌujlam kib tuꞌn kbinchben ex ax tocwit kcꞌujlalil.
Tzaꞌn tten tuꞌn tkeꞌ kcꞌuꞌj tiꞌj Dios
19 Tuꞌn jlu cꞌelel knicꞌ tiꞌj ka ma ko oc lpeꞌ tiꞌj ju yol axix toc,
ex ckebilxix kcꞌuꞌj tiꞌj Dios.
20 Porque ka ma tma kanmi ka mya baꞌn in kbinchaꞌn,
ate Dios maꞌ toclen twitz ju kanmi,
ex ojtzkiꞌn tcyakil tuꞌn.
21 Akeye erman at ncꞌuꞌje cyiꞌje,
ka mintiꞌ in tmaꞌn kanmi ka mya baꞌn in kbinchaꞌn,
kꞌukl kcꞌuꞌj tiꞌj Dios.
22 Ex alcye ma txi kkanin te,
ctzajel tkꞌoꞌn ke porque in che japun ke tmandamyent kuꞌn ex in kbinchaꞌn aju baꞌn nneꞌla tuj twitz.
23 Ex atzunju tmandamyent jlu:
tuꞌn t-xi kocslaꞌn Jesucrist aju Tcꞌwaꞌl Dios,
ex tuꞌn kcꞌujlante kib kxolx,
ic tzaꞌn kꞌmaꞌmaj ke tuꞌn.
24 Alcye in che japun ke tmandamyent tuꞌn,
ax taꞌ tucꞌil Dios,
ex ax taꞌ Dios tucꞌil.
Cyjaꞌtzun nneꞌl knicꞌ tiꞌj ka ax najl Dios tuj kanmi,
tuꞌnju Xewbaj Xjan ma tzaj tkꞌoꞌn ke.