AJU TNEJEL UꞌJ XI TTZꞌIBAN APOSTL PEDRO
Jun kꞌolbebl tuꞌn apostl Pedro
1
Akine Pedro,
apostl kine te Jesucrist,
in xi ntzꞌibane cyeye akeye ma che pone najal cyuj junxitl nasyon,
ex cysipan cyibe tuj txꞌotxꞌ Ponto ex tuj txꞌotxꞌ Galacia ex tuj txꞌotxꞌ Capadocia ex tuj txꞌotxꞌ Asia ex tuj txꞌotxꞌ Bitinia.
2 Ma che jaw scꞌoꞌne tuꞌn Kman Dios tuꞌnju ximamaj tuꞌn ojtxi,
ex paꞌmaj keye tuꞌn Xewbaj Xjan tuꞌn cyajbene oꞌcx te Dios,
ex tuꞌn t-xi cynimane,
ex tuꞌn t-sakix tuj cyanmiye tuꞌn tchcꞌel Crist.
Awt Dios kꞌonte nimxix t-xtalbil cyeye tuꞌn tkeꞌxix cycꞌuꞌje.
Aju kꞌukbabl kcꞌuꞌj mlay naj
3 Nimanxwit tbi Dios aju tman Kajaw Jesucrist,
tuꞌnju nimxix ma tzaj kꞌakꞌan tcꞌuꞌj kiꞌj,
ex ma ko itzꞌj tcabmajiꞌn tuꞌn,
tuꞌn tten jun kꞌukbabl kcꞌuꞌj mlay naj porque o jatz ankꞌin Jesucrist cyxol cyimni.
4 Ax icx tuꞌn kcꞌmonte jun etzbil mlay naj,
ex mlay tzꞌilix,
ex mlay tzkij.
Aju etzbil lu cꞌuꞌn tuꞌn Dios tuj cyaꞌj te cyeye.
5 Ex cwentin keye tuꞌn tipumal Dios jaꞌlo nok tuꞌn cyocslable,
tuꞌntzun cycꞌmonteye jun colbil,
aju banimaj tuꞌn tyecꞌunjtz tuj mancbil tkꞌijlalil.
6 In che tzalaje tiꞌj tcyakil jlu,
masque at maj il tiꞌj tuꞌn ttzaj junxilchak joybil cyiꞌje ex in che bisune jaꞌlo,
pero nok te cab kꞌij jlu.
7 In che yajlanjtze tuꞌn tel nicꞌbaj tiꞌj cyocslable ka ax toc,
porque aju cyocslable mas wiꞌyilxix twitz kꞌan pwak;
masque in naj kꞌan pwak,
pero tuꞌn kꞌakꞌ nneꞌl nicꞌbaj tiꞌj;
octzun tel nicꞌbaj tiꞌj cyocslable oc che jawil nimsaꞌne,
ex ctzajel kꞌoꞌn nim cyoclene ex nimbil cyeye oc tul Jesucrist.
8 Naꞌnx cylonteye Jesucrist,
pero at cycꞌujlalile tiꞌj.
Masque mintiꞌ ma cyile jaꞌlo,
pero ma che ocslane tiꞌj;
cyjaꞌtzun in che tzalaje nimxix,
mintiꞌ juntl tzalajbil icju;
9 ex ma cycꞌame colbil te cyanmiye tuꞌnju at cyocslable.
10 Ke t-sanjel Dios ojtxi e yolin tiꞌj ju xtalbil ma cycꞌame;
e cub ten ximal tiꞌj ju colbil lu ex o cyajbe tuꞌn tel cynicꞌ tiꞌj.
11 O che ximan tiꞌj alcye xjal cꞌoquel te Crist ex alcye tkꞌijlalil tuꞌn tul;
naꞌnxtok tyajlanjtz Crist in che yolin naj tiꞌj tuꞌn tyajlanjtz,
ax icx e yolin naj tiꞌj tuꞌn tjaw nimsaꞌn tbajlenxi yajlaꞌn;
ax T-xew Crist kꞌmante jlu cye,
aju najl tuj cyanmi.
12 Tzaj tchicꞌbaꞌn Dios jlu cye,
mya cye tuꞌn tajben,
nok oꞌcx tuꞌn tajben ke jaꞌlo;
axtzun jlu ma tzaj chicꞌbaꞌn cyeye jaꞌlo cyuꞌn keju in che pacban tiꞌj tkanil colbil,
in che yolin nok tuꞌnju tipumal Xewbaj Xjan tzaj samaꞌn tuj cyaꞌj.
Ex ke anjel cyajbil tuꞌn tel cynicꞌ tiꞌj tcyakil jlu.
Ma ko txconjtz tuꞌn Dios tuꞌn kten mintiꞌ kpaltil
13 Cyjaꞌtzun,
che tencuye ximal tiꞌj alcye tuꞌn cybinchanteye.
Tenx cynable,
ex keꞌcxix cycꞌuꞌje tiꞌj t-xtalbil Dios aju ctzajel kꞌoꞌn cyeye oc tul Jesucrist.
14 Ma che oque tcꞌwaꞌl Dios,
cyjaꞌtzun cynimanxe tyol;
ex miꞌn txi cykꞌoꞌntle ambil teju cyajbile mya baꞌn,
ic tzaꞌn o cybinchaye ojtxi tej naꞌnxtok tel cynicꞌe tiꞌj tyol Dios.
15 Ic tzaꞌn te Dios xjante,
aju txcon cyeye,
icxtzun cyeye cypaꞌmil cyibe tiꞌj tcyakil mya baꞌn,
tuꞌntzun cyoque xjan;
16 porque tzꞌibamaj ju yol lu tuj Tuꞌjil:
Che ocxe xjan,
porque weye xjan kine,
chi Dios.
17 Katzun nnoꞌc cykꞌoꞌne Dios te Cymane,
che xobtzune twitz tcyakil kꞌij oc cytene twitz txꞌotxꞌ,
porque ate Dios in che oc cycyakil xjal tuj xjel tuꞌn,
teyle junjun ic tzaꞌnxju takꞌunben,
ex mintiꞌ nnoꞌc tqueꞌyin Dios ti t-xilen xjal.
18 Baꞌn cyuꞌne ma che colpete tuꞌn miꞌn cyankꞌintle tuj ju nokx gan,
porque aju xnakꞌtzbil cycꞌame te cymane nokx gan;
ex baꞌn cyuꞌne mya tuꞌn kꞌan pwak ex mya tuꞌn sak pwak ma che colpete,
porque in che naj jlu.
19 Nok oꞌcx tuꞌn tchcꞌel Crist ma che colpete,
aju wiꞌyilxix;
ic tten Crist ic tzaꞌn jun tal ẍneꞌl mintiꞌ tpaltil ex mintiꞌ ttzꞌilil.
20 Ximamajtl tuꞌn Dios atxix naꞌnxtok tbant twitz txꞌotxꞌ tuꞌn ticꞌx tuꞌn Crist,
pero matzun jaꞌlo tuj mancbil tkꞌijlalil ma tzaj yecꞌun Crist tuꞌn cycolpete.
21 Ex nok tuꞌn Crist ma che ocslane tiꞌj Dios;
ate Crist jatz ankꞌin tuꞌn Dios cyxol cyimni,
ex jaw nimsaꞌn tuꞌn Dios;
cyjaꞌtzun tten at cyocslable tiꞌj Dios ex ma keꞌ cycꞌuꞌje tiꞌj.
22 Tuꞌn takꞌunben Xewbaj Xjan ma txi cynimane ju yol axix toc,
cyjaꞌtzun ma txꞌjet tuj cyanmiye,
ex in cycꞌujlaꞌne ke erman,
ex ax toc cyuꞌne,
cyjaꞌtzun cycꞌujlam cyibe cyxolxe tuꞌn tcyakil cycꞌuꞌje ex tuꞌn tcyakil cyipune.
23 Ma che itzꞌje tcabmajiꞌn;
pero mya tiꞌj jun xjal cnajel ma che el itzꞌje,
nok oꞌcx ma che el itzꞌje tiꞌj jun iyaj mlay naj;
aju iyaj lu atzun tyol Diosju,
itzꞌ ex cucx tten te jumajx.
24 Porque in tmaꞌn tuj Tuꞌjil:
Cycyakil xjal ic cyten ic tzaꞌn cꞌul,
ex tcyakil cyoclen xjal ic tten ic tzaꞌn t-xmacal cꞌul.
Ate cꞌul in tzkij ex nneꞌl tzꞌak t-xmacal;
25 atzunju tyol Kman cucx tten te jumajx,
chi tuj Tuꞌjil.
Ex atzunju yol lu ma pacbanjtz cyeye tej cybinteye tkanil colbil.