Aju tyol Crist cye ocslal ateꞌ tuj tnam Efeso
2
Tzꞌibanxa teju anjel at cyxol ocslal tuj tnam Efeso:
Atzun jlu in tmaꞌn aju at wuk cheꞌw tuj tbankꞌab,
aju in bet cyxol ke wuk candil kꞌan pwak cytxꞌotxꞌil:
2 Ojtzkiꞌn cybinchbene wuꞌne,
nim in che akꞌnane ex at cypasense;
ex baꞌn wuꞌne mintiꞌ in cub tuj cywitze ke xjal in cybinchaꞌn mya baꞌn,
ex ma tzicꞌ cywitze cyiꞌj keju nnoꞌc cykꞌon cyib te apostl,
ex mya apostl ke,
ex ma tzꞌel cynicꞌe cyiꞌj,
nicꞌal yol ke.
3 Baꞌn wuꞌne at cypasense ex nok tuꞌn nlaje nimcu ma tzicꞌx cyuꞌne,
ex nim ma che akꞌnane,
ex mintiꞌ ma che sicte.
4 Pero at jun cyile nwitze:
Jaꞌlo mintiꞌtl cycꞌujlalile at ic tzaꞌn nej.
5 Cynaꞌntztzune jatum tzaj xeꞌt cycublen tzꞌake,
tajtz tiꞌj cyanmiye ex cybinchame ic tzaꞌn cybinchaye nej.
Ka miꞌn ma tzꞌajtz tiꞌj cyanmiye,
chin xeꞌltzune cyucꞌile ex cꞌelel wiꞌne cycandile tuj tlugar,
ka mintiꞌ sajtz tiꞌj cyanmiye.
6 Pero at jun baꞌn in cybinchaꞌne:
Nneꞌl cyicꞌune cybinchben ke nicolaíta,
ax icx weye nneꞌl wicꞌune.
7 Alcye at t-ẍcyin,
binx aju in tmaꞌn Xewbaj Xjan cye cycyakil ocslal tuj junjun tnam.
Alcye ma cub tiꞌj mya baꞌn tuꞌn,
cxel nkꞌoꞌne toclen tuꞌn t-xi tloꞌn twitz ju tzeꞌ te chwinklal aju at tucꞌil Dios tuj cyaꞌj.
Aju tyol Crist cye ocslal ateꞌ tuj tnam Esmirna
8 Ex tzꞌibanxa teju anjel at cyxol ocslal tuj tnam Esmirna:
Atzun jlu in tmaꞌn aju at atxix t-xe tnejel ex cucx ctel oc tjapun baj mancbil tkꞌijlalil,
aju o cyim ex o jaw ankꞌin:
9 Ntzkiꞌne cybinchbene,
ex baꞌn wuꞌne aju yajbil cyeye ex aju cymebayile,
pero kꞌinun keye.
Ex baꞌn wuꞌne aju xmaybil cyeye cyuꞌn xjal in cymaꞌn ka judiy xjal ke ex mya judiy xjal ke,
nok oꞌcx cykꞌon cyib te Satanás.
10 Miꞌn che xobe teju yajbil cyeye tzul,
porque at junjun cyxole chꞌix cyocx kꞌoꞌn tuj pres tuꞌn tajaw il,
tuꞌntzun cyoque tuj malbil tuꞌn;
ex tuj laj kꞌij che yajlanjtzele.
Pero che weꞌxixe tuj cyocslable masque ka ma che cyime tuꞌn tlaj,
ex akine chin kꞌolte cychwinklale ic tzaꞌn jun oyaj.
11 Alcye at t-ẍcyin,
binx aju in tmaꞌn Xewbaj Xjan cye cycyakil ocslal tuj junjun tnam.
Alcye ma cub tiꞌj mya baꞌn tuꞌn,
mlay cꞌixbisanjtz tuꞌn tcabin camic.
Aju tyol Crist cye ocslal ateꞌ tuj tnam Pérgamo
12 Ex tzꞌibanxa teju anjel at cyxol ocslal tuj tnam Pérgamo:
Atzun jlu in tmaꞌn aju kꞌiꞌn spad tuꞌn,
banin ttziꞌ wen te cycabil pacꞌ:
13 Ntzkiꞌne cybinchbene,
ex baꞌn wuꞌne jatum najl keye,
atzun najl keye jatum in cawin Satanás,
ex ocslaꞌnx kine cyuꞌne,
ex mintiꞌ cub cyewane ka ocslal keye wiꞌje,
mi tuj tkꞌijlalil tej tten Antipas aju testiw wiꞌje japunxix tuꞌn,
ex cub byoꞌn cyxole jatum najl Satanás.
14 Pero at jun cyile nwitze,
porque at junjun cyxole cucx lepchkeꞌc tiꞌj t-xnakꞌtzbil Balaam.
Xi tkꞌoꞌn Balaam xnakꞌtzbil te Balac tzaꞌn tten tuꞌn cycub tzꞌak aj Israel tuꞌn tuj mya baꞌn,
xi tmaꞌn cye tuꞌn t-xi cychyoꞌn aju in cub kꞌot te oyaj cywitz ke tilbilal,
ex tuꞌn cyyaẍin.
15 Ax icx at junjun cyxole cucx lepchkeꞌc tiꞌj cyxnakꞌtzbil xjal nicolaíta,
aju icꞌun wuꞌne.
16 Cyjaꞌtzun,
tajtz tiꞌj cyanmiye;
ka miꞌn ma tzꞌajtz tiꞌj cyanmiye,
chin xeꞌltzun naje cyucꞌile,
ex chin kꞌojile cyiꞌj tuꞌnju spad tetz tuj ntziꞌye.
17 Alcye at t-ẍcyin,
binx aju in tmaꞌn Xewbaj Xjan cye cycyakil ocslal tuj junjun tnam.
Alcye ma cub tiꞌj mya baꞌn tuꞌn,
cxel nkꞌoꞌne chꞌin twa maná aju ewan,
ex cxel nkꞌoꞌne jun tal abj te,
sak queꞌyin,
tzꞌiban jun acꞌaj tbi twitz,
mi aꞌl jun ojtzkilte,
nok oꞌcx aju oc ccꞌmolte.
Aju tyol Crist cye ocslal ateꞌ tuj tnam Tiatira
18 Ex tzꞌibanxa teju anjel at cyxol ocslal tuj tnam Tiatira:
Atzun jlu in Tmaꞌn Tcꞌwaꞌl Dios aju in koptzꞌaj tbakꞌ twitz ic tzaꞌn tkan kꞌakꞌ,
ex ke tkan in che koptzꞌaj ic tzaꞌn kꞌan cꞌuxbil in koptzꞌaj tocx tuj kꞌakꞌ.
19 Ojtzkiꞌn ke cybinchbene wuꞌne ex baꞌn wuꞌne at cycꞌujlalile,
at cyocslable,
baꞌn cyajbeble,
at cypasense ex mas baꞌn cybinchbene jaꞌlo ic tzaꞌn nej.
20 Pero at jun cyile nwitze,
porque cuyinx cyuꞌne aju xuꞌj Jesabel nnoꞌc tkꞌon tib te pacbal,
in cheꞌx t-xnakꞌtzaꞌn ke nmajene ex in che cub t-sbuꞌn tuꞌn cyyaẍin ex tuꞌn t-xi cychyoꞌn aju oyaj in cub kꞌot cywitz ke tilbilal.
21 Xi nkꞌoꞌne ambil te tuꞌn tajtz tiꞌj tanmi,
pero miꞌn taj tuꞌn tajtz tiꞌj tanmi tuꞌn tcyaj tcolin tuꞌn tyaẍin.
22 Cbeltzun nkꞌoꞌne twitz watbil tuꞌn tcꞌixbisanjtz tuꞌn yabil,
ex keju in che binchan aj pajil tucꞌil che xel nkꞌoꞌne tuj nim yajbil cye,
ka miꞌn sajtz tiꞌj cyanmi tiꞌj ju tbinchben xuꞌj;
23 ex ke tal oc che bel nbyoꞌne.
Ex cꞌeleltzun cynicꞌ cycyakil ocslal tiꞌj tuj junjun tnam ka akine nneꞌlxix nnicꞌe tiꞌj ju at tuj cynabl xjal ex tuj cyanmi,
ex teyle junjun cyeye cxel nkꞌoꞌne t-xel te ic tzaꞌnx ju tbinchben.
24 Pero ke txkantl ateꞌ cyxole tuj tnam Tiatira,
akeju mintiꞌ in che oc lpeꞌ tiꞌj t-xnakꞌtzbil ju xuꞌj lu ex mintiꞌ in che xnakꞌtzan tiꞌj t-xnakꞌtzbil Satanás,
aju nim nabl taj tuꞌn tel knicꞌ tiꞌj ic tzaꞌn in cymaꞌn junjun,
cyetzun cxel nmaꞌne,
mlayx cub nkꞌoꞌne juntl iktz cyibaj;
25 nok oꞌcx,
aju at cyucꞌil,
tuꞌn cytzyunte wen acutzun in chin ule.
26 Alcye ma cub tiꞌj mya baꞌn tuꞌn ex cucx in tbinchaꞌn aju in xi nmaꞌne,
cxel nkꞌoꞌne toclen tuꞌn tcawin cyibaj ke nasyon
27 ic tzaꞌn weye ma tzaj kꞌoꞌn woclene tuꞌn Nmane;
ex ccawil xjal lu cyibaj ke nasyon tuꞌn var cꞌuxbil ex che bel buchj tuꞌn ic tzaꞌn in che cub buchj ke cꞌil.
28 Ex cxel nkꞌoꞌne te aju cheꞌw in jaꞌwil oc in tzaj t-xe cyaꞌj.
29 Alcye at t-ẍcyin,
binx aju in tmaꞌn Xewbaj Xjan cye cycyakil ocslal tuj junjun tnam.