AJU UꞌJ XI TTZꞌIBAN APOSTL PABLO TE FILEMÓN
Jun kꞌolbebl tuꞌn apostl Pablo te Filemón
1
Akine Pablo,
pres kine tuꞌn tlaj Jesucrist.
Ma tzul erman Timotey wucꞌile,
cyjaꞌtzun in xi ktzꞌibane ju uꞌj lu teya Filemón,
at-xix kcꞌuꞌje tiꞌja ex junx in akꞌnana kucꞌile.
2 Ax icx in xi ktzꞌibane te kerman Apia ex te Arquipo,
aju soldad junx kucꞌile,
ex cye cycyakil ocslal nnoꞌc cychmon cyib tuj tjaya.
3 Awt Kman Dios tucꞌix Kajaw Jesucrist che tzaj kꞌonte xtalbil cyeye ex tuꞌn tkeꞌxix cycꞌuꞌje.
Aju tcꞌujlalil Filemón ex ju tocslabl
4 Cucx in xi nkꞌoꞌne chjonte te Dios,
aju Dios in chin ajbene te,
in xi nkꞌoꞌne chjonte tiꞌja Filemón,
ex in tzaj nnaꞌne tuj nnaꞌj Diose,
5 porque in nbiꞌne at tcꞌujlalila tiꞌj Kajaw Jesús,
ex cyiꞌj cycyakil ocslal,
ex at tocslabla tiꞌj Kajaw Jesús.
6 Chin cubsale twitz Dios cyiꞌj keju ma che ocslan tuꞌnju ma txi tchicꞌbaꞌna tocslabla cye;
chin cubsale cyiꞌj tuꞌn telxix cynicꞌ tiꞌj t-xtalbil Dios ma tzaj tkꞌoꞌn ke nok tuꞌn Jesucrist.
7 Porque tuꞌnju tcꞌujlalila erman,
ma ko tzalaje nim ex ma keꞌxix kcꞌuꞌje,
porque ma kꞌukbanjtz cycꞌuꞌj ocslal tuꞌna.
In cubsan Pablo tiꞌj Onésimo, aju tmajen Filemón
8 Cyjaꞌtzun masque at woclene tuꞌn Crist tuꞌn t-xi nmaꞌne alcye tuꞌn tbinchanteya,
9 pero tuꞌnju at ncꞌujlalile tiꞌja,
mas baꞌn chin cubsale twitza,
porque akine Pablo tij xjal kine,
ex presin kine jaꞌlo tuꞌn tlaj Jesucrist.
10 Chin cubsale twitza tiꞌj ncꞌwaꞌle Onésimo,
aju ma tzꞌoc te ncꞌwaꞌle tuj ocslabl tuj presbil weye.
11 Ojtxi mintiꞌxix ajben Onésimo teya,
atzun jaꞌlo at tajben teya ax icx weye.
12 Cꞌajeltzun nsamaꞌne tucꞌila;
cꞌmomtzuna mer ic tzaꞌn ax kine oc chin tcꞌmaꞌya.
13 Ma wajbeye tuꞌn tten Onésimo junx wucꞌile,
tuꞌn tajben weye te t-xela tuj presbil weye,
porque pres kine tuꞌn tlaj tkanil colbil,
14 pero miꞌn waje tuꞌn nbinchanteye ka naꞌnxtok nyoline tucꞌila,
ex miꞌn waje tuꞌn ttzaj tkꞌoꞌna jun xtalbil weye lajwers,
nok oꞌcx waje tuꞌn ttzaj tkꞌoꞌna tuꞌn tcyakil tcꞌuꞌja.
15 Balo tuꞌn jlu el tpaꞌn tib Onésimo tiꞌja cab kꞌij,
tuꞌn tajtl tucꞌila tuꞌn tten te jumajx.
16 Oc tpontl tucꞌila,
mlay tentl ic tzaꞌn jun majen tcꞌayin tib,
nok oꞌcx tuꞌn tten ic tzaꞌn jun erman cꞌujlaꞌn tuꞌna.
Porque mas at toclen jaꞌlo twitz jun majen.
At-xix ncꞌuꞌje tiꞌj,
pero atzun teya mas at-xix tcꞌuꞌja tiꞌj.
Mya nok oꞌcx at tcꞌuꞌja tiꞌj Onésimo tuꞌnju tmajena,
pero icx tuꞌnju ocslal tiꞌj Kajaw.
17 Katzun tucꞌila kine tuj twitza,
cꞌmoma Onésimo ic tzaꞌn ax kine.
18 Ex ka at mya baꞌn ma tbincha teya,
ex ka at tcꞌas tucꞌila,
kꞌontza tuj ncwente.
19 Akine Pablo ma cub ntzꞌibane jlu tuꞌn nkꞌabe,
akine chin chjolte cꞌas;
masque icx teya nim tcꞌasa wucꞌile,
jacu bant tuꞌn t-xi nmaꞌne tuꞌn toca te nmajene,
pero mlay txi nmaꞌne.
20 Cyjaꞌtzun erman,
cuchiwt tuꞌn tbinchanteya jun xtalbil weye,
tuꞌnju ocslala tiꞌj Kajaw;
kꞌukbama ncꞌuꞌje tuꞌnju ocslal koꞌ tiꞌj Crist.
21 Cyjaꞌtzun ma txi ntzꞌibane jlu teya tuꞌnju kꞌukl ncꞌuꞌje tiꞌj ka cxel tnimana nyole,
ex baꞌn wuꞌne mas oc tbinchaꞌya twitzju ma txi nmaꞌne teya.
22 Ax icx at juntl tuꞌn t-xi nmaꞌne teya,
binchama tten nposadiye;
porque kꞌukl ncꞌuꞌje tiꞌj Dios oc chin pole juntl maj cyucꞌile nok tuꞌn cynaꞌj Diose.
Jun kꞌolbebl tuꞌn Pablo te bajsbil yol
23 In xi kꞌolbeꞌna tuꞌn Epafras,
junx taꞌ wucꞌile tuj pres tuꞌn tlaj Jesucrist.
24 Ax icx in xi kꞌolbeꞌna tuꞌn Marcos,
ex tuꞌn Aristarco,
ex tuꞌn Demas,
ex tuꞌn Lucas,
akeju junx in che akꞌnan wucꞌile.
25 Awt t-xtalbil Kajaw Jesucrist ten tuj cyanmiye.
Icxwitju.