Tuꞌn kajben ic tzaꞌnx ju koclen ma tzaj tkꞌoꞌn Dios
4
O tzicꞌx tuꞌn Crist tuj t-ximlal ex cyim [tuꞌn tchjet kil],
cyjaꞌtzun icx cyeye tuꞌn tten cynable ic tzaꞌn tnabl Crist;
porque aju xjal otok tzicꞌx tuꞌn tuj t-ximlal mintiꞌtl taj tiꞌj il.
2 Cyjaꞌtzun,
jteꞌ kꞌijtl tuꞌn cytene twitz txꞌotxꞌ,
oꞌcx che ximane tiꞌj tuꞌn tbant tajbil Dios cyuꞌne,
ex mya tuꞌn cyximane tiꞌj aju in pon cycꞌuꞌj xjal tiꞌj.
3 Acux aju o cybinchaye ojtxi,
o cybinchaye aju in che tzalaj txkantl xjal tiꞌj,
akeju mintiꞌ ojtzkiꞌn Dios cyuꞌn.
Ojtxi mintiꞌ cyjucꞌbil cyibe,
in pon cycꞌuꞌje tiꞌj mya baꞌn,
cꞌal kꞌeꞌn keye,
in che achine tuj ninkꞌij,
nnoꞌc cꞌaj kꞌeꞌn cyuꞌne,
in che cꞌulune cywitz ke tilbilal,
icꞌbilxix ke.
4 Ke txkantl xjal in che labin cyiꞌje tuꞌnju mya mojl in che bete cyucꞌil,
ex mya cytzokpin cyibe cyucꞌil ic tzaꞌn cye mintiꞌ cyjucꞌbil cyib,
cyjaꞌtzun in che yolin mya baꞌn cyiꞌje.
5 Pero ke xjal lu oc cykꞌaꞌ tajlal twitz Dios aju banin tten tuꞌn cyoc xjal tuj xjel tuꞌn,
tzaꞌnx ke xjal itzꞌ icx ke xjal o che cyim.
6 Porque tuꞌn tlaj jlu o pacbanjtz tkanil colbil cye keju o che cyim,
tuꞌntzun tankꞌin cyanmi ic tzaꞌn te Dios itzꞌte,
masque cub cysentens tuꞌn cycyim ic tzaꞌn cycyakil xjal.
7 In lakꞌex ttzaj tkꞌijlalil tuꞌn tbaj tcyakil;
tenxtzun cynable ex che xkꞌukine tuj naꞌj Dios.
8 Pero aju mas il tiꞌj,
tuꞌn ttenxix cycꞌujlalile cyxolxe,
porque ka at cycꞌujlalile,
cnajsetel nimcu cyil txkantl cyuꞌne.
9 Cykꞌonxe posad cyxolxe ex miꞌn tzaj jun cyyole tiꞌj.
10 Aju toclen teyle junjun ma tcꞌam tzꞌajbenxwit tuꞌn cye txkantl,
tuꞌn cyoc te jun baꞌn mayordom tiꞌj ju cyoclen junxilchak tten ma cycꞌam tuꞌn Dios.
11 Ka at jun in pacban,
yolin ic tzaꞌn in tmaꞌn tyol Dios;
ka at jun in ajben cye mastl,
tzꞌajbenx tuꞌn tipumal Dios,
tuꞌntzun tjaw nimsaꞌn tbi Dios tiꞌj tcyakil nok tuꞌn Jesucrist.
Awt Dios tuꞌn tjaw nimsaꞌn tbi ex tuꞌn tcawin tuj tcyakil tabkꞌiyil te jumajx.
Icxwitju.
Tuꞌn ticꞌx yajbil kuꞌn porque ocslal koꞌ
12 Erman,
akeye at ncꞌuꞌje cyiꞌje,
miꞌn che jaw secꞌpaje tuꞌn tlaj joybil cyiꞌje in tzaj ic tzaꞌn kꞌakꞌ tuꞌn tel nicꞌbaj cyiꞌje;
miꞌn che ximane tiꞌj ka oꞌcx cyeye in tzaj joybil cyiꞌje.
13 Nok oꞌcx che tzalajxe tuꞌn ticꞌx cyuꞌne junx tucꞌil Crist,
tuꞌntzun cytzalaje nimxix oc tul Crist in koptzꞌaj wen tuj tajwalil.
14 Ka ma che oc yasoꞌne tuꞌn tlaj ocslal keye tiꞌj Crist at tzalajbil cyeye porque tcub T-xew Dios cyibaje,
aju Xewbaj tbanilxix.
[Ax toc nnoꞌc yasoꞌn Crist cyuꞌn xjal,
atzun cyeye in jaw cynimsaꞌne tbi.]
15 Cyjaꞌtzun ka at jun cyeye ma tzicꞌx tuꞌn,
pero cuchiwt mya tuꞌn tlaj in biyun,
ex mya tuꞌn tlaj in elkꞌan,
ex mya tuꞌn tlaj in binchan mya baꞌn,
ex mya tuꞌnju nnoꞌcx tlamon tib tiꞌj tyol juntl.
16 Pero ka at jun ma tzicꞌx tuꞌn tuꞌn tlaj ju ocslal tiꞌj Crist,
miꞌn tzaj tchꞌixwi,
nok oꞌcx tuꞌn t-xi tkꞌoꞌn chjonte te Dios tuꞌnju ocslal tiꞌj Crist.
17 Porque ma pon tkꞌijlalil tuꞌn t-xeꞌt castiw cyxol ke tcꞌwaꞌl Dios.
Katzun nej ma xeꞌt castiw kxol,
¿jatumtzun che pol keju mintiꞌ in xi cyniman tkanil colbil in tzaj tkꞌoꞌn Dios?
18 Ex ka peni ma clet jun xjal tzꞌaklxix,
¿jatumtzun cpol ju xjal mya baꞌn ex ju xjal aj il?
19 Cyjaꞌtzun,
ka ma tzicꞌx cyuꞌne ic tzaꞌn tajbil Dios,
cyokxeꞌnanx cyanmiye te Dios aju Chꞌisal cyeye,
aju baꞌn tuꞌn tkeꞌ kcꞌuꞌj tiꞌj,
ex cybinchame aju baꞌn.