EX KA AJU YOL TZAJ TCHICꞌBAꞌN DIOS TE APOSTL JUAN
Aju in tzaj tyecꞌun Jesucrist
1
Aju tzꞌiban tuj uꞌj lu,
atzunju tzaj tchicꞌbaꞌn Jesucrist.
Tcyakil jlu tzaj tmaꞌn Dios te tuꞌn t-xi tchicꞌbaꞌn cye tmajen tcyakilju at tuꞌn tul naj.
Ex tzaj t-samaꞌn Jesucrist t-anjel,
ex tuꞌnju anjel tzaj tchicꞌbaꞌn weye,
akine Juan,
tmajen Dios kine.
2 Ma txi nchicꞌbaꞌne tcyakilju ma wile,
ex ma chin oque testiw tiꞌj tyol Dios ex tiꞌj ju yol axix toc tzaj tchicꞌbaꞌn Jesucrist.
3 At tzalajbil cye xjal in che schꞌin cyiꞌj ke yol tuj tuꞌjil lu,
ex at tzalajbil cye keju in che bin tiꞌj tyol Dios ex in japun cyuꞌn aju tzꞌiban tuj;
porque aju tkꞌijlalil in lakeꞌx ttzaj.
Xi ttzꞌiban Juan uꞌj lu cye ocslal ateꞌ cyuj wuk tnam
4 Akine Juan in xi ntzꞌibane cyeye,
ocslal keye ateꞌye cyuj wuk tnam tuj txꞌotxꞌ Asia:
Tzajwit kꞌoꞌn xtalbil cyeye ex tuꞌn tkeꞌxix cycꞌuꞌje tuꞌn Dios aju at jaꞌlo ex at ojtxi ex tzul,
ex cyuꞌn ke wuk Xewbaj ateꞌ twitz tkꞌukbil jatum in cawin,
5 ex tuꞌn Jesucrist aju testiw axix toc tyol,
ex aju tnejel jatz ankꞌin cyxol cyimni,
ex ate cawil cyibaj rey ateꞌ twitz txꞌotxꞌ.
Ate Crist cꞌujlal ke,
ex ma ko tzokpet tuꞌn tuj kil tuꞌnju tchcꞌel,
6 ex ma ko oc tkꞌoꞌn te rey ex ma ko oc te pal tuꞌn kajben te Dios aju Tman.
Oꞌcxwit te tuꞌn tnimanjtz ex tuꞌn tcawin tuj tcyakil tabkꞌiyil te jumajx.
Icxwitju.
7 Lu tzul Crist tuj muj.
Cycyakil xjal oc cyilaꞌ,
ax icx keju e oc xayunte te oc cyilaꞌ;
ex cycyakil tnam twitz txꞌotxꞌ che okꞌel tuꞌn cyxobil tuꞌn tlaj.
Cbantel icju.
Icxwitju.
8 Akine atine t-xe tnejel ex cucx chin tele oc tjapun baj mancbil tkꞌijlalil,
ic tzaꞌn ju letr A ex Z,
chi Kman Dios aju at jaꞌlo,
ex at ojtxi,
ex tzul,
ex at tipumal tuꞌn tbant tcyakil tuꞌn.
O ilwaj Jesucrist tuꞌn Juan ic tzaꞌn tuj witzicꞌ
9 Akine Juan cyermaniye,
ex ax yajbil nnicꞌx wuꞌne ic tzaꞌn cyeye nnicꞌx cyuꞌne,
ex junx koclen cyucꞌile tuj tcawbil Dios,
ex at kpasens tuꞌn ticꞌx kuꞌn tuꞌn tipumal Jesucrist.
Presintok kine tuj ju tal txꞌotxꞌ tmijil mar Patmos tbi.
Presintok kine tuꞌn tlaj in xi npacbaꞌne tyol Dios ex tuꞌn tlaj in xi nchicꞌbaꞌne aju yol tiꞌj Jesucrist.
10 Tuj tkꞌij Kajaw cub ten tipumal Xewbaj Xjan wibaje,
ex o nbiye jun tkꞌajkꞌajel maꞌxix wiꞌjxiye,
ic tzaꞌn tkꞌajkꞌajel chun,
11 in tmaꞌn:
[—Akine atine t-xe tnejel ex cucx chin tele oc tjapun baj mancbil tkꞌijlalil,
ic tzaꞌn ju letr A ex Z.]
Aju cꞌoquel tqueꞌyina,
tzꞌiban cuꞌxa tuj jun libro,
ex samanxa cye ocslal ateꞌ tuj wuk tnam tuj txꞌotxꞌ Asia:
Tuj Efeso,
tuj Esmirna,
tuj Pérgamo,
tuj Tiatira,
tuj Sardis,
tuj Filadelfia,
ex tuj Laodicea,
chi weye.
12 Ajtzun nqueꞌyine tuꞌn nlonteye alcyeju in yolintok wucꞌile;
ex tej taj nqueꞌyine,
o wile wuk candil kꞌan pwak cytxꞌotxꞌil,
13 ex cyxol ke wuk candil,
o wile jun ic queꞌyin ic tzaꞌn jun xinak toc t-xbalun ẍjoꞌw,
ex toc jun cꞌalbil ttzi t-xuꞌc,
kꞌan pwak ttxꞌotxꞌil.
14 Aju twiꞌ ex ju ttzmal twiꞌ sak queꞌyin ic tzaꞌn sak lan,
puro sak ic tzaꞌn ttxa cheꞌw;
ke tbakꞌ twitz in che koptzꞌaj ic tzaꞌn tkan kꞌakꞌ.
15 Ex ke tkan in che koptzꞌaj ic tzaꞌn kꞌan cꞌuxbil in koptzꞌaj tocx tuj kꞌakꞌ;
ex ju tkꞌajkꞌajel twiꞌ ic tzaꞌn tkꞌajkꞌajel nimcu aꞌ in jululun.
16 Ex tcub wuk cheꞌw tuj tbankꞌab,
ex nneꞌtz jun spad tuj ttziꞌ,
banin ttziꞌ wen te cycabil pacꞌ;
ex ic queꞌyin twitz ic tzaꞌn t-spicꞌumal kꞌij in koptzꞌajxix wen.
17 Tej nlonteye,
in cub tzꞌake t-xe tkan,
ic tzaꞌn cyimni in oque.
Atzun te cub tkꞌoꞌn tbankꞌab wibaje,
ex tma weye:
—Miꞌn xoba;
akine tnejel ex mancbil,
18 ex itzꞌ kine;
in cyime,
pero jaꞌlo itzꞌ kine te jumajx;
ex tuj nkꞌabe ateꞌ ke tal ja te camic ex te cynajbil cyimni.
19 Tzꞌiban cuꞌxtzuna tcyakilju ma tila,
cyucꞌix keju ateꞌ jaꞌlo ex keju oc tilaꞌya yajxi.
20 Akeju wuk cheꞌw ma tila tuj nbankꞌabe ex keju wuk candil kꞌan pwak cytxꞌotxꞌil,
atzun cyxilen jlu:
Keju wuk cheꞌw,
atzun ke anjel ateꞌ cyxol ocslal cyuj wuk tnam,
ex keju wuk candil,
atzun ke ocslal ateꞌ cyuj wuk tnam.