Tzaꞌn tten tuꞌn cyankꞌin keju ma che mojeꞌ
3
Ax icx cyeye akeye xuꞌj,
cynimanx cychmile tuꞌntzun tocslan cychmile ka mya ocslal cychmile tiꞌj tyol Dios,
mya tuꞌn yol tuꞌn tocslan,
nok oꞌcx tuꞌnju cymodiye baꞌn.
2 Jaculo tzꞌocslan cychmile oc tqueꞌyinte mintiꞌ jun cyximbetze mya baꞌn ex baꞌn che nimane te.
3 Aju cyyecꞌbil cyibe myawt aju kꞌanchaꞌl tuꞌn tbaj cybinchaꞌne ttzmal cywiꞌye ax tuꞌn toc baj cywitz xjal tiꞌj,
ex ka tuꞌn toc cykꞌoꞌne ganch kꞌan pwak cyiꞌje,
ex ka tuꞌn toc cykꞌoꞌne cyxbalune wiꞌyilxix;
4 nok oꞌcx tuꞌn cyyecꞌunteye aju at tuj cyanmiye,
aju tbanilxix,
tuꞌn tten cyanmiye mans ex txulch,
atzun jlu tbanilxix ex mlay naj,
ex atzun jlu wiꞌyilxix tuj twitz Dios.
5 Cyjaꞌtzun tten o cyyecꞌu cyib ke xuꞌj akeju in che ajben te Dios ojtxi;
kꞌukl cycꞌuꞌj tiꞌj Dios,
ex niman cychmil cyuꞌn.
6 Ic tzaꞌn te Sara xi tniman tyol Abraham,
ex oc t-xi yolin tucꞌil,
tat,
chi Sara.
Ka ma cybinchaye baꞌn ex ka mintiꞌ ma che xobe,
che oquele ic tzaꞌn te Sara.
7 Ax icx cyeye akeye chmilbaj,
atwit cynable tuꞌn cynajane cyucꞌil cyxuꞌjile,
porque chꞌin cye xuꞌj cycꞌuꞌj;
ex cykꞌonxe nimbil cye,
porque ma cycꞌam cychwinklal junx cyucꞌile tuꞌn t-xtalbil Dios.
Tenxwit cynable tuꞌn cymojeꞌye,
tuꞌntzun tcꞌmet cynaꞌj Diose.
Keju nnicꞌx cyuꞌn tuꞌn tlaj in cybinchaꞌn baꞌn
8 Pero tuꞌn tcyakil jlu,
junxwit cynable cycyakile,
kꞌakꞌanx cycꞌuꞌje tiꞌj juntl,
cycꞌujlam cyibe porque cyitzꞌin cyibe,
ttzaj tzꞌeꞌy cycꞌuꞌje tiꞌj juntl,
che oque mans.
9 Ka at jun mya baꞌn ma binchanjtz cyiꞌje cyuꞌn xjal,
miꞌn tzꞌaj cykꞌoꞌne t-xel mya baꞌn;
ka ma che oc yasoꞌne cyuꞌn xjal,
miꞌn tzꞌaj cymojtzaꞌne yasbil;
atzun jlu cybinchame cye:
Che yoline baꞌn cyiꞌj,
porque baꞌn cyuꞌne ma che txconjtze tuꞌn cycꞌmonteye tcyꞌiwbil Dios.
10 Porque in tmaꞌn tuj Tuꞌjil:
Alcye taj tuꞌn ttzalaj tuj tchwinklal ex tuꞌn tten tuj txubtxaj,
il tiꞌj tuꞌn tjacꞌunte ttziꞌ tuꞌn miꞌn tyolin mya baꞌn,
ex tuꞌn tjacꞌunte ttziꞌ tuꞌn miꞌn tnicꞌan yol.
11 Paꞌmil tib tiꞌj ju mya baꞌn,
ex bincham ju baꞌn;
tzꞌoc tililx tuꞌn tuꞌn cucx tuꞌn tten baꞌn cyucꞌil mastl.
12 Porque cwentin ke xjal tzꞌaklxix tuꞌn Kman,
ex in tzaj tbiꞌn cynaꞌj Dios.
Atzun keju in cybinchaꞌn mya baꞌn,
in kꞌojl Kman cyiꞌj,
chi tuj Tuꞌjil.
13 ¿Atpelo jun jacu tzꞌoc binchante mya baꞌn cyiꞌje ka cucx in cybinchaꞌne aju baꞌn?
14 Pero ka at chꞌin ma tzicꞌx cyuꞌne tuꞌn tlaj ju in cybinchaꞌne baꞌn,
at tzalajbil cyeye.
Cyjaꞌtzun miꞌn che xobe cywitz xjal,
ex miꞌn naj cynable,
15 nok oꞌcx tuꞌn cynimane te Crist tuj cyanmiye,
porque atzun Cyajawe.
Nok banin cytene tuꞌn t-xi cytzakꞌweꞌne ke xjal,
akeju in che kanin jun rasón cyeye tikuꞌn ma keꞌ cycꞌuꞌje tiꞌj Crist,
cheba cymanxe cye ex atwit cychi tuj cywitze.
16 Cybinchame aju baꞌn ic tzaꞌnx in tmaꞌn cyanmiye,
tuꞌntzun ttzaj cychꞌixwi keju in che yasun cyiꞌje tuꞌn tlaj ju baꞌn in cybinchaꞌne ex tuꞌn tlaj ocslal keye tiꞌj Crist,
in che yolin cyiꞌje ka mya baꞌn keye.
17 Porque ka ic tajbil Dios,
mas baꞌn tuꞌn ticꞌx cyuꞌne tuꞌn tlaj ju baꞌn in cybinchaꞌne,
twitzju tuꞌn ticꞌx cyuꞌne tuꞌn tlaj ju mya baꞌn.
18 Porque icx te Crist icꞌx tuꞌn nok junx maj,
cyim tuꞌn tchjet kil;
ate Crist tzꞌaklxix,
pero cyim tuꞌn klaj mya tzꞌaklxix koꞌ,
tuꞌn kpon tiꞌn tucꞌil Dios.
Ax toc,
cub byoꞌn Jesús ex cyim t-ximlal,
pero jatz ankꞌin tuꞌn tipumal Xewbaj Xjan.
19 Ex ax tanmi Crist xi aj pacbal cye anmi lamoꞌn ke.
20 Tuj tkꞌijlalil ojtxi mintiꞌ xi cyniman xjal lu tyol Dios;
nim o ayon Dios cyiꞌj ex at tpasens tuj tkꞌijlalil Noé tej matok in bant aju matij barc.
Xi tkꞌoꞌn Dios ambil cye,
pero mya nim xjal e clet tuj barc,
nok wajxak e clet tuj aꞌ.
21 Aju aꞌ lu o yecꞌunjtz naj te jun yecꞌbil tiꞌj ju byabl,
aju ma ko clet tuꞌn jaꞌlo.
Mintiꞌ in tmaꞌn jlu ka tuꞌn byabl nneꞌl ttzꞌilil kximlal,
nok oꞌcx te jun yecꞌbil tiꞌj ju kyol ma txi ktziyan te Dios,
tuꞌn kankꞌin tuj tumelxix.
Ate jlu in tzaj kꞌinte colbil ke tuꞌnju o jatz ankꞌin Jesucrist cyxol cyimni.
22 Ate Jesucrist o japun tuj cyaꞌj,
tcub ttxlaj Dios tuj bankꞌabaj;
ke anjel ex keju at cyoclen,
ex keju at cyipumal ateꞌ tjakꞌ tcawbil Jesucrist.