AJU UꞌJ XI TTZꞌIBAN APOSTL PABLO TE TITO
Xi ttzꞌiban Pablo jun uꞌj te Tito
1
Akine Pablo,
tmajen Dios kine ex apostl kine te Jesucrist,
ma chin tzaj samaꞌne tuꞌn Dios tuꞌn tcyuwsanjtz cyocslabl keju scꞌoꞌmaj ke,
tuꞌn telxix cynicꞌ tiꞌj ju yol axix toc,
tuꞌntzun tbant cyniman te Dios,
2 ex tuꞌn tkeꞌ cycꞌuꞌj tiꞌj tuꞌn tten cychwinklal te jumajx.
Porque atxix ojtxi,
naꞌnxtok ttzaj xeꞌt ke tabkꞌiyil,
tzaj ttziyan Dios tuꞌn tten kchwinklal,
ex miban te Dios nicꞌan yol.
3 Atzun jaꞌlo tujxix tkꞌijlalil ma tzaj tchicꞌbaꞌn Dios tyol,
aju Dios Clol ke ex atzunju ma tzaj kꞌmante tuꞌn t-xi npacbaꞌne ju yol lu.
4 In xi ntzꞌibane jlu teya Tito,
axix toc ncꞌwaꞌle,
junx kocslabl.
Awt Kman Dios tucꞌix Kajaw Jesucrist aju Clol ke che tzaj kꞌonte xtalbil teya,
[ex tzajwit kꞌakꞌan cycꞌuꞌj tiꞌja] ex tuꞌn tkeꞌxix tcꞌuꞌja.
Aju takꞌun Tito tuj Cret
5 Cyjaꞌtzun xi nmaꞌne teya tuꞌn tcyaja tuj txꞌotxꞌ Cret,
tuꞌn tcyaj bant tiꞌj tuꞌna aju atx taj,
ex tuꞌn toc tkꞌoꞌna ansyan tuj junjun tnam,
ic tzaꞌn xi nmaꞌne teya.
6 Baꞌn tuꞌn toc te ansyan aju mintiꞌ tpaltil,
ex nok junx t-xuꞌjil at,
ex ka ocslal ke tcꞌwaꞌl ex ka mintiꞌ in che yolin xjal cyiꞌj tcꞌwaꞌl ka tzokpiꞌn ke tuꞌn cybinchante nok alcye cyajbil ex ka miban che bin.
7 Porque aju cwentil takꞌun Dios tuj tcwent taꞌ tcyakil takꞌun Dios,
cyjaꞌtzun il tiꞌj tuꞌn tten mintiꞌ tpaltil,
mya jawni twitz,
mya jurat in jaw cyakpaj,
mya cꞌal kꞌeꞌn,
mya kꞌojlel,
ex mintiꞌ in pon tcꞌuꞌj tiꞌj jun cambabl mya tuj tumel,
8 nok oꞌcx baꞌn kꞌon posad,
at tcꞌujlalil tiꞌj ju baꞌn,
at tnabl,
tzꞌaklxix,
baꞌnxix tten tchwinklal,
ex tcwent tib,
9 tzyuꞌnx tuꞌn aju yol axix toc ic tzaꞌn o xnakꞌtzanjtz,
icx te tuꞌn tkꞌonte cynabl mastl tuꞌn jun xnakꞌtzbil tzꞌaklxix ex tuꞌn tcub tiꞌj cynabl keju in che kꞌojin tiꞌj.
10 Porque at nimcu xjal miban che bin,
in che yolin nokx gan,
ex sbul ke,
ic tzaꞌn ke xjal judiy mas in che yolin.
11 Il tiꞌj tuꞌn tmaket cytziꞌ jlu,
porque in xitj cynabl enter jun ja xjal cyuꞌn,
in cykꞌoꞌn jun xnakꞌtzbil mya baꞌn tuꞌn cycambante pwak mya tuj tumel.
12 At jun pacbal cyxol aj Cret ax cyxjalil o tma:
Ke xjal aj Cret cucx in che nicꞌan yol,
ic tzaꞌn jil ke,
mya baꞌn ke,
cye che waꞌn ex cyꞌaj ke,
chi xjal.
13 Ax toc aju yol tma xjal lu;
cyjaꞌtzun cyuwx cawinxa ke,
tuꞌntzun cyten tuj cyocslabl mintiꞌ cypaltil,
14 ex tuꞌn miꞌn t-xi cybiꞌn cylaꞌjbil xjal judiy,
ex tuꞌn miꞌn t-xi cyniman cyxnakꞌtzbil xjal akeju nneꞌl cypaꞌn cyib tiꞌj ju yol axix toc.
15 Cycyakil keju sak tuj cyanmi,
sak taꞌ tcyakil cyuꞌn;
atzun cye keju najni cyanmi ex mya ocslal ke,
tcyakil nnoꞌc cykꞌoꞌn te tzꞌil,
ex ma tzꞌilix tuj cynabl ex tuj cyanmi.
16 In cymaꞌn ka ojtzkiꞌn Dios cyuꞌn,
pero tuꞌn cybinchben nneꞌl knicꞌ cyiꞌj ka mya ax toc cyyol.
Puro icꞌbil ke ex miban che niman ex mintiꞌ cyajben tuꞌn cybinchante jun baꞌn.