AJU UꞌJ XI TZꞌIBAN CYE XJAL EBREY
Ma tzaj tmaꞌn Dios tyol ke nok tuꞌn Tcꞌwaꞌl
1
Nimcu maj o yolin Dios ojtxi cye kxeꞌchel ex tuj nimcu tumel tzaj tkꞌoꞌn tyol cye t-sanjel tuꞌn ttzaj cymaꞌn.
2 Te mancbilxitzun tuj tkꞌijlalil jaꞌlo ma tzaj tmaꞌn Dios tyol te Tcꞌwaꞌl tuꞌn ttzaj tmaꞌn ke,
ex ma tzꞌoc tkꞌoꞌn Dios Tcꞌwaꞌl tuꞌn toc te etzal te tcyakil.
Ax icx tcyakilju at,
tbincha Tcꞌwaꞌl Dios,
ax Dios kꞌmante tuꞌn tbant.
3 In tkoptzꞌaꞌn Cꞌwaꞌlbaj t-spicꞌumal Dios,
ax tilbilal Cꞌwaꞌlbaj ic tzaꞌn tilbilal Dios,
ex tzyuꞌn tcyakil tuꞌn Cꞌwaꞌlbaj tuꞌn tyol at tipumal.
Tej tel txꞌjet kil tuꞌn,
cubtzun keꞌ tuj bankꞌabaj ttxlaj Dios tuj cyaꞌj,
aju Dios maꞌxix toclen.
Mas at toclen Tcꞌwaꞌl Dios cywitz ke anjel
4 Cyjaꞌtzun ma tzꞌoc Tcꞌwaꞌl Dios mas at toclen cywitz ke anjel,
porque ma tzꞌoc jun tbi mas at toclen twitz cybi anjel.
5 Porque mya te jun anjel xi tmaꞌn Dios ju yol lu:
Aya Ncyꞌajal,
ma chin oque te tmana jaꞌlo.
Ex mya tiꞌj jun anjel o tma ju yol lu:
Akine chin oquel te tman,
atzun te cꞌoquel te ncꞌwaꞌle,
chi Dios.
6 Pero tej ttzaj tkꞌoꞌn Dios nej Tcꞌwaꞌl cyxol xjal,
o tma:
Cycyakil ke t-anjel Dios che cꞌulun twitz,
chi Dios.
7 Pero atzunju yol lu in tmaꞌn Dios cyiꞌj anjel:
In che oc tkꞌoꞌn ke t-anjel ic tzaꞌn cykꞌikꞌ,
ex ke ajbel te in che oc tkꞌoꞌn ic tzaꞌn tkan kꞌakꞌ,
chi tuj Tuꞌjil.
8 Atzun tiꞌj Cꞌwaꞌlbaj in tmaꞌn cyjaꞌ:
Aya Dios,
aju tcawbila cucx cyjel ten te jumajx tuj tcyakil tabkꞌiyil;
ex tuj tumelxix in cawina.
9 Ma tzalaja tiꞌj ju tzꞌaklxix ex ma tzꞌel ticꞌuna aju mya baꞌn.
Cyjaꞌtzun ma jaw scꞌoꞌna tuꞌn Dios,
aju Tdiosa,
ex mas ma tzalaja tuꞌn cywitz ke mastl tucꞌila.
10 Ax icx in tmaꞌn:
Aya Kman,
t-xe tnejel cub tkꞌukbaꞌna txꞌotxꞌ,
ex tuꞌnxa o bant cyaꞌj.
11 Oc che najel jlu,
atzun teya cucx ctela te jumajx.
Cycyakil jlu oc che bajel ic tzaꞌn jun xbalun;
12 ex cbel tbalkꞌiꞌna ic tzaꞌn jun xbalun,
ex che chꞌexpetel ic tzaꞌn jun xjal in baj tchꞌexpuꞌn t-xbalun.
Atzun teya,
cucx ttena te jumajx,
ex mintiꞌ bajsbil te tabkꞌiyila,
chi tuj Tuꞌjil.
13 Pero mi jun maj tma Dios te jun anjel cyjaꞌ:
Kecuya ntxlaje tuj nbankꞌabe acutzun in cub cyiꞌj aj kꞌoj tiꞌja wuꞌne,
chi Dios.
14 Cycyakil anjel xewbaj ke ex in che ajben te Dios,
in che tzaj samaꞌn tuꞌn cyonin cye keju in che clet.