Aju tyol Crist cye ocslal ateꞌ tuj tnam Sardis
3
Ex tzꞌibanxa teju anjel at cyxol ocslal tuj tnam Sardis:
Atzun jlu in tmaꞌn aju at cywukil T-xew Dios tucꞌil ex cyucꞌix ke wuk cheꞌw:
Ojtzkiꞌn ke cybinchbene wuꞌne,
ex baꞌn wuꞌne in kꞌmanjtz cyiꞌje ka itzꞌ keye,
pero cyimni keye.
2 Cynaꞌntztzun cyibe,
ex cycyuwsame aju atx cyucꞌile aju chꞌix tnaj;
porque ma wile ke cybinchbene mya tzꞌaklxix twitz Dios.
3 Cyjaꞌtzun,
cynaꞌntze aju xnakꞌtzbil ma cycꞌame ex ma cybiye;
cycꞌuꞌnxe ex tajtz tiꞌj cyanmiye.
Ka mintiꞌ ma che xkꞌukine,
chin ule ic tzaꞌn elekꞌ,
ex mlayx cybiye alcye or tuꞌn wule cyucꞌile.
4 Pero at junjun cyxole tuj tnam Sardis mintiꞌ ma tzꞌilix tiꞌj cyxbalun;
atzun keju che betel wucꞌile toc cyxbalun sak,
tuj tumelxix jlu porque baꞌn ke.
5 Alcye ma cub tiꞌj mya baꞌn tuꞌn,
atzunju cꞌoquel t-xbalun sak;
ex mlay jatz nkꞌuchine tbi tuj libro te chwinklal,
ex cxel nchicꞌbaꞌne twitz Nmane ex cywitz ke t-anjel ka ax toc ocslal wiꞌje.
6 Alcye at t-ẍcyin,
binx aju in tmaꞌn Xewbaj Xjan cye cycyakil ocslal tuj junjun tnam.
Aju tyol Crist cye ocslal ateꞌ tuj tnam Filadelfia
7 Ex tzꞌibanxa teju anjel at cyxol ocslal tuj tnam Filadelfia:
Atzun jlu in tmaꞌn aju xjan,
ex aju ax toc tyol,
ex kꞌiꞌn tal ja te rey David tuꞌn,
in jaket tlamel ja tuꞌn ex mi jun xjal jacu bant tuꞌn tlamet tuꞌn,
ex in lamet tlamel ja tuꞌn ex mi jun xjal jacu bant tuꞌn tjaket tuꞌn.
8 Ojtzkiꞌn ke cybinchbene wuꞌne.
Lu ma jaket wuꞌne jun ttzi ja cywitze,
ex mi jun xjal jacu bant tuꞌn tlamet tuꞌn;
baꞌn wuꞌne nok chꞌin cyipumale at,
pero ma japun nyole cyuꞌne ex mintiꞌ ma cub cyewane cywitz xjal ka ojtzkiꞌn kine cyuꞌne.
9 Ex keju cykꞌon cyib te Satanás,
keju in cymaꞌn ka judiy xjal ke ex mya judiy xjal ke,
nok oꞌcx in che nicꞌan yol,
che tzajel wiꞌne tuꞌn cycub ẍmejeꞌ cywitze,
ex tuꞌn tel cynicꞌ tiꞌj,
akine ẍin cꞌujlan cyeye.
10 Tuꞌnju ma japun nyole cyuꞌne ex ma tzicꞌx yajbil cyuꞌne,
cyjaꞌtzun che cletele wuꞌne oc tul canun tkꞌijlalil oc cyoc cycyakil xjal tuj joybil cyiꞌj,
akeju najl ke twitz txꞌotxꞌ.
11 Jurat chin ul naje;
aju at cyucꞌile cytzyumxixe wen,
tuꞌntzun miꞌn tel kꞌiꞌn ju oyaj cyeye tuꞌn juntl.
12 Alcye ma cub tiꞌj mya baꞌn tuꞌn,
cꞌoquel nkꞌoꞌne te tkan ja tuj tja Dios,
mlayx tzꞌetz,
axtzun cyjel ten;
ex cꞌoquel ntzꞌibane tbi Dios tiꞌj ex tbi jun tnam aju etzan tuꞌn Dios,
aju acꞌaj Jerusalén tbi,
aju cbeletz tuj cyaꞌj jatum taꞌ Dios,
ax icx cꞌoquel ntzꞌibane tiꞌj aju nbiye acꞌaj.
13 Alcye at t-ẍcyin,
binx aju in tmaꞌn Xewbaj Xjan cye cycyakil ocslal tuj junjun tnam.
Aju tyol Crist cye ocslal ateꞌ tuj tnam Laodicea
14 Ex tzꞌibanxa teju anjel at cyxol ocslal tuj tnam Laodicea:
Tcyakilju o bant tuꞌn Dios t-xe tnejel,
tiꞌj Jesucrist tzaj xeꞌt;
ate Jesucrist junx tiꞌj tyol,
ex atzun jun testiw in japunxix tuꞌn ex axix toc tyol.
Atzun jlu in tmaꞌn Jesucrist:
15 Ojtzkiꞌn ke cybinchbene wuꞌne.
Baꞌn wuꞌne mya cheꞌw ateꞌye ex mya cyak ateꞌye.
Mas baꞌnwtlo nokwit cheꞌw ateꞌye ex ka cyak.
16 Pero tuꞌnju mya cheꞌw ateꞌye ex mya cyak,
nok oꞌcx kꞌulkꞌaj ateꞌye,
cyjaꞌtzun che eletz ntzubane tuj ntziye.
17 Porque in cymaꞌne cyjaꞌ:
kꞌinun koꞌye,
nimxix at keye,
ex mintiꞌ chꞌin atx taj keye,
che chiye,
pero mintiꞌ nneꞌl cynicꞌe tiꞌj ka puro tuj bis ateꞌye,
ex mintiꞌ jun baꞌn at cyeye,
meba keye,
moẍ keye,
ex mintiꞌ cyxbalune.
18 Cyjaꞌtzun cxel nkꞌoꞌne jun cyconseje:
Cylakꞌonxe kꞌan pwak wucꞌile,
saksaꞌmaj tuꞌn kꞌakꞌ,
tuꞌntzun cyoque kꞌinun;
ex cylakꞌonxe sak xbalun wucꞌile tuꞌn toc cyiꞌje tuꞌntzun miꞌn cychꞌixwiye tuꞌnju mintiꞌ cyxbalune toc;
ex cylakꞌonxe tkꞌanbil cywitze wucꞌile tuꞌn tocx cykꞌoꞌne tuj cywitze tuꞌntzun tbanix cywitze.
19 Akeju cꞌujlaꞌn wuꞌne in cheꞌx ncawine ex in che cub tuj castiw wuꞌne.
Cyjaꞌtzun tzꞌoc tililx cyuꞌne ex tajtz tiꞌj cyanmiye.
20 Lu kine atine ttzi ja ex in chin kꞌajtzane;
ka at jun ma binte tkꞌajkꞌajel nwiꞌye ex ma tzꞌocx tjakoꞌn tlamel ja,
chin oquexe tucꞌil,
ex chin waꞌle tucꞌil,
ax icx te cwaꞌl wucꞌile.
21 Alcye ma cub tiꞌj mya baꞌn tuꞌn,
cxel nmaꞌne te tuꞌn tcub keꞌ wucꞌile tuj nkꞌukbile jatum in chin cawine,
ic tzaꞌn weye ma cub tiꞌj mya baꞌn wuꞌne,
ex ma chin cub keꞌye tucꞌil Nmane tuj tkꞌukbil.
22 Alcye at t-ẍcyin,
binx aju in tmaꞌn Xewbaj Xjan cye cycyakil ocslal tuj junjun tnam.