2
Cykꞌoncjtzune tcyakil mya baꞌn ex tcyakil sbubl;
miꞌn che oque te xmletzꞌ,
miꞌn tzaj tloꞌch cycꞌuꞌje,
miꞌn che siꞌmine yol cyiꞌj xjal.
2 Che ocxe ic tzaꞌn ke tal neꞌ cꞌitzke che itzꞌj in tzaj el cycꞌuꞌj tiꞌj cychꞌuꞌ;
icxwittzun cyeye tzajwit el cycꞌuꞌje tiꞌj tyol Dios mya smoꞌn twitz,
tuꞌn tajben te cyanmiye tuꞌntzun cychꞌiye ex tuꞌn cyclete.
3 Porque ma tzꞌel cynicꞌe tiꞌj ka tbanilxix Kajaw.
Ate Crist jun abj itzꞌ ex kꞌol chwinklal
4 Che lakꞌetze tucꞌil Kajaw,
porque ate Kajaw jun abj itzꞌ ex kꞌol chwinklal.
Ax toc el icꞌun cyuꞌn xjal,
atzun tuj twitz Dios scꞌoꞌmaj ex wiꞌyilxix.
5 Ax icx cyeye ma che oque ic tzaꞌn abj itzꞌ;
cyjaꞌtzun,
cymojban cyibe tucꞌil Crist tuꞌn cyjaw binchaꞌne tuꞌn cyoque te jun tja Dios mintiꞌ kꞌanchaꞌl,
ex tuꞌn cyoque te pal oꞌcx tuꞌn cyajbene te Dios,
tuꞌntzun t-xi cykꞌoꞌne oyaj te Dios nok tuꞌn Jesucrist.
Aju oyaj lu mintiꞌ kꞌanchaꞌl ex in xi tcꞌmoꞌn Dios.
6 Porque atzun jlu in tmaꞌn tuj Tuꞌjil:
Lu cbel nkꞌoꞌne jun abj tuj tnam Sión,
aju abj maꞌxix te scyini,
scꞌoꞌmaj ex wiꞌyilxix;
alcye ma tzꞌocslan tiꞌj mlay tzaj tchꞌixwi,
chi tuj Tuꞌjil.
7 Aju abj lu wiꞌyilxix te cyeye,
akeye ma che ocslane;
atzun cye keju mintiꞌ in che ocslan,
mya wiꞌyilxix,
porque in tmaꞌn tuj Tuꞌjil:
Aju abj el cyicꞌun ke binchal ja,
ma tzꞌoc te scyini te simyent,
chi tuj Tuꞌjil.
8 Ax icx in tmaꞌn:
Ma tzꞌoc te jun abj tuꞌn cyjaw tolj xjal tiꞌj,
ex ma tzꞌoc te jun abj tuꞌn cyjaw tzꞌak xjal tiꞌj,
chi tuj Tuꞌjil.
Porque in che jaw tolj tiꞌj ju yol tuꞌnju mintiꞌ in xi cyniman;
porque cyajnix bant jlu tuꞌn Dios ojtxi.
Ke xjal etzan tuꞌn Dios
9 Akeye junx cyiyjile,
scꞌoꞌmaj keye,
ex ma che oque te rey ex pal,
ma che oque te jun tnam oꞌcx te Dios tuꞌn cyajbene,
ma che oque te jun tnam tecuxix Dios tuꞌntzun t-xi cychicꞌbaꞌne tbinchben Dios nim tipumal;
ate Dios txcon cyeye tuꞌn cyetze tuj klolj ex tuꞌn cytene tuj t-spicꞌumal tbanilxix.
10 Ojtxi mya jun tnam keye,
atzun jaꞌlo ma che oque te jun tnam te Dios;
ojtxi mintiꞌ tzaj kꞌakꞌan tcꞌuꞌj Dios cyiꞌje,
atzun jaꞌlo ma tzaj kꞌakꞌan tcꞌuꞌj cyiꞌje.
Tuꞌn kten oꞌcx tuꞌn kajben te Dios
11 Akeye erman at ncꞌuꞌje cyiꞌje,
chin cubsale cywitze porque ic tzaꞌn stranjer xjal keye ex ic tzaꞌn betin xjal keye tzalu twitz txꞌotxꞌ,
miꞌn txi cynimane aju tajbil cychibjale,
porque atzun jlu in kꞌojin tiꞌj cyanmiye.
12 Che ankꞌine baꞌn cyxol txkantl xjal mintiꞌ ojtzkiꞌn Dios cyuꞌn,
tuꞌntzun miꞌn cyyolintl cyiꞌje ka mya baꞌn keye,
nok oꞌcx tuꞌn cyqueꞌyinte cyakꞌunbene baꞌn ex tuꞌn tjaw cynimsaꞌn tbi Dios oc ttzaj tkꞌoꞌn Dios t-xtalbil cye.
13 Cynimanxe tcyakil cawbil tcub cyxol xjal,
tuꞌnju ocslal keye tiꞌj Kajaw;
cynimanxe president,
porque atzun in cawin cyibaj cycyakil;
14 ax icx cynimanxe ke gobernador,
porque in che tzaj samaꞌn tuꞌn president tuꞌn tcub cykꞌoꞌn cycastiw ke xjal binchal mya baꞌn,
ax icx tuꞌn cyyolin baꞌn cyiꞌj ke xjal baꞌn cybinchben.
15 Porque atzun tajbil Dios jlu,
tuꞌn cybinchanteye aju baꞌn,
cyjaꞌtzun tuꞌn tmaket cytziꞌ ke xjal mintiꞌ chꞌin baꞌn cyuꞌn ex mintiꞌ cynabl.
16 Tzokpiꞌn keye,
pero mya tuꞌnju tzokpiꞌn keye tuꞌn cybinchanteye aju mya baꞌn,
nok oꞌcx tuꞌn cyoque te tmajen Dios.
17 Che nimane cye cycyakil.
Cycꞌujlame ke erman.
Che xobe twitz Dios.
Che nimane te president.
Tuꞌn ticꞌx kuꞌn ic tzaꞌn te Crist icꞌx tuꞌn
18 Akeye majen,
atwit tchi cypatrone tuj cywitze tuꞌntzun cytene tjakꞌ cycawbil;
mya nok oꞌcx tuꞌn t-xi cynimane ke patrón baꞌn ke ex baꞌn cymod,
ax icx tuꞌn t-xi cynimane ke patrón mya baꞌn cymod.
19 Porque baꞌn jlu tuj twitz Dios,
ka at jun erman in yajlanjtz nokx gan ex nnicꞌx tuꞌn tuꞌn tlaj taj tuꞌn tniman te Dios.
20 Ka ma che oc bjuꞌne tuꞌn tlaj il otok cybinchaye,
¿atpelo nimbil cyeye ka ma tzicꞌx cyuꞌne?
Pero ka ma che yajlanjtze tuꞌn tlaj ju baꞌn in cybinchaꞌne,
ex ka ma tzꞌicx cyuꞌne,
atzun jlu baꞌn nneꞌla tuj twitz Dios.
21 Porque ma che txconjtze tuꞌn Dios tuꞌn ticꞌx cyuꞌne;
porque icx te Crist icꞌx tuꞌn tuꞌn cylaje,
cyaj tyecꞌun cyeye tuꞌn cyoc lpeꞌye tiꞌj.
22 Mintiꞌ jun il o tbincha Crist,
ex mintiꞌ o tma jun yol te sbubl.
23 Tej toc yasoꞌn Crist cyuꞌn xjal,
mintiꞌ aj tmojtzaꞌn yasbil.
Tej tyajlanjtz cyuꞌn,
mintiꞌ xi tmaꞌn yol te xobtzabl cye,
nok oꞌcx xi tkꞌon tib tuj tcwent Dios aju binchalte tiꞌj xtis tuj tumelxix.
24 Ax Jesucrist xi ikante kil tej tjaw kꞌoꞌn t-ximlal twitz crus,
tuꞌntzun koc ic tzaꞌn cyimni tuꞌn miꞌn kbinchan il,
ex tuꞌn kankꞌin tuꞌn kbinchante aju tzꞌaklxix.
Tuꞌn tcꞌixblen Crist ma che banixe.
25 Porque nej ic cytene ic tzaꞌn ke ẍneꞌl tzpetni ke;
atzun jaꞌlo ma che ul meltzꞌaje tucꞌil Crist aju Pastoril cyeye ex Cwentil cyanmiye.