Tzaꞌn tten oc tul juntl maj Kajaw
3
Akeye erman at ncꞌuꞌje cyiꞌje,
atzun tcabin uꞌj jlu in xi ntzꞌibane cyeye;
tuj cycabil uꞌj ma txi nkꞌoꞌne cynable ex ma jaw ncꞌasune cynable tuꞌn cyximane tuj tumelxix,
2 tuꞌntzun ttzaj cynaꞌne aju yol o kꞌmanjtz ojtxi cyuꞌn ke t-sanjel Dios xjan,
ex tuꞌn ttzaj cynaꞌne tmandamyent Kajaw ex Clolke,
aju xi cypacbaꞌn ke apostl e ten cyucꞌile.
3 Tnejel tzꞌelx cynicꞌe tiꞌj jlu:
Tuj mancbil tkꞌijlalil che ul ke xmayil in cybinchaꞌn aju cyex cyajbil,
4 ex in cymaꞌn:
¿Jatumtzun taꞌ tuꞌn tul Crist ic tzaꞌn tzaj tmaꞌn?
Porque atxix tej cycyim ke kxeꞌchel,
ttenx tcyakil ic tzaꞌn t-xe tnejel tej tbant twitz txꞌotxꞌ,
che chi.
5 Cyuꞌnx miꞌn cyaj tuꞌn tel cynicꞌ tiꞌj jlu:
Ojtxi o binchanjtz cyaꞌj tucꞌix txꞌotxꞌ tuꞌn tyol Dios,
atzun jatz jlet txꞌotxꞌ tuj aꞌ ex axtzun tcub txꞌotxꞌ tibaj aꞌ,
6 cyjaꞌtzun cycyakil keju ateꞌ twitz txꞌotxꞌ ojtxi e cyaj mulkꞌaj tjakꞌ aꞌ ex e naj.
7 Atzun te cyaꞌj tucꞌix txꞌotxꞌ akeju ateꞌ jaꞌlo,
tzyuꞌn ke tuꞌnx tyol Dios,
cꞌuꞌn ke tuꞌn cybaj tzꞌeꞌy tuꞌn kꞌakꞌ tuj tkꞌijlalil jwisi ex tuj tkꞌijlalil oc cynaj ke xjal mya nimal Dios ke.
8 Pero erman,
akeye at ncꞌuꞌje cyiꞌje,
tzꞌelx cynicꞌe tiꞌj jlu:
Tuj twitz Kajaw jun kꞌij junx taꞌ ic tzaꞌn jun mil abkꞌi,
ex jun mil abkꞌi junx taꞌ ic tzaꞌn jun kꞌij.
9 Ate Kajaw mlay tzicꞌx tiꞌj tyol aju tziyimaj tuꞌn ic tzaꞌn in cymaꞌn junjun:
Ma tzicꞌx tiꞌj tyol,
che chitzun.
Mya ma tzicꞌx tiꞌj tuꞌn,
nok oꞌcx tuꞌnju at tpasens kiꞌj,
porque miꞌn tajbil Kajaw tuꞌn tnaj jun xjal,
nok oꞌcx tajbil tuꞌn tajtz tiꞌj cyanmi cycyakil.
10 Aju tkꞌijlalil Kajaw minaben tzul,
ic tten ic tzaꞌn jun elekꞌ nnuꞌl konicꞌan;
tujtzun tkꞌijlalil lu cnajel cyaꞌj tucꞌil jun tkꞌajkꞌajel in julin wen,
ex tcyakilju at cbel ulj tuꞌn kꞌakꞌ,
ex ju txꞌotxꞌ tucꞌix cybinchben xjal at twitz cbajel tzꞌeꞌy tuꞌn kꞌakꞌ.
11 Katzun il tiꞌj tuꞌn tcub ulj tcyakil jlu,
¿yajtzun cyeye,
myapelo il tiꞌj tuꞌn cyankꞌine baꞌn,
ex tuꞌn tel cypaꞌn cyibe tiꞌj tcyakil mya baꞌn,
ex tuꞌn cynimane te Dios?
12 Tzꞌoc tililx cyuꞌne tuꞌn tbant cytene ex tuꞌn cyayone tiꞌj tkꞌijlalil oc tul Dios;
porque oc tpon tkꞌijlalil oc tul Dios,
cꞌoquel tkꞌakꞌal cyaꞌj,
cbel ulj,
ex tcyakilju at cbel ulj tuꞌn kꞌakꞌ.
13 Atzun ke in ko ayon tiꞌj acꞌaj cyaꞌj ex acꞌaj txꞌotxꞌ jatum cbinchetel aju tzꞌaklxix cyuꞌn cycyakil,
ic tzaꞌn tzaj ttziyan Dios ke.
14 Cyjaꞌtzun erman,
akeye at ncꞌuꞌje cyiꞌje,
che ayone tiꞌj tcyakil jlu,
tzꞌoc tililx cyuꞌne tuꞌn cytene mintiꞌ chꞌin tzꞌil cyiꞌje oc tul Kajaw,
ex mintiꞌ cypaltile,
ex tuꞌn tten cymojbabl cyibe.
15 Tzꞌelx cynicꞌe tiꞌj jlu:
Tuꞌnju at nim tpasens Kajaw at colbil ke,
ic tzaꞌn tyol kerman Pablo aju at-xix kcꞌuꞌj tiꞌj xi ttzꞌiban cyeye,
ic tzaꞌnx ju tnabl tzaj tkꞌoꞌn Dios te.
16 Tuj tcyakil tuꞌj Pablo in yolin tiꞌj tcyakil jlu;
at junjun yol tuj tuꞌj cyuw tuꞌn tel knicꞌ tiꞌj;
ke xjal mya xnakꞌtzamni ke ex mya cyuw cyten in baj cymeltzꞌun ju yol lu,
ex in baj cymeltzꞌuꞌn mastl yol tzꞌiban tuj Tuꞌjil,
cyjaꞌtzun cyuꞌnx che najel.
17 Cyjaꞌtzun erman,
akeye at ncꞌuꞌje cyiꞌje,
biꞌmaj jlu cyuꞌne,
cycwentin oc cyibe tuꞌn miꞌn cyxi lachꞌoꞌne cyuꞌn xjal mya baꞌn ke ex ma che el tzpet tiꞌj ju yol axix toc;
cycwentin oc cyibe tuꞌn cycyaj tene waꞌlxix tuꞌn miꞌn cycub tzꞌake.
18 Pero che chꞌiyxe tuj t-xtalbil Kajaw ex Clol ke Jesucrist ex tzꞌelx mastl cynicꞌe tiꞌj.
Nimanxwit ju tbi jaꞌlo ex te jumajx.
Icxwitju.