AJU TOXIN UꞌJ XI TTZꞌIBAN APOSTL JUAN
Jun kꞌolbebl tuꞌn apostl Juan
1
Akine ansyan in xi ntzꞌibane teya Gayo,
axix toc at ncꞌuꞌje tiꞌja.
2 In chin cubsane twitz Dios tiꞌja erman,
aya at ncꞌuꞌje tiꞌja,
cuchiwt tuꞌn tel baꞌn teya tuj tcyakil ex tuꞌn ttena tuj txubtxaj ic tzaꞌn tanmiya baꞌn taꞌ.
3 Porque nimxix in tzalaje tej cyul junjun erman ex tzaj cytxꞌolbaꞌn tiꞌja,
cyma ka in japunxix tuꞌna tuj tcyakil,
porque cucx toc lpeꞌya tiꞌj ju yol axix toc.
4 Atzun mas in chin tzalaje tiꞌj jlu,
oc nbinteye ka oꞌcx in che oc lpeꞌ ke ncꞌwaꞌle tiꞌj ju yol axix toc.
In yolin Juan baꞌn tiꞌj Gayo
5 Erman,
at ncꞌuꞌje tiꞌja,
baꞌnxix in tbinchaꞌna oc in ajbena cye erman,
masque mintiꞌ ojtzkiꞌn cywitz tuꞌna.
6 Tej cyul tzalu tzaj cymaꞌn cywitz ke ocslal tiꞌj ju tcꞌujlalila cyiꞌj.
Baꞌnxix in tbinchaꞌna ka ma txi tkꞌoꞌna chꞌin onbil cye tuj cybe,
porque in che ajben te Dios.
7 Porque ma che ex tuj cybe nok tuꞌnju at cycꞌujlalil tiꞌj Crist,
ex mintiꞌ chꞌin onbil o cycꞌam cye xjal mya ocslal ke.
8 Cyjaꞌtzun,
ilxix tiꞌj tuꞌn cycꞌmonjtz ke jlu kuꞌn ex tuꞌn t-xi kkꞌoꞌn chꞌin onbil cye,
tuꞌntzun kakꞌnan junx cyucꞌil tuꞌn tpacbanjtz ju yol axix toc.
Mya baꞌn tmod Diótrefes
9 Xi ntzꞌibane jun uꞌj cye ocslal,
pero ate Diótrefes taj tuꞌn toc te nejenel cyxol,
ex mintiꞌ in xi tniman kyole.
10 Cyjaꞌtzun,
ka ma chinxe tuꞌn npone cyucꞌile,
cxel nmaꞌne te aju mya baꞌn in tbinchaꞌn,
in yolin toc tuꞌn yol mya baꞌn kiꞌje ex in siꞌmin yol kiꞌje.
Ex mya conporm in cyaj tuꞌn jlu,
ax icx mintiꞌ in che tcꞌmoꞌn ke erman in che pon,
ex mintiꞌ in tkꞌoꞌn permis cye mastl ocslal akeju cyajbil tuꞌn cycꞌmonjtz erman cyuꞌn,
ex in che etz tlajoꞌn cyxol ke ocslal.
11 Aya erman at ncꞌuꞌje tiꞌja,
miꞌn tzꞌoc lpeꞌya tiꞌj ju mya baꞌn,
nok oꞌcx tiꞌj ju baꞌn.
Aju xjal in tbinchaꞌn baꞌn,
te Dios te;
pero aju xjal in tbinchaꞌn mya baꞌn,
mintiꞌ ojtzkiꞌn Dios tuꞌn.
Ate Demetrio jun yecꞌbil baꞌn
12 Cycyakil xjal in che yolin baꞌn tiꞌj Demetrio,
ax icx aju tbinchben in tyecꞌun ka baꞌn tmod,
ax icx keye in ko yoline ax toc tiꞌj,
ex baꞌn tuꞌna aju kyole axix toc.
Jun yol te mancbil
13 Nimcu at tuꞌn t-xi nmaꞌne teya,
pero miꞌn wajbile tuꞌn t-xi ntzꞌibane tuꞌn tint ex tuꞌn plum;
14 porque ximan wuꞌne mya yajxi tuꞌn npone queꞌyil teya;
octzun ko yolil ex cꞌoquel kqueꞌyin kwitz.
15 Cuchiwt tuꞌn ttena tuj txubtxaj.
In xi kꞌolbeꞌna cyuꞌn ke amiw.
Kꞌonxa nkꞌolbeble cye teyle junjun kamiw.