3 Akeye erman at ncꞌuꞌje cyiꞌje,

nimxix o wajbeye tuꞌn t-xi ntzꞌibane cyeye tiꞌj ju colbil ke kcyakil;

pero jaꞌlo ilxix tiꞌj tuꞌn t-xi ntzꞌibane cyeye ex tuꞌn t-xi nkꞌoꞌne cynable tuꞌn toc tililxix cyuꞌne tuꞌn miꞌn tnaj kocslabl;

aju yol ma kocsla,

te jumajx ma tzaj tokxenan Dios ke,

akekoꞌ ocslal koꞌ.

4 Porque at junjun xjal sbul ma tzꞌocx cykꞌon cyib cyxol ocslal;

biꞌx cyaj bant tiꞌj ojtxi tuꞌn tcub cysentens xjal lu,

porque mya nimal Dios ke,

in cyaj cycolin t-xtalbil Kdios,

ex in xi cykꞌon cyib tuꞌn cybinchante tcyakilju cyajbil,

mintiꞌ cyjucꞌbil cyib ex mintiꞌ cyaj tiꞌj tuꞌn cyten tjakꞌ tcawbil Dios oꞌcxte Dios Tajaw Tcyakil,

ex mintiꞌ cyaj tiꞌj tuꞌn cyten tjakꞌ tcawbil Kajaw Jesucrist.

5 Cyjaꞌtzun wajbile tuꞌn ttzaj nnaꞌntle juntl maj cyeye,

masque biꞌmajtl tcyakil jlu cyuꞌne,

e naj ke xjal aj Israel tuꞌn Kman,

akeju mintiꞌ xi cyniman tyol,

ex otok che clet tuꞌn nej tej cyetz tiꞌn tuj txꞌotxꞌ Ejipt.

6 Ax icx jun cꞌloj anjel cyaj cykꞌoꞌn cyoclen ex cyaj cycolin cyex cynajbil,

cyjaꞌtzun presin ke tuꞌn Dios,

ex cꞌaloꞌn ke tuꞌn caden tuj klolj te jumajx,

tzyuꞌn ke tuꞌn tcub cycastiw tuj tkꞌijlalil jwisi tuj jun kꞌij maꞌ toclen.

7 Ic tzaꞌn ke xjal tuj tnam Sodoma ex tuj tnam Gomorra cyucꞌix ke mastl tnam tiꞌjele,

e yaẍin ex xi cykꞌon cyib tuj achbil aju elni tiꞌj cwent,

ex tzaj jun castiw cyibaj,

e naj tuꞌn kꞌakꞌ te jumajx,

tuꞌn cyoc te jun yecꞌbil cye cycyakil xjal,

ic tzaꞌn o baj cyiꞌj jun cꞌloj anjel tzaj jun castiw cyibaj.

8 Icxtzun cyten ke xjal lu,

mer ic tzaꞌn in che witzcyꞌan,

in baj cytzꞌilsaꞌn cychibjal;

cycꞌiꞌ tuꞌn cycub cawin tuꞌn Kman,

ex in che yasun cyiꞌj keju at mas cyoclen tuj cyaꞌj.

9 Pero mya ic tten tmod Miguel aju nejenel cye anjel,

porque tej tkꞌojin Miguel tucꞌil tajaw il e jaw cub tucꞌil yol tiꞌj t-ximlal Moisés,

mintiꞌ oc tnimarin tib Miguel tuꞌn toc ten yasul tiꞌj tajaw il,

ex mintiꞌ cub t-sentens tuꞌn,

nok oꞌcx tma:

Awt Kman mayonte teya.

10 Atzun ke xjal lu in che yolin mya baꞌn tiꞌj ju mintiꞌ ojtzkiꞌn cyuꞌn;

ex atzunju cyachbil ojtzkiꞌnxix cyuꞌn cytzajlenx,

mas in che naj tuꞌn ic tzaꞌn ke jil mintiꞌ cynabl.

11 Becꞌbil cywitz porque in cybinchaꞌn ic tzaꞌn te Caín o tbincha.

Ex ma che el txalpuj ic tzaꞌn te Balaam,

nok tuꞌn tcnet cycambabl;

ex ma che naj tuꞌnju in che kꞌojin tiꞌj Dios ic tzaꞌn te Coré.

12 Ake jlu ic cyten ic tzaꞌn jun tzꞌil cyxole,

in tzaj cychꞌixwiye cyuꞌn oc nnoꞌc nintz waꞌn cyuꞌne;

in che waꞌn cyucꞌile mintiꞌ in tzaj chꞌin cychꞌixwi,

ic cyten jlu ic tzaꞌn ke pastor ẍneꞌl mintiꞌ in che oc cycwentin ke cyẍneꞌl,

ex oꞌcx in che ximan cyiꞌjx tuꞌn toc cycꞌaꞌchan cyib.

Ic cyten jlu ic tzaꞌn muj mintiꞌ aꞌ tuj,

nok jachak in pon kꞌiꞌn tuꞌn cykꞌikꞌ;

ic cyten ic tzaꞌn jun tzeꞌ tzkij mintiꞌ t-xak ex mintiꞌ twitz;

cyimni ke te jumajx ex bakoꞌmaj ke.

13 Ic cyten ic tzaꞌn mar in xtulkꞌin in kꞌojl wen ex in cyaj tkꞌoꞌn swac,

ic tten cybinchben xjal lu ic tzaꞌn t-swaquil mar puro chꞌixbajil cybinchben.

Ic cyten ic tzaꞌn ke cheꞌw in che txalpujeꞌ;

banimaj jun lugar cye xjal lu tuꞌn cyxi kꞌoꞌn tuj klolj puro kxopin te jumajx.

14 O yolin Enoc cyiꞌj xjal lu,

ax Dios tzaj kꞌmante te.

Ate Enoc tal tchman Adán,

tiyjil twukin cꞌloj xjal.

Chi Enoc tma cyjaꞌ:

Lu tzul Kman cyucꞌix ke t-anjel xjan nimxix cyajlal.

15 Tzul Kman kꞌol jwisi cyibaj cycyakil ex tuꞌn tel tuj kꞌanchaꞌl cybinchben xjal mya nimal Dios ke ex mya baꞌn cybinchben,

ex tuꞌn tel tuj kꞌanchaꞌl cyyol ke aj il mya nimal Dios ke,

akeju ma che yolin cyuw tiꞌj Kman,

chi Enoc.

16 Ke xjal lu nok in che wululun tiꞌj ju in baj,

ex mintiꞌ jun baꞌn nneꞌla tuj cywitz,

oꞌcx at cygan tiꞌj cyex cyajbil.

Nim in che yolin tiꞌj cynimbil cyib,

mejor che xmoxin cyiꞌj xjal tuꞌn tcub cyiꞌj xjal cyuꞌn tuꞌntzun cycambante jun tiꞌxti.

17 Atzun cyeye erman at ncꞌuꞌje cyiꞌje,

cynaꞌntze ke yol cyaj cymaꞌn ke apostl te Kajaw Jesucrist ojtxi.

18 Porque che chi apostl o cyma cyeye:

Tuj mancbil tkꞌijlalil che ul ke xmayil in cybinchaꞌn cyex cyajbil mya baꞌn,

che chi apostl.

19 Atzun ke jlu in che cub kꞌonte pabl tib cyxol xjal;

oꞌcx toc cyximbetz tiꞌj ju te twitz txꞌotxꞌ,

mintiꞌ T-xew Dios tuj cyanmi.

20 Atzun cyeye erman at ncꞌuꞌje cyiꞌje,

cycyuwsam cyibe tuj cyocslable,

aju cyocslable xjan,

ex che naꞌne Dios ic tzaꞌn in tmaꞌn Xewbaj Xjan.

21 Ax che tencje tuj tcꞌujlalil Dios;

che ayone tiꞌj Kajaw Jesucrist,

tuꞌn ttzaj kꞌakꞌan tcꞌuꞌj cyiꞌje tuꞌn ttzaj tkꞌoꞌn cychwinklale te jumajx.

22 At junjun in jawjeꞌ cycꞌuꞌj;

cycyuwsame cynabl.

23 Ex cyiꞌmetze junjuntl tuj kꞌakꞌ tuꞌn cyclet;

ex kꞌakꞌanx cycꞌuꞌje cyiꞌj junjuntl,

pero atwit cyxobile,

ex atwit cycwente tiꞌj tuꞌn miꞌn cytzꞌilixe tuꞌn tajbil cychibjal xjal lu;

ic tten jlu ic tzaꞌn jun xbalun puro tzꞌil.

24 Ate Dios at tipumal tuꞌn cyoc cwentine tuꞌn,

tuꞌn miꞌn cycub tzꞌake,

ex at tipumal tuꞌn cyxi kꞌiꞌne tuꞌn,

tuꞌn cytene twitz tuj t-spicꞌumal tucꞌil nim tzalajbil ex mintiꞌ cypaltile.

25 Oꞌcxte Dios at tnabl,

atzun Clol keju;

nimanxwit ju tbi ex tuꞌn tten tchiylal tuj cywitz cycyakil,

ex awt tuꞌn tcawin tibaj tcyakil,

ex tenwt tipumal tibaj tcyakil,

nok tuꞌn Kajaw Jesucrist,

ojtxi ex jaꞌlo ex tuj tcyakil tabkꞌiyil te jumajx.

Icxwitju.