Ate Crist yolil kiꞌj twitz Dios
2
Akeye tal ncꞌwaꞌle,
in xi ntzꞌibane tcyakil jlu cyeye tuꞌntzun miꞌn cybinchane il.
Pero ka at jun ma binchan il,
at jun yolil kꞌij tucꞌil Kman Dios,
ate Jesucrist aju tzꞌaklxix.
2 Oc Jesucrist te chojbil kil;
mya oꞌcx tuꞌn tlaj kil,
ax icx tuꞌn tlaj cyil cycyakil xjal.
3 Ka ma che japun ke tmandamyent Dios kuꞌn,
tuꞌntzunju in keꞌxix kcꞌuꞌj tiꞌj ka ojtzkiꞌn Dios kuꞌn.
4 Pero ka at jun xjal ma kꞌmante:
Ojtzkiꞌn Dios wuꞌne ka chi,
ex ka mintiꞌ in che japun ke tmandamyent Dios tuꞌn,
nicꞌal yol te,
ex aju yol axix toc mintiꞌ tuj tanmi.
5 Pero alcyeju in japun tyol Dios tuꞌn,
ax toc at tcꞌuꞌj tiꞌj Dios ex ma tzꞌaket-xix tcꞌujlalil.
Cyjaꞌtzun in keꞌxix kcꞌuꞌj tiꞌj atoꞌ junx tucꞌil.
6 Alcye in kꞌmante ka ax taꞌ tucꞌil Dios,
il tiꞌj tuꞌn tbet baꞌn ic tzaꞌn o bet Crist.
Aju acꞌaj mandamyent
7 Erman,
mya acꞌaj mandamyent aju in xi ntzꞌibane cyeye;
nok oꞌcx aju ojtxi mandamyent aju at cyucꞌile atxix t-xe tnejel.
Aju ojtxi mandamyent,
atzunju yol o cybiye atxix t-xe tnejel.
8 Masque ojtxi mandamyent in xi ntzꞌibane cyeye,
pero acꞌajx taꞌ,
ax toc ma japun tuꞌn Crist,
ax icx cyeye tuꞌn tjapun cyuꞌne,
porque aju klolj chꞌix ticꞌ,
ex aju spicꞌun ax toc ma tzul koptzꞌaj.
9 Ka at jun in kꞌmante ka at tuj spicꞌun ex ka nneꞌl ticꞌun terman,
ax taꞌ tuj klolj.
10 Alcye jun xjal in tcꞌujlaꞌn terman ax taꞌ tuj spicꞌun,
ex mintiꞌ jun mya baꞌn tuj tanmi tuꞌn tjaw tolj tiꞌj.
11 Pero ka at jun nneꞌl ticꞌun terman,
ax taꞌ tuj klolj ex in bet tuj klolj,
ex mintiꞌ nneꞌl tnicꞌ tiꞌj tzaꞌn t-xiꞌ,
porque ma tzꞌoc te moẍ tuꞌn klolj.
12 In xi ntzꞌibane jlu cyeye,
akeye tal ncꞌwaꞌle,
porque o najset cyile tuꞌnju ocslal keye tiꞌj Jesucrist.
13 In xi ntzꞌibane jlu cyeye,
akeye mambaj,
porque ojtzkiꞌn Crist cyuꞌne,
aju at atxix t-xe tnejel.
In xi ntzꞌibane jlu cyeye,
akeye cuꞌxun,
porque ma cub tiꞌj tajaw il cyuꞌne.
In xi ntzꞌibane jlu cyeye,
akeye tal ncꞌwaꞌle,
porque ojtzkiꞌn Kman Dios cyuꞌne.
14 In xi ntzꞌibane jlu cyeye,
akeye mambaj,
porque ojtzkiꞌn cyuꞌne aju at atxix t-xe tnejel.
In xi ntzꞌibane jlu cyeye,
akeye cuꞌxun,
porque at cyipune,
ex ma cycꞌame tyol Dios tuj cyanmiye,
ex ma cub tiꞌj tajaw il cyuꞌne.
15 Miꞌn cycꞌujlaye aju achbil te twitz txꞌotxꞌ,
mi jun tiꞌxti mya baꞌn at twitz txꞌotxꞌ.
Ka at jun xjal in tcꞌujlaꞌn aju achbil te twitz txꞌotxꞌ,
mintiꞌ tcꞌujlalil tuj tanmi tiꞌj Kman Dios.
16 Porque tcyakilju at twitz txꞌotxꞌ,
aju tajbil kchibjal mya baꞌn,
ex tcyakilju mya baꞌn nnoꞌc kqueꞌyin ex in pon kcꞌuꞌj tiꞌj,
ex aju knimbil kib tuj kchwinklal,
myatzun te Kman Dios jlu,
nok oꞌcx te twitz txꞌotxꞌ.
17 Cbajel ju twitz txꞌotxꞌ tucꞌix ju cyajbil xjal mya baꞌn;
atzunju xjal in tbinchaꞌn tajbil Dios cyjel ten te jumajx.
Aju yol axix toc ex aju nicꞌaj yol
18 Akeye tal ncꞌwaꞌle,
atzunju mancbil tkꞌijlalil jaꞌlo;
ic tzaꞌn o cybiye,
tzul aju aj kꞌoj tiꞌj Crist,
icxtzun jaꞌlo nimcu aj kꞌoj tiꞌj Crist ma che jaw jlet;
cyjaꞌtzun nneꞌl knicꞌ tiꞌj ka atzun mancbil tkꞌijlalil jaꞌlo.
19 Kxol ma che ex;
pero mya kucꞌil ke;
porque nokwit kucꞌil ke,
axwitlo ma che cyaj ten kucꞌil.
Pero ma che ex tuꞌntzun tyecꞌunjtz ka mya cycyakil ke kucꞌil ke.
20 Atzun cyeye ma tzꞌoc kꞌoꞌn cyoclene tuꞌn Xewbaj Xjan,
ex cycyakile ojtzkiꞌn ju yol axix toc cyuꞌne.
21 Mintiꞌ in xi ntzꞌibane cyeye tuꞌnju mintiꞌwt baꞌn cyuꞌne aju yol axix toc,
nok oꞌcx tuꞌnju ojtzkiꞌn cyuꞌne;
ex baꞌn cyuꞌne mya tiꞌj ju yol axix toc in tzaj ju nicꞌaj yol.
22 ¿Alcyetzunju nicꞌal yol?
¿Myapetzunju in tmaꞌn ka mya ate Jesús ju Crist,
aju at toclen tuꞌn Dios?
Atzun jlu aj kꞌoj tiꞌj Crist,
porque nneꞌl ticꞌun xjal Kman Dios tucꞌix Tcꞌwaꞌl.
23 Aju xjal icꞌun Tcꞌwaꞌl Dios tuꞌn,
mintiꞌ Kman Dios tucꞌil;
pero alcye jun xjal in tchicꞌbaꞌn ka ax toc ocslal tiꞌj Tcꞌwaꞌl Dios,
ax icx at Kman Dios tucꞌil.
24 Aju yol o cybiye atxix t-xe tnejel,
axwit cyaj ten tuj cyanmiye.
Ka ma cyaj ten ju yol tuj cyanmiye,
aju o cybiye atxix t-xe tnejel,
ax icx che cyjel tene tucꞌil Kman Dios ex tucꞌil Tcꞌwaꞌl.
25 Ex atzun jlu o tzaj tmaꞌn Jesucrist ke tuꞌn ttzaj tkꞌoꞌn aju kchwinklal te jumajx.
26 A jlu in xi ntzꞌibane cyeye tuꞌn tel cynicꞌe cyiꞌj keju cyajbil tuꞌn cysbun cyeye.
27 Aju Xewbaj Xjan ma cycꞌame tuꞌn Jesucrist ax taꞌ tuj cyanmiye,
ex mya il tiꞌj tuꞌn cyxnakꞌtzanjtze tuꞌn juntl;
porque aju Xewbaj Xjan ma cycꞌame tuꞌn Jesucrist,
in che xnakꞌtzanjtze tuꞌn tuj tcyakil,
ax toc tyol ex mya nicꞌal yol te.
Cyjaꞌtzun,
ax che cyaj tene tucꞌil Crist,
ic tzaꞌn ma che xnakꞌtzanjtze tuꞌn.