2 Akeye wermaniye,

ka ma tzaj junxilchak joybil cyiꞌje,

tzꞌocwit te nim tzalajbil cyeye.

3 Porque baꞌn cyuꞌne,

ka ma che malonjtze tuj cyocslable,

ctel mastl cypasense tuꞌn ticꞌx cyuꞌne.

4 Tzꞌoc tililx cyuꞌne tuꞌn tten cypasense cabalxix,

tuꞌn toc cynable ex tuꞌn cytene mintiꞌ cypaltile,

ex mintiꞌ jun atx taj cyeye.

5 Ka at jun cyxole atx taj tnabl,

kaninx tnabl te Dios,

ex ctzajel tkꞌoꞌn Dios tnabl;

porque ate Dios nimxix in tzaj tkꞌoꞌn cye cycyakil ex mintiꞌ in ilin.

6 Pero keꞌxix tcꞌuꞌj xjal tiꞌj Dios oc t-xi tkanin,

ex miꞌn jawjeꞌ tcꞌuꞌj;

porque aju xjal mintiꞌ in keꞌ tcꞌuꞌj tiꞌj Dios,

ic tten ic tzaꞌn twitz mar in yucch tuꞌn cykꞌikꞌ ex in xtulkꞌin.

7 Ka at jun xjal mintiꞌ in keꞌ tcꞌuꞌj tiꞌj Dios,

tzꞌelx tnicꞌ tiꞌj,

mintiꞌ jun tiꞌxti ctzajel kꞌoꞌn te tuꞌn Kajaw.

8 Jun xjal cabe tcꞌuꞌj mya segur taꞌ tuj tcyakil tbe.

9 Aju erman tal yaj,

tzalajx tuꞌnju cjawil nimsaꞌn tuꞌn Dios;

10 pero aju kꞌinun,

tzalajx tiꞌj tuꞌn toc te chꞌin;

porque cnajel te kꞌinun ic tzaꞌn t-xmacal cꞌul.

11 Porque oc tjaꞌwil kꞌij tucꞌix nim tcyakal,

biꞌx in tzkij cꞌul ex nneꞌl tzꞌak t-xmacal,

aju queꞌyin tbanilxix,

cnajel.

Icxtzun te kꞌinunju,

cucx toc tilil tuꞌn tiꞌj tnegosyo,

pero oc cnajel.

12 At tzalajbil teju xjal ka ma tzicꞌx tuꞌn oc toc tuj joybil tiꞌj;

porque ka ma tzicꞌx tuꞌn,

oc tcꞌmaꞌ jun oyaj tuꞌn tten tchwinklal,

aju tzaj tmaꞌn Dios tuꞌn ttzaj tkꞌoꞌn cye keju in che cꞌujlan te.

13 Ka at jun xjal ma tzꞌoc tuj joybil tiꞌj tuꞌn tbinchante aju mya baꞌn,

miꞌn tma ka tuꞌn Dios ma tzꞌoc tuj joybil tiꞌj;

porque mlay bant tuꞌn toc Dios tuj joybil tiꞌj tuꞌn tbinchante aju mya baꞌn,

ex mi jun nnoꞌc tuj joybil tiꞌj tuꞌn Dios.

14 Pero teyle junjun nnoꞌc tuj joybil tiꞌj,

ax tnabl in xmoxin te tuꞌn tpon tcꞌuꞌj tiꞌj ju mya baꞌn,

ax tnabl in sbunte te.

15 Nej in pon tcꞌuꞌj tiꞌj ju mya baꞌn;

octzun tchꞌiy ju mya baꞌn tuj tanmi,

in tbinchaꞌn il,

octzun tchꞌiy il,

in tzajtzun camic tuꞌn il.

16 Akeye erman at ncꞌuꞌje cyiꞌje,

miꞌn che tzpete tiꞌj jlu.

17 Tcyakil oyaj baꞌn ex tcyakil oyaj tbanilxix,

atzun in cuꞌtz tuj cyaꞌj,

atzun in tzaj tucꞌil Dios aju binchal cye spicꞌun ateꞌ twitz cyaꞌj.

Mintiꞌ in tchꞌexpuꞌn Dios tnabl,

ex mya ic tten Dios ic tzaꞌn jun xlecun in bet.

18 Tuꞌnxju tajbil ma ko oc te tcꞌwaꞌl nok tuꞌn tyol axix toc,

tuꞌntzun koc tnejel ocslal cyxol ke tchꞌisben,

ic tzaꞌn tnejel twitz awal.

19 Cyjaꞌtzun erman akeye at ncꞌuꞌje cyiꞌje,

cycyakile baꞌn tuꞌn t-xi cybiꞌn naje ju yol,

pero mya jurat naj tuꞌn cyyoline,

ex mya jurat naj tuꞌn cyjaw cyakpaje.

20 Porque aju xjal jurat in jaw kꞌojl,

mintiꞌ in tbinchaꞌn aju tzꞌaklxix tuj twitz Dios.

21 Cyjaꞌtzun,

cykꞌoncje tcyakil ttzꞌilil tucꞌix ju mya baꞌn ma chmet-xix,

ex che oque mans,

tuꞌn cycꞌmonteye ju yol ma cuꞌx awaꞌn tuj cyanmiye;

porque at tipumal ju yol lu tuꞌn tclet cyanmiye.

22 Cynimanxe ju yol,

ex mya nok oꞌcx tuꞌn cybinteye,

porque ka oꞌcx in xi cybiꞌne ex mintiꞌ in japun cyuꞌne,

in cysbun cyibe.

23 Ka at jun oꞌcx in xi tbiꞌn ju yol ex mintiꞌ in japun tuꞌn,

ic tten ic tzaꞌn jun xjal nnoꞌcx tqueꞌyin twitz tuj jun respej.

24 Porque oc tbaj tqueꞌyin twitz in xiꞌtzun,

ex biꞌx nnicꞌ tnaꞌl tuꞌn tzaꞌn queꞌyin.

25 Atzun teju in cuꞌx tqueꞌyinxix tuj ley tzꞌaklxix,

aju ley at tzokpibl tuꞌn,

ex cucx in cuꞌx tqueꞌyin,

ex mintiꞌ nnicꞌ tnaꞌl tuꞌn aju in tbiꞌn,

nok oꞌcx in japun tuꞌn,

atzunte jlu at tzalajbil te tiꞌj ju in tbinchaꞌn.

26 Ka at jun cyxole tuj tnabl ka in niman Dios,

pero ka mintiꞌ in ajtz tjacꞌuꞌn tiꞌj ttziꞌ,

in cub t-sbun tib,

ex aju tocslabl nokx gan.

27 Aju ajbebl twitz Kman Dios sakxix ex mintiꞌ tpaltil,

atzun jlu:

tuꞌn konin cyiꞌj cꞌwaꞌl mintiꞌ cyman ex cyiꞌj meba xuꞌj tuj yajbil cye,

ex tuꞌn toc kcwentin kib tuꞌn miꞌn ktzꞌilix cyxol xjal.